ተፈጥሮ እንኳን አያስተምራችሁም: 1ቆሮ 11:15

ተፈጥሮ እንኳን አያስተምራችሁም: 1ቆሮ 11:15

ነገረ ድኅነታዊውን የዓለምን ታሪክ ለሁለት እንክፈል ካልን የምንከፍለው በሁለት ነው። የመጀመሪያው ዓለም አስቀድሞ የተፈጠረበት ሲሆን ሁለተኛው ደግሞ ዓለም የታደሰበትና እንደገና የተወለደበት ዘመን ነው።

ዓለም የተፈጠረው በስድስት ቀናት ሲሆን ይሄም እግዚአብሔር ዓለምን ለማዳን የጠበቃቸው የስድስት ሺህ አመታት (5500 ዘመን) ምሳሌ መሆናቸውን ቤተክርስቲያን ታስተምራለች። በእነዚህ ስድስት ቀናት የተፈጠሩ ፍጥረታት የነገረ ድኅነት ማሳያ መሆናቸውን በወፍ በረር ለመመልከት እንሞክራለን።

እሑድ

የብሉይ ኪዳን መፅሐፍ የሚጀምረው በሥነ ፍጥረት ትረካ ነው። መጽሐፉ የሥነ ፍጥረት ትረካውን ለመጀመር የሚጠቀማት ዓረፍተ ነገር “በመጀመሪያ እግዚአብሔር ሰማይና ምድርን ፈጠረ” የምትል ናት። ይህች ዓረፍተ ነገር የእግዚአብሔርን አምላክነት፣ ከሃሊነትና ፈጣሪነት የምታውጅ አዋጅ ናት። የቤተክርስቲያን ሊቃውንት ሊቀ ነብያት ሙሴ መጽሐፉን በጻፈበት ቋንቋ ልዩ ምሥጢር እንዳለው ይነግሩናል እንመልከተው:-
בְּרֵאשִׁית בָּרָא אֱלֹהִים אֵת הַשָּׁמַיִם וְאֵת הָאָרֶץ‎ 
(ቤሬሺት ባራ ኤሎሂም ኤት ሃሽማይም ቬት ሃ’ርትዝ)

እንደ ሊቁ ጠርጡለስ ያሉ ሊቃውንተ ቤተክርስቲያን በመጀመሪያ የሚለው ቃል ከጊዜ ገላጭነቱ ባሻገር ሐዋርያው ቅዱስ ጳውሎስ የፍጥረት መጀመሪያ ብሎ የጠራውን መነሻ በማድረግ መጀመሪያ የሚለው ቃል የኢየሱስ ክርስቶስ ስሙ ነው ይላሉ። በዮሐንስ ወንጌል ላይም ሥጋን የተዋሐደ ቃል እርሱ ክርስቶስ እንደሆነ ሲያጠይቅ በመጀመሪያም ቃል ነበረ ብሎ የቃል (የክርስቶስ)ን መጀመሪያነት ይናገራል። “ባራ/ፈጠረ” የሚለውም ቃል በእብራይስጥ ለእግዚአብሔር ብቻ የሚነገር አምላካዊ የመፍጠር ችሎታን የሚናገር ቃል ነው።

የዕብራይስጡ ኤሎሒም የሚለው ቃል ደግሞ በሐዲስ ኪዳን በገሃድ ስለተነገረው ስለ ምሥጢረ ሥላሴ ይናገራል ምክንያቱም ኤሎሂም የኤል (አምላክ) ብዙ ቁጥር አመልካች / Plural/ ሲሆን ፈጠረ የተባለበት ቃል ባራ ግን ነጠላ ቁጥር /singular/ መሆኑ የእግዚአብሔርን ልዩ ሦስትነት አመልካች ነው። ለአያያዥነት የምትገባው “ኤት” ከፊደል አፃፃፏ ባሻገር ባላት የዕብራይስጥ ሥዕላዊ መግለጫ ደግሞ እጅግ ድንቅ ምስልን ይሰጠናል። ኤት የአሌፍና የታው ፊደላት ድምር ሲሆን አሌፍ በሥዕላዊ መግለጫ የበሬ አንገት አይነት ምልክት ሲኖረው ታው ደግሞ የመስቀል ምልክት አለው። ይሄም የኢየሱስ ክርስቶስን በመስቀል የመሰዋት ምስጢር የያዘ ነው። በቃሉ ላይ ያሉት አሌፍና ታው የዕብራይስጥ የመጀመሪያና የመጨረሻ ቃላት መሆናቸው ደግሞ አልፋና ኦሜጋ (ራዕ 21:6) ያለውን ያመላክታል።

እንግዲህ በአንዱ ዓረፍተ ነገር ውስጥ ነገረ ሥላሴና ነገረ ክርስቶስ በዚህ መልክ በምሳሌያት ተጠቅሶ ይገኛል።

ሰኞ
በዕለተ ሰኞ የተሰራው ታላቅ ሥራ ከአራቱ ባህርያተ ሥጋ አንዱ የሆነውን ውሃን መከፈል ነበር። የውሃ መከፈልን ቅዱስ ባስሊዮስ በሰማይ የሚያመሰግኑና በምድር የሚራዱ የመላእክትን ሕብረት ይወክላሉ ሲል ምሳሌነቱን የሁለቱን አብያተ ክርስቲያናት (ከአይሁድና ከአህዛብ የመጡ ክርስቲያኖች) እንዲሁም በሰማይና በምድር የሚገኙ የቅድስት ቤተክርስቲያን አካላትም ይተረጎማል።

ማክሰኞ

የማክሰኞ ሥነ ፍጥረት ውስጥ በጉልህ የምናየው የምድር ማብቀል ዘወትር ማክሰኞ የምንደግመውን ውዳሴ ማርያም ያስታውሰናል። በውዳሴ ማርያሙ አፈ በረከት ቅዱስ ኤፍሬም ንፅህት ድንግል የሆነች እመቤታችንን ዘር ያልተዘራባት እርሻ አንቺ ነሽ የሕይወት ፍሬ ካንቺ ወጣ ይላታል። ብሉይ ኪዳን በኢሳያስ ትንቢትና (ኢሳ 7:14) በሉቃስ ወንጌል ላይም (ሉቃ 1:34-35) ተፅፎ እንደምናነበው ክርስቶስ የተወለደው ህቱም ድንግል ከሆነች ከእመቤታችን ማርያም ያለወንድ ዘር ነው። የመጀመሪያዋ ምድር ያለ ገበሬ በእግዚአብሔር ፈቃድ እንዳበቀለች ሁሉ እመቤታችንም በእግዚአብሔር ፈቃድ በግብረ መንፈስ ቅዱስ ፀንሳ ተገኝታለች።

ረቡዕ

በዚህ ቀን ፀሐይ፣ ጨረቃና ከዋክብት ተፈጠሩ። ፀሐይ የፀሐየ ጽድቅ የክርስቶስ ምሳሌ ናት እርሱ በባህሪው ብሩህ የሆነ ነው ( ዮሐ 8:12) ጨረቃና  ከዋክብት ከፀሐይ የሚካፈሉ ሲሆን ሐዋርያው ቅዱስ ጳውሎስ እናንተ የክርስቶስ ተካፋዮች ናችሁ (ዕብ 3:14) እንዲል የቀደመ እምነታቸውን ጠብቀው የሚገኙ ሁሉ እነርሱም በጸጋ የዓለም ብርሃን ይሆናሉና (ማቴ 5:14) ጨረቃና ከዋክብት የቅዱሳን ምሳሌ ናቸው። ይሄውም በመስቀል በተከፈለ ዋጋ የተገኘ ክብር ነው።

ሐሙስ

ሰው ከውሃና ከመንፈስ ካልተወለደ በቀር የእግዚአብሔርን መንግስት አይወርስም የሚለው ነገረ ድኅነታዊ ጥሪ ለኒቆዲሞስና ለብዙ ሰማዕያን እንግዳ ነገር ነው። ዮሐ 3:1-10 ሊቁ ቅዱስ ኤፍሬም ሶርያዊ ግን በዕለተ ሐሙስ ነፍሳትን (እንስሳትን፣ አራዊትን፣ አዕዋፋትን) ያስገኘችውን ውሃ እንድንመለከት ይነግረናል። በውሃው ላይ የእግዚአብሔር መንፈስ ሰፎ ነበር የሚለውን አብነት አድርጎ ዶሮ እንቁላሎቿን ሸፍና በሙቀት እንደምተፈለፍል ሁሉ ይህችም የቀደመችው ውሃ ሕያዋንን አስገኝታለች። የቀደመችው ውሃ በጥምቀት የእግዚአብሔር ልጅነትን ለምታስገኘው ውሃ ምሳሌ ናት። የቀደመችው ፍጥረታዊ ውሃ የሚባሉና የሚያስፈሩ እንስሳትን አስገኝታለች ዳግማዊቷ የድኅነት ውሃ ግን በእረኛቸው ክርስቶስ ፊት የሚሰበሰቡ በጎች ምዕመናን ታስገኛለች።

አርብ

በክርስቶስ ደም  የሰው ልጅ ዳግም የተወለደባት ዕለተ አርብ ጥላ በሆነችው ቀዳሚቷ አርብ የሰው ልጅ ተፈጠረ። የተፈጠረው በእግዚአብሔር መልክ ነው። የእግዚአብሔር መልክ ከሚተረጎምባቸው ትርጓሜዎች ብዙ ናቸው ከእነርሱም አንዱ በዮሐ 1:18፣ቆላ 1:15 ላይ በተጠቀሰው መነሻ ያ መልክ ከአዳም የልጅ ልጅ ተወልዶ የሰውን መልክ ገንዘብ የሚያደርገው የክርስቶስ መልክ መሆኑን ነው።

ቅዱስ አትናቴዎስ ነገረ ሥጋዌን በገለፀበት ድርሳን እንዳለው የአዳም ከሥጋና ከነፍስ መሰራትም የክርስቶስ የሥጋና የመለኮት ፍጹም ተዋሕዶ ማሳያ ነው። ፍፁም ተቃራኒዎቹ ስጋና ነፍስ ያለመቀላቀል፣ ያለመጠፋፋት አንድ እንደሆኑ በክርስቶስም መለኮትና ሥጋ ከሁለት አካልና ባህሪ ያለመከፈል አንድ እንደሆኑ ማሳያ ነው።

ይቆየን

ቤተክርስቲያን ማን ናት?

