ሥርዓተ ጥምቀት

     ጥምቀት ሌሎችን ምስጢራተ ቤተ ክርስቲያን ለመሳተፍ፣ የቤተ ክርስቲያን አባል ለመሆን የመጀመሪያው መግቢያ በር ነው። ጌታችን መድኃኒታችን ኢየሱስ ክርስቶስ በተወለደ በሠላሳ ዓመቱ በዮርዳኖስ ወንዝ በዮሐንስ እጅ ተጠምቆ ጥምቀትን መሠረተ። ጌታችን ኢየሱስ ክርስቶስ ተጠምቆ ከውኀው ከወጣ በኋላ አብ “ዝንቱ ወልድየ” ብሎ የባሕርይ ልጅነቱን መስክሯል። መንፈስ ቅዱስ በርግብ አምሳል ወርዶ በራሱ ላይ ተቀምጧል።   ማቴ ፫÷፲፮-፲፯  በትምህርቱ መጨረሻ “በአብ በወልድ በመንፈስ ቅዱስ ስም አጥምቁ!” በማለት ጥምቀትን አዟል። ማቴ ፳፰ ÷ ፲፱

ከመጠመቅ በፊት የሚያስፈልጉ ነገሮች
፩. ትምህርት፣
፪. እምነት ያስፈልጋል። ተጠማቂው በዕድሜ ከፍ ያለ ከሆነ የክርስትናን ትምህርት የተማረ፣ በኢየሱስ ክርስቶስ ያመነ መሆን አለበት። ጌታችን “ያመነ የተጠመቀ ይድናል” ብሎአልና። ማር ፲፮ ÷ ፲፮.
እምነት መሠረት ነው ሌሎች ተግባራት ግን ሕንጻዎች ናቸው። እምነቱን ለመግለጽ የማይችል ሕጻን ከሆነ ግን በወላጆችና በክርስትና አባቱ ወይም እናቷ ኃላፊነት ይጠመቃል። ካደገ በኋላ በኃላፊነታቸው ይመክሩታል ያስተምሩታል።

ለጥምቀት የተወሰነ ዕድሜ፡-ለጥምቀት የተወሰነ ዕድሜ ለወንዶች ፵ ቀን እና ለሴቶች ፹ ቀን ነው። ኩፋሌ ፬÷፱-፲፫ ሕፃኑ ሞት የሚያሰጋው ሆኖ ከተገኘ ግን ከአርባና ከሰማንያ ቀንም በፊት በሞግዚት ታዝሎ ሄዶ ይጠመቃል። ለመጠመቅ ቀኑ የደረሰውን ሰው ለነገ ብሎ ቀጠሮ መስጠትና በልዩ ልዩ ምክንያት ማሳደር አይገባም።

የጥምቀት ሥርዓት፡- ፩. ጥምቀት የሚደረገው በሥላሴ ስም ነው። የሥላሴን ስም ሳይጠሩ የተጠመቁት ጥምቀት ውኃ ተነክሮ እንደመውጣት የሚቆጠር እንጂ የሚሰጠው ዋጋ ወይም ጥቅም የለውም። ማቴ ፳፰ ÷ ፲፱
፪. ጥምቀት የሚፈጸመው በፈሳሽ ወይም በጥልቅ ውኃ ነው። የሚከናወነውም የሥላሴን ስም እየጠሩ “አጠምቀከ በስመ አብ፤ አጠምቀከ በስመ ወልድ፤ አጠምቀከ በስመ መንፈስ ቅዱስ” እያሉ ሦስት ጊዜ ብቅ፣ ጥልቅ እያደረጉ በማጥመቅ ነው። የማጥመቁ ሂደት ጥልቅ ውኃ በማይገኝበት ጊዜ ግን ውኃ በመቅዳት ወይም በእጅ በማፈስ ያጠምቁታል።
፫. አጥማቂው ኤጲስ ቆጶስ ወይም ቄስ ነው፤ ስልጣነ ክህነት የሌለው ሊያጠምቅ አይችልም።
በማጥመቅ ጊዜ የሚፈጸመው ሥርዓት የሚከተለው ነው።
ንኡሰ ክርስቲያን ማጥመቂያው የትንሣኤ ዕለት የሆነ እንደሆነ በሰሙነ ሕማማት፣ በሱባኤው ውስጥ ሰውነታቸውን ይታጠባሉ፤ ዐርብ ይጾሙና እሑድ ይጠመቃሉ።
ኤጲስ ቆጶሱ ወይም ቄሱ ሲያጠምቁ ፊታቸውን ወደ ምሥራቅ አዙረው፣ እጃቸውን ዘርግተው ይጸልዩለታል።
ቀጥሎ ልጅነት በሚያሰጠው መንፈስ ቅዱስን በሚያሳድረው በሜሮኑ ይጸለይበታል።
ከተጸለየበት በኋላ ለሌላ ቄስ  ይሰጥና በተጠማቂዎች ቀኝ ያቆሙታል።
ወደ መጠመቂያው ከመግባታቸው አስቀድሞ በአብ፣ በወልድ፣ በመንፈስ ቅዱስ ስም እንዳመኑ ይናገራሉ። ማለትም “በአብ፣ በወልድ በመንፈስ ቅዱስ ታምናለህን?” እያለ እያንዳንዳቸውን ይጠይቃቸዋል። “አዎን አምናለሁ” እያሉ እያንዳንዳቸው ይመልሳሉ።
ከዚህ በኋላ ቅብዓ ቅዱስ ይቀቧቸዋል፤ ያጠምቋቸዋል፣ ልጅነትን ያሳድሩባቸዋል።
መናገር የሚችሉ ከሆነ ራሳቸው እምነታቸውን በመመስከር ጸሎተ ሃይማኖትን ያነባሉ። መናገር የማይቻላቸው ከሆኑ የክርስትና አባትና እናት ስለ እነሱ ሃይማኖታቸውን ይመሰክራሉ፤ ጸሎተ ሃይማኖት ያነባሉ።

የተጠማቂዎች  ቅደም ተከተል ተራ፡-በመጀመሪያ የ ፵ና የ፹ ቀን ምፃናት ይጠመቃሉ፤ በኋላ ንኡሰ ክርስቲያን ወንዶች ይጠመቃሉ፤ በመጨረሻ  ንኡሰ ክርስቲያን  ሴቶች ይጠመቃሉ። 
ተጠማቂዎች ከተጠመቁ በኋላ ካሕኑ ሜሮን ይቀቧቸዋል። ከዚያ በኋላ ቅዱስ ሥጋውን እና ደሙን ያቀብሏቸዋል። የክርስትና አባት እና እናትም አብረው ጾመው ቅዱስ ሥጋው እና ደሙ ይቀበላሉ።

በዕለቱ ክርስትና የተነሱ ከሌሎች ቆራቢዎች በፊት ሥጋ ወደሙን ይቀበላሉ። የምትጠመቀውን ሴት ንኡሰ ክርስቲያን ቅብዓ ቅዱሱንና ሜሮኑን ኤጲስ ቆጶሱ ከአንገቷ በላይ ከቀባ በኋላ ሌላውን ሰውነቷን የምትቀባው ዲያቆናዊት ሴት ናት።

በጥምቀት የሚገኝ ክብር፡- ከእግዚአብሔር መንፈሳዊ ልደት መወለድ ልጅነት ማግኘት፣ ከኃጢአት መንጻት ነው።
ወነአምን በአሐቲ ጥምቀት ለሥርየተ ኃጢአት (ጸሎተ ሃይማኖት) የእግዚአብሔር ፀጋ ለሰው ልጅ የሚሰጠው በጥምቀት ከሥላሴ ሲወለድ መሆኑ በቅዱሳት መጻሕፍት ተነግሯል። ዋቢ መጽሐፍ:- ሥርዓተ ቤተ-ክርስቲያን በሊቀ ካህናት ክንፈ ገብርኤል አልታዬ

ተስፋ

ሕይወታችን ያለ ተስፋ ባዶ ነው፤ ያለ ተስፋ መኖር አንችልም፤ ተስፋ ከሌለን ማንኛውንም ዓይነት የኑሮ ገጠመኝና ችግር ማሳለፍ አይቻለንም፡፡ የሰው ልጆች ዋነኛው ብርታት ተስፋ ማግኘትና በተስፋ መኖር ነው፡፡ የመጀመሪያው ሰው አዳም የአምላካችን የእግዚአብሔርን ሕግ ተላልፎ አትብላ የተባለውን ዕፀ በለስ ከበላ በኋላ የሞት ፍርድ ተፈርዶበት በምድር ላይ ሲኖር በሀዘንና በጭንቅ ነበር፡፡ ሆኖም ግን ፈጣሪ የልቡን ጭንቀትና ሀዘን ተመልክቶ ሊምረው ስለ ወደደ ከልጅ ልጁ ተወልደ እንደ ሚያድነው ቃል ገባለት፡፡ ይህም ለአዳም ትልቅ ተስፋ ስለ ነበረ ትንቢቱ ይፈጸም ዘንድ በተስፋ ጠብቋል፡፡ ሰዎች በምድር ላይ ልንኖር የምንችለው ተስፋ የምናደርግበት ነገር ሲኖረን ነው፡፡ አዳም ማጥፋቱን አውቆና አምኖ ምሕረትን ስለ ለመነ ወደ ቀደ መክብሩ ተመልሶ መንግሥተ ሰማያትን መውረስ እንደቻለ እኛም ተስፋ ማድረግ ያለብን ተስፋ (ርስተ መንግሥተ ሰማያትን) ነው፡፡ ይህም የምድር ሕይወታችንን በመልካሙና በእውነተኛው መንገድ እንድንኖር ይረዳናል፡፡ ለዚህም ምሳሌዎች የሆኑት የጻድቃን የአባቶቻችንና የእናቶቻችን ታሪኮች ምስክሮች ናቸው፡፡ ጻድቁ ኢዮብ ሀብቱንና ንብረቱን እንዲሁም ልጆቹን በሙሉ አጥቶ በዚያ ሕመምና በሽታ በተፈራረቀበት ጊዜ እንኳን በእግዚአብሔር ተስፋ ሳይቆርጥ  ‹‹ብርሃንን ተስፋ አደረግሁ›› በማለት ተናገረ እንጂ አምላክን እንዳላማረረ ቅዱሱ መጽሐፍ ይነግረናል፡፡ (ኢዮ. ፴፥፳፮) ይህ በእውነት ለእኛ ትልቅ ትምህርት የሚሆነን ነው፡፡ በእርግጥም እንደ ኢዮብ ያለ መከራ እና ችግር ሳይደረስብን በራሳችን ችግር ተውጠን ባለንበት በዚህ ጊዜ ተስፋ ማድረግ የምንችለው አምላካችንን ሊሆን ይገባል እንጂ በሆነው ባልሆነው ነገር እግዚአብሔርን ማማረር እራስን ለባሰ ችግር ማጋለጥ ነው፡፡

እግዚአብሔር አምላክ በሕይወቱ ውስጥ የሌለ ሰው ተስፋ ሊኖረው እንደማይችል በቅዱሳን ታሪክ ብቻም ሳይሆን በራሳችን ተሞክሮም የተመለከትነውና ያወቅነው ነገር ነው፡፡ ብዙዎቻችን ሳናውቅም ሆነ አውቀን ከገባንበት ችግር ለመውጣት አቅቶን ስንባዝን የከረምንና ግራ በመጋባት መፍትሔ መስሎን ወዳልሆነ ነገር የገባን ልንኖር እንችላለን፡፡ ለምሳሌ: ሰዎች ችግራቸውን ለመፍታትና ከገቡበት ዕዳ ለመላቀቅ ሲሉ ወደ ባዕድ አምልኮት ውስጥ ይገባሉ፡፡ ይህ ግን የባሰ ችግር እንደ ሚያመጣ በወቅቱ ላያውቁና ላያገናዝቡ ይችላሉ፡፡ ምክንያቱም ሰው ለምድራዊ ሕይወት ሲል ፈጣሪውን ክዶ ለጠላት መገዛት ከጀመረ ለጊዜው ችግሩ የተፈታለትና የሥጋ ድሎት ያገኘ ቢመስለውም ወደደም ጠላ የእርጅናው ዘመን በደረሰ ጊዜና ወደ ሞት ሲቃረብ በፍርሃት መኖር ይጀምራል። ከዚህም በባሰ መልኩ ሲያመልከው የነበረው ዲያብሎስ ሞቱ በቀረ በጊዜ ተስፋ አሳጥቶ ነፍሱን ወደ ገሃነም ሊያወርዳት ይፋጠናል፤ በዚህ ጊዜ የመዳን ተስፋው ተሟጦ ንስሓ እንዳይገባ ዲያብሎስ የማያደርገው ጥረት የለም፡፡ ሰው ሲተማመንበት የነበረው ሀብቱም ሆነ ውበቱ ወይም ሥልጣኑ ከገሃነም ሊያድነው አይችልም። ይህ ሁሉ አላፊ ጠፊ ነው፤ የሥጋ ነገር ሁሉ ጠፊ ነውና፤ ‹‹ከንቱ፥ ከንቱ፥ የከንቱ ከንቱ ሁኩ ከንቱ››   እንዲል። (መክ. ፩፥፪) ይህንን ግን በጊዜው ተረድቶ ለነፍሱ መኖር የሚችል ሰው በአሁኑ ጊዜ ጥቂት ነው፤ አብዛኛው ሰው በምድራዊ ችግሮቹ ላይ ትኩረት አድርጎ የሚኖርነው፡፡ ስለሆነም ከአቅማችን በላይ የሆነ ችግር ሲያጋጥመን እና መፍትሔ ስናጣ እግዚአብሔርን ተስፋ ማድረግ ያዳግተናል፡፡ ይቅር እንደሚለንና ምሕረትን መለመን እንደምንችልም ማመን ስለሚከብደን ተስፋ እንቆርጣለን፡፡

