የመድኃኔዓለም ጥሪ

“ልጆቼ! በድህነቴ ላይ ቸርነትን አድርጉልኝ፡፡ በዚህስ አልችልም ካላችሁ እሺ በቁስሌ ላይ ዘይትን አፍሱልኝ፡፡ አሁንም ይህን ማድረግ ካልቻላችሁ ወደ እኔ ጠጋ በሉና አናግሩኝ፡፡ እናንተን ማየት፣ ከእናንተ ጋር መጨዋወት ይናፍቀኛልና፡፡ በገዛ ደሜ የገዛኋችሁ ልጆቼ! ከባድ ነገር እኮ አልለመንኳችሁም፡፡ እኔ የምፈልገው ትንሽ ዳቦ፣ ጊዜአዊ ማደርያ፣ እንዲሁም የሚያጽናኑ ቃላትን ብቻ ነው፡፡ “ይህ ሁሉ ማድረጌ ምን ይጠቅመኛል?” ካላችሁ ስለ ምሰጣችሁን ርስት መንግሥተ ሰማያት ብላችሁ አድርጉት፡፡ አሁንም ልባችሁ አልተነካምን? ስለ መንግሥተ ሰማያት አታድርጉት፤ ግን ደግሞ ስለ ሰብአዊ ርኅራኄ ይህን አድርጉልኝ፡፡ የእኔን መራቆት የሚያሳዝናችሁ በቀራንዮ አደባባይ ስለ እናንተ ብዬ የተራቆትኩት ብቻ ነውን? ታድያ አሁንም ‘ኮ በደጃችሁ ላይ ተጥዬ ዕራቁቴን ነኝ፡፡ ለምን አላዘናችሁልኝም? የታሰርኩት በቀራንዮ ብቻ ነውን? አይደለም፡፡

ታድያ እንደምን አታዝኑልኝም? የማፈቅራችሁ ልጆቼ? † በመስቀል ላይ ተሰቅዬ ሳለሁ “ተጠማሁ” እንዳለኩ ዛሬስ ስለ እናንተ ብዬ ደጋግሜ ይህን ቃል አልተናገርኩምን? ጕሮሮዬ ደርቆ ስለምን ትንሽ እንኳ አላሳዝናችሁም? ስለምንስ ይህ ሁሉ ፍቅር ስለ እናንተ መሆኑን ትዘነጉብኛላችሁ? የምለምናችሁ እናንተን ባለጸጋ ለማድረግ አይደለምን? ይህችን ትንሽ ቸርነት ስላደረጋችሁልኝ በዐይን ያልታየች፣ በጀሮ ያልተሰማች፣ በሰውም አእምሮ ያልታሰበች ርስት መንግሥተ ሰማያት እንድታገኙ ብዬ አይደለምን? ስለ እናንተ ብዬ ደሀ የሆንኩት ያኔ በመዋዕለ ሥጋዌዬ ብቻ እንደሆነ አታስቡ ልጆቼ! ዛሬም ቢሆን በደጃችሁ የተጣልኩት ስለ እናንተ ጥቅም እንደሆነ ተረዱልኝ፡፡

ከባድ ነገር ‘ኮ አልለመንኳችሁም፡፡ † እስር ቤት መጥታችሁ ጠይቁኝ እንጂ አስፈቱኝ አላልኳችሁም፡፡ ታምሜ ጠይቁኝ እንጂ ፈውሱኝ አላልኳችሁም፡፡ ከጠየቃችሁኝ ብቻ በቂዬ ነው፡፡ እስኪ ልጠይቃችሁና እናንተም መልሱልኝ! በዚያ በአስፈሪው ቀን ስመጣ “ኑ እናንተ የአባቴ ብሩካን” የሚለውን ቃሌ መስማት አትፈልጉምን? ዛሬ የሰጣችሁኝ ሁሉ የምረሳ ይመስላችኋልን? ያኔ በክብር ስመጣ ከእልፍ ወለዱ ጋር እንድሰጣችሁ አትሹምን? የማፈቅራችሁ ልጆቼ! ከደጃችሁ ተጥዬ የምለምናችሁ፣ ከበራችሁ ላይ ቆሜ ማደርያን የምጠይቃችሁ፣ እጄን ዘርግቼ እናንተን እናንተን የማየው ያኔ ትሉ ወደማይጠፋው እሳቱ ወደማያንቀላፋው እሳት እንዳትሄዱብኝ ብዬ ነው፡፡

ታድያ ይህን ለምን አትረዱልኝ ልጆቼ? ስለምን እንዳስቸገርኳችሁ ታስባላችሁ? ለእናንተ ጥቅም እንደሆነ እንዳትረዱ አዚም ያደረገባችሁ ማን ነው? ከእናንተ ጋር ቁጭ ብዬ ልብላ ስላችሁ ስለምን ትገፈትሩኛለችሁ? ይህን ያህል ቸርነት አድርጌላችሁ ሳለሁስ ስለምን በግልምጫ አያችሁኝ? ይህን ያህል መውደድ ወድጃችሁ ሳለሁ ስለምን በቅጡ ልታነጋገግሩኝ አልወደዳችሁም? ከአዳም ጀምሮ ዓለም እስኪያልፍ ድረስ ያለው ሕዝብ ሁሉ በአንድ አደባባይ ላይ ቆሞ፣ እልፍ አእላፍ መላእክት በዙርያዬ ረበው “ይህ/ ይህቺ ልጅ ወዳጄ ነው/ ናት፤ በመሆኑም በታላቅ ክብርና ዕልልታ አጅባችሁ ወደ ዘለዓለም ደስታዋ አግቡት/ አግቧት” የሚለውን ፍርዴ አትናፍቁምን? † ልጆቼ! እኔን ላለማየት ስለምን ፊታችሁን ትሸፍናላችሁ? ስለምን ታፍራላችሁ? እኔ ሳላፍርባችሁ ስለምን እናንተ አፈራችሁ? ልጆቼ! ልባችሁ እንደተነካ አውቃለሁ፡፡ ነገር ግን ስሜት ብቻ አይሁን፡፡

ከንፈራችሁን ብቻ አትምጠጡብኝ፡፡ ከእናንተ የምፈልገው አንዲት ነገር ብቻ ነው፡፡ ከላይ የጠየቅኳችሁን ነገሮች ወደ ተግባር ቀይሯቸው፡፡ ለማይጠቅማችሁ ነገር አብዝታችሁ እየሮጣችሁ ለሚጠቅማችሁ ነገር አትስነፉ፡፡ “እኔኮ ሥጋ ለባሽ ነኝ፤ ይህን እንደምን እችላለሁ?” አትበሉኝ፡፡ አውቃለሁ! ነገር ግን ፈቃዳችሁን ብቻ ስጡኝ እንጂ እኔ ራሴ አደርግላችኋለሁ፡፡

“ያለ እኔ ምንም ልታደርጉ አትችሉም” ብዬ ያስተማርኳችሁን ቃል ረሳችሁትን? /ዮሐ.15፡5/፡፡ እንግዲያውስ ከእናንተ የምፈልገው ፈቃዳችሁን ነው፡፡ አሁን ካላችሁበት ቦታ ተንቀሳቅሳችሁ ወጣ ስትሉ ታገኙኛላችሁ፡፡ አናግሩኝ! አፍቃሪያችሁ መድኃኔዓለም ነኝ፡፡”

✍ ቅ.ዮሐንስ አፈወርቅ መልእክተ ጳውሎስ /ሮሜ.8፡31-39/ ትርጕም

🏡በማኅበራዊ መገናኛዎቻችን ቤተሰብ ይሁኑ!
የዩቲዩብ ቻናል፡
http://youtube.com/@EMislene
የቴሌግራም ቻናል፡
https://t.me/EMislene
የፌስቡክ ገጽ፡
https://www.facebook.com/EMislene/
የኢንስታግራም ገጽ፡
https://www.instagram.com/egziabher_meslene28/
የቲክቶክ ገጽ፡
https://www.tiktok.com/@egziabhermeslene28
ድሕረ ገጽ፡
www.debregelila.org

📖ከንግግር የሚበልጥ ዝምታ

‹‹ከመቀየም ይልቅ የዋህነት የምትወድ ጌታዬ ኢየሱስ ክርስቶስ ሆይ የትግስትህ መጠኑን አውቅ ዘንድ የአፍ መዝጊያ ቁልፍ የሆነች ዝምታን ስጠኝ››ይላሉ የመልክአ ኢየሱስ ደራሲ ። ጌታችን አይሁድ በሐሰት ክሶች ደጋግመው ሲከሱት፤ ሲሰድቡት፤ሲዘብቱበት የታገሰውን የትዕግስቱን መጠን እንዴት ልንረዳው እንችላለን?