ቤተክርስቲያን የሰማያዊያንና የምድራውያን ኅብረት ናት።

የዓለማችን እጅግ ጥንታዊና አካታች ኅብረት ቤተክርስቲያን ናት። ከሰማያዊያን መላእክት ጀምሮ እስከ ዕለት አማኝ ድረስ በአሚነ ሥላሴ ሥር ያሉትን ሁሉ ታጠቃልላለች። በመሆኑም በእያንዳንዱ ምድራዊ ኅጥእ መመለስ በሰማይ መላእክት ዘንድ ደስታ ይደረጋል። /ሉቃ 15:7, ሉቃ 15:10/ በዚህ አለም በፀናች በቀናች ሃይማኖት ውስጥ ሆነው ያንቀላፉትም ቢሆኑ በእርሱ እንደማመናቸው ቢሞቱ እንኳን ሕያው ናቸውና (ዮሐ 11:25) የሞት ኃይል ከቤተክርስቲያን ኅብረት አይነጥላቸውም። እንደውም እንደደመና በዙሪያችን ከበውን ምሳሌነታቸውን ያሳዩናል ይማልዱልናልም። (ዕብ 12:1፣ ራዕ 6:10)

የቤተክርስቲያን አንድነት የሚመነጨው ትንሳኤና ሕይወት በሆነው በኢየሱስ ክርስቶስ ግንድነት ላይ ነው። በስሙ የሚያምኑ ሁሉ ቅርንጫፎቹ ናቸው። ፍሬ ማፍራትን እንቢ ካላሉ በስተቀር የትኛውም ኃይል ከግንዱ ክርስቶስ ሊያላቅቃቸው አይችልም። (ዮሐ 15:1-5)  በዕለተ ሐሙስ ጸሎቱ ላይ ጌታችን ኢየሱስ ክርስቶስ የክርስቲያኖች አንድነት የዘለዓለማዊው የቅድስት ሥላሴ አንድነት (የፈቃድ፣ የሀሳብ፣ የስልጣን) መልክ መሆኑን ይነግረናል:- “..ከዚህም በኋላ በዓለም አይደለሁም፥ እነርሱም በዓለም ናቸው፥ እኔም ወደ አንተ እመጣለሁ። ቅዱስ አባት ሆይ፥ እነዚህን የሰጠኸኝን እንደ እኛ አንድ እንዲሆኑ በስምህ ጠብቃቸው።.…እኛም አንድ እንደ ሆንን አንድ ይሆኑ ዘንድ፤ እኔም በእነርሱ አንተም በእኔ ስትሆን፥ በአንድ ፍጹማን እንዲሆኑ፥ የሰጠኸኝን ክብር እኔ ሰጥቻቸዋለሁ፤ እንዲሁም ዓለም አንተ እንደ ላክኸኝ በወደድኸኝም መጠን እነርሱን እንደ ወደድሃቸው ያውቃል።…” ዮሐ 17:11-23 ። ለዛም ነው ፈቃዳቸውን ለእግዚአብሔር በማስገዛት በሐዋርያት ሥራ እንደምናነበው በስሙ ያመኑ ሁሉ በአንድ ልብ ነበሩ የተባለው።  ሐዋ 1:14፣ 2:1፣ 4:24፣ 5:12፣ 15:26። ያም ልብ የክርስቶስ ልብ ነው። 1ቆሮ 2:16።

ቤተክርስቲያን በእግዚአብሔር ቃል ላይ የተመሠረተች ናት። ቤተክርስቲያን የተመሰረተችው በኢየሱስ ክርስቶስ የእግዚአብሔር ልጅነትን በሚገልፅ መሠረተ እምነት ላይ ነው። ለዚህም ነው ክርስቶስ፡ ጴጥሮስ የሕያው እግዚአብሔር ልጅ ነህ ብሎ ሲመሰክር አንተ አለት (በግሪኩ Πέτρος – ጴጥሮስ) ትባላለህ ካለው በኋላ ምስክርነቱን በሴት አንቀጽ በዚህችም አለት (በግሪኩ πέτρα – ጴጥራ ) ቤተክርስቲያኔን እመሰርታለሁ ብሎ ተናግሯል  ። የመመስረቻው አለት ጴጥሮስን ከሰየመበት አለት ተለይቶ በሴት አንቀጽ መነገሩ ሐዋርያው በተናገራት የእግዚአብሔር ቃል እንጂ በራሱ  በሐዋርያው ላይ የተመሠረተች አለመሆኑን ይነግረናል (ማቴ 16: 15-18)። ቤተክርስቲያን በእግዚአብሔር ቃል ተመስርታለች ስንል ምን ማለታችን ነው የሚል ካለ ሐዋርያው ቅዱስ ጳውሎስ እንዲህ ይለናል “በሐዋርያትና በነቢያት መሠረት ላይ ታንጻችኋል፥ የማዕዘኑም ራስ ድንጋይ ክርስቶስ ኢየሱስ ነው፤” ኤፌሶን 2፥20 በመሆኑም ኢየሱስ ክርስቶስ የእግዚአብሔር ልጅ መሆኑን የሚናገሩ የነቢያትና የሐዋርያት፡ የመጻሕፍትም ሆነ የትውፊት ትምህርቶች የቤተክርስቲያን መሠረቶች ናቸው።

ራሷ ክርስቶስ ነው እሷም አካሉ ናት። የቤተክርስቲያንና የክርስቶስ ግንኙነት በዘመናት ውስጥ ለአይን ጥቅሻ እንኳን የተቋረጠ አይደለም። ጌታችን መድኀኒታችን ኢየሱስ ክርስቶስ ለሐዋርያቱ  “እነሆም እኔ እስከ ዓለም ፍጻሜ ድረስ ሁልጊዜ ከእናንተ ጋር ነኝ።” ማቴዎስ 28፥20 ብሎ እንደተናገረው ለቅፅበት እንኳን እርሱ ቤተክርስቲያንን ሊተዋት አይችልም። ከክርስቶስ የተለየች ቤተክርስቲያን ትሞታለች ምክንያቱም ክርስቶስ የቤተክርስቲያን ራሷ እርሷም አካሉ ናትና። አንዳንዶች ክርስቶስ የቤተክርስቲያን ራስ ነው ስንል ምሳሌ (Metaphor) አድርገው ይወስዱታል ነገር ግን እውነታው ይህ አይደለም። ብርሃነ አለም ጳውሎስ በኤፌሶን የመጀመሪያው ምዕራፍ ላይ ስለ ክርስቶስ ሕማም ከተናገረ በኋላ  “ሁሉንም ከእግሩ በታች አስገዛለት ከሁሉ በላይም ራስ እንዲሆን ለቤተ ክርስቲያን ሰጠው።” ኤፌሶን 1፥22 ብሎ ራስነቱ የምሳሌ ሳይሆን የእውነት መሆኑን ያስረዳናል። ለአካሉ ራስ እንደመሆኑ መጠን በቤተክርስቲያን ላይ የሚደርስን ነገር ሁሉ በእርሱ ላይ እንደደረሰ ይቆጥረዋል።  ይህንን ቅዱስ ጳውሎስ በቀደመ ዘመኑ አስተውሎታል። ከክርስቶስ እርገት በኋላ ቤተክርስቲያንን ለማጥፋት ሲፋጠን የነበረው ሳውል (በቀድሞ ስሙ) በታላቅ ብርሃን ውስጥ የገጠመው አምላካዊ ወቀሳ “ለምን ቤተክርስቲያንን ታሳድዳለህ” ሳይሆን “ለምን ታሳድደኛለህ” የሚል ነበር ምክንያቱም የቀድሞው ሳውል ያሳደደው ክርስቶስ ራሱ የሆነላትን ቤተክርስቲያንን ነውና። (ሐዋ 9:1-6) ኦርቶዶክሳዊት ቤተክርስቲያን የክርስቶስ ራስነትን በፍፁም ልቧ የምትቀበለው በመሆኑ  የካቶሊክ ቤተክርስቲያንን የፖፕ የበላይነት (ራስነት) ትቃወማለች። ቤተክርስቲያን አካባቢያዊ ርዕሳነ ሊቃነ ጳጳሳት (የኢትዮጵያ፣ የህንድ፣ የግብፅ፣ የሶሪያ፣ የአርመን፣ የኤርትራ ፓትሪያርክ) እንጂ ሁሉ አቀፍ ምድራዊ ራስ/አባት የላትም ምክንያቱም አለማቀፋዊ አባቷ፣ ሊቀካህኗና ራሷ ኢየሱስ ክርስቶስ ነውና።