ሕይወት በውጣውረድ የተሞላች እንደመሆኗ የሚያሳዝን ነገር በኑሮአችን ሲያጋጥመን በመከፋት ተስፋ መቁረጥ የለብንም፤ ዛሬ ቢጨልምብን ብርሃን ይሆናልና፡፡ ጻድቁ ኢዮብ ‹‹…በጎ ነገርን በተጠባበቅኋት ጊዜ እነሆ ክፉ ቀኖች መጡብኝ፤ ብርሃንን ተስፋ አደረግሁ›› በማለት እንደተናገረው ምንም እንኳን መከራና ችግራችን የተደራረበበት ወቅት ላይ ብንሆንም እነዚህ ክፉ ቀናት አልፈው በጎ ጊዜ እንደሚመጣ ተስፋ ማድረግ ይገባል፡፡አባቶቻችን “ክርስቲያን ተስፋ አይቆርጥም” ይላሉ። በክርስቶስ ክርስቲያን የተባልን በሙሉ የትኛውም ዓይነት ችግር ቢገጥመንም ሆነ መከራችን በዝቶ በሥቃይ ላይ ብንሆን አምላካችን እንደማይተወን ማመን አለብን፡፡ እግዚአብሔርን ተስፋ ያደረገ ሰው ወድቆ አይወድቅም፤ ከወደቀበትም ይነሣል፤ ፈጣሪ ሰውን አይረሳምና። እንደማያይና እንደማይሰማ ሆኖ ዝም የሚለን ለሁሉም ነገር ጊዜ ስላለው ነው፡፡ በትዕግሥት እርሱን ተስፋ አድርጎ ለሚጠብቀው ሰው ችግሩን ይፈታለታል፤ ከመከራና ከሥቃይም ያወጣዋል፡፡ ‹‹እንደ ማይሰጥ ይዘገያል››  እንደተበለውም ለሁላችንም የሚያስፈልገንን ከእኛ የበለጠ ለራሳችን የሚያውቅ አምላክ ስለሆነ በጊዜው የወደደውንና የፈቀደውን ያደርግልናል፡፡ (ቅዳሴ ሠለስቱ ምዕት)

አምላካችን እግዚአብሔር “ተስፋችን ነው፤ ፈጣሪያችን መመኪያችን ነው” የምንለውም ለዚህ ነው፡፡ እርሱን ያመነ ሰው ማንኛውንም የመከራ ጊዜ ማለፍ እንደሚቻለው ቅዱሳት መጻሕፍት ያስተምሩናል፡፡ በተለይም በዚህ ጊዜ ቤተክርስቲያናችን በስደትና መከራ ላይ በሆነችበት ወቅት መለስ ብለን ታሪካችንን ልንመረምር እንደሚገባ እንወቅ! በቤተክርስቲያን ታሪክ ላይ እንደምናነበው ከሆነ፣ ቅድስት የሆነችው የእግዚአብሔር ማደሪያና የክርስቲያኖች ቤት (ቤተክርስቲያን) በየዘመናቱ በተነሡ አሕዛብ ነገሥታት ስትፈርስና ስትቃጠል  ኖራለች፡፡ በካህናትና ምእመናን ላይም ብዙ እንግልት ደርሶባቸዋል፤ በግፍ የተገደሉ፣ ቤት ንብረታቸው በቃጠሎ አልያም በዝርፊያ ያጡ ቁጥራቸው በርካቶች ናቸው፡፡ ይህ በዚህ ጊዜ የተመለከትነውና የታዘብ ነው እንዲሁም የመሰከርነው እውነት ነው፡፡ ሰዎች ያለ ጥፋታቸው ወንጀለኛ ተብለው ሲታደኑ፣ ሲታሠሩና በአሰቃቂ ሁኔታ ሲገደሉ በዓይናችን አይተናል፤ “የፍርድ ያለህ” እስክንል ድረስም ግፍ ተፈጽሞብናል፡፡ “ይህ ሁሉ ለምንድን ነው በእኛ ያለ የደረሰብን?’’ ብለን መጠየቅ ግን ተገቢ ነው፡፡ ምክንያቱም ፈተና ከብዙ አቅጣጫ የሚመጣነውና። አምላካችን ለጽድቅ ሲፈትነን ጠላት ደግሞ ቀንቶ ሊያጠፋን በመሆኑ ይህንን ተገንዝበን በሕጉ በመመራትና ለሥርዓቱ ተገዢ ሆነን እንኑር! ካልሆነ ግን የእግዚአብሔር ቁጣ በማይመለሱ ኃጢአተኞች የሚበረታ ስለሆነ ለተቃጣ መቅሠፍትና ቅጣት እንዳረጋለን፡፡ ተስፋ ከሚያሳጡን ዋነኛ ነገሮች ኃጢአት ቀዳሚ ተጠቃሽነው፤ በጎውን ትተን ክፋት ስናስብና ስንበድል ከአምላካችን ስለምንርቅ ለመዳንም ተስፋ አይኖረንም። ኃጢአት በሠራን ቁጥር ደግሞ እግዚአብሔርን እንደ በደልን ስለምናውቅ ይቅርታን እና ምሕረትን ማግኘት እንደማንችል ማሰብ እንጀምርና ከአምላካችን እየራቀን እንዲሁም የመዳን ተስፋችን እየመነመነ ይሄዳል፡፡ በኑሯችንም በጭንቅ የተዋጠና ሰላም እና ዕረፍትን ያጣን እንሆናለን፡፡ ስለዚህም መልካሙን ሕይወት ለመኖርና በጎ ቀኖችን ለማየት ተስፋችን እግዚአብሔርን በመፍራትና ለእርሱ በመገዛት መኖር ያስፈልጋል፡፡ በእርግጥ የክርስትና ሕይወት መንገዷ ጠባብ መተላለፊያዋም ውስን እንደሆነ ይታወቃል። በመሆኑም “ሥርዓቱን መጠበቅ ይከብደናል” በሚል ሰበብ በተሳሳተ መንገድ መጓዝና በተጣመመ ጎዳና መራመድ መጨረሻው ገደል መግባት ነው፡፡ ሐዋርያው ቅዱስ ሉቃስ ‹‹ወደ ጠባቡ በር ትገቡ ዘንድ በርቱ››  በማለት እንደተናገረው ይህን እውነት ለተረዳ ሰው የመኖር ትርጉሙን ማወቅ ይቻለዋል፤ (ሉቃ. ፲፫፥፳፬)  ‹‹እኔ መንገድና እውነት፣ ሕይወትም ነኝ››   በማለት አምላካችን ተናግሯልና፤ (ዮሐ. ፲፬፥፮) ትክክለኛው መንገድ ጌታችን መድኃኒታችን ኢየሱስ ክርስቶስ የመሠረተው፣ መከራ መስቀሉን የምንቀበልበት፣ ለእርሱ ፍቅር ስንል ሥጋችንን የምናራቁትበት ከፍ ሲልም ሰማዕት የምንሆንበት የክርስትና ሕይወት ነውና፡፡
አምላካች ንእግዚአብሔር ቸርነቱንና ምሕረቱን ያብዛልን፤ አሜን! መልካም ሰንበት! ምንጭ፦ በኢትዮጵያ ኦርቶዶክስ ተዋሕዶ ቤተክርስቲያን ሰንበት ትምህርት ቤቶች ማደረጃ መምሪያ ማኅበረ ቅዱሳን

ከኔሮን ቄሣር እስከ ዳክዮስ መጀመሪያ

ከዘመነ ሐዋርያት አንስቶ በተለያዩ ሀገራት ላይ የሠለጠኑ አረማውያን በቤተክር ስቲያን ላይ ያደረሱት ስደት በዘመኑ የነበረውን ክርስትና ምን ያህል ጠንካራ እንደነበር ያሳያል። ቅድስት ቤተክርስቲያን የጸናች ናትና ሥጋቸውን እንጂ ነፍሳቸውን ማንም ሊገድል እንደማይችል እያስተማረች የማያልፈውን ዓለም እያሰቡ ከክርስቶስ ጋር መኖርን እንዲናፍቁ ታደርጋቸው ነበር። በጊዜው የነበራቸውን ቆራጥነት፣ ለሃይማኖታቸው ሲሉ የሚያሳዩትን ጭካኔ በአላውያን ወታደሮችና ነገሥታት ዓይን የሚያስደንቅ ነበር።

ክርስቲያኖቹ ከቤተ አይሁድ ይደርስባቸው የነበረው ግፍና መከራ ይልቅ ከቤተ አሕዛብ ይደርስባቸው ከነበረው በአንጻሩ የባሰ ነበር። በተለይ በሮማውያን ዘንድ የነበረው አምልኮተ ጣዖት በሀገራቸው ውስጥ ረሃብ፣ ችግርና ቸነፈር ሲነሣ በክርስቲያኖች ምክንያት አማልክቶቻቸው ስላዘኑ እንደደረሰባቸው ያስወሩና በክርስቲያኖችም ላይ ስም የማጥፋትን ዘመቻ ያሴሩ ነበር።የሕዝቡን ልብ በክርስቲያኖች ላይ ለማነሳሳት በኔሮን ቄሣር ዘመነ መንግስት በንጉሡ ኔሮን ሮም በእሳት እንድትጋይ ሆናለች። ቀድሞውን ይደርስባቸው የነበረው መከራና እንግልት በአዋጅ ጸድቆ ክርስቲያኖች በያሉበት ተሳደው እንዲገደሉ የሚል ትዕዛዝ ወጣ። ብርሃናተ ዓለም ቅዱስ ጴጥሮስ ወጳውሎስ ሰማዕትነትን የተቀበሉት በዚሁ በኔሮን ዘመነ መንግስት ነበር። የሰማዕታቱን ዜና የሰሙ ከሮም ውጭ ይኖሩ የነበሩ ማኅበረ ምእመናን ይኽንን ክብር ለመቀበል በገፍ ወደ ሮም ይተሙ ነበር ።

ኔሮን ቄሣር በ፷፰ ዓ.ም. ከሞተ ወዲህ ላሉት ሁለት ዓመታት ሁለት ቄሣሮች ነግሠዋል። በቤተክርስቲያን ታሪክ ከ፸ – ፻፷፪ ያለው ዘመን የመሸጋገሪያ ጊዜ ተብሎ ይጠራል። በእኒኽ ዓመታት ውስጥ ሐዋርያውያን አበው (በርናባስ፣ ቀለሜንጦስ ዘሮም፣ ፖሊካርፐስ፣ ሔርማ፣ ዲዮናስዮስ፣ ፓፒየስና አግናጥዮስ ምጥው ለአንበሳ) በእግረ ሐዋርያት ተተክተው ሲያስተምሩ የነበረበት ወቅት ነው። ከኔሮን ቄሣር በኋላ የተነሣው ወንድሙ ድምጥያኖስ ምስሉን በኤፌሶን አሰርቶ እንዲሰገድለት ትዕዛዝ አወጣ። በወቅቱ ሐዋርያው ቅዱስ ዮሐንስ (ፍቁረ እግዚእ) ሀገረ ስብከቱ ነበረችና ሐዋርያዊ ተልዕኮውን እየፈጸመ ነበር። ይኽንን የድምጥያኖስን ተግባር አውግዞ፣ ከነበሩት የኤፌሶን ክርስቲያኖች ጋር ተቃወመ። በኋላም በድምጥያኖስ ትዕዛዝ ወደሮም ፍርድ ቤት ሄዶ ወደ ፍጥሞ ደሴት እንዲጋዝ ተደርጓል።