ባላጠፋኸው ስትከሰስ፤ያላደረከውን አድርገሃል እየተባለ ለሞት በሚያደርስ ክስ ስትወቀስ በዝምታ መሸከም እጅግ ከባድ ነው፡፡እናም በብስጭት እና በምሬት ራስህን ለመከላከል መሞከርህ አይቀርም፡፡ምናልባትም ከመናገር አልፈህ ከሳሾችህን፤ የሚሰድቡህን፤ የሚተፉብህን ሁሉ መሬት ተሰንጥቃ እንድትውጣቸው ማድረግ ብትችል ከማድረግ አትመለስም፡፡

ጌታችን ግን ሁሉን ማድረግ ሲቻለው በዝምታ ተቀበለ፡፡‹‹ይህን ያህል ዝምታ እንደምን ያለ ዝምታ ነው?ይህ ያህል ትዕግስት እንደምን ያለ ትዕግስት ነው?›› እያልን በቅዳሴያችን ከማድነቅ በቀር ምን ልንል እንችላለን፡፡

የጌታችን ዝምታ ከአይሁድ ንግግር ይልቅ የጲላጦስን ልብ ገዛው የጌታችን ትዕግስት ጲላጦስን አስጨነቀው፡፡እንደ ሎሎች ተከሳሾች ሕይወቱን ለማዳን በገዢው ፊት ዕንባ የማይማጸን ክሶቹን ለማስተባበል የማይሞክር ከሳሾቹን መልሶ እየከሰሰ ራሱን ነጻ ለማውጣት የማይፍጨረጨርበሰንሰለት ታስሮ እየተጎተተ እንኳን ከሚጎትቱት ጋር የማይታገል ሞት ሊያስፈርድበት በሚችል ወንበር ፊት ቀርቦ በፍጹም እርጋታና ሰላም የሚቆም ተከሳሽ ከጌታ በቀር አይቶ የማያውቀው ጲላጦስ ከሊቃነ ካህናቱ ጩኸት በላይ በናዝራዊ ዝምታ ተማረከ፡፡ማር 15 4-5

ጲላጦስ ከግቢው ውጪ ቆመው የሚጮኹት አይሁድ ወደ ጎን ትቶ ጌታችንን ለብቻው መረመረው፡፡‹‹ጰላጦስም እንደገና ወደ ግቢ ገባና ኢየሱስን ጠርቶ የአይሁድ ንጉሥ አንተ ነህን? አለው፡፡ኢየሱስም መልሶ፡-አንተ ይህን የምትለው ከራስህ ነው ወይስ ሌሎች ስለ እኔ ነገሩህን? አለው››(ዮሐ 18 32-35) ለመናገርም ጊዜ አለውና ጌታችን መልስ ሰጠ፡፡ምላሹ ግን ጥያቄ ነበር፡፡

የጌታችን መልስ ከላይ ሲታይ‹እንዴት እንዲህ ይላል?››የሚያሰኝ ሊመስል ይችል ይሆናል፡፡ ሆኖም ጌታችን ይህንን ያለው የጲላጦስ ጥያቄ ሁለት መልስ ያለው ስለሆነ ነው፡፡‹‹ንጉሥ ነህ ወይ? ለሚለው ጥያቄ መንፈሳዊ ትርጉሙ ከሆነ እርሱ ከክርስቶስ እንደመሆኑ ‹አዎን አንተም አልከው›የሚያሰኝ ነው፡፡ ቄሳርን የሚጋፋ ንጉሥ እንዳይነሳ በሚፈሩት በሮማውያን እይታ ከሆነ ደግሞ ጌታችን‹ንጉሥ አይደለሁም› ሊል ይችላል፡፡

ጲላጦስ በጠየቀው ጊዜ ‹ይህን የምትለው ከራስህ ነውን ወይስ ሌሎች ስለ እኔ ንገሩህን? ማለቱ ጥያቄው ከራስህ የመጣ ከሆነ ንጉሥ አይደለሁም እንድልህ አይሁድ የነገሩህን ብቻ ይዘህ ከሆነ ደግሞ ‹‹መሲሑ ንጉሥ እኔ ነኝ›› ብዬ ለይቼ እመልስልህ ዘንድ የጥያቄህን መነሻ ንገረኝ እንደማለት ነው፡፡

ጰላጦስ የጌታችንን አጠያየቅ ስለተረዳ በአይሁድ ዘንድ ያለው ነገር ለእርሱ እንደማይገደው በማሳየት‹‹እኔ አይሁዳዊ ነኝን?ወገኖችህ የካህናት አለቆች ለእኔ አሳልፈው ሰጡህ ምን አድርገሃል?›› አለው፡፡ ጌታችንም መልሶ ‹‹መንግስቴ ከዚህ ዓለም አይደለችም መንግስቴስ ከዚህ ዓለም ብትሆን ወደ አይሁድ እንዳልሰጥ ሎሌዎች ይዋጉልኝ ነበር፡፡ አሁን ግን መንግስቴ ከዚህ አይደለችም›› አለው፡፡

ጌታችን በዚህ መልሱ ሰማያዊ ንግሥናውንም ምድራዊ ሥልጣንን የሚፈልግ ንጉሥ አለመሆኑን በአንድ ላይ አስረዳ፡፤ ‹‹መንግስቴ ከዚህ ዓለም አይደለችም››ብሎ አይሁድ እንደሚከሱት ለቄሳር በተቀናቃኝነት የሚያሰጋ መንግስት እንደሌለው አስረዳ፡፡ ይህም መልስ የጰላጦስን ልብ የሚያሳርፍ ነው፡፡ምክንያቱም የሀገረ ገዢው ዋነኛ ጭንቀት ኃላፊ የቄሳር ሥልጣን እንዳይነካ ማድረግ ላይ ብቻ ነው፡፡

‹‹መንግሥቴ›› የሚለው ቃል ደግሞ የክርስቶስ ንጉሥነትን ያሳያል፡፡የቤተክርስትያን ታሪክ ጸሐፊው አውሳብዮስ ዘቄሳሪያ እንዳለው‹‹የክርስቶስ መንግሥቱ በምድራዊ ሕግጋት የማይወሰን በአምላካዊና ሰማያዊ ትምህርቱ ነፍሳትን ብሩሕ ስላደረገ ብቻ ዓለም ሁሉ የተስፋፋ መንግሥት ነው››በዙህም መሰረት መንግሥቱ ተብለን የተጠራነው በስሙ አምነው የተከተሉት ሐዋርያት በእነርሱ መሠረትነት የተመሠረተችው ቤተክርስትያን በስሙ ያመንን እኛ ክርስትያኖች ነን፡፡

መንግሥቱ የተባልነው በእርሱ ያመንን እኛ ክርስትያኖች ከሆንን ‹‹መንግሥት ከዚህ ዓለም አይደለችም››የሚለው ቃልስ እንዴት ይታያል? እኛ ያለነው በዚህ ዓለም አይደለምን?የሚልጥያቄ ማስከተሉ አይቀርም፡፡ ጌታችን መንግሥቴ ‹‹ከዚህ ዓለም አይደለችም›› አለ እንጂ ‹‹በዚህ ዓለም አይደለችም››አላለም፡፡በስሙ የምታምን ቤተ ክርስትያንና ክርስትያኖች ሁሉ‹በዓለም›ናቸው እንጂ‹ከዓለም› አይደሉም።

✍ሕማማት
ዲ/ን ሄኖክ ኃይሌ
ገጽ 177

🏡በማኅበራዊ መገናኛዎቻችን ቤተሰብ ይሁኑ!
የዩቲዩብ ቻናል፡
http://youtube.com/@EMislene
የቴሌግራም ቻናል፡
https://t.me/EMislene
የፌስቡክ ገጽ፡
https://www.facebook.com/EMislene/
የኢንስታግራም ገጽ፡
https://www.instagram.comS/egziabher_meslene28/
የቲክቶክ ገጽ፡
https://www.tiktok.com/@egziabhermeslene28
ድሕረ ገጽ፡
www.debregelila.org

ዘወረደ / ጾመ ሕርቃል

የመጀመሪያ የዐቢይ ጾም መግቢያ እሑድ ዘወረደ ይባላል ደግሞም ጾመ ሕርቃል ይባላል፡፡

«ዘወረደ» ማለት «የወረደ» ማለት ነው፡፡  አምላክ ሰው ሆነ፤ ሰው አምላክ ሆነ ማለት ነው። ይህም  ጌታችን መድኃኒታችን ኢየሱስ ክርስቶስ  እኛን ለማዳንና ፍቅሩን ሊገልጽልን ከሰማያት መውረዱን ከድንግል ማርያም የእኛን ሥጋ መዋሐዱን የሚያዘክር፤  ከሰማየ ሰማያት ወርዶ ከቅድስት ድንግል ማርያም መወለዱን የሚያመላክት፣ የሚታወስበት፣ የሚነገርበት  የዐቢይ ጾም አንደኛው ሳምንት   ነው፡፡