ቤተክርስቲያን የክርስቶስ ሙሽራናት። ቤተክርስቲያንን የሚያመለክቱ ቃላት የሚገለፁት በሴት ፆታ ነው። ይሄም በክርስቶስ አባትነትና ሙሽራነት ትይዩ ያለችው ቤተክርስቲያን የምዕመናን እናትና ሙሽራ ስለሆነች ነው። ሙሽራው ክርስቶስ ከእርሷ ጋር ነውና ቤተክርስቲያን የክርስቶስ ሙሽራ ናት /ዮሐ 3:29/ በመሆኑም ሙሽራ ለሙሽሪት ባለው ፍቅር መጠን ቤተክርስቲያን በክርስቶስ ተወዳለች እርሱም ነፍስን አሳልፎ እስከመስጠት ያለ ነው። (2ቆሮ 11፣ ኤፌ 5) የቤተክርስቲያን ሙሽርነት አስቀድሞ በብሉይ ኪዳን በኋላም በሐዲስ ኪዳን የተገለጠ መለኮታዊ ሀሳብ ነው። ባለ ራዕዩ ዮሐንስም በዮሐንስ ራዕይ ለታረደው በግ ሙሽራ ትሆን ዘንድ አዲሲቷ ኢየሩሳሌም እንደወረደችና ይህችም የቅዱሳን ህብረት መሆኗን ይናገራል። (ራዕ 19-21)

ቤተክርስቲያን የምሥጢራት መፈፀሚያ ናት። ክርስትና ከሌሎች ሃይማኖቶች የሚለየውና አማናዊነቱ የሚገለጠው በሚታይ አገልግሎት የማይታይ ጸጋ በሚገኝባቸው የጥምቀት፣ የሜሮን፣ የቁርባን፣ የንስሐ፣ የክህነት፣ የተክሊልና የቀንዲል ምሥጢራት ነው። እነዚህ ምሥጢራት አንድን ሰው አስቀድሞ ክርስቲያን በማድረግ በቤተክርስቲያን በኩል ከክርስቶስ ጋር አንድ ያደርጉታል። ይኸውም መንግስቱን መውረስ ነው። ነገር ግን ከእነዚህ ምሥጢራት አንዳቸውም በነጠላ ቁጥር ሊፈፀሙ አይችሉም። የግድ የአማንያንን ኅብረት ይጠይቃሉ በመሆኑም በአካለ ሥጋም ሆነ በአካለ ነፍስ ያሉ ምዕመናን ሊገኙ ይገባል። ከዛም ባሻገር ምሥጢራቱን የሚመራው አካል በክርስቶስ ለቤተክርስቲያን በተሰጠ ስልጣነ ክህነት ሐዋርያዊ ቅብብሎሽ የተሾመ መሆን ይኖርበታል። ለዛም ነው ሐዋርያት መሰባሰብን ቁልፍ አድርገው የሚያስተምሩት (ሐዋ 15:6፣ 1ቆሮ 11) የመሰባሰቡ አስፈላጊነት “ሁለት ወይም ሦስት በስሜ በሚሰበሰቡበት በዚያ በመካከላቸው እሆናለሁና።” ማቴ 18፥20 የሚለው የማይሻር አምላካዊ ቃል ነው በመሆኑም ምሥጢራቱን የሚፈጽሙ ሁሉ በመሰባሰብ የሚታየውን አገልግሎት አማናዊ ያደርገው ዘንድ በመሐላቸው ያለውን ክርስቶስ ይጠይቁታል።

ይቆየን

አባ ሙሴ ጸሊም

አንድ በግ በአንድ ጊዜ ጨርሶ እንደሚበላና አንድ ፊቀን ወይን ጠጅ እንደ ሚጠጣ ስለ እርሱ እራሱ ተነግሯል። እርሱ አስቀድሞ መንግሥተ ሰማያትን ገፍቷት ነበርና እርሱ በሥጋው ጠንካራ በሥራውም ኃይለኛ የነበረ ይበላና ይጠጣ፣ ይቀማና ያመነዝር ነበር ይገድልም የነበረ ማንም ሊቋቋመውም የማይችለው ነበርና ሰዎች ከገድሉ የተነሳ ያደንቁታል። እርሱ ፀሐይን ለሚያመልኩ ሰዎች አገልጋይ የነበረ ብዙ ጊዜም ወደ ፀሐይ እያንጋጠጠ “ፀሐይ ሆይ አንተ አምላክ ከሆንክ አነጋግረኝ” በልቡም “የማላውቅህ ሆይ ራስህን አሳውቀኝ” የሚል ነበር። አባ ሙሴ ጸሊም።
ከዚህም በኋላ በአስቄጥስ ገዳም ያሉ መነኰሳት እግዚአብሔርን ያውቁታል ያዩታልም እያሉ ሲነጋገሩ ሰዎችን ሰማና ተነሣ ። ሰይፉንም ታጥቆ ወደ አስቄጥስ ገዳም ሔደ ።በደረሰም ጊዜ አባ ኤስድሮስን አገኘው። አባ ኤስድሮስም ፈራው። ሙሴ ጸሊምም “እውነተኛውን አምላክ ታሳውቁኝና ታስረዱኝ ዘንድ ወደ እናንተ መጣሁ” ሲለው አባ ኤስድሮስ ወደ አባ መቃርስ ወስዶ አገናኘው። እርሱም ተቀብሎ ሃይማኖትን አስተማረውና “ታግሠህ የማስተምርህን ከጠበቅህ እግዚአብሔርን ታየዋለህ።” ብሎ የክርስትና ጥምቀትን አጥምቆ አመነኰሰው ። ከብዙዎች ገድለኞች ቅዱሳን ይልቅ ብዙና ጽኑዕ ገድልን መጋደል ጀመረ። ሰይጣንም ቀድሞ ሲሠራው በነበረ በመብሉና በመጠጡ በዝሙቱም ይዋጋው እርሱም በራሱ ላይ የሚደርስበትን ሁሉ ለአባ ኤስድሮስ ይነግረው ነበር። በዚህም ጊዜ አባ ኤስድሮስ አጽናንቶ ሊሠራው የሚገባውን ያስተምረው ነበር።
ከገድሉ ብዛትም የተነሣ አረጋውያን መነኰሳት በሚተኙ ጊዜ ቤቶቻቸውን በመዞር ውኃ መቅጃዎችን ወስዶ ውኃ ከሩቅ ቦታ ሞልቶ በየቤታቸው ደጃፍ ያኖር ነበር። እንዲህ እያደረገ በመጋደል በብዙ ዘመናት ኖረ። ታዲያም ሰይጣን በእርሱ ቀንቶ በእግሩ ውስጥ አስጨናቂ የሆነ አመታት መታው ተኝቶም እየተጨነቀ ብዙ ቀን ታመመ።
ከዚህም በኋላ የመታውና የሚፈታተነው ሰይጣን እንደሆነ ዐውቆ ሥጋው በእሳት ተለብልቦ እንደ ደረቀ ዕንጨት እስኪሆን ድረስ ተጋድሎውንና አገልግሎቱን አበዛ። እግዚአብሔርም ትዕግሥቱን አይቶ ከደዌው ፈወሰው የሰይጣንንም ጦር ከእርሱ አራቀለት የመንፈስም ጸጋ አደረበት ወደ እርሱም አምስት መቶ ወንድሞች መነኰሳት ተሰበሰቡ በእነርሱም ላይ አበ ምኔት ሆነ።
ከዚህም በኋላ ቅስና ሊሾሙት መረጡት በቤተ መቅደስም ሊቀ ጳጳሳቱ ዘንድ በአቆሙት ጊዜ ሊቀ ጳጳሳቱም አልፈቀደም ነበርና አረጋውያኑን “ይህን ጠቋራ ለምን አመጣችሁት ከዚህ አውጡት” አላቸው እነርሱም “መልክህ የከፋ ጠቋራ ሆይ መልካም አደረጉብህ” በማለት ራሱን እየገሠጸ ወጣ ከዚህ በኋላ ዳግመኛ ሊቀ ጳጳሳቱ ጠራውና እጁን በላዩ ጭኖ ቅስና ሾመው እንዲህም አለው “ሙሴ ሆይ እነሆ በውስጥም በውጭም ሁለመናህ ነጭ ሆነ”።
ከእለታት በአንዲት ዕለት ቅዱሳን አረጋውያን ወደርሱ መጡ ። ውኃ አልነበረውምና ከበዓቱ ብዙ ጊዜ ወጣ ገባ ይል ነበር ከዚህም በኋላም ብዙ ዝናም ዘንሞ ጒድጓዶችን ሁሉ ሞላ። አረጋውያንም ለምን ብዙ ጊዜ ወጣ ገባ ትል ነበር ብለው ሲጠየቁት “እግዚአብሔርን ውኃ ካልሰጠኸኝ ቅዱሳን አገልጋዮችህን ምን አጠጣቸዋለሁ እለው ነበር በቸርነቱም ዝናምን ልኮልን ውኃን አገኘን” ነበር ያላቸው።
አባ ሙሴ ከአረጋውያን ጋር ወደ አባ መቃርስ ሔደ አባ መቃርስም የሰማዕትነት አክሊል ያለው ከእናንተ ውስጥ አንዱን እነሆ አያለሁ” አላቸው አባ ሙሴም “አባቴ ሆይ ምናልባት እኔ እሆናለሁ በሰይፍ የገደለ በሰይፍ ይገደል ዘንድ አለው የሚል ጽሑፍ አለና” ብሎ መለሰ።
ከዚህም በኋላ የበርበር ሰዎች መጡ አባ ሙሴም ከእርሱ ጋራ ያሉትን መነኰሳት “እነሆ የበርበር ሰዎች ደረሱ መሸሽ የሚፈልግ ይሽሽ” አላቸው እነርሱም “አባታችን አንተስ አትሸሽምን” ሲሉት “በሰይፍ የገደለ በሰይፍ ይገደላል ስለ ሚለው የእግዚአብሔር ቃል እነሆ ያቺን ቀን ለብዙ ዘመናት ስጠብቃት ኖሬአለሁ” እንዳለም ወዲያውኑም የበርበር ሰዎች ገብተው በሰይፍ ገደሉት መሸሽ ስላልፈለጉ ከእርሱ ጋር ሰባት መነኰሳትም ተገደሉ። አንዱ መነኮስ ግን ከምንጣፍ ውስጥ ተሠወረ ። የእግዚአብሔር መልአክ በእጁ አክሊል ይዞ ባየ ጊዜ ግን ከተሠወረበት ወጣና በበርበር ሰዎች ተገደለ። የሰማዕታትንም አክሊል ተቀበለ።
ወንድሞች ሆይ ከሀዲና ነፍሰ ገዳይ ቀማኛና ዘማዊ የነበረውን ለውጣ ደግ አባት መምህርና የሚያጽናና ለመነኰሳትም ሥርዓትን የሠራ ካህንና በሁሉም አብያተ ክርስቲያን ስሙ እንዲጠራ እንዳደረገችው የንስሐን ኃይሏን ተመልከቱ።ሥጋው በአስቄጥስ ገዳም ደርምስ በተባለ ቦታ ለዘላለም ይኖራል ከእርሱም ብዙዎች ድንቆችና ተአምራት ይታያሉ። ለእግዚአብሔር ምስጋና ይሁን እኛንም በአባ ሙሴ ጸሊም በጸሎቱ ይማረን በረከቱም ከእኛ ጋራ ትኑር ለዘላለሙ አሜን።
ምንጭ፦ የሰኔ 24 ስንክሳር።