ከድምጥያኖስ በክርስቲያኖች ላይ ይደርስ ከነበረው ጭካኔ በኋላ ከ፺፰ – ፻፲፯ ዓ.ም. የነገሠው ጨካኙ ቄሣር ትራጃን ነበር። በኃይል ብቻ ሳይሆን በዘዴና በማስፈራራት ጭምር ክርስቲያኖች ወደቤተ ጣኦት ለመመለስ ይሞክር ነበር።በአገዛዝ ቀንበራቸው በታሪክ ከነበሩ ነገሥታት ክርስቲያኖች ላይ ያደረሱትን ግፍ እጅጉን የከፋ ስለነበር በተለየ መልኩ ይጠቀሳሉ። ከትራጃን በኋላ ሀድርያን የተባለ ንጉሥ ፻፲፯ – ፻፴፰ የነገሠ ሲሆን ከበፊቱ ይልቅ መጪዎቹ ፵ ዓመታት ለክርስቲያኖች በአንጻራዊነት የእፎይታ ጊዜ ነበር ማለት ይቻላል። ሀድርያን ክርስቲያኖች በእምነታቸው ምክንያት እንዳይገደሉ ትዕዛዝ አውጥቶ ነበር። ከእርሱ በኋላ የተነሣው አንቶኒዮስ ፒየስ ፻፴፰ – ፻፷፩ አንዳንድ ሕጎችን ከማሻሻል ውጪ ቀድሞ የነበረውን የአገዛዝ ስልት ይከተል ነበር። ሕዝቡ ክርስቲያኖች ላይ መከራ ሲያደርስ ግን አይከላከልላቸው። ከሐዋርያን አበው መካከል ቅዱስ ፖሊካርፐስ በ፻፶፭ ሰማዕትነትን የተቀበለው በአንቶንዮስ የንግሥና ዘመን ነበር።ከ፻፷፩-፻፷፫ የነገሠው ፈላስፋው ንጉሥ ማርቆስ አብሪሊዮስ “ክርስቲያኖች ሞገደኞች፣ ወፈፌዎች ናቸው” ይል ነበር፡፡ከ፻፹-፻፺፪ የነገሠው ቄሣር ከሞዶስ ቀስ በቀስ በዘዴ እያደረገ ቤተ ክርስቲያንን ለማጥፋት ዕቅድ ነበረው፡፡ ሌሎችም እንደእነ እስክንድሮ – ሳዊሮስ (፪፻፳፪-፪፻፴፩)፣ እንደእነ ፊልጶስ ዓረባዊ (፪፻፵፬-፪፻፵፱) ያሉ ንቀውና ተጸይፈው ክርስቲያኖችን ከምንም አይቆጥሯቸውም ነበር፡፡ በቤተ ክርስቲያን ላይ የመጨረሻውን ድል ለማግኘት ብዙ ቄሣሮች ባላቸው ኃይልና ዘዴ በሙሉ ተጠቅመዋል፡፡ የመጨረሻውና የማያዳግመው ዘዴ ግን በዳክዮስ ዘመነ መንግስት (፪፻፵፬-፪፻፶፩ ዓ.ም.)የወጣው ዐዋጅ ነው፡፡

⛪️ ዘበእንቲአሃ ለቤተክርስቲያን ⛪️

የክርስቶስን መከራና ሕመም ኬርኤላይሶን ብለን ያሰብንበት ዕለተ ስቀለት ካለፈ አንድ ሳምንት ሞላው። በስግደትና በሐዘን ያሰብነው ሕማሙ መዳረሻው ለእኛ ካጠላብን የሐዘን ቀንበር ነፃ መሆን ነውና የከፈለልንን ፍፁም ፍቅር ለማሰብ ቅድስት ቤተክርስቲያን የሰሙነ ትንሳዔውን የመጀመሪያ አርብ ቅድስት ቤተክርስቲያን ብላ ትሰይመዋለች።

ዕለተ አርብ ቤተክርስቲያን ተብሎ የመሰየሙ ምስጢር መድኅነ ዓለም ኢየሱስ ክርስቶስ በዕለተ አርብ የተቀበለውን መከራ ለማን ብሎ ነው የተቀበለው ለሚለው ጥያቄ መልስ የሚሰጥ ነው። ምክንያቱም የኢየሱስ ክርስቶስ ደም መፍሰስ የዘመናዊው ዓለም ምዕራባዊ ክርስትና እንደሚያስበው እያንዳንዱን በነጠላ በግል ለማዳን ሳይሆን እያንዳንዱን በቃሉና በደሙ በመሰረታት ሕብረት በኩል የራሱ አካል ለማድረግ ነውና።

የመጽሐፈ ሰዓታቱ ሊቅ ኢትዮጵያዊው ቄርሎስ አባ ጊዮርጊስ ዘጋስጫ በመሐረነ አብ ጸሎቱ መግቢያ ሃሌ ሉያ ብሎ ይጀምርና ዘበእንቲአሃ ለቤተክርስቲያን ተጸፋእከ በውስተ ዓውድ ከመትቀድሳ በደምከ ክቡር ዘበእንቲአሃ ዝግሃታተ መዋቅሕት ጾረ ወተአገሰ ምራቀ ርኩሰ እንዘ አልቦ ዘአበሰ አምላክ ዲበ ዕፀ መስቀል ተሰቅለ /በክቡር ደምህ ትቀድሳት ዘንድ ስለቤተክርስቲያን በአደባባይ በጥፊ ተመታክ፤ ስለ እርሷ ሲል ታስሮ ተጎተተ፣ እርኩስ ምራቅን ታገሰ ያለበደል አምላክ በመስቀል ላይ ተሰቀለ ሲል የክርስቶስ ዋጋ መክፈል ለቤተክርስቲያን መሆኑን ይናገራል።

ለመሆኑ ይህች ቤተክርስቲያን ማናት? ብዙዎቻችን ስለቤተክርስቲያን ስናስብ አእምሯችን ላይ የሚመጣው ህንፃው ወይም ተቋም ነው። በእርግጥ ህንፃ ቤተክርስቲያን ከቤተክርስቲያን ሦስቱ ትርጉሞች አንዱ ቢሆንምና ለአስተዳደር እንዲመች ሲባል ቤተክርስቲያን በተቋማዊ መልክ ብትገለጽም ቤተክርስቲያንን እንደ አንድ ድርጅት መረዳት ከሌሎች የእምነት ድርጅቶችና ፈራሽ ተቋማት ጋር የምትነፃፀር አድርጎ መረዳትን ፈጥሮብናል።

ቤተክርስቲያን የሚለው ቃል መነሻ አቅሌሲያ /ἐκκλησία/ ሲሆን ትርጉሙም ጉባዔ፣ አንድነት፣ ሕብረት ማለት ሲሆን የጉባዔው ባለቤት ራሱ እግዚአብሔር ስለሆነ ቤተክርስቲያን ጉባኤ እግዚአብሔር ተብላ ትጠራለች። (ማቴ 16:18)

ቤተክርስቲያን የተመሰረተችው በኢየሱስ ክርስቶስ የእግዚአብሔር ልጅነትን በሚገልፅ መሠረተ እምነት ላይ ነው። ለዚህም ነው ክርስቶስ ጴጥሮስ የሕያው እግዚአብሔር ልጅ ነህ ብሎ ሲመሰክር አንተ አለት (በግሪኩ Πέτρος – ጴጥሮስ) ትባላለህ ካለው በኋላ ምስክርነቱን በሴት አንቀጽ በዚህችም አለት (በግሪኩ πέτρα – ጴጥራ ) ላይ ቤተክርስቲያኔን እመሰርታለሁ የሲኦል ደጆችም አያናውጧትም በማለት የተመሠረተችው በሥጋና ደም ሳይሆን ከእግዚአብሔር በተገኘ ቃል መሠረት መሆኑን ይነግረናል (ማቴ 16: 15-18)።

ቤተክርስቲያን በእግዚአብሔር ቃል ተመስርታለች ስንል ምን ማለታችን ነው የሚል ካለ ሐዋርያው ቅዱስ ጳውሎስ እንዲህ ይለናል “በሐዋርያትና በነቢያት መሠረት ላይ ታንጻችኋል፥ የማዕዘኑም ራስ ድንጋይ ክርስቶስ ኢየሱስ ነው፤” ኤፌሶን 2፥20 በመሆኑም ኢየሱስ ክርስቶስ የእግዚአብሔር ልጅ መሆኑን የሚናገሩ የነቢያትና የሐዋርያት የመጻሕፍትም ሆነ የትውፊት ትምህርቶች የቤተክርስቲያን መሰረት መሆናቸውን ይናገርና የማዕዘኑ ራስ እርሱ ጌታችን መሆኑን ይናገራል።

መምህረ ዓለም ጳውሎስ ከሌሎች ሐዋርያት አብልጦ ስለቤተክርስቲያን አምልቶ በመናገር የሚታወቅ ሐዋርያ ነው ይህ ሐዋርያ ቤተክርስቲያን በክርስቶስ በምን ያህል መጠን እንደተወደደች ለባሎች በሚሰጠው ምክር ላይ ያነሳዋል።


“ባሎች ሆይ፥ ክርስቶስ ደግሞ ቤተ ክርስቲያንን እንደ ወደዳት ሚስቶቻችሁን ውደዱ፤ በውኃ መታጠብና ከቃሉ ጋር አንጽቶ እንዲቀድሳት ስለ እርስዋ ራሱን አሳልፎ ሰጠ። እድፈት ወይም የፊት መጨማደድ ወይም እንዲህ ያለ ነገር ሳይሆንባት ቅድስትና ያለ ነውር ትሆን ዘንድ ክብርት የሆነችን ቤተ ክርስቲያን ለራሱ እንዲያቀርብ ፈለገ።” ኤፌ 5:25-27

ቤተክርስቲያን ድካምና እድፈት እንዳይኖርባት አድርጎ ምን ያህል እንደ ወደዳት እናስተውል። እርሷ ከዳግማዊው አዳም በዐለተ አርብ ከጎኑ ተገኝታለችና ዳግማዊት ሔዋን ናት። ሔዋን የሚለው ቃል የሕያዋን እናት እንደ መሆኑ የስሙ ትርጓሜም ልክ የሚመጣው በክርስቶስ አባትነት ሕያዋንን ለምታፈራው ለቤተክርስቲያን ነው። በዚህች ቤተክርስቲያን በኩል ካልሆነ ማንም ሕይወት እኔ ነኝ ካለን ከክርስቶስ ጋር አይገናኝምና ከሷ ውጭ ያሉ ሁሉ ሙታን ናቸው።

የቤተክርስቲያን ክብር ይህን ያህል ነው ምክንያቱ ደግሞ ራሷ ክርስቶስ ስለሆነ ነው። ከዚህም ባሻገር ቤተክርስቲያን ወሰን አልባ ናት። ከቀደመው ሰው መፈጠር አስቀድሞ በዓለመ መላእክት የነበረች ጉባዔ ናት። ይህችው ጉባዔም በምድር በብሉይ ኪዳን አበው ዘንድ ነበረች። በነዳዊት አንደበትም ይህቺ ለዘለዓለም ማረፊያዬ ናት ብሎ ያናገረው እርሱ እግዚአብሔር ነው መዝ 132:14። ለዚህም ነው ቅዱስ ጳውሎስ በነቢያትና በሐዋርያት መሰረት ላይ ብሎ የተናገረው።

እርሱ ክርስቶስ ይህቺኑ ቤተክርስቲያንን ያፀና ዘንድ በውስጧ ባሉ ሰውና መላእክት መሐል ያለውን የጥል ግድግዳ ያጠፋ ዘንድ ሰው ሆነ። በሐዲስ ኪዳን አዳምን ያከብረው ዘንድ መልዕልተ መስቀል እንቅልፍ በተባለ ሞት ውስጥ ሆኖ ከጎኑ በፈሰሰ ውሃና ደም የማትሞተዋን ሔዋንን ሰራልን። በዚህች ቤተክርስቲያን በኩል ብቻ ከክርስቶስ ጋር ህብረት መፍጠር እንድንችል ዘንድ የሚያዛምዱንን ምሥጢራት ሰራልን በጥምቀት ከአንድ ማህፀን በመወለዳችን ወንድምና እህት አደረገን። እራሱን የከበረ ማዕድ በማድረግ በቅዱስ ሥጋውና ክቡር ደሙ አፋቀረን። በሜሮን መንፈስ ቅዱስን አሳደረብን። ከክርስቶስ ጋር አንድ እንሆን ዘንድ ራስ በመሆን አካሉ እንሆን ዘንድ ፈቀደ።


አንድ የሰውነት አካል ብቻውን ሕያው እንደማይሆን አንድ ክርስቲያንም ያለ ቤተክርስቲያን ሕብረት በክርስቶስ ሕያው መሆን አይችልም በመሆኑም ከክርስቶስ ጋር ይጣበቅ ዘንድ ከቤተክርስቲያን ጋር አንድ መሆን ይኖርበታል።

ቤተክርስቲያን ራሷ በሆነው ክርስቶስ አማካኝነት ሕልውናዋም ዘላለማዊ ነው። በምድር የምትጋደል ቤተክርስቲያን እንዳለች ሁሉ በሰማይም አሸናፊት ቤተክርስቲያን አለችና የአማኞች ሞት ከተጋድሎዋ ቤተክርስቲያን ወደ አሸናፊቷ ቤተክርስቲያን መሸጋገሪያ ነው። በመሆኑም በአሸናፊዋ ቤተክርስቲያን የሚገኙ ምዕመናን ከተጋዳይዋ ቤተክርስቲያን ምዕመናን ጋር ይነጋገራሉ፣ ይፀልያሉ በማይቋረጥ ሕብረት ይኖራሉ። ዕብ 12:1።

ይህንን ሁሉ ክብር ያለብሳት ዘንድ እናትም ትሆነን ዘንድ በመከራ መስቀል ቤተክርስቲያንን የዋጃት የአምላካችን ክርስቶስ ስሙ የተመሰገነ ይሁን።

ክርስቶስ ተንስአ እም ሙታን – ክርስቶስ ከሙታን ተነሳ።

በሰሙነ ሕማማት የምንሰማቸው እንግዳ ቃላትና ትርጉማቸው

ሕማማት ከአለም አቀፋዊ የኦርቶዶክስ ተዋሕዶ ቤተክርስቲያን ትውፊቶች መሐል አንዱ ነው። አብዛኞቹ የምሥራቅም ሆነ የኦርየንታል አብያተክርስቲያናት ከኢትዮጵያና ከግብፅ አብያተክርስቲያናት የዘመን አቆጣጠር ጋር የሚመሳሰለውን የጁልያን የዘመን አቆጣጠር ስለሚከተሉ ሕማማቱን በተመሳሳይ ቀን በተቀራራቢ ሥርዓት ያከብሩታል። የሕማማት ሰሙን ስርዓት ዓለማቀፋዊነት ማሳያዎች መካከል በሰሙነ ህማማት ወቅት በምልጃ የሚጠሩ ዓለምአቀፋዊ ቅዱሳንና ወደ ግዕዝም ሆነ አማርኛ ያልተተረጎሙ ቃላት መገኘታቸው ነው።