ዮሐ.3፥13፡፡ እግዚአብሔር አምላክ ለአዳም በገባው ቃልኪዳን መሰረት “ የዘመኑ ፍጻሜ በደረሰ ጊዜ እግዚአብሔር ከሴት የተወለደውን ልጁን ላከ”ገላ 4፥4 እንዳለ ሐዋርያው ቅዱስ ጳውሎስ የጠፋውን አዳም ፍለጋ ከአባቱ እሪና ሳይጎድል ሳይለይ ከሰማይ መውረዱን የምናዘክርበት ነው።

ይህ ጾም የጾም መግቢያ የመጀመሪያ ሳምንት የምንጾመው ጾም ሲሆን ጾመ ሕርቃል ተብሎም ይጠራል፡፡ እግዚአብሔር አምላክ ለአዳም “ከአምስት ቀን ተኩል በኋላ ከልጅ ልጅህ ተወልጄ አድንሃለሁ” ብሎ ለአዳም ቃል ገባለት ፡፡ ይህ ኪዳነ አዳም ይባላል ፡፡ የቃል ኪዳን ሁሉ መሠረት ነው ፡፡ ሁለቱን ኪዳናት (ብሉይ ወሐዲስ) በፅኑዕ ተስፋ ያስተሳሰረ የረጅም ዘመናት የድኅነት ሰንሰለት ነው ፡፡ ዘወረደ እርቀ አዳም  ፤ ተስፋ አበው ፤ ትንቢተ ነቢያት ፤ ሱባኤ ካህናት መፈፀሙ ፤ ኪዳነ አዳም መሲህ መወለዱ የሚነገርበት የፍቅር አዋጅ ነው።

ሕርቃል ማን ነው? ለምንስ በስሙ ተሰየመ? በ614 ዓ.ም ኪርዮስ የተባለ የፋርስ ንጉሥ ኢየሩሳሌምን በመውረር ጥቃት አደረሰ፡፡ በዚህ ወቅት በኢየሩሳሌም ንግሥት ዕሌኒ በሠራችው ቤተመቅደስ ውስጥ ሲገባ ንግሥቷ በክብር አስቀምጣው የነበረው የጌታችን የመድኃኒታችን የኢየሱስ ክርስቶስ መስቀል እንደ ፀሐይ ሲያበራ አገኘው፡፡

ቢነካው አቃጠለው ዲያቆናቱን አሸክሞ ሌላውን ንዋየ ቅድሳት ዘርፎ 60ሺ የሚደርሱትን አቁስሎ ገድሎ 3ሺ የሚሆኑትን ማርኮ ከተማዋንም አቃጥሎ ወደ ፋርስ ባቢሎን ይመለሳል፡፡ በዚህ ጊዜ ከጦርነቱ ያመለጡ በየዋሻው በየጉራንጉሩ ገብተው የተሸሸጉ ተሰብስበው ከ14 ዓመት በኋላ በ628 ጩኸታቸውንና የደረሰባቸውን በደል ለክርስቲየኑ የሮም ንጉሥ ሕርቃል ይነግሩታል፡፡ እርሱም ሐዋርያት ሰውን የገደለ እድሜውን በሙሉ ይጹም ስላሉ እንዴት ላድርገው አላቸው እኛ የአንተን እድሜ ተከፋፍለን እንጾማለን ብለው አንድ አንድ ሳምንት ደርሷቸው ጾሙን በሚገባ ጾመውታል፡፡ የጌታችን የኢየሱስ ክርስቶስ መስቀልና የተማረኩ ክርስቲያኖችን ለመመለስ ሕርቃል ጦር መዝዞ በኪርዮስ ላይ ተነሳበት ድል ለሕርቃል ሆነና መስቀሉን ያለበትን አጥቶ ሲቸገር መስቀሉን ሲቀብርና ዲያቆናቱን ሲያስገድል በመስኮት ሆና ያየችው ከኢየሩሳሌም የተማረከች አንዲት ብላቴና አሳይታው አውጥቶ በልብሰ መንግሥቱ ጠቅልሎ ወደ ቊስጥንጥንያ ተመለሰ፡፡ የተማረኩት በሙሉ ነጻ ወጡ ይህን ለማሰብ ለማስታወስ በተጨማሪም በኃጢአት ላይ ድል እንድናገኝ መንፈሳዊ ጦር በውስጣችን እንዲበዛልን መስቀልህ ከምርኮ እንደተመለሰ እኛንም ከኃጢአት ምርኮ መልሰን ለሕርቃል ድል መንሳትንና በጠላቶቹ ላይ ኃይልን እንደሰጠኸው ለእኛም በኃጢአት ላይ ድል መንሳት መንፈሳዊ ኃይልን ስጠን እያልን እንጾመዋለን፡፡

በጌታ ጾም ላይ እንዲጾም የሆነበት ምክንያት ጾሙ የጌታ ጾም በሚጾምበት ወቅት ላይ ስለተጾመ ቤተክርስቲያናችን አብራ ደንግጋዋለች፡፡ እዚህ ላይ በዚያን ጊዜ ለሕርቃል ሕዝቡ ሱባኤ ይዞለታል፡፡

ዛሬም እኛ ለቤተክርስቲያን ያደረግነውን በማሰብ እግዚአብሔር አምላክ ለሕርቃል የሰጠውን በጠላቶቹ ላይ ድል መንሳትን ለእኛም እንዲሰጠን የምንጠይቅበት ስለሆነ የመጀመሪያውን ሳምንት በሕርቃል ሰይመን ጾሙን እንጾማለን፡፡ የእኛ ጠላት የጨለማ ገዥ የሆነው ዲያቢሎስ ነውና እሱን ደግሞ በጾም እንደምናሸንፈው ጌታችን መድኃኒታችን ኢየሱስ ክርስቶስ አስተምሮናል።

እኛም በዚህ በዐቢይ ጾም የለመነውና የጠየቅነው ነገር ሁሉ ከኃጢአት በስተቀር እንዲከናወንልን ጾምን ገንዘባችን እናድርግ።

🏡በማኅበራዊ መገናኛዎቻችን ቤተሰብ ይሁኑ!
የዩቲዩብ ቻናል፡
http://youtube.com/@EMislene
የቴሌግራም ቻናል፡
https://t.me/EMislene
የፌስቡክ ገጽ፡
https://www.facebook.com/EMislene/
የኢንስታግራም ገጽ፡
https://www.instagram.com/egziabher_meslene28/
የቲክቶክ ገጽ፡
https://www.tiktok.com/@egziabhermeslene28
ድሕረ ገጽ፡
www.debregelila.org
              

ዐቢይ ጾም

ጾም ማለት ሰውን ከምግብ መከልከል ነው፡፡ (ፍትሃ ነገስት አንቀፅ.15) “ጾምሰ ተከልኦተ ብዕሊ ዕምመብልዕ በጊዜ እውቅ” ጾም ማለት በታወቀው ዕለት በታወቀው ሰዓት ሰው ከምግብ የሚከለከለው መከልከል ነው፡፡ መብል መጠጥ የኀጢአት መሠረት ነው በመብል ምክንያት ሞት በሰው ልጆች ላይ መጣ “ይችን ዕፀ በለስ ብትበሉ ሞትን ትሞታላችሁ” ዘፍጥረት 2፥17 ጾም ማለት ሰውነት ከሚፈልጋቸው ነገሮች ሁሉ መከልከል ለሰውነት የሚያምረውን የሚያስጐመዥውን ነገር መተው ማለት ነው።

መብል መጠጥ ከልክ ሲያልፍ ከተዘወተረም ከእግዚአብሔር ይለያል፤ “ያዕቆብ በላ ጠገበ ወፈረ ገዘፈ ደነደነ ፈጣሪው እግዚአብሔርን ተወ ሕይወቱ ከእግዚአብሔር ተለየ” ዘዳግም 32፥15-17 “የእግዚአብሔር መንግሥት መብልና መጠጥን አትሰብክም” ሮሜ 14፥16፣ 1ኛ ቆሮንቶስ 8፥8-13 “ዛሬ የሚራቡ የሚጠሙ ብፁአን ናቸው ይጠግባሉና ማቴዎስ 5፥6 ጾም የሥጋ መቅጫ ነው፤ “ነፍሴን /ሰውነቴን/ በጾም ቀጣኋት መዝሙር 68፥10 ጾም በነቢያት የተመሠረተ በክርስቶስ የጸና በሐዋርያትም የተሰበከና የተረጋገጠ ለክርስቲያኖች ዲያብሎስን ድል የምንነሣበት መንፈሳዊ የጦር ዕቃ ነው፡፡ ስለዚህ ሐዋርያዊትና ኦርቶዶክሳዊት ቤተ ክርስቲያን እንደምታስተምረን ይህን ጾም ከምግብ ለመከልከል ጋር ጸሎትን፥ ስግደትን፥ ምጽዋትንና የንስሐ ዕንባን ጨምረን እንጹመው፡፡ ጌታችንና ነቢያት፣ ሐዋርያት የተውልን መንፈሳዊ መሣሪያ ነውና። ጌታችን መድኃኒታችን ኢየሱስ ክርስቶስ ይህን ጾም የጾመው ለአብነት፣ ለማስተማር፣ ለአርዓያ ነው፡፡ በዚህ ታላቅ ጾም ጥንተ ጠላታችን ዲያብሎስ፣ ከሰው የሥጋ ጠባይ የሚመጣ ስስትና ፍቅረ ንዋይ ድል የተነሱበት ነው፡፡ እኛም ይህን እያሰብን በተለያየ መንገድ የሚመጣብንን ፈተና ለማራቅ ከዚህ ታላቅ ጾም በረከት እንድናገኝ እንጾማለን፡፡ ጸልዮ ጸልዩ፣ ጾሞ ጹሙ ብሎናል፡፡ ማቴዎስ 6፥16 ስለዚህም ትእዛዙን ለማክበር እንጾማለን።