አቤቱ በቅዱስ መንፈስህ አንጻኝ

በዲ/ን ብርሃኑ አድማስ

ጌታ ሆይ በበዓለ ሀምሳ ቅዱስ መንፈስህን ልከህ ሐዋርያትን አጽንተህ አንጽተህ ሰባ ሁለት ቋንቋዎችን ገልጸህ ከዓለም የተሰበሰቡ በጸሎት የተጉ ሦስት ሺሕ ሰዎችን ለራስህ መረጥክበት፡፡ በብሉይ ኪዳኑ በዓለ ኀምሳ ቀድሞ ከደረሰው እሸቱን መሥዋዕት አድርገው ሲያቀርቡልህ እንደምትቀበልበት ሥርዓት ዛሬም የሐዲስ ኪዳኗን ቤተ ክርስቲያን ሦስት ሺሕ ምእመናን ለራስህ እሸት አድርገህ ተቀበልክ፡፡

እነዚያ ሰዎች በእውነት ምንኛ የታደሉ ናቸው፡፡ ከእነርሱ ቀጥሎ የሰማዕታትን አዝመራ ልታጭድ፤ የጻድቃንንም ሰብል በአባቴ ቤት ብዙ ማደሪያ አለ ባልከው ቦታ ልትሰበስብ፣ የሊቃውንትንም ነዶ በዐውደ ምሕረት አደባባይህ ልታከማች፣ የንጹሐን ምእመናንን ክምርም በዐውድማሕ ልትከምር መሆኑን ዛሬ በተቀበልካቸው ቀድመው በደረሱ እሸቶችህ አሳወቅኸን፡፡ ገና ሳይሰበክ ያመኑ፣ ገዳማት ሳይመሠረቱ በጸሎት የተጉ፣ ሐዋርያት ወደ እንኳን ወደ ዐለም ወደ እሥራኤል ቤት ሳይወጡ እነዚህ ከዓለም ሁሉ መጥተው ቀድመው የተሰበሰቡ ምንኛ የተመረጡ ናቸው፡፡ በሐዋርያት የወረደውን መንፈስህን አይተው ያደነቁ፣ አይሁድ ሐዋርያትን በጉሽ የወይን ጠጅ ሰክረዋል ሲሉ ሰምተው ያልደነገጡ፣ ቋንቋቻቸውን ሰምተው ጸጋህን የተረዱ፣ በዚች ቀን ተጠምቀው የመጀመሪያዋን ቅድስት ጉባኤ የመሠረቱት እነዚህ አማንያን በእውነት ምንኛ የተመረጡ ናቸው፡፡ በርግጥም ከሐዋርያት ስብከት በፊት የደረሱ እውነተኛ የመንፈስ ቅዱስ እሸቶች፡፡

ጌታ ሆይ እኔ ግን እንኳን ከሰው ከዓለም ቀድሜ ለፍሬ ለእሸትነት መሥዋዕት ልደርስ ከአዝመራውም የምገኝ አይመሰለኝም፡፡ ነገር ግን ቸርነትህን ተስፋ አደርጋለሁ፡፡ በቃርሚያ ለቃሚ እንኳ ሰብሰብህ ለትንሽ ዐውድማህ እንድታበቃኝ እለምንሃለሁ፡፡ አዎን እኔ ለጽድቅ አዝመራ አጫጆች ለእጃቸው የማልጨበጥ፣ ለዐይናቸው የማልገባ ቃርሚያ እንኳን ከሆንኩ ትልቅ እድል ነው፤ ሩትን ልክህ እንደምትሰበስበን አውቃለሁና፡፡ ስለዚህ ጌታ ሆይ ገበሬዎች ሐዋርያት በአንድ ቀን እንዳደረሷቸው ለእሸት መሥዋዕት ዛሬ እንደቀረቡልህ ሦስት ሺሕ ትጉኃን ምእመናን አድርገህ ተቀበለኝ አልልህም፤ ነገር ግን ገበሬዎች ባይሰበስቧቸውም እንደ ሩት ያሉ የተናቁ ግፉዓን ከሚለቅሟቸው ቃርሚያዎች አንዱ መሆንን ግን አትንፈገኝ፡፡

ጌታ ሆይ በዕለተ በዓለ ኀምሳ ትጓሃኑ ምእመናን እያዩት የወረደውን በእሳት ላንቃ አምሳል የሚወርድ ስጦታህን አልጠይቅህም፤ በእኔ ላይ የሰለጠነውን የዓለምን መንፈስ እንድታርቅልኝ ግን እለምንሃለሁ፡፡ በሰባ ሁለት ወይም በርከት ያሉ ቋንቋዎችን መናገርን እንድትሰጠኝም እኔ አልጠይቅህም፣ በምሰማቸው ቋንቋዎች መልካሙን መስማትና ማስተዋልን እንድትሰጠኝ ግን እለምንሃለሁ፡፡ በቋንቋ ዐለምን ለማገልግል አልጠይቅህም፣ በቋንቋ ምክንያት እንዳልጠፋና ሌሎችንም እንዳላጠፋ፤ የሌሎችን ቋንቋ እንዳልጠላ፣ ቋንቋዬን ጠሉ ብዬም ሰዎችን እንዳልጠላ ትረዳኝና ልቡናዬንም ትጠብቅልኝ ዘንድ ግን በእውነት እለምንሃለሁ፡፡ አቤቱ ባለብዙ ቋንቋዎችን አንድ ማድረገን ባልችል በቋንቋቸው ምክንያት መከፋፈልና መለያየትን ማምጣትን ግን ከእኔ ፈጽመህ አስወግድልኝ፡፡

አምላኬ ሆይ ዛሬ እንደ ሐዋርያትህ በመንፈስ ቅዱስ ልሞላ አልልህም፤ ለእኔ በውስጤ የሞላውን ቆሻሻ ካስወገድክልኝ በእጅጉ ይበቃኛል፡፡ የእሳት ላንቃዎች ይውረዱብኝ አልልህም፤ ከውስጤ እየጨሰ የሚወጣውን የንዴት፣ የብስጭትና የስድብ እሳት ካበረድክልኝ ይበቃኛል፡፡ በቅዱስ ያዕቆብ አድረህ “እንዲሁም አንደበት ደግሞ ትንሽ ብልት ሆኖ በታላላቅ ነገር ይመካል። እነሆ፥ ትንሽ እሳት እንዴት ያለ ትልቅ ጫካ ያቃጥላል። አንደበትም እሳት ነው። አንደበት በብልቶቻችን መካከል ዓመፀኛ ዓለም ሆኖአል፤ ሥጋን ሁሉ ያሳድፋልና፥ የፍጥረትንም ሩጫ ያቃጥላል፥ በገሃነምም ይቃጠላል” /ያዕ 3 ፤ 5 – 6/ ስትል የገለጽከውን የሚያቃጥለኝን ጎጅ እሳቴን ካጠፋህልኝ ነፍሴ ትልቅ ዕረፍት ታገኛለች። እንደ ሐዋርያት በመንፈስ ሆኖ ጥበብን መናገርንም ዛሬ አልተይቅህም፡፡ ሳላውቀው መንፈስ ቅዱስን ከመስደብ እንድትጠብቀኝ፤ ቤተ ክርስቲያንን ሊያገለግሉ ኃጢአትን ሊያስተሠርዩ በተሾሙ ላይ አፌን ከመክፈት በእነርሱ ያደረ መንፈስ ቅዱስንም ከመስደብ እንድትጠብቀኝ ግን እለምሃለሁ፡፡

በመንፈስ ቅዱስ ስጦታ ልሰከር አልልህም፤ በነገር ከመስከር፣ በስሜት ከመናጥ አውጥተህ በመንፈስና በእውነት ከሚያመልኩህ እንድትደምረኝ ግን እለምንሃለሁ፡፡ ነቢይ ኤልሣዕ በሰማርያ ሆኖ በሶርያ የሚመከረውን ያውቅ እንደነበረ በመንፈስ ቅዱስ ስጦታህ በዓለም ያለውን የተሰወረውን ሁሉ ልወቅ አልልህም፡፡ “ግን እርሱ የእውነት መንፈስ በመጣ ጊዜ ወደ እውነት ሁሉ ይመራችኋል” / ዮሐ 16 ፤ 13/ ባልከው ቃል ኪዳን መሠረት በስምህ ከሚያጨበረብሩት ጠብቀህ ወደ እውነት ብቻ እንድትመራኝ ግን እለምነሃለሁ፡፡