እኒህ እንግዳ ቃላት የሦስት ጥንታዊ ቋንቋዎች ማለትም ቅብጥ፣ ግሪክና ዕብራይስጥ ቃላት ሲሆኑ በግብረ ሕማማት መጽሐፍ ትዕዛዝ በሚባለው ክፍል ውስጥ የሚገኙና በስግደት ወቅት ካህናትና ምዕመናን በምልልስና በቅብብል የሚሏቸው ውብ ቃላት ናቸው።

1. በአምስቱም ቀናት የምንጠቀምባቸው ቃላት

ከቅብጥ (ከግብፅ ቤተክርስቲያን ጥንታዊ ቋንቋ) የመጡ


ናይናን፡-
የቅብጥ ቃል ሲሆን ትርጉሙ «መሐረነ ፣ማረን» ማለት ነው፡፡ ቃሉ ከኢየሱስ፣ ክርስቶስ፣ አማኑኤል፣ እብኖዲ፣ ማስያስ፣ታኦስ፣ ትስቡጣ ተከትሎ የሚገባ ቃል ነው

እብኖዲ፡-
የቅብጥ ቃል ሲሆን ትርጉሙ «አምላክ» ማለት ነው፡፡ «እብኖዲናይናን» ሲልም «አምላክ ሆይ ማረን» ማለቱ ነው፡፡

ከጽርዕ (ከጥንታዊ የግሪክ ቋንቋ) የመጡ

ኪርያላይሶን/ኪርዬኤሌይሶን:- «ኪርዬ» ማለት «እግዚነ»ማለት ሲሆን«ኤሌይሶን» ማለት ደግሞ «እግዚኦ-ማረን» ማለት ነው፡፡ ትርጉሙም «አቤቱ ማረን» ማለት ነው፡፡ «ኪርያላይሶን» የምንለው በተለምዶ ነው፡፡ ኪርያ ማለት እግዝእትነ/እመቤታችን ማለት ስለሆነ ሲጠራ «ኪርዬኤሌይሶን» መባል አለበት፡፡


ታኦስ፡-  «ጌታ ፣አምላክ» ማለት ነው፡፡ «ታኦስ ናይናን» ማለትም «ጌታ ሆይ ማረን» ማለት ነው


ትስቡጣ/ዴስፓታ:- ከሚለው የግሪክ ቃል የመጣ ሲሆን ትርጉሙም ደግ ገዥ ማለት ነው፡

ከዕብራይስጥ (ከአይሁድ ጥንታዊ ቋንቋ) የመጡ


ማስያስ፡-  «መሲሕ» ማለት ነው፡፡ «ማስያስ ናይናን» ሲልም «መሲሕ ሆይ ማረን» ማለት ነው፡፡

2. በዕለተ አርብ ብቻ የምንሰማቸው ቃላት

በዕለተ አርብ በስድስት ሰዓት ከወንጌልና የድህረ ወንጌል ንባባት በኋላ በቤተክርስቲያን ያሉ ሁሉ ቁጭ ብለው ሦስት ካህናት ጥቁር ለብሰው በዕዝል ዜማ የሚያዜሙት ዜማ አለ።  ዐርፍተ ነገሮቹ የቅብጥ ሲሆን ትርጉማቸውም:-

አምነስቲ ቲ ሙኪርያቱ አንቲ ፋሲልያሱ
  ተዘከረነ እግዚኦ በውስተ መንግሥትከ – አቤቱ በመንግሥትህ አስበኝ ማለት ነው፡፡

አምንስቲ ቲ ሙአግያ አንቲ ፋሲልያሱ
ተዘከረነ ኦ ቅዱስ በውስተ መንግሥትከ – አቤቱ ቅዱሱ ሆይ በመንግስትህ አስበኝ፡ ማለት ነው።

አምንስቲ ቲ ሙዳሱጣ አንቲ ፋሲልያሱ
ተዘከረነ እግዚአ ኩሉ በውስተ መንግሥትከ- የሁሉ የበላይ የሆንክ ወይ በመንግሥትህ አስበን ማለት ነው፡

እመቤታችን ቅድስት ድንግል ማርያምና ታቦተ ጽዮን

✨እንኳን ለእናታችን ለእመቤታችን ለቅድስት ድንግል ማርያም ታቦተ ጽዮን የፊልስጥኤማውያን ጣዖት ዳጎንን ለሰባበረችበት (ታሪኩ በመጽሐፍ ቅዱስ 1ኛ ሳሙ 5)፣ ወደ ኢትዮጵያ ገብታ አክሱም ለመጀመርያ ጊዜ ለከበረችበትና ታቦተ ጽዮን ከነበረችበት ድንኳን ወጥታ ማንም ካህን ሳይሸከማት በተአምራት አብርሃና አጽብሓ ወዳሠሩላት ቤተ መቅደስ ራሷ በመንፈስ ቅዱስ ገብታ ለተገኘችበት ለዓመታዊ መታሰቢያ በዓል በሰላም አደረሰን።

✍ታቦተ ጽዮን በእመቤታችን ቅድስት ድንግል ማርያም ትመሰላለች፤ ይህን ለመረዳት ስለ ታቦተ ጽዮን አሠራርና መንፈሳዊ ትርጉም አስቀድመን ልናውቅ ይገባናል፡፡ እግዚአብሔር አምላክ ታቦተ ጽዮንን እንዲሠራ ብልሃትን፣ ጥበብን፣ ማስተዋልን፣ ዕውቀትን ይለይ ዘንድ መንፈሱን ያሳደረበትን ከይሁዳ ወገን የሆነውን ባስልኤልን መረጠ /ዘፀ.፳፭፥፱/፡፡ እርሱም እግዚአብሔር በሰጠው ማስተዋል ከማይነቅዝ እንጨት ርዝመቷ ሁለት ክንድ ተኩል፤ ወርዱዋ አንድ ክንድ ተኩል፤ ቁመቷ አንድ ክንድ ተኩል እንዲኖራት አድርጎ ታቦቷን ሠራት፡፡ በመቀጠል በውስጥም በውጪም በጥሩ ወርቅ ለበጣት፣ ከታቦቷም ዙሪያ የወርቅ አክሊልን አደረገላት፡፡ ካህናት ታቦተ ጽዮንን ለመሸከም እንዲረዳቸውም በአራቱም መዓዘናት በወርቅ የተሠሩ ቀለበቶችንና በእነርሱም ውስጥ የሚገቡ ሁለት መሎጊያዎችን ሠራ፡፡ ከጥሩ ወርቅም የስርየት መክደኛውን በቃል ኪዳን ታቦቷ ላይ በርዝመቷና በወርደዋ ልክ ሠራ፡፡ የስርየት መክደኛውን እንዲጋርዱት አድርጎም ጥሩ ከሆነ ከተቀጠቀጠ ወርቅ ኪሩቤልን ሥሎ በስርየት መክደኛው ግራና ቀኝ አስቀመጣቸው፡፡ እነዚህ በጥሩ ወርቅ የተሠሩት ሁለቱ ኪሩቤል ፊታቸው ወደ ስርየት መክደኛው ሆኖ እርስ በእርሳቸው እንዲተያዩ ተደርገው የተሠሩ ናቸው፡፡ በዚህ በስርየት መክደኛው በሁለቱ ኪሩቤል መካከል እግዚአብሔር ለሙሴ እየተገለጠ ሰው ከባልንጀራው ጋር እንደሚነጋገር በግልጽ ያነጋግረው ነበር፤ ለሕዝቡም በደመና ዐምድ ይታያቸው ነበር  /ዘፀ.፰፥፲፩፤ ፳፭፥፳፪-፴፫/፡፡

ወደ ምሥጢሩ ትርጓሜ ስንመለስም ታቦተ ጽዮን የእመቤታችን የቅድስት ድንግል ማርያም ምሳሌ ስትሆን፣ በውስጧ የያዘችው የሕጉ ጽላትም የጌታችን መድኃኒታችን ኢየሱስ ክርስቶስ ምሳሌ ነው፡፡ ታቦቷ ከማይነቅዝ እንጨት መሠራቷ የእመቤታችንን ንጽህና የሚያመለክት ሲሆን፣ በውጪም በውስጥም በጥሩ ወርቅ መለበጧ ደግሞ ቅድስናዋንና በሁለት ወገን ድንግል መሆኗን የሚያስረዳ ነው፡፡ ታቦተ ጽዮን በግራና በቀኝ በኩል በተዘጋጁ አራት ከወርቅ የተሠሩ ቀለበቶች ነበሯት፤ በእነዚያ የወርቅ ቀለበቶች ውስጥም ሁለት መሎጊያዎች ይገቡባቸው ነበር፡፡ ታቦቷን ለማንቀሳቀስ ባስፈለገ ጊዜ አራት ሌዋውያን ካህናት በመሎጊያዎቹ ይሸከሟታል፡፡ ይህ ሥርዐት በሰማያትም የሚታይ እውነታ ነው፡፡ የጌታን መንበር ገጸ ሰብእ፣ ገጸ ንሥር፣ ገጸ ላህምና ገጸ አንበሳ ያላቸው አርባዕቱ እንስሳት ይሸከሙታልና /ኢሳ.፮፥፩-፭፤ ሕዝ.፩፥፩-፲፮/፡፡ ለአማናዊቷ ታቦት ለቅድስት ድንግል ማርያምም ሰላምን የሚያወሩ፣ መልካም የምሥራችንም የሚናገሩ፣ መድኃኒትንም የሚያወሩ፣ ጽዮንንም;‹‹አምላክሽ ነግሦአል›› የሚሉ፣ እግሮቻቸው በተራሮች ላይ እጅግ ያማሩ የእርሷንና የጌታችንን ስም ተሸክመው ወንጌልን ለዓለም የሚሰብኩ ኦርቶዶክሳውያን መምህራን አሏት /ኢሳ.፶፪፥፯/፡፡ የስርየት መክደኛው መቀመጫው የንጹሐን አንስት፣ መክደኛው የንጹሐን አበው፣ ግራና ቀኙ የሐናና የኢያቄም ምሳሌ ነው፡፡ በክንፎቻቸው የጋረዱት; ኪሩቤልም የጠባቂው መልአክ ቅዱስ ሚካኤልና የአብሣሪው መልአክ ቅዱስ ገብርኤል ምሳሌዎች ናቸው፡፡

የስርየት መክደኛው ስርየቱ የሚፈጸምበት ስፍራ ቢሆንም ነገር ግን በዚህ ቦታ ምንም ዓይነት መሥዋዕት አይቀርብም ነበር፡፡ ይህም በጊዜው አማናዊው መሥዋዕት ገና እንዳልተሠዋ ያስገነዝበናል፡፡ ይህ ስፍራ እግዚአብሔር ለሙሴ የሚገለጥበት ቦታ ነው፤ ከእርሱ ውጪ ሌላ ነገር በእዚያ ላይ ማረፍ አይችልም ነበር፡፡ ከዚህም የምናስተውለው አንድ ምሥጢር አለ፤ ይኸውም እግዚአብሔር አምላክ ለአዳም የገባውን ቃል ኪዳን ሊፈጽም ሰው በሆነ ጊዜ ራሱን መሥዋዕት አድርጎ የሚያቀርብበት ልዩ ስፍራ እንዳዘጋጀ ያመላክተናል፡፡ይህ ስፍራ አማናዊ መሥዋዕት የሚቀርብበት ቦታ እንደሚያስፈልግ የሚያስገነዝብ ስፍራ ነው፡፡ ይህን ለማመልከትም ለኃጢአት ስርየት የቀረበው መሥዋዕት ከታረደ በኋላ ካህኑ ደሙን በጣቱ እየነከረ ሰባት ጊዜ በስርየት መክደኛው አንጻር በመገናኛ ድንኳኑ ውስጥ ይረጨው ነበር /ዘሌ.፬፥፮/፡፡ነገር ግን ይህ ደም ከስርየት መክደኛው ላይ አያርፍም ነበር፤ ምክንያቱም በዚህ ስፍራ መቅረብ የሚገባው አማናዊው መሥዋዕት የጌታችን የመድኃኒታችን የኢየሱስ ክርስቶስ ቅዱስ ሥጋውና ክቡር ደሙ ነውና፡፡