✨የዚህ ታላቅ ጾም ስያሜዎች፦

👉ዐቢይ ጾም
ባሕርይ አምላክ በሆነዉ በጌታችን መድኃኒታችን ኢየሱስ ክርስቶስ የተመሠረተ በመሆኑ ዐቢይ ወይም ታላቅ ጾም ይባላል።

👉ጾመ ሁዳዴ
በጥንት ጊዜ ገባሮች ለባለ ርስት የሚያርሱት መሬት ሁዳዴ ተብሎ ይጠራ ነበር፡፡ እኛም ባለቤቱ ኢየሱስ ክርስቶስን እያሰብን የምንጾመው በመሆኑ ጾመ ሁዳዴ ተብሏል።

👉የካሳ ጾም
አዳምና ሔዋን ከገነት የተባረሩት ለውርደት ሞት ለሲዖል ባርነት የበቁት በመብል ምክንያት ነው፡፡በመብል ምክንያት የሞተውን የሰው ልጅ ጌታችን በፈቃዱ በፈጸመው ጾም ካሰው፤ መንፈሳዊ ረሃብን በረሃቡ ካሰለት፡፡ ስለዚህም የካሳ ጾም ተባለ።

👉የድል ጾም
አርዕስተ ኃጣውእ /ማቴዎስ 4/ ድል የተነሱበት በመሆኑ የድል ጾም ተብሏል.

👉የመሸጋገሪያ ጾም
ጌታችን ከሕገ ኦሪት ወደ ሕገ ወንጌል ሊያሸጋግረን የጾመው ጾም በመሆኑ የመሸጋገሪያ ጾም ተብሏል።

👉ጾመ አስተምህሮ
ጌታችን የጾመው ለትምህርት ነው፡፡ እርሱ መጾም ያለበት ሆኖ አይደለም፡፡ ስለዚህም ይህ ጾም ጾመ አስተምህሮ ይባላል፡፡ አርባ መአልትና አርባ ሌሊት ጾመ። ማቴዎስ 4፥2

👉የቀድሶተ ገዳም ጾም
ጌታችን ከከተማ ርቆ ከሰው ተለይቶ በመጾም ከከተማ ርቆ ከሰው ተለይቶ በብሕትውና መኖርን ቀድሶ የሰጠበት፣ የመጥምቁ ዮሐንስና የነቢዩ ኤልያስን ገዳማዊነት የባረከበት በመሆኑ የቀድሶተ ገዳም ጾም ተብሏል።

👉የመዘጋጃ ጾም
ሕዝበ እሥራኤል የፋሲካውን በግ ከመመገባቸው በፊት ዝግጅት ያደርጉ ነበር፡፡ እኛም ትንሣኤን ከማክበራችን፣ ሥጋና ደሙን ከመቀበላችን በፊት በጾምና በጸሎት ዝግጅት የምናደርግበት በመሆኑ የመዘጋጃ ጾም ተብሏል።

👉የሥራ መጀመሪያ ጾም
ጌታችን መድኃኒታችን ኢየሱስ ክርስቶስ የሰውን ሥጋ ለብሶ በምድር ሳለ ስብከት፣ ተዓምራት ከመጀመሩ በፊት የጾመው ጾም ነውና የሥራ መጀመሪያ ጾም ይባላል። ጾሙን የኃጢአት መደምሰሻ የድያብሎስ ድል መንሻ የመንግስተ ሰማያት መውረሻ የልቦና ማደሻ የእድሜ መለመኛ የፍቅር ያድርግልን ።

እንኳን ለታላቁ ለዐቢይ ጾም በሰላም አደረሰን። በሰላም አስፈጽሞ በቸርነቱ ለብርሃነ ትንሳኤው በሰላም ያድርሰን አሜን።

🏡በማኅበራዊ መገናኛዎቻችን ቤተሰብ ይሁኑ!
የዩቲዩብ ቻናል፡
http://youtube.com/@EMislene
የቴሌግራም ቻናል፡
https://t.me/EMislene
የፌስቡክ ገጽ፡
https://www.facebook.com/EMislene/
የኢንስታግራም ገጽ፡
https://www.instagram.com/egziabher_meslene28/
የቲክቶክ ገጽ፡
https://www.tiktok.com/@egziabhermeslene28
ድሕረ ገጽ፡
www.debregelila.org
              

📖መጻሕፍትን ስለ ማንበብ – በቅዱስ ዮሐንስ አፈወርቅ

📖መጻሕፍትን ስለ ማንበብ – በቅዱስ ዮሐንስ አፈወርቅ

ቅዱስ ዮሐንስ አፈወርቅ እንደሚነግረን መጻሕፍት ለሰው ልጆች የተሰጡት ጸጋ መንፈስ ቅዱስ ከእኛ እንዲርቅ ስላደረግነውና እግዚአብሔርን መስማት የምንችልበት መንፈሳዊ ጆሮ (እዝነ ልቡና) በማጣታችን ምክንያት ነው (ማቴ.፣ ድር. 1፡1)፡፡

ቃሉን በልቡናችን መጻፍ ስላቃተን በጽላትና በወረቀት ተጽፎ የተሰጠን ነው (ዝኒ ከማሁ)፡፡

አንድ ሰው በአጠገቡ ለሌለ ወዳጁ ደብዳቤ እንደሚጽፍለት ኹሉ፥ እግዚአብሔርም ሰውን ከመውደዱ የተነሣ ከእርሱ ለራቀው ለሰው ልጅ የላካቸው ደብዳቤዎች ናቸው – ቅዱሳት መጻሕፍት (ዘፍ.፣ ድር.2፡4)፡፡

ስለዚህ ቅዱሳት መጻሕፍት እግዚአብሔር ወደ አዳም መጥቶ ካነጋገረው፣ ቃኤልን ከገሠጸው፣ ከኖኅ ጋር ከተነጋገረው፣ የአብርሃምን ደግነት ከተቀበለበት አንጻር ኹለተኛ አማራጭ ናቸው፡፡

ጌታችንና መድኃኒታችን ኢየሱስ ክርስቶስም ወደዚህ ምድር ሲመጣ የሰው ልጆችን ከራሱ ጋር ሲያስታርቅ እንደ መጀመሪያው አፍ ለአፍ እንዲያናግራቸው ነበር (ማቴ.፣ ድር.1)፡፡

መንፈስ ቅዱስ በመጣ ጊዜ የነገራቸውን እንደሚያስታውሳቸው እንጂ የተጻፈ ነገር አለመስጠቱም ይህን የሚያስረዳ ነው (ዮሐ.14፡26)፡፡

ዳግመኛም ነቢያቱ “ሕጌን በልቡናቸው አኖራለሁ፥ በልባቸውም እጽፈዋለሁ፤ እኔም አምላክ እኾናቸዋለሁ እነርሱም ሕዝብ ይኾኑኛል” ብለው ትንቢት የተናገሩትም ለዚህ ነው (ኤር.31፡33)፡፡

ቅዱስ ጳውሎስም “ሥጋ በኾነ በልብ ጽላት እንጂ በድንጋይ ጽላት ያልተጻፈ” ያለውም ይህን እንደሚያስረዳ ሊቁ ያብራራል (2ኛ ቆሮ.3፡3)፡፡

ስለዚህ መጻሕፍት የተሰጡት በኹለት መሠረታዊ ምክንያቶች እንደ ኾኑ ሊቁ ያብራራል፡-

☞ የመጀመሪያው በጊዜ ሒደት አንዳንዶች ከመሠረታዊው ትምህርተ ክርስትና ፈቀቅ እያሉ ስለ ኼዱ ነው፡፡

☞ኹለተኛው ምክንያት ደግሞ በክርስቲያናዊ ሕይወታቸው ማለትም በምግባራቸው ንጽህናቸውነን እያቆሸሹ ስለ ኼዱ ነው፡፡

በመኾኑም መጻሕፍት ሲሰጡ እነዚህ በሃይማኖትም በምግባርም ከእውነት ወደ ሐሰት፣ ከጣባቢቱ ወደ ሰፊይቱ መንገድ ፈቀቅ ያሉትን ለመመለስና ሌሎችም ወደዚያ እንዳይሔዱ ለማስታወስ የተሰጡ ናቸው (ሉቃ.1፡1-4)፡፡

ከላይ ከተመለከትነው መረዳት እንደሚቻለው መጻሕፍትን ማንበብ የሕይወት (የድኅነት) ጉዳይ እንጂ የአማራጭ ጉዳይ እንዳልኾነ መገንዘብ ያስፈልጋል፡፡

ሐዋርያው ቅዱስ ጳውሎስ በመንፈስ ለወለደው ልጁ ለሊቀ ጳጳሱ ለቅዱስ ጢሞቴዎስ መጻሕፍትን ስለ ማንበብ፡- “እስክመጣ ድረስ በማንበብ ተጠንቀቅ፤ በማንበብ ተወስነህ ኑር” ካለው በኋላ ምክንያቱን ሲነግረውም፡- “ይህን ብታደርግ ራስህንም የሚሰሙህንም ታድናለህ” ያለውም ለዚህ ነው (1ኛ ጢሞ.4፡16)፡፡ ጳጳስ ቢኾንም፣ ሕመምተኛ ቢኾንም ከእናቱና ከሴት አያቱ እንደ ለመደው ማንበብ ነበረበትና !