ጌታ ሆይ ከጥፋት ጎዳና ከመልሰከኝ ለእኔ ትልቅ ጸጋ ነው፡፡ እንደ አይሁድ ካለ ሥጋዊ ቅንዓት አውጥተህ እንደ ዳዊት ወዳለ መንፈሳዊ ቅንዓት አድርሰኝ፡፡ ከሐዋርያትህ ጋር ቆሜ እንደ ሲሞን መሠርይ ባለ የስህተት መንገድ መንፈስህንና ጸጋህን ከመመኘትና በዚያም ከሚመጣ ርግማን ጠብቀኝ /ሐዋ 5፣/፡፡ ይልቁንም ቤተ መቅደስ ተጠርተው መገኘት ባይችሉም በቤታቸው ሳሉ ልባቸውን አይተህ ጸጋህን እንደ ሰጠሃቸው እንደ ኤልዳድንና እንደ ሞዳድ /ዘኍ 11 ፤ 26/ የመሆንን የትሕትና መንፈስ አድለኝ፡፡ ጌታ ሆይ እንደ ይሁዳ ኖሬ ኖሬ መጨረሻ ላይ ከመውጣት ጠብቀኝ፡፡ ይልቁንም እንደ ፈያታዊ ዘየማን ባለቀች የጭነቅ ሰዓት እንኳ ልቤን ለንስሐ አንቃልኝ ፡፡ ጌታዬ ሆይ ለአገልግሎትህና ለተልእኮ በወጣሁበት እንደ ዴማስ መንገድ ላይ ከመጥፋት አድነኝ፣ ይልቁንም እንደ ጳውሎስ ለጥፋት ከምፈጥንበት ጎዳና መልሰህ ከመንጋህ ደርበኝ እንጂ፡፡ በታላቅ ነቢይ ቀብተህ አክብረኸው ሳለ ለሥጋውና ለጠቅሙ ቀንቶ እንደናቅኸው እንደ ሳዖል ከመሆን ጠብቀኝ፤ ይልቁንም ሚስቱ ሜልኮል እስክትስቅበት ድረስ ራሱን ጥሎ ለክብርህ ብሎ በተራው ሕዝብ ፊት እንደ ዘፈነው እንደ ዳዊት የማስተዋልን መንፈስ አድለኝ፡፡

ጌታ ሆይ እኔ በመንፈስ ሆኜ መናገርን ዛሬ አልጠይቅህም፤ በመንፈስ ሆኜ ስለኃጢአቴ ማዘንን እንድትሰጠኝ ግን እለምንሃለሁ፡፡ ጌታ ሆይ እንደ ሕዝቅኤል እንደ ነቢያትም ሁሉ መንፈስህ መጥቶ ይዳስሰኝ፣ ቀጥ አድርጎም ያቁመኝ አልልህም /ሕዝ 3 ፤ 12/፡፡ የዳዊትን ቃል ተውሼ ግን አቤቱ፥ እንደ ቸርነትህ መጠን ማረኝ እንደ ምሕረትህም ብዛት መተላለፌን ደምስስ። ከበደሌ ፈጽሞ እጠበኝ፥ ከኃጢአቴም አንጻኝ” እልሃለሁ /መዝ 50፤ 1-2/፡፡ እንደ እስጢፋኖስ አድርገህ መንፈስ ቅዱስን ሙላብኝም አልልህም፡፡ ነገር ግን በተነሳሂው በዳዊት ቃል “ከፊትህ አትጣለኝ፥ ቅዱስ መንፈስህንም ከእኔ ላይ አትውሰድብኝ” እልሃለሁ መዝ 50 ፤ 11/።

ጌታ ሆይ ብዙ ነገር እየዘረዘርኩ ዛሬ ብዙ ስጦታ አልጠይቅህም፡፡ የምጠይቅህ አንድ ነገር ነው፤ በእውነት ይቅር እንድትለኝ እለምንሃለሁ፡፡ “ከበደሌ ፈጽሞ እጠበኝ፥ ከኃጢአቴም አንጻኝ፤ እኔ መተላለፌን አውቃለሁና፥ ኃጢአቴም ሁልጊዜ በፊቴ ነውና። 4 አንተን ብቻ በደልሁ፥ በፊትህም ክፋትን አደረግሁ፥ በነገርህም ትጸድቅ ዘንድ በፍርድህም ንጹሕ ትሆን ዘንድ” መዝ 51 ፤ 2 – 3/። “ስሕተትን ማን ያስተውላታል? ከተሰወረ ኃጢአት አንጻኝ” /መዝ 19፥12/ ። “አቤቱ፥ ኃጢአቴ እጅግ ነውና ስለ ስምህ ይቅር በለኝ” /መዝ

25 ፤ 11/። “አቤቱ፥ ጸሎቴን ስማ፥ ጩኸቴንም አድምጥ፥ ልቅሶዬንም ቸል አትበለኝ እኔ በምድር ላይ መጻተኛ ነኝና፥ እንደ አባቶችም እንግዳ ነኝና / መዝ 39፥12/። “እኔ ችግረኛና ቍስለኛ ነኝ አቤቱ፥ የፊትህ መድኃኒት ይቀበለኝ” /መዝ 69፥29/። “አቤቱ፥ ቀኑን ሁሉ ወደ አንተ እጮኻለሁና ማረኝ። የባሪያህን ነፍስ ደስ አሰኛት፥ አቤቱ፥ ነፍሴን ወደ አንተ አነሣለሁና። አቤቱ፥ አንተ መሓሪና ይቅር ባይ ነህና፥ ምሕረትህም ለሚጠሩህ ሁሉ ብዙ ነውና። አቤቱ፥ ጸሎቴን አድምጥ፥ የልመናዬንም ድምፅ ስማ” /መዝ 86 ፤ 3 – 6/ ። “በሂሶጵ እርጨኝ፥ እነጻማለሁ፤ እጠበኝ፥ ከበረዶም ይልቅ ነጭ እሆናለሁ። ሐሤትንና ደስታን አሰማኝ፥ የሰበርሃቸውም አጥንቶቼ ደስ ይላቸዋል። ከኃጢአቴ ፊትህን መልስ፥ በደሌንም ሁሉ ደምስስልኝ። አቤቱ፥ ንጹሕ ልብን ፍጠርልኝ፥ የቀናውንም መንፈስ በውስጤ አድስ። ከፊትህ አትጣለኝ፥ ቅዱስ መንፈስህንም ከእኔ ላይ አትውሰድብኝ። የማዳንህን ደስታ ስጠኝ፥ በእሽታ መንፈስም ደግፈኝ” /መዝ 51 ፤ 7 – 12/። ጌታ ሆይ በሐዋርያትህ ላይ ባወረድከው፣ በቤተ ክርሰቲያንህ አድሮ በሚኖረው፣ እስከ ዕለተ ምጽአት ከወዳጆችህ በማይለየው በቅዱስ መንፈስህ አኔን አንጻኝ፤ አሜን፡፡ እንኳን ለበዓለ ጰራቅሊጦስ አደረሳችሁ፣ አደረሰን፡፡

ዲ/ን ብርሃኑ አድማስ

እግዚአብሔር ምስሌነ
@EMislene

አካልና ጥላ : መግቢያ

“እነዚህ ሊመጡ ያሉት ነገሮች ጥላ ናቸውና፥ አካሉ ግን የክርስቶስ ነው።”
ቆላ 2፥17

ሐዋርያው ቅዱስ ጳወሎስ በታናሿ እስያ ለሚገኙ የቆላስይስ ክርስቲያኖች በጻፈው መልእክቱ ላይ መገረዝ በጥምቀት እንደተተካ በተናገረበት አንቀፁ፡ ስለ በዓላትም ያነሳና የብሉይ ኪዳን ትምህርቶች፣ ሥርዓቶች በሙሉ ሊመጣ ያለው የክርስቶስ ጥላ እንደሆኑ ያነሳል።

በእርግጥም የኢየሱስ ክርስቶስ የማዳን ስራ እንደውሃ ፈሳሽ እንደ እንግዳ ደራሽ ካለምንም በድንገት ብቅ ያለ አይደለም። መምህራችን ክርስቶስም ሆነ ሐዋርያት ያስተማሯቸው ትምህርቶች አስቀድሞ  ለከበሩ አባቶች ለእነ አብርሃም፣ ይስሐቅና ያዕቆብ ከተገለጠው እውነት ጋር የሚስማሙ እንጂ እንግዳ ትምህርቶች አልነበሩም። በዚህም ምክንያት ከእነሱ ጋር ሊከራከሩ የወደዱ አይሁዶችን ከመጽሐፋቸው በመጥቀስ ዝም ያሰኟቸው ነበር። መድኃኒታችን ኢየሱስ ክርስቶስ በመዋዕለ ሥጋዌው “ መጻሕፍትንና የእግዚአብሔርን ኃይል አታውቁምና ትስታላችሁ።” ማቴ 22፥29 ብሎ የተናገረው ለዚሁ ነው።

በመሆኑም ኦርቶዶክሳዊው የነገረ ሃይማኖት መረዳት አንዱን ጥሎ ሌላውን አንጠልጥሎ የሚጓዝ ሳይሆን የብሉይ ኪዳን ጽሁፎችን ከሐዲስ ኪዳኑ ጋር እያስማሙ በኅሊና አበው የመጓዝ ጥበብ ነው።