ይህ የስርየት መክደኛ ለእኛ የሚያስተላለፈው ተጨማሪ መልእክትም አለው፡፡ይኸውም አማናዊው መሥዋዕት ክርስቶስ መሥዋዕት ሆኖ ዓለምን ማዳኑ እንደማይቀርና መሥዋዕቱ የሚቀርብበት ስፍራም በቅድስተ ቅዱሳኑ (ቤተ መቅደሱ) ውስጥ እግዚአብሔር በምሕረት በሚገለጥበት በቃሉ ማደሪያ በጽላቱ ላይ መሆን እንደሚገባው ያስገነዝበናል/ዕብ.፬፥፲፮/፡፡ ይህም እግዚአብሔር አምላክ በነቢዩ ሚልክያስ ላይ አድሮ ‹‹ከፀሐይ መውጫ ጀምሮ እስከ መግቢያዋ ድረስ ስሜ በአሕዛብ ዘንድ ታላቅ ይሆናልና በየስፍራውም ስለ ስሜ ዕጣንን ያጥናሉ፤ ንጹህም ቍርባን ያቀርባሉ፤›› /ሚል.፩፥፲፩/ በማለት እንደ ተናገረው የስርየት መክደኛው አንዲት ቅድስት ቤተ ክርስቲያን ምሥጢረ ቍርባንን ለምትፈጽምበት ጽላት ወይም ታቦት ምሳሌ መሆኑን ያሳየናል፡፡ የስርየት መክደኛውን የሚጋርዱት በጥሩ ወርቅ የተሠሩት የኪሩቤል ምስሎችም አማናዊው መሥዋዕት በሚሠዋበት ጊዜ በዙሪያው ረበው የሚገኙ የመላእክት ምሳሌዎች ናቸው፡፡ ቅዱሳን አባቶቻችን እንዳስተማሩን ሁለቱ ኪሩቤል የተባሉት ቅዱስ ሚካኤልና ቅዱስ ገብርኤል ናቸው፡፡ ይህን ለማስገንዘብ ቅድስት ቤተ ክርስቲያናችን በመንበረ ታቦቱ ላይ ምስለ ፍቁር ወልዳ እንዲቀመጥ ታዝዛለች፡፡ ምስለ ፍቁር ወልዳን  ላስተዋለ ሰው በትክክል የታቦተ ጽዮንን መንፈሳዊ ትርጕም ይረዳል፡፡

ታቦተ ጽዮን ከሌሎች የብሉይ ኪዳን ንዋያተ ቅድሳት በተለየ መልኩ እጅግ ግሩም የሆነ ምሥጢርን በውስጧ ይዛለች፡፡ ይህን ድንቅ ምሥጢር ለመረዳትም አንድ ምሳሌ እንመልከት፤ ንጉሥ ዳዊት የእግዚአብሔርን የቃል ኪዳኑ ታቦት ከአቢዳራ ቤት ወደ ጽዮን ከተማ ባስመጣበት ወቅት በታቦቷ ፊት በሙሉ ኃይሉ በደስታ እየዘለለ ለእግዚአብሔር መንፈሳዊ መዝሙርን አቅርቦ ነበር /፪ሳሙ.፮፥፲፪-፲፯/፡፡ ከዚህ ጋር ተመሳሳይ የሚሆን ድርጊት በሐዲስ ኪዳንም ተፈጽሟል፡፡ ይኸውም እመቤታችን ቅድስት ድንግል ማርያም ለቅድስት ኤልሳቤጥ ሰላምታ በሰጠቻት ጊዜ የስድስት ወር ፅንስ የነበረው ቅዱስ ዮሐንስ መጥምቅ የእመቤታችንን የሰላምታ ድምፅ በመስማቱ እንደ አባቱ እንደ ዳዊት በእናቱ ማኅፀን ውስጥ ሆኖ በደስታ ዘሏል (ሰግዷል) /ሉቃ.፩፥፵፬/፡፡ ቅዱስ ዳዊት በቃል ኪዳኑ ታቦት ፊት እየተደሰተ ለአምላኩ የምስጋና ቅኔን መቀኘቱም ለሰው ልጆች ሁሉ የመዳናችን ምክንያት የሆነችውን ቅድስት ድንግል ማርያምንና ልጇን በቃል ኪዳኗ ታቦት በኩል አስቀድሞ በዓይነ ሕሊና ስለ ተመለከታቸው ነበር፡፡

እንኳን አደረሰን። ከበዓሉ ረድኤት በረከት ይክፈለን። መልካም በዓል።

የ2016 ዓ.ም የአጽዋማትና የበዓላት አወጣጥ ( በመጋቤ ሐዲስ ዶክተር ሮዳስ ታደሰ )

በስመ አብ ወወልድ ወመንፈስ ቅዱስ አሐዱ አምላክ ንዌጥን በረድኤተ እግዚአብሔር ጽሒፈ ቀመረ ባሕረ ሐሳብ ዘድሜጥሮስ ሊቀ ጳጳሳት ዘእስክንድርያ ጸሎቱ ወበረከቱ የሃሉ ምስሌነ ለዓለመ ዓለም አሜን ።


መጽሐፉ መርሐ ዕውራን፤ ባሕረ ሐሳብ ይባላል፤ መርሐ ዕውራን አለው አላዋቂዎችን መርቶ ወደ ዕውቀት የሚያደርስ ስለኾነ፤ ሐሳብ ቊጥር ነው ብፁዓን እለ ተኃድገ ሎሙ ኀጢአቶሙ ወእለ ኢኃሰበ ሎሙ ኲሎ ጌጋዮሙ እንዲል፤ ባሕረ ሐሳብ አለው ባሕር እስኪለምዱት ድረስ ያስፈራል ይገርማል፤ ከለመዱት በኋላ በልብ ተኝቶ ይውሏል ይኽም መጽሐፍ እስኪለምዱት ድረስ ያስፈራል ይገርማል ከለመዱት በኋላ ብዙ ምስጢር አስታውቆ ደስ ያሰኛልና፤ አንድም ባሕር ከለመዱት በኋላ ከመሠረቱ ወርዶ አሸዋ ይዞ ይወጧል ይኽም መጽሐፍ ከለመዱት በኋላ ብዙ ምስጢር ያስታውቃል ያስመርምራል፤ አንድም የባሕር አዟሪቱ መንገዱ ብዙ ነው የዚኽም መጽሐፍ መንገዱ ስልቱ ብዙ ነውና፤ አንድም ሐሳበ ባሕር ይላል ባሕር ዘመን ነው ሠፈራ ለባሕር በመሥፈርት ወደለዋ ለዓለም በመዳልው መኑ ዘአእመረ ስፍሐ ሰማይ ወዕመቀ ቀላይ እንዲል በባሕር ውስጥ ያለውን እግዚአብሔር እንጂ ሰው እንዳያውቀው በዘመንም ኹሉ የሚደረገውን እግዚአብሔር እንጂ ሰው አያውቀውምና፤ ኢኮነ ለክሙ ታእምሩ መዋዕለ ወአዝማነ ዘሠርዐ አብ እንዲል፡፡ 

👉 ድሜጥሮስ ማለት መጽሔት ማለት ነው፤ አንድም ፀሓይ ማለት ነው ሰውን በትምህርቱ ብሩህ ያደርጋልና የድሜጥሮስ ትውልዱ ነገዱ ከአዝማደ እስክንድርያ ነው ጥንተ ነገሩ እንደምን ነው ቢሉ ያባቱ ወንድም ያጐቱ ሴት ልጅ ነበረችው አባቷ ሲሞት ልጄን ከልጅኽ አትለይብኝ አደራ ብሎት ሞተ፤ አብረው አደጉ አካለ መጠን አደረሱ ዘመኑ ሐሳውያን የበዙበት ነበርና ርሱንም ከሌላ ብናጋባው ርሷንም ለሌላ ብንድራት ከሃይማኖት ይወጣሉ ከምግባር ያድጻሉ ሕንጻ ሃይማኖት ከሚፈርስ ሕንጻ ሥጋ ይፍረስ ርስ በርሳቸው እናጋባቸው ብለው መከሩ መክረው አልቀረ ሠርግ አደረጉ፤ ሥርዓተ ከብካቡ ሲፈጸም ሥርዓተ መርዓዊና ሥርዓተ መርዓት ያድርሱ ብለው ከጫጉላው ቤት አግብተዋቸው ኼዱ፤ ርሷን አስቀድሞ መንፈስ ቅዱስ አነሣሥቶ ድሜጥሮስ ያንት ወንድምነት ለኔ የኔ እኅትነት ላንተ አልበቃ ብሎ የባዕድ ሥራ እንሥራ አልኽን አለችው፤ እኔስ የናት ያባቴን ፈቃድ ማፍረስ ይኾንብኛል ብዬ ነው እንጂ ፈቃዴም አይደል ፈቃድሽ ካልኾነ አንተወውምን አላት እንተወው አለችው፤ እንኪያስ የተለያየን እንደኾነ አንችን ለሌላ ወንድ እኔንም ለሌላ ሴት ያጋቡናልና መስለን እንኑር አላት እንኑር አለችው፤ በአንድ ቤት በአንድ አልጋ እየተኙ 48 ዘመን ኖሩ፤ ርሱን መልአኩ ቀኝ ክንፉን ርሷን ግራ ክንፉን እያለበሳቸው ያድራል፤ ሲነጋ በመስኮቱ በአምሳለ ርግብ ወጥቶ ሲኼድ ያዩታል ስለምን ቢሉ በቅተዋልና አንድም በንጽሕናቸው ይትጉበት ብሎ፤ በዘመኑ የተሾመው ሊቀ ጳጳስ ሉክዮስ ሉክያኖስ ይባላል አረጀ ደከመ፤ ሕዝቡ ተሰብስበው አባታችን አንተ አረጀኽ ደከምኽ ካንተ ቀጥሎ የሚሾመውን ንገረን አሉት፤ እናንተም ወደ እግዚአብሔር አመልክቱ እኔም ወደ እግዚአብሔር አመለክታለኊ ብሎ ቀን ቀጥሮ ሰደዳቸው ከእግዚአብሔር የታዘዘ መልአክ መጣ ስሙ ድሜጥሮስ የሚባል ያለጊዜዋ ያፈራች የወይን ዘለላ ይዞ ካንተ ሊባረክ ይመጣል ካንተ ቀጥሎ የሚሾመው ርሱ ነው አለው፤ ሕዝቡም በቀጠራቸው ቀን መጡ አገኛችኹት አላቸው እኛስ አላገኘንም አሉት እኔ አገኘኹላችኊ አላቸው፤ ስሙ ድሜጥሮስ የሚባል ያለጊዜዋ ያፈራች የወይን ዘለላ ይዞ ሊባረክ ይመጣል ከኔ ቀጥሎ የሚሾመው ርሱ ነው ለጊዜው እንቢ ይላችኋል ግድ ብላችኊ ሹሙት አላቸው፡፡

👉 ይኽም ድሜጥሮስ ተክል አጽድቆ ዕርፍ አርቆ የሚኖር ገበሬ ነበር ይላሉ፤ ከዕለታት በአንድ ቀን ተክል ለመጐብኘት ከተክል ቦታ ገብቶ ሳለ ያለጊዜዋ ያፈራች የወይን ዘለላ አገኘ ይኽንስ ከሊቀ ጳጳሱ ወስዶ ሊባረኩበት ይገባል ብሎ በንጹሕ ዕቃ አድርጎ ይዞ ኺዶ ንገሩልኝ አለ፤ እንዲኽ ያል ይዞ የመጣ ሰው ከደጅ ቁሟል ብለው ነገሩት እንዲኽ ያል ይዞ የመጣውን ከደጅ ያቆሙታልን ያገቡታልን እንጂ ግባ በለው አለው፤ ገብቶ ተባርኳል፤ ከኔ ቀጥሎ የሚሾመው ይኽ ነው ብሏቸው ወዲያው ዐረፈ፤ ቀብረው ሲመለሱ ሕዝቡ ተሾምልን አሉት በማርቆስ ወንበር የሚቀመጥ የተማረ ነው ደግሞም ንጹሕ ድንግል ነው፤ እኔ እንደምታውቁኝ ሕዝባዊ ነኝ ደግሞም ሥጋዊ ነኝ እንደምን አድርጎ ይኾናል አላቸው፤ እኛስ አባታችን ያዘዘንን ትተን ሌላ አንሾምም አሉት፤ ርሱም እንደማይተውት ዐውቆ ሊቀ ጳጳሱ ሲሾም ምን ያደርግላችኊ ነበር አላቸው አንቀጸ አባግዕን አንብቦ ይተረጒምልን ነበር አሉት ወንጌል አምጡልኝ አለ፤ አመጡለት እንኳን ትርጓሜውን ንባቡን አያውቀው የነበረ መንፈስ ቅዱስ ገልጾለት ተርጒሞላቸዋል፤ ይኽም ብቻ አይደለም ብሉይና ሐዲስ ተርጒሟል፡፡

👉 ከዚኽ በኋላ ከደጀ ሰላም ቆሞ አንተ በቅተኻል ተቀበል አንተ አልበቃኽም ቆይ እያለ ከልክሏቸዋል፤ ሕዝቡም ቆንጆ ሚስቱን ከቤቱ አስቀምጦ እኛን ይከለክለናል ብለው አምተውታል፤ መልአኩም ኢትፍቅድ አድኅኖ ርእስከ ወብእሲትከ አላ አላ አድኅኖ ሕዝብከ አለው፤ ርሱም ዕንጨት እየያዛችኊ ተሰብሰቡ ብሎ ዐዋጅ ነገረ ምእመናኑም ዕንጨት እየያዙ ተሰበሰቡ ደመራ አሠርቶ በእሳት አቃጥሎ ልብሰ ተክህኖውን ለብሶ ሊቀድስ ገባ ጸሎተ ቅዳሴውን ፈጽሞ ልብሰ ተክህኖውን እንደለበሰ በእሳቱ መኻከል እየተመላለሰ ያጥን ጀመር፤ ሚስቱም ከዚያ ነበረችና ስፍሒ አጽፈኪ ልብስሽን ዘርጊ አላት ዘረጋች እሳቱን እየታፈነ ከልብሷ ላይ አደረገላት ልብሷ ሳይቃጠል ቀርቷል ሕዝቡም አባታችን ይኽን ተአምራት ያደረግኸው ስለምን ነው አሉት፤ አምታችኹኝ አላቸው፤ አላበጀንም በድለናል ይቅር በለን አሉት፤ ይፍታሕ ወይኅድግ ያንጽሕ ወይስረይ ብሎ ናዟቸዋል፤ ኑዛዜ ከዚያ ወዲኽ ተጀምሯል፡፡