ሊቁም፥ ቅዱሳት መጻሕፍትን በጥንቃቄና በብልሐት የምናነብ ከኾነ እውነተኛውን ሃይማኖትን እንደምንማር መንፈሳዊ ሕይወትንም መምራት እንደሚቻለን አሰተምሯል (ዮሐ.፣ ድር.30)፡፡

መጽሐፍ ቅዱስ በተቀመጠበት ላይ ዲያብሎስ ወደዚያ መቅረብ ካልተቻለው፥ ቃሉ በእኛ ዘንድ ሲኖርም አጋንንት ወደ እኛ አይቀርቡም፡፡

ክፉ ሰሚዕ ብሎም ርእይ አጋንንትን ወደ እኛ እንዲቀርቡ እንደሚያደርግ ኹሉ፥ ደግ ሰሚዕ ብሎም ርእይም ጸጋ መንፈስ ቅዱስ እንድናገኝ ያደርጋል (ዮሐ.፣ ድር. 32)፡፡

ስለዚህ ከዚህ ከለመለመ የአበባ መስክ እንደ ንብ መቅሰም ፍሬውንም በየጊዜው መብላት እጅግ ያስፈልጋል (ሐውል.፣ ድር. 1)፡፡ ከምግበ ሥጋ ረሃብ ይልቅ ቃለ እግዚአብሔርን መራብ ይከፋልና፤

ቅዱሳት መጻሕፍት ማለት የመድኀኒት ሳጥኖች ናቸው፡፡ በመኾኑም አንድ ሰው ለሚያጋጥመው ማንኛውም ዓይነት መከራና ኀዘን ወደ እነርሱ ኼዶ መድኀኒትን ለራሱ ሊወስድ ይገባል (ቆላ.፣ ድር.9)፡፡

ጠላታችን ዲያብሎስ ረቂቅ ነው፡፡ እርሱን ድል የምናደርግበት መሣሪያም ረቂቅ ሊኾን ይገባል፡፡ ቅዱሳት መጻሕፍትም ረቂቃን መንፈሳዊ ትጥቆች ናቸው፡፡ እነዚህን አለመታጠቅ ማለት ወደ ጦር ሜዳ ያለ ትጥቅ እንደ መኼድ ነው (ቆላ.፣ ድር.9)፡፡ ማደግ የምንችለው እነዚህን በአግባቡ ስንታጠቅ ነው፡፡

ቅዱሳት መጻሕፍት መብራቶች ናቸው፡፡ እነዚህን መብራቶች የማይጠቀም ሰው በምንፍቅናና በምግባር ጨለማ ይጓዛል፡፡ ቢደክምም እንኳን ድካሙ ረብ የለሽ ድካም ይኾንበታል (ሮሜ.፣ መቅድም)፡፡

ለክርስቲያኖች ቅዱሳት መጻሕፍትን አለማንበብ እጅግ ውርድት ነው፡፡ አሕዛብ ስለ ፈረስ ግልቢያ ቢጠይቁአቸው የተጨዋቾቹን ስም፣ ጨዋታው የሚካኼድበት ከተማ፣ የተጨዋቾቹ ብቃት፣ ከተጫዋቾቹም አልፈው ስለ ፈረሶቻቸው ሳይቀር ጠንቅቀው ያውቃሉ፡፡ በቤ.ክ. የሚካኼደውን ነገር የማያውቁ ክርስቲያኖች ግን አሉ (ዮሐ.፣ ድር. 32)፡፡

እንደ ሊቁ አነጋገር ለስሕተት ትምህርት መግነን፣ ለአሕዛባዊ ሕይወትም መበራከት ተጠያቂዎቹ ክርስቲያኖች ናቸው፡፡ ክርስቲያኖች እውነትን ይዘው እውነት እንድታበራ ማድረግ ሲገባቸው ተውጠውና በቸልታ ስለሚኖሩ ከላይ የጠቀስናቸው እንዲበዙ አድርጓቸዋል፡፡

አሕዛብ አንድ የሚወዱት ተጫዋች ሲዘለፍ ዝም አይሉም፡፡ ስለ ተነቀፈው ዘፋኝ ወይም ተጫዋች ይከራከራሉ፡፡ ነቃፊውን ያሳምኑ ዘንድም ረዘም ያለ ክርክርን ያደርጋሉ፡፡ ክርስቲያኖች ግን በክርስትና ላይ እንደዚህ ያለ ነቀፋ ሲደርስ ወይ አብረው ይስቃሉ፤ ወይም አንገታቸውን ደፍተው ዝም ይላሉ፡፡ ይህም የእግዚአብሔርን ቁጣ የሚቀሰቅስ ነው (ዮሐ.፣ ድር. 17)፡፡

መጻሕፍትን አለማንበብ ክሕደት የተባለ ልጅ እንዲወለድ፣ የተበላሸ ሕይወት እንዲኖር፣ እንደዚሁም ነገሮች ኹሉ ምስቅልቅላቸው እንዲወጡ ያደርጋል (ሀብታምና ድኻ፣ ድር. 3)፡፡

ስለዚህ ቅዱሳት መጻሕፍትን ማንበብ የድኅነት – የዘለዓለም ሕይወት ጉዳይ መኾኑን በመገንዘብ ዕለት ዕለት ማንበብና መዳናችንንም መፈጸም ይገባናል !

✞ ይህን እንድናደርግ ጌታችንና መድኃኒታችን ኢየሱስ ክርስቶስ በቸርነቱና ሰውን በመውደዱ ያድለን፥ አሜን !
(ጥንቅር ገብረ እግዚአብሔር ኪደ)

🏡በማኅበራዊ መገናኛዎቻችን ቤተሰብ ይሁኑ!
የዩቲዩብ ቻናል፡
http://youtube.com/@EMislene
የቴሌግራም ቻናል፡
https://t.me/EMislene
የፌስቡክ ገጽ፡
https://www.facebook.com/EMislene/
የኢንስታግራም ገጽ፡
https://www.instagram.comS/egziabher_meslene28/
የቲክቶክ ገጽ፡
https://www.tiktok.com/@egziabhermeslene28
ድሕረ ገጽ፡
www.debregelila.org

ማርያም እንተ ዕፍረት

ይችም ቅድስት አስቀድማ ኑሮዋን በዝሙት ያሳለፈች ኃጢኣተኛ ነበረች። እርሷም ጐልማሶችን ወደርሷ ትማርካቸው ዘንድ በየራሱ በሆነ ሽልማትና ጌጥ ትሸለም ነበር። በአንዲትም ዕለት እንደ ልማድዋ ተሸልማ አጊጣ ሽቱም ተቀብታ ፊቷን በመስታዋት ተመለከተች የጉንጯ ቅላትና ደም ግባቷ፡የዓይኗም ወገግታና ጥራት ማማሩን አይታ እያደነቀች አንድ ሰዓት ያህል ቆየች ከዚህም በኋላ በጎ ኀሳብ በላይዋ መጣ ሞትንና የዚህን ዓለም ማለፍ አሰበች። የክብር ባለቤት ጌታችን ኢየሱስም ኃጢኣተኞችን እንደ ሚቀበልና ኃጢአትንም እንደሚያስተሰርይ ሰምታ በዝሙት የሰበሰበችውን ሦስት መቶ ወቄት ወርቅ አላት ። ያላትን ይዛ ኼዳለች።