የብሉይ ኪዳን አስፈላጊነት ብዙዎች እንደሚያነሱት የሥነ ፍጥረት ትረካን ለመረዳት፣ የቀደሙ አበውን ለማወቅ፣ የእግዚአብሔርን ጠብቆት ለመረዳት ብቻ አይደለም በእርግጥ ገፀ ንባቡ የሚነግረን ይሄን ቢሆንም በውስጡ እጅግ ድንቅ የሆነ የነገረ ድኅነት ሃሳቦችን ይዞ ይነሳል።

በሥነፍጥረት በአዳም አፈጣጠር ውስጥ ካለው የዳግማዊ አዳም ኢየሱስ ክርስቶስ ቃል ሥጋ መሆን ጀምሮ፣ በአቤል ደም፣ በኖህ መርከብ፣ በይስሐቅ መሰዋት፣ በሙሴ መነሳት ወዘተ ሥጋዌውን በብዙ ምሳሌያት ይናገራል። በምሳሌ ብቻም ግን አይደለም በዘመናት ባናገራቸው ነብያት በኩል አይተው የጻፉት በሚመስል ልክ ይመጣ ያለውን መሲህ ክርስቶስን ይተርኩታል። ወንጌላውያኑም የክርስቶስ ኢየሱስን ሥጋዌ በዘገቡባቸው ሥፍራዎች ላይ በነቢይም / በመጽሐፍም እንደተናገረው ሲሉ የሚያነሱት ይሄንን ነው። ይሄ የብሉይና የሐዲስ ኪዳን መገናዘብ ግን በግላዊ መረዳት የሚደረስበት አይደለም። ይልቁንም ከቀደሙ የቤተክርስቲያን አባቶች ጋር በሚስማማ አንድ ልብ እንጂ።

እርሱም ሐዋርያው እንደሚለው ሁሉን አንድ            የሚያደርግ የክርስቶስ ልብ ነው (1ኛ ቆሮ 2:16) በመሆኑም ይህ የክርስቶስ ልብ (ሃሳብ) ደግሞ በብቸኝነት የሚገኘው በቤተክርስቲያን ውስጥ ነውና ከቀደሙት አባቶች ጋር በትርጓሜና በጸሎት መተባበርን ይጠይቃል። ምክንያቱም አርዮስን ጨምሮ ብዙዎች የብሉይ ኪዳንን ገፀ ንባብ በገዛ ፍላጎታቸው ልክ በመተርጓማቸው ከክርስቶስ አንድነት እንዲለዩ ሆነዋል።

በመሆኑም በዚህ አምዳችን በየሳምንቱ አርብ እነዚህን የብሉይ ኪዳን ሀሳቦች እንዴት ሊመጣ ላለው አካል ክርስቶስ ጥላ እንደሆኑ እንመለከታለን። የአምዱ አላማ መጽሐፍ ቅዱስ ጥናት ብቻ ባለመሆኑ በውስጡ ነገረ ሃይማኖት፣ ነገረ ክርስቶስ፣ ነገረ ማርያም፣ ነገረ ድህነት፣ ነገረ ቅዱሳን፣ ነገረ አበውና ሥርዓተ ቤተክርስቲያን ይዳሰሱበታል።

አምዱ ዘወትር አርብ የመሆኑ ምሥጢር በዕለተ አርብ ጌታችን ኢየሱስ ክርስቶስ በመስቀል ላይ ወደተናገራቸው ቃላት ይወስደናል። በዚህች ዕለት ከተናገራቸው ቃላት መካከል በዮሐንስ ወንጌል የተዘገበው የመጨረሻው ቃል “ተፈፀመ”  ነው። የቤተክርስቲያን መተርጉማን ይሄን ሲተረጉሙ ከሚያነሷቸው ትርጓሜዎች አንዱ “ከፅንሰቱ እስከ ስቅለቱ ድረስ በኦሪትና በነብያት የተነገሩት ሁሉ ተፈጽመዋልና ተፈፀመ አለ” የሚል ነው።  በመሆኑም ብሉይ ኪዳናዊው ድንግዝግዝ ጥላ ወለል ብሎ በተገለጠበት በዕለተ አርብ በማዕከለ ዘመን ላይ ቆመን ወደፊትና ወደ ኋላ እንጓዛለን።

ቀጣይ ሳምንት 👉 “ተፈጥሮ እንኳን አያስተምራችሁም ? 1ቆሮ 11:15 “

ይቆየን

ቤተክርስቲያን ምንድን ነው? /የቃሉ ትርጉም/

ብዙዎች ቤተክርስቲያን ሲባል ወደ አእምሯቸው የሚመጣው የአድባራትና የገዳማት ህንፃ ቤተክርስቲያን ነው። ቤተክርስቲያን ማን ናት ተብሎ ለሚጠየቀው ጥያቄ እያንዳንዱ ክርስቲያን ምዕመንን ብሎ የሚመልስም አይጠፋም።  በእርግጥም ከቤተክርስቲያን ትርጓሜ ስፋት አንፃር እነዚህ ሁለቱም መልሶች ትክክል ናቸው። ነገር ግን ለህንፃውም ሆነ ለእያንዳንዱ ክርስቲያን ቤተክርስቲያንነት መሠረቱ ግን በክርስቶስ ራስነት ውስጥ ያለው የአማንያን ሕብረት፣ መሰባሰብ፣ ወገን ወይም ጉባኤን ነው።ቤተ ክርስቲያን የሚለው የግእዝ ቃል የሚነግረንም ይሄ ነው። በሀገራችን የሚኖሩ አይሁድን ቤተ አይሁድ፣ ቤተ እስራኤል እንደምንለው ቤተ ክርስቲያንም የክርስቲያን ህብረት፣ የክርስቲያን ጉባኤ፣ የክርስቲያን ወገን (ዘር) ማለት ነው።መጽሐፍ ቅዱስ በተፃፈባቸው ጥንታውያን የዕብራይስጥና የግሪክ (ጽርዕ) ቋንቋዎችም የቤተክርስቲያን አቻ ትርጉሞች የሚያሳዩት ይሄንኑ ነው።

በዕብራይስጥ ቋንቋ ሁለት ቃላት ቤተክርስቲያን የሚለውን ቃል የሚተኩ ሲሆን አንደኛው “עֵדָה” (አይ’ዳው) ሲሆን መሰባሰብ፣ ጉባኤ፣ ቤተሰብ ወይም ሕብረት ማለት ነው። ሁለተኛውም የዕብራይስጡ ቃል “קָהַל” (ቃ’ዋል) ተመሳሳይ ትርጓሜ አለው። የግሪኩ ἐκκλησία (አቅሌሲያ)ም በተመሳሳይ መሰብሰብን፣ ጉባኤንና ህብረትን አመላካች ነው።κυριακός (ኩሪ’ያኮስ) የሚለው የግሪክ ቃል ደግሞ በጥንታዊት ቤተክርስቲያን ከአቅሌሲያ ጋር በትይዩ ያገለግል የነበረ ቃል ሲሆን የጌታ ቤት፣ የክርስቲያኖች ቤት የሚል ትርጉም ያለው ሲሆን ዛሬ ላይ ለምንጠቀመው የግእዙ ቤተ ክርስቲያን ወይም ለእንግሊዘኛው CHURCH መነሻ ቃል እንደሆነ ይታመናል።

ከላይ ለማየት እንደምንችለው የዕብራይስጡም፣ የግሪኩም፣ የግእዙም ሆነ የእንግሊዝኛው ስም በብዛት ትኩረት የሚያደርጉት ከሦስቱ የቤተክርስቲያን ትርጓሜዎች (ከህንፃው፣ ከእያንዳንዱ ምዕመንና ሕብረቱ) ላይ ነው። የዚህ ዋናው ምክንያቱ ደግሞ የሁለቱን ማለትም የእያንዳንዱ ክርስቲያን ቤተክርስቲያንነትና የህንፃው ቤተክርስቲያንነት የሚመነጨው በክርስቶስ ራስነት በተሰበሰቡ የምዕመናን ህብረት በመሆኑ ነው። አንድ ምዕመን በጥምቀት በሚገኝ ልጅነት ከቤተክርስቲያን ሕብረት ጋር እስካልተዋሃደና የሕብረቱ አካል እስካልሆነ ድረስ ቤተክርስቲያን መሆን አይችልም በተመሳሳይም አንድ ህንፃ ቤተክርስቲያን ለመባል የክርስቲያኖች ሕብረት የሚሰባሰብበትና በአንድነት ቅዱስ ምሥጢራትን የሚፈጽሙበት ሊሆን ይገባል።

/እግዚአብሔር ቢወድና ቢፈቅድ በቀጣዩ ሳምንት የቤተክርስቲያንን ምንነት ከቅዱሳት መጻሕፍትና ከሊቃውንት አንፃር እንዳስሳለን/ ይቆየን።

የዓለም ሁሉ መምህር ቅዱስ ዮሐንስ አፈወርቅ

በዚህችም ዕለት የዓለሙ ሁሉ መምህር የሆነ የከበረ አባት ዮሐንስ አፈወርቅ አረፈ፡፡ ይህም አባት ከእስክንድርያ አገር ሰዎች ወገን ነው የአባቱም ስም አስፋኒዶስ የእናቱም ስም አትናሲያ ነው እሊህም እጅግ ባለጸጎች ነበሩ ይህንንም ልጃቸውን በመልካም አስተዳደግ አሳደጉት ትምህርትንና ጥበብንም ሁሉ አስተማሩት እርሱ ወደ አቴና ሔዶ በመምህራን ቤት ተቀምጦ ትምህርትን ሁሉ ተምሮ በዕውቀቱ ከብዙዎች በላይ ከፍ ከፍ ብሏልና።