👉 ድሜጥሮስ በተሸመ በ27 ጌታ ባረገ በ207 ዘመን ይኽን መጽሐፍ ተናግሮታል፤ ስለምን ቢሉ ከሐዋርያት ጀምሮ እስከ ርሱ የነበሩ ምእመናን ዐቢይ ጾምን የጥምቀት ሳኒታ ጀምረው በየካቲት 21 ይፈጽሙ ነበር፤ ሕማማትንም ወአጐንድዮሙ መዋዕለ ይላል በመጋቢት ያደርጉ ነበር እንዲኽ ማድረጋቸው ተጠምቆ ጹሟል ሕማሙም በመጋቢት ነው ሲሉ፤ አጽዋማትን በዓላትን እንዳገኙ ያደርጉ ነበር፤ ርሱ ግን በዘአለበዎ መንፈስ ቅዱስ ይላል ሰኞ የሚኾነውን ከሰኞ ረቡዕ የሚኾነውን ከረቡዕ ኀሙስ የሚኾነውን ከኀሙስ ዐርብ የሚኾነውን ከዐርብ እሑድ የሚኾነውን ከእሑድ እንዳይወጣ ኢየዐርግ ኢይወርድ እየሰጠ ወስኖታል፤ አይወጣም አይናወጥም ቢናወጥስ አጽዋማት በዓላትም እንደቀድሞ በኾኑ ነበር፤ ርሱም በዘአለበዎ መንፈስ ቅዱስ ባልተባለም ነበር፡፡

👉 ድሜጥሮስ ነነዌ፣ ዐቢይ ጾም፣ ጾመ ሐዋርያት ከሰኞ፤ ደብረ ዘይት፣ ሆሣዕና፣ ትንሣኤ፣ ጰራቅሊጦስ ከእሑድ፤ ርክብ፣ ምሕላ ድኅነት ከረቡዕ፤ ዕርገት ከኀሙስ፤ ስቅለት ከዐርብ እንዳይወጣ ግለጽልኝ ብሎ ግብር ገባ ከእግዚአብሔር የታዘዘ መልአክ መጥቶ ከሌቱ በ23 በ23 እስከ 7 ሱባኤ ቈጥረኽ 161 ይኾናል፤ 150ውን ገድፈኽ 11 ይተርፋል፤ አበቅቴ በለው ብሎታል፤ መልአኩም ቅዱስ ሚካኤል ነው፤ ከመዓልቱም እስከ 7ት ሱባኤ ቈጥረኽ 49 ዕለት ይኾናል 30ውን ገድፈኽ 19ኝን መጥቅዕ በለው ብሎታል፤ የድሜጥስ ጥንተ አበቅቴና መጥቅዕ ይኽ ነው፤ የሌሊቱን አብዝቶ የቀኑን ስለምን አሳነሰው ቢሉ የሌሊት ልቡና ክት የቀን ልቡና ባካና ነውና፤ አንድም ቀን ሲፈርድ ሲተች ጉባኤ ሲያደርግ ይውላልና፤ ሕማማትን ያስቀድማል ትንሣኤን ያስከትላል ሐዘኑ ለደስታው እንዲመች፤ ካላዘኑ ደስታ ካልጾሙ ፋሲካ የለምና፤ የሐዲሱን ያስቀድማል ዘመኑ ነውና የብሉዩን ወደኋላ ያደርጋል፤ አልቦ መጥቅዕ ወአበቅቴ አንድ ወገን ያደርጋል፤ ታሪክ፣ መቅድም፣ አርዕስት እየሰጠ ወስኖታል፤ ታሪኩ ይኽ ነው፤ መቅድሙን ያመጣዋል።

👉 በአብ ስም አምነን አብን ወላዲ ብለን በወልድ ስም አምነን ወልድን ተወላዲ ብለን በመንፈስ ቅዱስ ስም አምነን መንፈስ ቅዱስን ሠራጺ ብለን ምንም ለአጠይቆ አካለት ሦስት ስላልነ በባሕርይ በሕልውና አንድ አምላክ ብለን አምነን ጸሎቱ ልመናው በረከቱ ክብሩ ይደርብንና የእስክንድርያው ሊቀ ጳጳሳት ድሜጥሮስ የተናገረውን የባሕረ ሐሳብ ቊጥር መጽሐፍን በእግዚአብሔር አጋዥነት እንጀምራለን፡፡ እግዚአብሔር እንደዛሬው ኹሉ አንድነቱ ሦስትነቱን ሳይጠቀልለው ሦስትነቱ አንድነቱን ሳይከፍለው በአንድነት በሦስትነት ሳለ ክብሩ በብቻው እንደቀረ ዐውቆ ዓለምን ልፍጠር ብሎ አሰበ፤ አስቦም አልቀረ ሰውና መላእክትን ስሙን ለመቀደስ ክብሩን ለመውረስ የቀረውን ፍጥረት ግን ለአንክሮ ለተዘክሮ ለምግበ ሥጋ ለምግበ ነፍስ ፈጠረ “ወኲሉ ዘተፈጥረ ለመፍቅደ ነባብያን ቦ እምኔሆሙ ለምህሮ ወቦ እምኔሆሙ ለተገብሮ፤ ወእንዘ ኢየኀድግ ርእሶ ዘእንበለ ሰማዕት፤ ወለእመ ፈቀድከ ታእምር ዘንተ እምአፍአ ብከ ሰማዕት ወመምህር ዘይመርሐከ ኀበ ዝንቱ፤ ወዘኢያስተርኢ እግዚአብሔር እምፍጥረተ ዓለም ይትዐወቅ በፍጥረቱ” እንዲል፤ እግዚአብሔርስ የፈጠረው ፍጥረት እያንዳንዱ ቢቈጠር ፍጡር ተናግሮ ባልፈጸመውም ነበር፤ እየወገን እየወገኑ ግን ብዙውን አንድ ብዙውን አንድ እያሉ ቢቈጥሩ ከእሑድ እስከ ዐርብ የፈጠረው ሥነ ፍጥረት 22 ነው፡፡ እስከዚኽ አርዕስት ነው፤ ይኽንንም በሥነ ፍጥረት ይመለከቷል።

👉 የፀሓይ ጥንታት ሦስት የጨረቃን ዐምስት የሚል ነውና፤ ይኽ ዓለም የተፈጠረበት ዕለተ እሑድ ጥንተ ዕለት፤ አዝርዕት፣ አትክልት፣ ዕፀዋት የተፈጠሩበት ዕለተ ሠሉስ ጥንተ ቀመር፤ ብርሃናት የተፈጠሩበት ዕለተ ረቡዕ ጥንተ ዮን ይባላል፤ “እሑድ ወሠሉስ ወረቡዕ ዘውእቶሙ ሠለስቱ ጥንታት” እንዲል።

👉 ዓለም ከተፈጠረ ጀምሮ እስከ ዛሬ ድረስ ዘመን ቢቈጠር በፀሓይ 7516 ዘመን፤ በጨረቃ 7746 ዘመን ከ8 ወር ከ14 ዕለት ይኾናል። ከልደተ ክርስቶስ አስቀድሞ የነበረው በፀሓይ 5500 ዘመን፤ በጨረቃ 5668 ዘመን ከ10 ወር ከ9 ዕለት፤ ይኽ ዓመተ ኩነኔ፣ ዓመተ ፍዳ ይባላል፡፡

👉 ከልደተ ክርስቶስ ወዲኽ ያለው ግን በፀሓይ 2016 ዘመን ነው፤ በጨረቃ 2077 ዘመን ከ10 ወር ከ5 ዕለት ይኽ ዓመተ ሥጋዌ፣ ዓመተ ምሕረት ይባላል፤ መላው ዓመተ ዓለም ነው፤ ዓመተ ዓለም ባለው ዓመተ ምሕረት የሚል ይገኛል፤ ጊዮርጊስ ወልደ አሚድም ዓመተ ዓለምን ዓመተ ምሕረት ብሎ ተርጒሞታል፤ ስለምን ዓመተ ዓለምን ዓመተ ምሕረት አለው ቢሉ? ሰው በዚኽ ዓለም ሳለ ኀጢአት ሠርቶ ንስሓ ቢገባ ከእግዚአብሔር ዘንድ ምሕረት የሚያገኝበት ስለኾነ ዓመተ ዓለምን ዓመተ ምሕረት ብሎ ተርጒሞታል “በዕለት ኅሪት እሰምዐከ ወበዕለተ መድኀኒት እረድአከ ወናሁ ይእዜ ዕለት ኅሪት ወናሁ ዮም ዕለተ አድኅኖት” እንዲል፡፡

👉 ለዚኹም መሥፈሪያ ሰባት አዕዋዳት አሉት፤ ምንና ምን ቢሉ? ዐውደ ዕለት፣ ዐውደ ወርኅ፣ ዐውደ ዓመት፣ ዐውደ አበቅቴ፣ ዐውደ ፀሓይ፣ ዐውደ ማኅተም፣ ዐውደ ቀመር ናቸው፡፡ ከሊኹም ሦስቱ በዕለት አራቱ በዓመት ይቈጠራሉ፤ በዕለት የሚቈጠሩት ሦስቱ ዐውደ ዕለት፣ ዐውደ ወርኅ፣ ዐውደ ዓመት ናቸው፤ በዓመት የሚቈጠሩ አራቱ ዐውደ አበቅቴ፣ ዐውደ ፀሓይ፣ ዐውደ ማኅተም፣ ዐውደ ቀመር ናቸው፡፡

👉 ዐውደ ዕለት ከእሑድ እስከ ቀዳሚት ያሉ ሰባት ዕለታት ናቸው፤ እሊኽም አውራኅን ለማስገኘት በሰባት በሰባት ሲመላለሱ ይኖራሉ “እስመ ኊልቊ ሰብአቱ በኀበ ዕብራውያን ፍጹም ውእቱ” እንዲል

👉 ዐውደ ወርኅ በፀሐይ ዘወትር ፴ በጨረቃ አንድ ጊዜ 29፤ አንድ ጊዜ ፴ ይኾናል፤ እሊኽም ዓመታትን ለማግኘት በ፴ በ፴ ሲመላለሱ ይኖራሉ፡፡

👉 ዐውደ ዓመት በፀሓይ 365 ዕለት በጨረቃ 354 ዕለት ነው፤ በፀሓይማ ምነው 365 ዕለት ከ15 ኬክሮስ ከ6 ካልኢት፤ በጨረቃ 354 ዕለት ከ22 ኬክሮስ ከ1 ካልዒት ከ37 ሣልሲት ከ52 ራብዒት ከ48 ኀምሲት አይደለውም ቢሉ “ወበውስተ ውሁድኒ ንብል አልቦ ወኢአሐዱ” እንዲል መጽሐፍ ትርፍ ትቶ ጐደሎ መልቶ መቊጠር ልማድ ነውና ፷ ካልመላ ብሎ እንዲኽ አለ እንጂ ቊጥሩስ አለ “እስመ ልማደ መጽሐፍ ይነግር ኊልቈ ምሉዓ ወፍጹመ ወየኀድግ ዘተርፈ ወይዌስክ ዲበ ሕፀፅ ካልዐ” እንዲል፤ ዕለታትን አዕዋድ አላቸው አውራኅን የሚያስገኙ ስለኾነ፤ አውራኅን አዕዋድ አላቸው ዓመታትን የሚያስገኙ ስለኾነ “ወበከመ ይትወለዳ አውራኅ እምዕለታት ወዓመታት እምአውራኅ ከማሁ ይትወለዳ አዕምሮታት እመከራት ወእምግባራት እንዲል፡፡

👉 ዐውደ አበቅቴ 19 ዓመት ነው በዚኽ ፀሓይና ጨረቃ መንገዳቸውን ፈጽመው በተፈጠሩበት ኆኅት ይገናኙበታል፤ ሊቀ ነቢያት ሙሴ፣ መምህራነ ወንጌል ሐዋርያት፣ ሊቀ ጳጳሳት ዲሜጥሮስ ከ፳ው አንድ ቀመር አንድ ተረፈ ቀመር፤ ከ፵ው ኹለት ቀመር ኹለት ተረፈ ቀመር፤ ከ፷ው 3 ቀመር 3ት ተረፈ ቀመር፤ ከ፹ው 4 ቀመር 4ት ተረፈ ቀመር፤ ከ፻ው 5ቀመር 5ት ተረፈ ቀመር እያላችኊ ቊጠሩ ማለታቸው ከዚኽ የተነሣ ነው “ወእምዘተርፈከ እምዐሠርቱ ወተሰዓቱ ተአትት እምኔሁ አሐደ ዓመተ እስመ ለዛቲኒ ዐሠርቱ ወተሰዓቱ ሙሴ ገብራ በጥበበ እግዚአብሔር ዘይገብሩ ባቲ ፍስሐ አይሁድኒ ወክርስቲያንኒ” እንዲል