ዲያብሎስም ታመልጠኛለች ይኽነን ጊዜ ላስትታት ብሎ ቀድሞ ከምታውቀው አንዱን መስሎ፡በመልከ፡መልካም ወጣት አምሳል ከመንገድ ላይ ቆይቷት “ወዴት ትኼጃለሽ” አላት፤ ዝም አለችው፤ “አንቺ ባትነግሪኝ እኔ እነግርሽ የለም፤ እንግዳ ወንድ መጥቶብሽ ለርሱ የምትቀቢው ሽቶ ልትገዢ ትኼጃለሽ” አላት፤ “አዎን” አለችው፤ ይኽም አይደለም “ፍቅሩ ያላለቀበት ወንድ መጥቶብሽ ለርሱ የምትቀቢው ሽቱ ልትገዢ ትኼጃለሽ” አላት፤ “አዎን” አለችው። ይኽም አይደለም “በጥቂት ገንዘብ ብዙ ገንዘብ የሚሸጥ ነጋዴ መጥቶብሽ ለርሱ የምትቀቢው ሽቱ ልትገዢ ትኼጃለሽ” አላት፤ “አዎን” አለችው። ኹሉንም “አዎን አዎን ትያለሽ ማናቸው ነው ትክክል” አላት፤ ርሷም ተገልጾላት “እንግዳ ወንድ መጥቶብሽ አልከኝ፤ ከዚኽ ዓለም ልዩ የሚኾን ጌታ መጥቷል፤ ፍቅሩ ያላለቀበት ወንድ መጥቶብሽ ላልከኝ የሰው ፍቅር አገብሮት ሊሞት መጥቷል፤ በጥቂት ገንዘብ ብዙ ገንዘብ የሚሸጥ ነጋዴ መጥቶብሽ ላልከኝ “አዎን በጥቂት ትሩፋት ብዙ ክብር የሚሰጥ ኢየሱስ ክርስቶስ መጥቷልና ለርሱ የምቀባው ሽቱ ልገዛ እኼዳለኊ”ብላ ስሙን ብትጠራበት እንደ ትቢያ በኖ እንደ ጢስ ተንኖ ጠፍቶላታል፤ ከዚኽ በኋላ ሃድኖክ የሚባል ባለጸጋ ነጋዴ አለ፤ ኼዳ “ለነገሥታት የሚገባ ሽቱ አምጣ” ብላ ሦስት መቶ ወቄት ወርቅ ሰጠችው፤ በአገራቸው “ሐሰት የለምና ይኽን ያኽልስ የሚያወጣ የለኝም” አላት፤ እርሱ የማያውቀው እናቱ የምታውቀው ዳዊት ሰሎሞን ተቀብተውለት የተረፈ ነበርና ከእንዲኽ ያለ ቦታ አለና ሽጥላት ብላው ሽጦላት አምጥታ ቀብታዋለች፤ ይኽም ብቻም አይደለም ጌታ ከእናቱ ጋር ግብጽ በተሰደደበት ጊዜ ሰሎሜም ፈያታዊ ዘየማንም ይዘውት ሳለ ከልብሱ ላይ ወዛ ቢያጥቡት ሰፈፈ ይኽም በዕቃ አኑረውት ነበርና ያም ተጨምሮበታል፤ በቢታንያ በለምጻሙ በስምዖን ቤት ሳለ ዋጋው እጅግ የበዛውን ይኽነን ሽቱ የመላው የአልባስጥሮስ ብልቃጥ ይዛ ወደ ርሱ ቀርባ በማዕድም ተቀምጦ ሳለ በራሱ ላይ አፍስሳዋለች፤ ጌታችንም ለደቀ መዛሙርቱ “ይኽነን ሽቱ በሰውነቴ ላይ አፍስሳ ለመቃብሬ አደረገች፤ እውነት እላችኋለኊ ይኽ ወንጌል በዓለም ኹሉ በማናቸውም ስፍራ በሚሰበክበትእ ርሷ ያደረገችው ደግሞ ለርሷ መታሰቢያ እንዲኾን ይነገራል” ብሏታልና። (የካቲት6 ስንክሳርና መጽሐፈ ተአምኆ ቅዱሳን ንባብና ትርጓሜው መጋቢ ሐዲስ ሮዳስ ከጻፈው።)

ቀድሞ በዝሙት የኖረችበትን አስከፊ ሕይወት በመተው በቆራጥ ኅሊና ፍጹም ንስሓ ገብታ ገንዘቧን ሁሉ አውጥታ እጅግ ውድ የሆነውን ሽቱ ገዝታ ጌታችንን ስትቀባው ጌታችንም በፍጹም ንስሓዋ ተደስቶ ‹‹እውነት እላችኋለሁ ይህ ወንጌል በዓለም ሁሉ በማናቸውም ስፍራ በሚሰበክበት እርሷ ያደረገችው ደግሞ ለእርሷ መታሰቢያ እንዲሆን ይነገራል›› በማለት አስደናቂ ትእዛዙን የሰጠላት ቅድስት ናት፡፡ ማቴ 26፡6፡፡ ይህንን የጌታችንን ትእዛዝ ልብ ብለን ካየነው በውስጡ ብዙ ምሥጢራትን የያዘ ነው፡፡ በሐዲስ ኪዳን ስለ ቅዱሳን ለመጀመሪያ ጊዜ የሰበከው ራሱ መድኀኔዓለም ክርስቶስ መሆኑን በዚሁ ልብ ይሉታል፡፡ ማርያም እንተ ዕፍረት የቀድሞውን ሕይወቷን ስናየው ሁልጊዜ ከነጭ ሐር የተሠራ ልብስ የምትለብስ፣ ከሽቱ ሁሉ ይልቅ የሚበልጥ ውድ ሽቱን ትቀባ ነበር፡፡ በወርቅም ታጌጥና በክፉ ሥራ ሁሉ ጸንታ የምትኖር ሴት ነበረች፡፡ ጠላት ዲያብሎስም የዚህን ዓለም ጣዕም አጣፈጠላት፡፡ ነገር ግን ስለዚህች ሴትና ስለ ኃጥአን ሁሉ ጌታችን ከጌትነቱ ከፍታ ሳይለወጥ ከልዑል ዙፋኑ ወረደ፡፡ በሰዎች መካከልም ከእነርሱ እንደ አንዱ እየተመላለሰ አስተማረ፡፡

አንድ ቀን እንደልማዷ ማርያም እንተ ዕፍረት ነጭ ሐር ለብሳ፣ አጊጣና ተኳኩላ ፊቷን በመስታወት አይታ ውድ ሽቱ ተቀባች፡፡ ጉንጮቿ ቀያዮች፣ ዐይኖቿ የተዋቡ ሆነው ደም ግባቷ በጣም አማራት፡፡ እንደዚህ እየተመለከተች አንድ ሰዓት ያህል ቆየች፡፡ ከዚህ በኋላ መልካም አሳብ በእርሷ ላይ አድሮ እንዲህ አለች፡- ‹‹ይህን ሁሉ ታስወግድ ዘንድ መልኬንም ትለውጥ ዘንድ ሞት ትመጣ የለምን? ይህ መልካም ሽታ ወደ ትልነትና ወደ መሽተት ይለወጣል፡፡ ይህስ ብርታት ፍጻሜው ጉስቁልናና ድካም አይለምን? ሊቀርቡኝ የሚወዱትስ የሚርቁኝ አይደሉምን? እንደዚህስ ከሆነ ዘለዓለም ከጥፋትና ከኩነኔ በቀር እንግዲህ ምን አገኛለሁ? የዚህን ዓለም ገንዘብ ብገዛ፣ ብነዳ ከድካም በዐይኖቼም ዕንባን ከማፍሰስ የሚያድነኝ ይኖራልን? ወይስ ይህ ሁሉ ከሞት ያድነኝ ዘንድ ይችላልን? ነፍሴ ሆይ! እንግዲህ ሁሉን ለሚገዛ ጌታ ምን ትመልሻለሽ? ከእውነተኛው ፈራጅ ዘንድ በአንቺ ላይ ትእዛዝ በመጣ ጊዜ እንዴት ትሆኛለሽ? ነፍሴ ሆይ! ንስሐ በሌለበት፣ ነፍስ የተናቀች በምትሆንበት ጩኸት፣ ልቅሶና ጩኸት ባለበት ቦታ የሚረዳሽ ማነው? ነጭ ሐርና ኅብሩ ልዩ ልዩ የሆነ ልብስ በመልበስ ደስ የምትሰኝ ሥጋዬ ሆይ በክብር ባለቤት በእግዚአብሔርና በመላእክቱ ፊት ራቁትሽን በቆምሽ ጊዜ እንዴት ትሆኛለሽ? ነፍሴ ሆይ! በዚህ ዓለም የተደሰችው ምን ይጠቅምሻል?…›› እያለች ራሷን መመርመር ጀመረች፡፡
ከዚህ በኋላ በማመን ጸንታ እንዲህ ብላ አሰበች፡- ‹‹ስለ ኃጥአን ወደዚህ ዓለም የመጣ ስለ እነርሱ በመካከላቸው እንደሰው የተመላለሰ ይህ አይደለምን? የኃጢአተኛን መመለሱን ነው እንጂ ሞቱን አልሻም ያለስ እርሱ አይደለምን? ነፍሴ ሆይ ምሕረትስ ቅርብ ናት፣ ባለመድኃኒትም የራቀ አይደለም፣ ሌላ መድኃኒትሽን ተስፋ የምታደርጊበትስ አለን? መቶ በግ ያለው ከእነርሱም አንዲቱ ቢጠፋ ዘጠና ዘጠኙን በበረሃ ትቶ የጠፋውን እስኪያገኝ ድረስ ሊፈልጋት የሚሄድ አይደለምን? ባገኛትም ጊዜ ደስ ብሎት በጫንቃው ይሸከማታል፣ ካልጠፉት ከዘጠና ዘጠኙ ይልቅ በእርሷ ደስ የሚሰኝ አይደለምን? እናንት ደካሞች ሸክማችሁ የከበዳችሁ ሁሉ ወደ እኔ ኑ እኔም አሳርፋችኋለሁ የሚል እርሱ መድኃኒት ክርስቶስ ነው፡፡ እንደዚህ ከሆነ ለምን እሰንፋለሁ? ለምንስ ንስሓ አልሻም? እነሆ ከዛሬ ጀምሮ ወደ እርሱ ሄጄ ራሴን በፊቱ እክዳለሁ›› ብላ ካሰበች በኋላ ተጽናናችና በፍጥነት ተነስታ ገንዘቧን፣ የገዛችውን ወርቋንና ብሯን ሁሉ ሰበሰበች፡፡