ከዚህም በኋላ ገና በታናሽነቱ መነኰሰ የዚህንም የኃላፊውን ዓለም ጣዕም ንቆ ተወ ከእርሱም ቀድሞ በዚሁ ገዳም ቅዱስ ባስልዮስ መንኵሶ ነበር በአንድነትም ተስማምተው ብዙ ትሩፋትን ሠሩ ወላጆቹም በሞቱ ጊዜ ከተውለት ገንዘብ ምንም ምን አልወሰደም ለድኆችና ለምስኪኖች ሰጠ እንጂ ከዚያም በምንኵስና ሥራ በመጠመድ ፍጹም ገድልን እየተጋደለ ኖረ።

በዚያም ገዳም ሶርያዊ ጻድቅ ሰው ስሙ ሲሲኮስ የሚባል መነኰስ ነበረ እርሱም ወደፊት የሚሆነውን በመንፈስ ቅዱስ ያይ ነበር በአንዲት ሌሊትም ለጸሎት እየተጋ ሳለ ሐዋርያትን ጴጥሮስንና ዮሐንስን አያቸው ወደ ዮሐንስ አፈወርቅ ገብተው ጴጥሮስ መክፈቻ ሰጠው ወንጌላዊ ዮሐንስም ወንጌልን ሰጠው እንዲህም አሉት በምድር ያሠርከው በሰማይ የታሠረ ይሆናል በምድርም የፈታኸው ደግሞ በሰማያት የተፈታ ይሆናልና በውስጥህ መንፈስ ቅዱስ ያደረብህ አዲስ ዳንኤል ሆይ የክብር ባለቤት ከሆነ ከታለቅ መምህር ኢየሱስ ክርስቶስ ዘንድ ወደ አንተ ተልከናልና ዕወቅ እኔም የመንግሥተ ሰማያት መክፈቻ የተሰጠኝ ጴጥሮስ ነኝ። ሁለተኛውም እኔም በመጀመሪያው ስብከቴ በከበረ ወንጌል ቃል አስቀድሞ ነበረ ያልኩ ይህም ቃል በጠላት ላይ የእሳት ሰይፍ የሆነ ዮሐንስ ነኝ። ለአንተም ከክብር ባለቤት ጌታ ኢየሱስ ክርስቶስ ዘንድ ወገኖችህ ምእመናንን በቀናች ሃይማኖት ታሳድጋቸው ዘንድ ዕውነተኛ አእምሮ ደግሞ ተሰጥቶሃል። ጻድቅ ሲሲኮስም ይህን ራእይ በአየ ጊዜ ቅዱስ ዮሐንስ ቸር ታማኝ እረኛ ሁኖ እንደሚሾም ዐወቀ። ከዚህም በኋላ በቅዱስ ዮሐንስ ላይ የመንፈስ ቅዱስ ጸጋ በላዩ ወርዶ አደረበትና ብዙ ድርሳናትንና ተግሣጻትን ደረሰ ዲያቆን ሁኖ ሳለም የቤተ ክርስቲያንን መጻሕፍት ብሉያትንና ሐዲሳትን ተረጐመ።

በአንዲት ሌሊትም ቅዱስ ዮሐንስ ሲጸልይ የእግዚአብሔር መልአክ በድንገት እንደ በረድ ነጭ በሆነ ልብስ ተገለጠለት ቅዱስ ዮሐንስም ሲያየው ደንግጦ በምድር ላይ ወደቀ መልአኩም አርአያውን ለውጦ እንደ ሰው ሁኖ ታየው ወዳጄ አዲስ ዳንኤል ሆይ አትፍራ ተነሣ አለው የቅዱስ ዮሐንስም ልቡ ተጽናንቶ ጌታዬ አንተ ማነህ ግርማህ አስፈርቶኛልና አለው የእግዚአብሔር መልአክም ትሠራው ዘንድ የሚገባህን ልነግርህ ወዳንተ የተላክሁ ነኝ። አሁንም እግዚአብሔር አምላክ ያዘዘህን ለመሥራት ልብህን አበርታ ቃልህ ከጽንፍ እስከ ጽንፍ በአራቱ ማእዘን ይደርሳልና እልፍ አእላፋትም ትምህርትህን ተቀብለው ትእዛዝህን ሰምተው ወደ ፈጣሪያቸው እግዚአብሔር ተመልሰው ይድናሉና በእግዚአብሔር መንግሥትም ውስጥ የጸና የብርሃን ዐምድ ትሆናለህና። እነሆ የአንጾኪያ ሊቀ ጳጳሳት ወደ አንተ ይመጣል ከእርሱም ጋራ ሁሉም ካህናትና ዲያቆናት በየማዕረጋቸው የሚያዝህንም አድርግ የእግዚአብሐር ትእዛዝ ነውና ልትተላለፍ አይገባህም አለው።

ከዚህም በኋላ ያ መልአክ ለአባ ፊላትያኖስ ተገልጦ ቅዱስ ዮሐንስን ቅስና እንዲሾመው አዘዘው በማግሥቱም ሊቀ ጳጳሳቱ መጣ ከርሱ ጋራም ካህናት አሉ ይህን ቅዱስ ዮሐንስንም ይዞ ቅስና ሾመው። የቍስጥንጥንያ ሊቀ ጳጳሳትም በአረፈ ጊዜ ንጉሥ አርቃድዮስ ልኮ አስመጥቶ ቅዱስ ዮሐንስን በቍስጥንጥንያ ላይ ሊቀ ጵጵስና ሾመው አባቶቻችን ሐዋርያት እንደሚአደርጉት በሊቀ ጵጵስናው ሥራ ላይ ጸና ሕይወትነት በአላቸው ትምህርቶችና ተግሣጾች ሕዝቡን ሁልጊዜ የሚአስተምር ሆነ። ከኤጲስቆጶሳትም ሆነ ከመንግሥት ወገን ሕግን የሚተላለፉትን ሁሉ ይገሥጻቸዋል ማንንም አይፈራም ፊት አይቶም አያደላም።

የንጉሥ አርቃድዮስ ሚስት አውዶክስያም ገንዘብ ወዳጅ ስለሆነች የአንዲት ድኃ መበለት ቦታዋን በግፍ ወሰደች ያቺ መበለትም ወደ ቅዱስ ዮሐንስ መጥታ ንግሥት አውዶክስያ ቦታዋን እንደነጠቀቻት ነገረችው እርሱም የደኃዋን ቦታዋን መልሺላት ብሎ ከብዙ ምክር ጋር እንድትመልስላት ንግሥት አውዶክስያን ለመናት እርሷ ግን እምቢ በማለት አልታዘዘችለትም ወደ ቤተ ክርስቲያን ገብታ ሥጋውን ደሙን እንዳትቀበል አውግዞ ለያት።

ቍጣንና ብስጭትንም ተመልታ ስለ ክፉ ሥራቸው ከሹመታቸው እርሱ የሻራቸውን ኤጲስቆጶሳት ሰበሰበች እነርሱም ንግሥቲቱን ስለ ተቃወመ ስደት እንደሚገባው በእርሱ ላይ ተስማምተው ጻፉ እርሷም አጥራክያ ወደ ሚባል ደሴት ሰደደችው። ከዚያም በደረሰ ጊዜ የዚያች ደሴት ሰዎች በክፉ ሥራ ጸንተው የሚኖሩ ከሀድያን ሁነው አገኛቸው ቅዱስ ዮሐንስም አስተማራቸው ገሠጻቸውም በፊታቸው ስለ አደረጋቸው ድንቆች ተአምራት ወደ ቀናች ሃይማኖት አስገባቸው።

የሮሜ ንጉሥ አኖሬዎስና ሊቀ ጳጳሳቱ ዮናክኒዶስ ስለ ቅዱስ ዮሐንስ ስደት በሰሙ ጊዜ እጅግ አዘኑ በንጉሥ አርቃድዮስ ላይም በመቆጣት እንዲህ የሚል ደብዳቤ ጽፈው ላኩ ከዚህ ከክፉ ሥራ ተጠበቅ ትእዛዛችንንም ተቀብለህ የከበረ ዮሐንስን ከስደቱ ከአልመለስከው በአንተና በእኛ መካከል ሰላም አይኖርም።

መልእክታቸውንም በአነበበ ጊዜ እጅግ አዘነ ሚስቱንም አግዶ ልኮ ቅዱስ ዮሐንስን ከስደቱ መለሰው በተመለሰ ጊዜም የቍስጥንጥንያ ሰዎች በመመለሱ ታላቅ ደስታ አደረጉ። ከጥቂት ቀኖች በኋላም ንግሥቲቱ ወደ ክፋቷ ተመልሳ ሁለተኛ ወደ አጥራክያ ደሴት ሰደደችውና በዚያው አረፈ።

ንጉሥ አኖሬዎስና ሊቀ ጳጳሳት ዮናክኒዶስም በሰሙ ጊዜ መልእክትን ላኩ ሊቀ ጳጳሳቱም የከበረ ዮሐንስን ከስደቱ እስከምትመልሰው ድረስ ሥጋውንና ደሙን እንዳትቀበል አውዶክስያን አወገዛት።