👉 ዐውደ ፀሓይ 28 ዓመት ነው፤ በዚኽ ዕለትና ወንጌላዊ ይገናኙበታል፤ ዕለቱ ረቡዕ ወንጌላዊዉ ማቴዎስ ነው፤ ረቡዕ ማቴዎስ እንዲል፤ ዕለትን ፀሓይ አለው “ወበትእዛዝከ ይቀውም ዕለት” እንዲል፤ ወንጌላዊዉን ፀሓይ አለው “አንትሙ ውእቱ ብርሃኑ ለዓለም” ካለው አንዱ ርሱ ነውና፤ በሰንጠረዥ ፀ፣ ደ ይላል፤ ዐውደ ፀሓይ ማለት ነው፡፡

👉 ዐውደ ማኅተም 76 ዘመን ነው፤ በዚኽ አበቅቴ ወንጌላዊ ይገናኙበታል፤ አበቅቴው 18 ወንጌላዊዉ ዮሐንስ ነው፤ ማኅተም አለው አበቅቴው ለአበቅቴ ወንጌላዊዉ ለወንጌላዊው ፍጻሜ ነውና፡፡

👉 ዐውደ ቀመር 532 ዘመን ነው፤ በዚኽ ዕለት፣ ወንጌላዊ፣ አበቅቴ እሊኽ 3ቱ ይገናኙበታል፤ ዕለቱ ሠሉስ፣ ወንጌላዊዉ ማቴዎስ ነው፤ ሠሉስ ማቴዎስ እንዲል አበቅቴው አልቦ ነው “ጥንቱ ለቀመር ዕለተ ሠሉስ ወንጌላዊ ማቴዎስ ወፍጻሜሁ ዕለተ ሰኑይ ወንጌላዊ ዮሐንስ” እንዲል፤ በዐውደ ፀሓይ ቦታ ዐውደ ማኅተም፤ በዐውደ ማኅተም ቦታ ዐውደ ፀሓይ የሚል ይገኛል፤ ከኹለቱ አንዱ ቢታጣ አንዱ ከቀመር ገብቶ ይቈጠራል፤ ቀመርን ለሦስቱ ስም በሰጡ ጊዜ ዐውደ ቀመር ዐቢይ ቀመር፤ ዐውደ

ማኅተም ማዕከላዊ ቀመር፤ ዐውደ አበቅቴ ንዑስ ቀመር ይባላል፤ ዐቢይ ቀመር መደቡ 14 ቊጥሩ 532፣532፤ ማዕከላዊ ቀመር መደቡ 6 ቊጥሩ 76፣76፤ ንዑስ ቀመር መደቡ 3 ቊጥሩ 19፣19 ነው፡፡

👉 ከዚኽም ዓመተ አበቅቴን ለማግኘት 7516 ዘመን በዐቢይ ቀመር ቢቀምሩ 532፤ 532 የተፈጸመለት 14 ዐቢይ ቀመር፤ 19፤ 19 የተፈጸመለት 3 ንዑስ ቀመር ኾኖ 11 ዓመት ይተርፋል።

👉 መላውንም በማእከላዊ ቀመርም ቢቀምሩ 76፤ 76 የተፈጸመለት 98 ማእከላዊ ቀመር 19፤ 19 የተፈጸመለት 3 ንዑስ ቀመር ኹኖ 11 ዓመት ይተርፋል፡፡

👉 በዐውደ ፀሓይም ቢቀምሩ 28፤ ኻያ ስምንት የተፈጸመለት 266 ዐውደ ፀሓይ፤  19፤ 19 የተፈጸመለት 3 ንዑስ ቀመር ኹኖ 11 ዓመት ይተርፋል፡፡

👉 መላውንም በንዑስ ቀመር ቢቀምሩ 19፤ 19 የተፈጸመለት 395 ንዑስ ቀመር
ኹኖ 11 ዓመት ይተርፋል፡፡

👉 7516ቱን ዘመን በቀመረ ዐረብም ቢቀምሩ 228፤ 228 የተፈጸመለት 32 ቀመረ ዐረብ፤ 19፤ 19 የተፈጸመለት 11 ንዑስ ቀመር ኹኖ 11 ዓመት ይተርፋል።

👉 ስመ አቅማር ብዙ ነው አይቶ መተው ነው፤ አሐደ አዕትት ለዘመን እንዲል ስለተጀመረ ተቈጠረ ስላልተፈጸመ ታተተ ብሎ ከ11ዱ አንዱን ቢያትቱ 10 ይተርፋል፤ 10 ዓመተ አበቅቴ ወጣ ገጠር ወንበር ይላል፡፡

👉 አበቅቴን ለማግኘት ከ10ሩ ዓመተ አበቅቴ 11፤ 11 ዕለት ቢነሡ 110 ይኾናል፤ ከ110ሩ 90ውን በ3፤ ፴ ቢገድፉት 20 ይተርፋል፤ 20 አበቅቴ ወጣ በዘመነ ዮሐንስ፡፡

👉 መጥቅዕንም ለማግኘት ከ10ሩ ዓመተ አበቅቴ 19 ዕለት ቢነሡ 190 ይኾናል፤ 190ውን በ6፤ ፴ ቢገድፉት 10 ይቀራል፤ 10 መጥቅዕ ወጣ በዘመነ ዮሐንስ፤ 20 መጥቅዕና 10 አበቅቴ ፴ ይኾናሉ እንጂ ከ፴ አይወጡም ከ፴ አይወርዱም፤ “ዓዲ መጥቅዕ ወአበቅቴ ክልኤሆሙ እመ ይበዝኁ ወእመ ይውኅዱ ኢየዐርጉ እም፴ ወኢይወርዱ እም፴ ወባሕቱ ወትረ ይከውኑ ፴” እንዲል።

(ከዚኽ በኋላ አበቅቴ ከመጠነ ሠርቀ መዓልትና ከሚለው ዠምሮ…ኢየዐርግ ኢይወርድ ኹሉ እንደ ታሪኩ አስገባ)     
 
❤ መጥቅዕ 10 መጥቅዕ ሲያንስ በጥቅምት ይውላልና ጥቅምት ኀሙስ ይብታል፤ ኀሙስ – ኀሙስ 8፤ ዐርብ 9፤ ቅዳሜ 10፤ በዐለ መጥቅዕ ጥቅምት 10 ቅዳሜ ቀን ይውላል፤ የቅዳሜ ተውሳክ 8፤ 8 እና 10= 18 መባጃ ሐመር ይገኛል፤ በጥቅምት ሳኒታ የካቲት ዐርብ ይብታል፡፡ ዐርብ – ዐርብ 8፤ ዐርብ – ዐርብ 15፤ ቅዳሜ 16፤ እሑድ 17፤ ሰኞ 18 የካቲት 18 ነነዌ
♦ የዐቢይ ጾም ተውሳክ 14፤ 14 ና 18=32፤ ፴ ውን ገድፎ 2 ይተርፋል።  መጋቢት እሑድ ይብታል እሑድ 1 ሰኞ 2
መጋቢት 2 ቀን ዐቢይ ጾም፡፡
♦ የደብረ ዘይት ተውሳክ 11፤ 11 እና 18=29፤ እሑድ እስከ እሑድ 8/ .. 15/ … 22/ … 29 መጋቢት 29 ደብረ ዘይት፡፡
♦ የሆሣዕና ተውሳክ 2፤ 2 እና 18=20፤ መጋቢት እሑድ ብቷል ሚያዝያ ማግሰኞ ይብታል፤ ማግሰኞ እስከ ማግሰኞ 8/ …15/ ረቡዕ 16፤ ኀሙስ 17፤ ዐርብ 18፤ ቅዳሜ 19፤ እሑድ 20 ሚያዝያ 20 ሆሣዕና
♦ ከዚኽም በዓለ ፍሥሕን (የአይሁድ ፋሲካን) ይናገሯል፤ ፍሥሕን 4 ነገር ይጠብቃታል፤ ገቦ መጥቅዕ፤ ሰሙነ ሕማማት፤ 190 ዕለት፤ 14 ሌሊት፤ ፍሥሕ የዕለት ተውሳክ አትሻም በደረቅ መጥቅዕ ነው የምትወጣው መጥቅዑ 10 የፍሥሕ ተውሳክ 10= 20
በዓሉን አናከብረውም ስለምን እናወጣዋለን ቢሉ ሐዋርያት ፍሥሕን ከትንሣኤ ጋራ አንድ አድርጎ ያዋለ ካህን ቢኾን ከክህነቱ ይሻር፤ ምእመን ቢኾን ከምእመናን ይለይ ብለው አውግዘዋልና ስለዚኽ ለይተን እናወጣዋለን፡፡
♦ የስቅለት ተውሳክ 7፤ 7 እና 18=25፤ ማግሰኞ እስከ ማግሰኞ 8/ …15/ …22 ረቡዕ 23/ ኀሙስ 24/ ዐርብ 25 ሚያዝያ 25 ስቅለት
♦ የትንሣኤ ተውሳክ 9፤ 9 እና 18=27፤ ዐርብ 25 ቅዳሜ 26 እሑድ 27 ሚያዝያ 27 ትንሣኤ
♦ የርክብ ተውሳክ 3፤ 3 እና 18=21፤ ሚያዝያ ማግሰኞ ብቷል ግንቦት ኀሙስ ይብታል፤ ኀሙስ – ኀሙስ 8/ …15/ …22/ አንዷን ታግሦ ግንቦት 21 ርክብ
♦ የዕርገት ተውሳክ 18፤ 18 እና 18= 36፤ ፴ውን ቢገድፉ 6 ይተርፋል። ሠኔ ቅዳሜ ይብታል። ቅዳሜ 1፤ እሑድ 2፤ ሰኞ 3፤ ማግሰኞ 4፤ ረቡዕ 5፤ ኀሙስ 6 ግንቦት 6 ዕርገት፡፡
♦ የጰራቅሊጦስ ተውሳክ 28፤ 28 እና 18=46፤ ፴ውን ገድፎ 16 ይቀራል፤ ቅዳሜ – ቅዳሜ 8/ …15/ እሑድ 16 በዓለ ጰራቅሊጦስ ሠኔ 16፡፡ 
♦ የጾመ ሐዋርያት ተውሳክ 29፤ 29 እና 18=47፤ ፴ውን ገድፎ 17 ይቀራል፤ ቅዳሜ – ቅዳሜ 8/…15/ እሑድ 16፤ ሰኞ 17 ሠኔ 17 ጾመ ሐዋርያት
♦ የምሕላ ድኅነት ተውሳክ 1፤ 1 እና 18= 19፤ ቅዳሜ እስከ ቅዳሜ 8/ …15/እሑድ 16/ ሰኞ 17/ ማግሰኞ 18/ ረቡዕ 19 ሠኔ 19 ምሕላ ድኅነት።

👉 ዓመተ ወንጌላዊን ከዚኽ ይናገሯል፤ ወለእመ ፈቀድከ ታእምር ዓመተ ወንጌላዊ ትከፍሎ ለዘመን ኀበ አርባዕቱ እድ ለእመ ተርፈ አሐዱ ማቴዎስ ወክልኤቱ ማርቆስ ወሠለስቱ ሉቃስ ወለእመ ዐረየ ክፍል ዮሐንስ እንዲል፤ ዓመተ ወንጌላዊን ለማወቅ ዓመተ ዓለምን ከአራት ከፍሎ አንድ ቢተርፍ ወንጌላዊዉ ማቴዎስ መኾኑ፤ ኹለት ቢተርፍ ማርቆስ፤ ሦስት ቢተርፍ ሉቃስ ቢተካከል ዮሐንስ መኾኑን በዚኽ ይታወቃል፤ 7516 ዘመን ለአራቱ ወንጌላውያን ቢያካፍሉ 1879 ደርሷቸው ይተካከላል፤ ቢተካከል ዮሐንስ ያለው ይኽ ነው፤ ዛሬ ወንጌላዊዉ ዮሐንስ መኾኑ በዚኽ ታውቋል፡፡

👉 ጥንተ ዮንንም ከዚኽ ይናገሯል፤ ወለእመ ፈቀድከ ታእምር ጥንተ ዮን ትከፍሎ ለዘመን ኀበ አርባዕቱ እድ ወትዌስክ ቦቱ መጠነ ራብዒት ወትገድፎ በበሱባኤ ወዘተርፈከ እምሱባኤ ተአትት እምኔሁ አሐደ ዓመተ ወእምዝ ይከውን ጥንተ ዮን እንዲል፤ ጥንተ ዮንንም ለማወቅ ዓመተ ዓለምን ከአራት ከፍሎ 5ኛ መጠነ ራብዒት 6ኛ ጳጉሜንን አክሎ በሱባዔ ገድፎ ከሱባዔ የተረፈውን አንዱን አትቶ 1 ቢተርፍ ጥንተ ዮን ረቡዕ መኾኑን መስከረም ረቡዕ መባቱን፤ 2ት ቢተርፍ ኀሙስ፤ 3 ቢተርፍ ዐርብ፤ 4 ቢተርፍ ቀዳሚት፤ 5 ቢተርፍ እሑድ፤ 6 ቢተርፍ ሰኞ፤ 7 ቢተርፍ ማግሰኞ መኾኑ በዚኽ ይታወቃል፡፡ 
አከፋፈል እንዳለፈው 7516 ዘመን ለአራቱ ወንጌላውያን ቢያካፍሉ 1879 ደርሷቸው ይተካከላል፤ ይኽን በሱባዔ ይገድፏል፤ ከሺው 300 ነሥቶ 700 ግዱፍ፤ ከ800ው አንዱን መቶ ነሥቶ 700 ግዱፍ፤ 400 ይተርል፤ ከ100ው 2፤ ከ400ው 8፤ ከ8ቱ አንድ፤ ከዚያም 1 እና 79= 80 ይኾናል፤ ከ80ው 77ቱን በ11 ሱባዔ ቢገድፉ 3 ይተርፋል፡፡
ከአንዱ ወንጌላዊ 3 ከ4ቱ ወንጌላውያን 12፤ መጠነ ራብዒት፤ 6ኛ ጳጉሜን 1879 ዕለት ትኾናለች፤ ርሷ በዕለት፤ ወንጌላዊ በዓመት ይተካከላሉና ግድፈት እንዳለፈው፤ መጠነ ራብዒት  3= 15፤  ከ15ቱ 7ቱን በአንድ ሱባዔ ቢገድፉ 8 ይተርፋል፤ አሐደ አዕትት ለዘመን እንዲል ስለተዠመረ ተቈጠረ ስላልተፈጸመ ታተተ ብሎ ከ8ቱ አንዱን ቢያትቱ 7 ይተርፋል፤ 7 ቢተርፍ ማግሰኞ ያለው ይኽ ነው፤ የማግሰኞ ጥንተ ዮን 7 ነውና፡፡ ጥንተ ዮንም ማለት ጥንተ ፀሓይ፤ ጥንተ ጨረቃ፤ ጥንተ ከዋክብት ማለት ነው፤ ጥንተ ዮን ብሂል ጥንተ ተፈጥሮቶሙ ለፀሓይ፤ ወወርኅ ወከዋክብት እንዲል፡፡