‹‹ምን አደርጋለሁ ይህን ገንዘብ ወስጄ ብሰጠው አይቀበልም እርሱ ፈጣሪ፣ ጌታና የዓለም መድኃኒት ነውና›› ብላ አሰበች፡፡

ከዚህ በኋላ ሽቱ ወደሚሸጥ ሰው ፍለጋ ሄደች፣ ያን ሰው ከጥንት ጀምሮ ታውቀው ነበርና ከእርሱ ዘንድ ዋጋው እጅግ ውድ የሆነ ሽቱን ገዛችና በደስታ ስትሄድ እነሆ ሰይጣን በወርቅ ያጌጠች ሴት መስሎ ወደ እርሷ መጣ፡፡ የዚህን ዓለም ምኞት እያጣፈጠ ይነግራት ጀመር፡፡ መብላትን፣ መጠጣትን፣ ያማረ ልብስ መልበስን፣ ሽቱ መቀባትን… ይህን ሁሉ ያሳስባት ጀመር፡፡ ጌታችንም በይቅርታው ብዛት የጠላት ዲያብሎስን ክፋት ገለጠላትና ‹‹ለበደልና ለኃጢአት ሥራ የተዘጋጀሁ አድርገኸኛልና ኃፍረትና ጉስቁልናንም በእኔ ላይ አምጥተሃልና አንተ ሰይጣን ከእኔ ወግድ›› ብላ በቁርጥ ነገር መለሰችለት፡፡ ጠላት ዲያብሎስም የሃይማኖቷን ጽናት ባየ ጊዜ ከእርሷ ሽሽቶ ፈሪሳዊ ወደሚሆን ስምን ወደሚባል ሰው ዘንድ ሄዶ ልቡናውን ያውከው ጀመር፡፡ እርሱም ጌታን በቤቱ ማዕድ ይመገብ ዘንድ ጋብዞት ነበርና፡፡ በልቡናው ያደረው ክፉ ሰይጣንም እንዲህ ብሎ እንዲናገር አደረገው፡- ‹‹ይህስ ነቢይ ቢሆን ይህች የምትዳስሰው ሴት ማን እንደሆነች እንዴትስ እንደነበረች ኃጢአተኛ እንደነበረች አያውቅም ነበር? ብሎ እንዲያስብ አድረገው፡፡››

“ከንቱ ነገርን ስትመለከቱ የኖራችሁ ዐይኖቼ ሆይ! ጌታን ታዩ ዘንድ ተሰጣችሁ፤ ርኩስን የምትዳስሱ እጆቼ ሆይ! የሰማያዊ ጌታን እግር ትዳስሱ ዘንድ ሰጣችሁ፤ ኃጢአተኛ ነፍሴ ሆይ! እነሆ ፈጽሞ ከፍ ያለ ባለሟልነትን አገኘሽ፤ ስላደረገልኝ ምን እከፍለዋለሁ› እያለች ታላቅ ልቅሶን አለቀሰች፡፡ የጌታንም እግር ይዛ በእንባዋ እያራሰች በፀጉሯ ታብስ ጀመር፡፡ አስቀድማ በልቧ እንዲህ ብላ አስባለችና ‹በጌታ ፊት ባለሟልነትንስ ካገኘሁ ወደ እርሱ ዘንድ እንድቀርብ ያደርገኛል፡፡ በሥራዬም ክፋት ካበረረኝ ግን ዳግመኛ አልድንም› ብላ አስባ ነበር፡፡ ከጌታም ባለሟልነትን ባገኘች ጊዜ ጨክና በራሱ ላይ ሽቱውን ጨመረች፡፡ ከዚህ ሁሉ ጋርም ልቅሶንና ልመናን አላቋረጠችም፡፡ የእግዚአብሔር ስጦታ በእርሷ ላይ እንደበዛ ባየ ጊዜ ጠላት ዲያብሎስ በእርሷ ላይ ታላቅ መቅናትን ቀናባት፡፡ ተቆጥቶም ወደ ስምዖን ተመልሶ ልቡን አወከው፡፡ ‹ይህስ ነቢይ ቢሆን ኖሮ ይህቺ የምትዳስሰው ሴት ኃጢአተኛ እንደሆነች ያውቅ ነበር› እንዲል አደረገው፡፡

ጌታችንም ስምዖንን ሁሉ ከእርሱ እንዳልተደበቀና ሀሳቡንም እንዳወቀበት እንዲረዳና እግዚአብሔርም በደለኞችን ማዳንና ከኃጢአታቸው ማንጻት እንደሚችል ያውቅ ዘንድ እንዲያስተውል አደረገው፡፡›› ሉቃ 7፡36-50፡፡

ይህ እጅግ ውድ ዋጋ ያለው የማርያም እንተ ዕፍረት ሽቱ መነሻ መገኛው ራሱ ጌታችን ነው፡፡ ይኸውም ነገሩ እንዲህ ነው፡- ‹‹ርጉም በሆነ በሄሮድስ ዘመን አረጋዊ ዮሴፍ ሕፃኑንና እመቤታችንን ይዞ ወደ ምድረ ግብፅ ሲሄዱ በመንገድ ላይ አንድ ፈረሰኛ ሰው አገኛቸውና ከእነርሱም ጋር ይሄድ ጀመር፡፡ እመቤታችን ድንግል ማርያምን በመንገድ እንደደከመች ባየ ጊዜ ሕፃኑን አንሥቶ ፈረሱ ላይ አውጥቶ በጭኑ ታቀፈው፡፡ ያንጊዜም በፈረሱ ላይ የመልካም ሽቱ መዓዛ ይሸት ነበር፡፡ ወዙም ሲንጠፈጠፍ ባየው ጊዜ መልካም ሽታም እንዳለው ባየ ጊዜ ሻሹን ከራሱ ላይ አውልቆ የሕፃኑን ወዝ ጠረገለትና ቆይቶ ሕፃኑን ለእናቱ ሰጥቷት በጐዳናው ሄደ፡፡ እቤቱም በደረሰ ጊዜ ልብሱን ታጥበው ዘንድ ለእናቱ ሰጣት፣ እርሷም በሻሹ ላይ ያለውን መልካም ሽታ ካየች በኋላ በማጠቢያ ባስቀመጠችው ጊዜ ከሻሹ ውስጥ ሽታው እጅግ የሚያስደስት መልካም ዘይት ወጣ፡፡

እርሷም ደስ ተሰኝታ ከቅባቷ ጋር በማሰሮ አድርጋ አስቀመጠችው፡፡ ያም ዘይት ባለበት በዚያች መንገድ የሚሄዱ ሰዎች ሁሉ የሽቶውን መዓዛ ያደንቁ ነበርና ስለዚህ ያች ሴት ከአገረ ገዥው ጋር እንዳያካስሷት ፈርታ በብዙ ገንዘብ ሽቱ ከሚገዙ ነጋዴዎች ለአንዱ ሸጠችለት፣ እርሱ ግን ምን እንደሆነ አያውቅም ነበር፡፡ ያም ዘይት ብፅዕት ማርያም እንተ ዕፍረት እስክትምጣ ድረስ ለብዙ ዘመን በእርሱ ዘንድ በዚያ ኖረ፡፡ ማርያም እንተ ዕፍረትም ከእርሱ እጅግ ውድ በሆነ ዋጋ ገዝታ በጌታችን ሥጋ ላይ አፈሰሰችው፡፡ እነሆም ይህ ዋጋው እጅግ ውድ የሆነው ሽቱ ከጌታችን ዘንድ እንደተገኘ የታወቀ ሆነ፡፡ ያም በፈረስ ላይ ተቀምጦ ጌታችንን በሕፃንንቱ በጭኑ አቅፎ የያዘው ፈረሰኛ ሰው ጌታችን በቀራንዮ አደባባይ በእንጨት መስቀል ላይ ተሰቅሎ ሳለ ያመነበት ፊያታዊ ዘየማን (ጥጦስ) ነው፡፡››