👉 ዕለተ ቀመርንም ለማወቅ ለጥንተ ዮን ከወጣው አንዱን ሳያትቱ በሱባዔ ገድፎ 1 ቢተርፍ ማግሰኞ መኾኑ፤ 2 ቢተርፍ ረቡዕ፤ 3 ቢተርፍ ኀሙስ፤ 4 ቢተርፍ ዐርብ፤ 5 ቢተርፍ ቀዳሚት፤ 6 ቢተርፍ እሑድ፤ 7 ቢተርፍ ሰኞ መኾኑ በዚኽ ይታወቃል፤ ለጥንተ ዮን የወጣው 8 ነው፤ በሱባኤ ቢገድፉ 1 አንድ ቢተርፍ ማግሰኞ ያለው ይኽ ነው፤ ዕለተ ቀመርም ማለት ቀመር የተዠመረበት ዕለት ማለት ነው፤ ቀመር የተዠመረው ማግሰኞ ነውና፡፡

👉 ዕለተ ዮሐንስንም ከዚኽ ይናገሩታል፤ ወለእመ ፈቀድከ ታእምር ዕለተ ዮሐንስ ትከፍሎ ለዘመን ኀበ አርባዕቱ እድ፤ ወትዌስክ ቦቱ መጠነ ራብዒት፤ ወክልዔተ ዕለተ ጠቢባን ወትገድፎ በበሱባዔ ወዘተርፈከ እምሱባዔ ኢተአትት አሐደ ዓመተ፤ ወእምዝ ይከውን ዕለተ ዮሐንስ እንዲል ዕለተ ዮሐንስን ለማወቅ ዓመተ ዓለምን ከአራት ከፍሎ፤ 5ኛ መጠነ ራብዒት፤ 6ኛ ጳጉሜንን አክሎ 7ኛ 2ት ዕለተ ጠቢባንን ጨምሮ በሱባዔ ገድፎ ከሱባዔ የተረፈውን አንዱን ሳያትቱ አንድ ቢተርፍ ዕለተ ዮሐንስ እሑድ መኾኑ፤ 2 ቢተርፍ ሰኞ፤ 3 ቢተርፍ ማግሰኞ፤ 4 ቢተርፍ ረቡዕ፤ 5 ቢተርፍ ኀሙስ፤ 6 ቢተርፍ ዐርብ፤ 7 ቢተርፍ ቀዳሚት መኾኑ በዚኽ ይታወቃል፡፡

👉 ለጥንተ ዮን የወጣ 8 እና 2 ዕለተ ጠቢባን= 10 ይተርፋል፤ በሱባኤ ቢገድፉ 3 ይተርፋል። 3 ቢተርፍ ማግሰኞ ያለው ይኽ ነው፤ ዕለተ ዮሐንስም ማለት አሻቅቦ ወደ ላይ እስከ ፍጥረተ ዓለም፤ አቈልቊሎ ወደ ታች እስከ ምጽአተ ክርስቶስ ቢቈጥሩ ለወንጌላዊዉ ዮሐንስ የሚደርሰው ቀን ማለት ነው፤ ወለእመ ፈቀድከ ታእምር ዘኀለፈ ይመርሐከ ዝንቱ እስከ ፍጥረተ ዓለም ወለእመ ፈቀድከ ታእምር ዘይመጽእ ያበጽሐከ ዝንቱ እስከ ምጽአተ ክርስቶስ እንዲል፤ አንድም ሠርቀ ቲቶን ዕለተ ዮሐንስ ይለዋል፤ ቲቶ የተባለው መስከረም ነው፤ የመጥምቁ ዮሐንስ በዓል የሚውልበት ቀን ማለት ነው፤ ርዕሰ ዐውደ ዓመት ዮሐንስ ወላዴ መጥቅዕ ወአበቅቴ እንዲል፡፡

👉 ዕለተ በዓል ዘኀለፈ ዕለተ በዓል ዘይመጽእ የእሑድ አሚሩ ሰንበተ ክርስቲያንን ለማወቅ በዘመኑ የወጣውን ጥንተ ዮን፤ ሠርቀ መዓልት፤ 2 ዕለተ ጠቢባን በየወሩ የሚገኘውን አጽፈ ወርኅ እሊኽን 4ቱን አንድ አድርጎ ቈጥሮ በሱባዔ ገድፎ 1 ቢተርፍ እሑድ አሚሩ፤ 2 ቢተርፍ ሰኞ ሰኑዩ፤ 3 ቢተርፍ ማግሰኞ ሠሉሱ፤ 4 ቢተርፍ ረቡዕ ረቡዑ፤ 5 ቢተርፍ ኀሙስ ኀሙሱ፤ 6 ቢተርፍ ዐርብ ሰዱሱ፤ 7 ቢተርፍ ቀዳሚት ሰቡዑ፤ 8 ቢተርፍ በሱባዔ ገድፎ እሑድ አሚሩ የሚያሰኘው ይኽ ነው፡፡

👉 አጽፈ ወርኅም ማለት የወርኁ ከወርኅ የሚደረብ ማለት ነው፤ ይኽስ ከምን ይገኛል ቢሉ? ወሩን በሱባዔ ቢገድፉ 4 ሱባዔ ኾኖ 2 ይተርፋል፤ የወርኁ 2 የዓመቱ 24፤ እንዲኽ ግን ስለኾነ ለመስከረም አጽፈ ወርኅ የለውም በጥንተ ዮን፤ በሠርቀ መዐልት በኹለት ዕለተ ጠቢባን ይቈጠራል፤ በእሊኽ በ3ቱ ይቈጠራል፤ ጥንተ ዮን 7፤ ሠርቀ መዐልት 1 = 8፤ ኹለት ዕለተ ጠቢባን 2፤ 10 ይኾናል፤ በሱባኤ ቢገድፉ 3 ይተርፋል። 3 ቢተርፍ ማግሰኞ ሠሉሱ ያለው ይኽ ነው።

👉 ዕለተ ጠቢባንም ማለት ጠቢባን ሥላሴ ይኽነን ዓለም የፈጠሩበት፤ ጠቢባን መላእክት ሥላሴን የሚያመሰግኑበት ቀን ማለት ነው፤ (ዬ) ጠቢባን ሥላሴ ይኽነን ዓለም ከእሑድ እስከ ዐርብ ፈጥረዋል፤ ጠቢባን መላእክት ሥላሴን ዘወትር ያመሰግናሉ ብሎ የቊጥር መጽሐፍን የተማሩ መምህራን ዕለተ ሰንበትን፤ 6ቱ ዕለታትን፤ ያለፉትን የሚመጡትን በዓላት የሚያውቁባቸው የሚያሳውቁባቸው ማለት ነው፤ ዕለተ ጠቢባንም የተባሉ እሑድና ሰኞ ናቸው፤ ከቀመር ገብተው አልተቈጠሩም፡፡

👉 ዕለተ ምርያ አዕዋዲትንም ለማወቅ የፀሓይ ዐውደ ዓመት 365 ዕለት ከ15 ኬክሮስ ከ6 ካልዒት ነው፤ ይኽነን በሱባዔ ቢገድፉት 52 ሱባዔ ኾኖ 1 ዕለት ከ15 ኬክሮስ ከ6 ካልዒት ይተርፋል፤ ይኽቺውም አንድ ዕለት የተባለችው ዐምስተኛዪቱ ጳጒሜን ናት፤ ዕለተ ምርያ አዕዋዲት ይላታል፤ ዕለተ ምርያ ማለት ዕለተ መድኀኒት ማለት ነው፤ መድኀኒታችን ኢየሱስ ክርስቶስ የተወለደበትን ቀን የምታሳውቅ ማለት ነው፤ ርሷ በዋለች ልደት ይውላልና፤ አዕዋዲትም አላት ዘመኑን የምታዘዋውር የምታለዋውጥ ማለት ነው፤ እሑድ የዋለውን ሰኞ፤ ሰኞ የዋለውን ማግሰኞ እንዲውል የምታደርግ ርሷ ናትና፡፡

👉 መጠነ ራብዒት 6ኛ ጳጉሜንም ለማወቅ የአንዱ ዓመት ኬክሮስ 15፤ የ2 ዓመቱ 30፤ የ4 ዓመቱ 60 ኬክሮስ ነው፤ 60ው ኬክሮስ 1 ዕለት ይኾናል፤ ይኽቺውም በሉቃስ መጨረሻ ዮሐንስን ተጠግታ የምትውል ስድስተኛዪቱ ጳጉሜን ናት፤ መጠነ ራብዒት፣ ሠግረ ዮሐንስ ይላታል፤ መጠነ ራብዒት አላት ርሷ በዕለት ወንጌላዊ በዓመት ይተካከላሉና፤ ሠግረ ዮሐንስም አላት ዮሐንስ ተራምዶ የሚውልባት ስለኾነ፡፡

👉 ዕሪና መዓልትና ዕሪና ሌሊትንም ለማወቅ የአንዱ ዓመት ካልዒት 6፤ የ5ቱ ዓመት 30፤ የ10ሩ ዓመት 60 ይኾናል፤ 60ው ካልዒት 1 ኬክሮስ ይኾናል፤ የ100ው ዓመት 10 ኬክሮስ፤ የ600 ዓመት 60 ኬክሮስ፤ 60ው ኬክሮስ አንድ ዕለት ይኾናል፤ ይኽቺውም ሰባተኛዪቱ ጳጉሜን ናት፤ ዓለም በተፈጠረ በ600 ዘመን ዕሪና መዓልት ዕሪና ሌሊት ኾኗል፤ ዓለም ከተፈጠረ ዠምሮ እስከ ዛሬ ድረስ 12 ዕሪና መዓልት 12 ዕሪና ሌሊት ኾኖ 13ኛው ከተዠመረ 316 ኾኖ በዘመነ ማቴዎስ ይኸውም ሊመላ 284 ይቀራል፡፡

(ከዚኽ በኋላ እንዲኽ ብሎ ባሕረ ሐሳብ አውጪው እንዲኽ ብሎ አሥርቆት ያውጣ፡፡)
በዘንዜከር ሐሳባተ ሕጉ ወትእዛዙ ለእግዚእነ ወአምላክነ ኢየሱስ ክርስቶስ እንዘ ሀሎነ በዘመነ ቅዱስ ዮሐንስ ወንጌላዊ ቡሩክ ያብጽሐነ እስከ ዘመነ ማቴዎስ ዜናዊ፤ ወንጌላዊ አለው ዮሐንስን ባለዘመን ነውና፤ ዜናዊ አለው ማቴዎስን የሚመጣ ነውና ወረኛ ንጉሥ እንዲሉ፡፡
👉 በሰብዐ ወኀምስቱ ምእት ዐሠርቱ ወስድስቱ ዓመተ ዓለም፡፡ በኀምሳ ወኀምስቱ ምዕት ዓመተ ዓለም፤ በዕሥራ ምዕት ዐሠርቱ ወስድስቱ ዓመተ ምሕረት፤ ሠረቀ ለነ ወርኀ መስከረም ቡሩክ ያብጽሐነ እስከ ወርኀ ጥቅምት በሰላመ እግዚአብሔር አሜን።

👉 አበቅቴ 20፤ ሠርቀ መዓልት 1፤ ሕጸጽ 1= 22፤ ዕሥራ ወሰኑዩ ሠርቀ ሌሊት፤ ዕሥራ ወሰዱሱ ሠርቀ ወርኅ፤ አሚሩ ሠርቀ መዓልት፤ ሰቡዑ ሠርቀ ዕለት፤ ዮም በዛቲ ዕለት ዘአቅረብነ ለከ አምኀ ስብሐት ያዐርጉ ለነ መላእክት ተወከፍ ለነ እግዚአ ስብሐት፤ ወስብሐት ለእግዚአብሔር፡፡            

አዘጋጅ፡- መጋቤ ሐዲስ ዶከተር ሮዳስ ታደሰ