ማርያም እንተ ዕፍረት ጌታችን ቃልኪዳን ከገባላት በኋላ ዐርፋለች፡፡ የንግሥ በዓላቶቿ መጋቢት 21 ቀን የጌታችንን እግር ሽቱ የቀባችበት ሲሆን የካቲት 6 ቀን ደግሞ ያረፈችበት ዕለት ነው፡፡ ጥቅምት 1 ዓመታዊ መታሰቢያ በዓሏ እንዲሆን አባቶቻችን ሕግ ሠሩልን፡፡ የማርያም እንተ እፍረትን ገድሏንና ድርሳኗን የጻፈላት ታላቁ የቤተክርስቲያናችን ሊቅ ቅዱስ ዮሐንስ አፈወርቅ ነው፡፡
የቅድስት ማርያም እንተ ዕፍረትን ረድኤት በረከታቸውን ያሳድርብን፣ በጸሎታቸው ይማረን፡፡( ገድለ ቅድስት ማርያም እንተ ዕፍረት፣ የጥቅምትና የካቲት ስንክሳር)

🏡በማኅበራዊ መገናኛዎቻችን ቤተሰብ ይሁኑ!
የዩቲዩብ ቻናል፡
http://youtube.com/@EMislene
የቴሌግራም ቻናል፡
https://t.me/EMislene
የፌስቡክ ገጽ፡
https://www.facebook.com/EMislene/
የኢንስታግራም ገጽ፡
https://www.instagram.comS/egziabher_meslene28/
የቲክቶክ ገጽ፡
https://www.tiktok.com/@egziabhermeslene28
ድሕረ ገጽ፡
www.debregelila.org

በበገና እና መሰንቆ ትምህርት አባላትን አስመረቀ

የእግዚአብሔር ምስሌነ ሰንበት ት/ቤት መዝሙር ክፍል
በበገና እና መሰንቆ ትምህርት ሲያስተምራቸው የነበሩ አባላትን አስመረቀ

*,,,🌼💥🌼 ***
የደብረ ገሊላ ዐማኑኤል ካቴድራል እግዚአብሔር ምስሌነ ሰ/ት/ቤት ከሚያከናውናቸው ዓበይት አገልግሎት መካከል አንዱ የሆነው የዜማ መሣሪያዎች ትምህርት ነው። ዘንድሮም እንደ አምላክ ፈቃድ ጥሪ የተደረገላቸው እንግዶችና የሰንበት ት/ቤቱ አባላት በተገኙበት እሑድ ታህሳስ 16, 2015 ዓ.ም በበገና በመሰንቆ ያሠለጠናቸውን 45 ሠልጣኞች በታላቅ ድምቀት አስመርቋል።
ሠልጣኞች በየተመረቁበት የዜማ መሣሪያ ዝማሬን ያቀረቡ ሲሆን ለመምህራንና ለሰንበት ት/ቤቱ ስጦታ አበሮክተዋል። ለተመራቂዎችም የምስክር ወረቀት ተበርክቶላቸዋል።
Egziabher Meslene
እግዚአብሔር ምስሌነ
በእነዚህ ገጾች ቤተሰብ ይሁኑን
የዩቲዩብ ቻናል፡
https://youtu.be/qprpfEqVSG4
የቴሌግራም ቻናል
https://t.me/EMislene
የፌስቡክ ገጽ፡
https://www.facebook.com/EMislene/
የኢንስታግራም ገጽ፡
https://www.instagram.com/egziabher_meslene28/
ድሕረ ገጽ፡
www.debregelila.org

ብሥራተ ገብርኤል

ትመስሊ ፊደለ
ወትወልዲ ወንጌለ
ወታገምሪ መስቀለ
ፊደልን ትመስያለሽ
ወንጌልን ትወልጃለሽ
መስቀልን ትወስኛለሽ
__
መጽሐፈ ሰዓታት

  እንኳን ለጌታችን የጽንሰት በዓል
      በሰላም አደረሳችሁ!
     _______________
 የደብረ ገሊላ ዐማኑኤል ካቴድራል እግዚአብሔር ምስሌነ ሰንበት ት/ቤት
     እግዚአብሔር ምስሌነ
   EGZIABHER MESLENE
    ¯¯¯¯¯¯¯¯¯¯¯¯¯¯¯¯¯¯¯¯¯¯¯
  join  us on t.me/EMislene

እንኳን ለጻድቁ አቡነ ገብረ መንፈስ ቅዱስ ዓመታዊ ክብረ በዓል በሰላም አደረችሁ፡፡

ቅዱስ አባታችን በምልጃቸው ሀገራችንን ሰላም ያድርጉልን፡፡

በእግዚአብሔር ምስሌነ ሰንበት ት/ቤት
የዩቲዩብ ቻናላችን ያልተቀላቀላችሁ እየው ልንኩ፡
https://www.youtube.com/channel/UCNjEKBSeBmsSGrHdlN3aSpQ

Subscribe_and_share

“እንደማይሰጥ ይዘገያል” ቅዳሴ ሠለስቱ ምዕት


👉ጸሎት የምንጸልይባቸው የየራሳችን ምክንያቶች አሉን። እጅግ ብዙ። ጥሩ የትምህርት ውጤት፣ ጤና፣ የተሳካ ሥራ፣ መልካም ትዳር፣ ከህይወት ፈተና መራቅ፣ መልካም ቤተሰብ፣ ልጅ፣ ለንስሓ እና ቅዱስ ቍርባን መብቃት ወዘተ… የሰው ልጅ በዘመናት ለአምላኩ ከጸለያቸው ጸሎቶች መካከል ይገኙበታል። አዳም ከጸጋ ከተራቆተ በኋላ ከገጠመው የሕሊና ሕመም (የቀደመውን ደስታ እና ሰላም ማጣት) የተነሣ መንግሥተ ሰማያትን ይለምን ነበር። ሰው ለእግዚአብሔር ያለው ፍቅር አገብሮት መጸለዩ እንዳለ ሆኖ ትልቁ የጸሎት መነሻ ግን ማጣት ነው። የቀደመ ሰላም፣ ፍቅር፣ ትዳር፣ ልጅ፣ ጤና፣ የተስተካከለ ሕይወት በማጣት እግዚአብሔር ደጅ ለጸሎት የቆምነው እልፍ ነን።
👉አዳም መንግሥተ ሰማያትን፣ የቀደመ ክብሩን፣ የቀደመ ሰላሙን፣ የቀደመ ጤንነቱን አጥቶ ፤ ለንስሓ እና ለጸሎት እንደቆመ ማለት ነው። ጸሎቱ ቅድመ እግዚአብሔር ደርሶ ተሰማለት። ለመልሱ ተግባራዊነት ደግሞ 5500 ዘመንን ቆየ። እንደቆይታው ግን የማይፈጸም ይመስል ነበር። እግዚአብሔር መልሱን ለመስጠት 5500 ዘመን መቆየቱ የራሱ ምክንያት አለው! ልክ የእኛን ጸሎት መልስ ለመስጠት እንደሚዘገየው ማለት ነው። ብዙዎቻችን ከመዘግየቱ የተነሣ ተስፋ ከማጣት ጀምሮ እግዚአብሔርን እስከመካድ እንደርሳለን። ለአዳም 5500 ዘመን እንደቆየበት ምክንያት ለኛም ጥያቄ መዘግየት ምክንያቶች ምንድናቸው ሚለውን ለማሰብ ለአዕምሯችን ዕድል አንሰጠውም። ይልቁን የመልሱን መዘግየት እንደ መቅረት አድርገን እንገነዘባለን። ለረጅም ጊዜ ደጁ ተመላልሰን የጸለይነው ጸሎት መልስ አልባ መስሎ ይሰማናል።
👉እግዚአብሔር እኛ በፈልገነው ወቅት መልሱን ስላልሰጠን ተስፋ እንቆርጣለን። እግዚአብሔር ጨርሶ የተወን ያክል ይሰማናል።የሠለስቱ ምእት ቅዳሴ ይህን ነገር ሲገልጥ “እንደማይሰጥ ይዘገያል” ይለዋል እግዚአብሔርን። እውነት ነው እግዚአብሔር መስጠቱ ለማይቀር ይዘገያል። የሚዘገይበትም የራሱ ምክንያቶች አሉት። እኛም ለመረዳት መሞከር ያለብን እነዚያን ምክንያቶች እንጂ መዘግየቱን እንደመቅረት መረዳት የለብንም። @ማኅበረ ቅዱሳን ሕዝብ ግንኙነት