ከዚህም በኋላ የከበረ ዮሐንስን ይመልሱት ዘንድ ንጉሥ ላከ ግን ሙቶ አገኙት ሥጋውንም ተሸክመው ወደ ቊስጥንጥንያ ከተማ አደረሱት። የከበረ ዮሐንስም በተሰደደበት አገር እንደአረፈና ሥጋውንም ወደ ቍስጥንጥንያ ከተማ እንደአመጡ ወደ አባ ዮናክኒዶስ መልእክት ጽፈው አስረዱት። ሁለተኛም የሮሜ ሊቀ ጳጳሳት ወደ ቤተ ክርስቲያን ገብታ ሥጋውንና ደሙን እንዳትቀበል ልኮ አውድክስያን አወገዛት እየለመነችውም ስምንት ወር ያህል ኖረች በብዙ ልመናም ፈታት። ነገር ግን ጭንቅ በሆነ ደዌ እግዚአብሔር አሠቃያት ያድኗት ዘንድ ገንዘቧን ለባለ መድኃኒቶች ጥበበኞች እስከ ሰጠች ድረስ ግን አልዳነችም ወደ ቅዱስ ዮሐንስ መቃብርም ሔዳ በእርሱ ላይ ያደረገችውን በደል ይቅር ይላት ዘንድ እየሰገደችና እያለቀሰች ለመነችው እርሱም ይቅር አላት ከደዌዋም ፈወሳት። ጌታችንም ከሥጋው ታላላቅ ድንቆች ታአምራትን ገለጠ።

ስለርሱም እንዲህ ተባለ በአንዲት ዕለትም ከንጉሥ አርቃዴዎስ ጋር ተቀምጦ ሳለ ንጉሡ እንዲህ አለው አባቴ ሆይ ስለ አንድ ቃል እንድታስረዳኝ እለምንሃለሁ። ይህም ቃል ከብዙ ጊዜ ጀምሮ በልቤ ውስጥ ይመላለሳል ወንጌላዊ ማቴዎስ ቅድስት ድንግል እመቤታችን ማርያምን የበኵር ልጅዋን እስከ ወለደች ድረስ ዮሴፍ አላወቃትም ስለምን አለ ወንዶች ሴቶችን እንደሚአውቋቸው ዮሴፍ አወቃትን? አለው።

የከበረ ዮሐንስም ንጉሥ ሆይ እንዲህ አትበል እንዲህ አንተ እንደምትለው አይደለም የከበረች ድንግል እመቤታችንስ የክብር ባለቤት ጌታችን ኢየሱስ ክርስቶስ በሆድዋ ውስጥ በነበረ ጊዜ የእርሱ ኅብረ መልክ በሚለዋወጥ ጊዜ ከእርሱ ጋር መልኳ ይለወዋወጥ ነበር። በንጹሕ ብርሌ ውስጥ ውኃ በጨመሩ ጊዜ ውኃ መስሎ እንደሚታይ ወይን ጠጅም ቢጨምሩ ያንኑ መስሎ እንደሚታይ ወይም ከውስጡ በተጨመረው ቀይም ቢሆን ቀልቶ እንደሚታይ ቅጠልያም ቢገባበት ቅጠልያ መስሎ እንደሚታይ።ድንግልም በሆድዋ ውስጥ የልጅዋ መልክ በሚለዋወጥ ጊዜ ከእርሱ ጋራ መልኳ ይለዋወጥ ነበር። እንደ ሮማን አበባ የምትቀላበት ጊዜ አለ እንደናርዶስም የምታብለጨልጭበት ጊዜ አለ የለመለመ ቅጠል የምትመስልበትም ጊዜ አለ ከወለደች በኋላ ግን አልተለወጠችምና ዮሴፍ በአንድ በቀድሞው ኅብረ መልኳ ተወስናለት መልኳን ተረዳ ማለት ነው አለው። በዚያን ጊዜ በንጉሥ አዳራሽ ውስጥ ከወርቅ የተሠራ የእመቤታችን አምላክን የወለደች የድንግል ማርያም ሥዕል ነበረችና አፈ ወርቅ ዮሐንስ ልሳነ ወርቅ ዮሐንስ አፈ በረከት ዮሐንስ መልካም ተናገርክ የሚል ቃል ከእርሷ ወጣ።

ንጉሡና ከእርሱ ጋር ያሉት በሰሙ ጊዜ እጅግ አደነቁ እግዚአብሔርንም አመሰገኑት በዚያን ጊዜ ንጉሥ አዝዞ ወርቅ ሠሪ አስመጥቶ ለከበረ ዮሐንስ የወርቅ ልሳን አሠርቶ ለሚያየው ሁሉ መታሰቢያ ምልክት ሊሆን አምላክን ከወለደች ከእመቤታችን ከድንግል ማርያም ሥዕል ዘንድ ሰቀለው። ቅዱስ ዮሐንስንም ከዚያች ቀን ወዲህ ልሳነ ወርቅ ብሎ ጠራው አፈ ወርቅም ተብሎ እስከዛሬ ተጠራ።

ለእግዚአብሔርም ምስጋና ይሁን እኛንም በቅዱሱ ጸሎትና ምልጃ ይማረን በረከቱም ከእኛ ጋራ ትኑር ለዘላለሙ አሜን።

( ስንክሳር ዘወርኀ ግንቦት)

ከሁሉ በኋላ ጭንጋፍ ለምሆን ለእኔ ታየኝ

ቅዱስ ጳውሎስ ለቆሮንቶስ ምእመናን ስለ ጌታ ትንሣኤ ማስረጃ እያቀረበ ነው:: በዚያን ዘመን ለጌታ ትንሣኤ ማስረጃ ስትጠቅስ በማቴዎስ ወንጌል እንዲህ ይላል ብለህ እንዳትጠቅስ ገና ወንጌላት አልተጻፉም:: ቢጻፉም ማቴዎስ በሕይወት እያለ በቃሉ መመስከር ሲችል ጽሑፉን ማስረጃ ማድረግ አያስፈልግህም:: ስለዚህ ለመነሣቱ ማስረጃዎች ከተነሣ በኋላ ያዩት ሰዎች ነበሩ:: በሕይወት ያሉትን የዓይን ምስክሮችን መጥቀስ ይቻላል:: የዓይን እማኞች ምስክርነት ከጽሑፍ በላይ የታሪክ ማስረጃ ነው:: ስለዚህ ጳውሎስ ስለ ጌታ ትንሣኤ “እነ እገሌ አይተውታል” እያለ መዘርዘርን መረጠ::

ጌታ ከተነሣ በኋላ እንደ ቀድሞው ለሁሉ አልታየም:: እርሱን ለማየት የተገባቸው ጥቂት ወደ ሺህ የሚጠጉ ሰዎች ነበሩ:: በማኅበር ያዩት አሉ:: በግል ያዩት አሉ::
ያዩት ነገር ወንጌል የሆነላቸው ብፁዓን ዓይኖች ያሏቸው እንዴት የታደሉ ናቸው? የተሰቀለውን ተነሥቶ ያዩት! ዳግም በሚመጣበት አካል የተገለጠላቸው ምንኛ የታደሉ ናቸው? ከመድኃኔ ዓለም አፍ ተቀብለው ኪዳን ያደረሱ! የጌታን ቅዳሴ ተቀብለው ያስቀደሱ! የትንሣኤው ማግስት ምስክሮች እንዴት ዕድለኞች ናቸው? ቢሞቱም እንኳን መነሣታቸውን በጌታ ትንሣኤ አይተው ደስ ብሎአቸው ያንቀላፉ እነርሱ ምንኛ የታደሉ ናቸው?

ቅዱስ ጳውሎስ በወንጌል ከተጠቀሱት ከነ ኬፋ በተጨማሪ ለይቶ ጌታ ለማን ለማን እንደታየ ገለጸ:: ለያዕቆብ ታየ ብሎ የእልፍዮስን ልጅ ለይቶ ጠቀሰው:: የቤተ ክርስቲያን ታሪክ ጸሐፍት እንደሚሉት ይህ ሐዋርያ ከሌሎች በተለየ የጌታን ትንሣኤ ሳላይ እህል አልቀምስም ብሎ የተሳለና አክፍሎትን የጀመረ ነበርና ጌታ ለይቶ ክብሩን አሳይቶታል:: ከዚያም ለዐሥራ ሁለቱ ታየ ብሎ የጌታን ድኅረ ትንሣኤ አስተርእዮ ዘረዘረ:: እኔ ማለትን የማይወደው ትሑት ቅዱስ ጳውሎስ “ከሁሉ በኋላ እንደ ጭንጋፍ ለምሆን ለእኔ ደግሞ ታየኝ አለ::

ጭንጋፍ ምንድር ነው? ጭንጋፍ (ጸዕጻዕ/ ተውራድ) ለፅንስ የሚነገር ቃል ነው:: መወለድ ያለበትን ጊዜ ያልጠበቀ ያለ ጊዜው የተወለደ ፅንስ ነው:: በመጠኑ ከሌላው ጊዜውን ከጠበቀ ፅንስ የሚያንስ ሲሆን ዕድገቱን በተገቢው ጊዜ ከሚወለድ ልጅ ጋር ለማስተካከል ሲባል በሙቀት ማቆያ ክፍል እንዲቆይ ይደረጋል:: ይህ ፅንስ ሲወለድ በሕመም ውስጥ ሆኖ ተሰቃይቶ ተጨንቆ ነው::

ቅዱስ ጳውሎስ ራሱን ለመግለጽ የተጠቀመበት ይህ አንድ ቃል የሕይወት ታሪኩን ጠቅልሎ የያዘ ድንቅ ቃል ነበር::ቅዱስ ጳውሎስ ምንም እንኳን የቤተ ክርስቲያን ብርሃን የሆነ ሐዋርያ ቢሆንም እንደ ዓሥራ ሁለቱ ሐዋርያት በጊዜው የተጠራ አልነበረም:: እርሱ ከሐዋርያት ጋር አብሮ በዳግም ልደት የተወለደ ሳይሆን ያለ ጊዜው ክርስቶስ ባረገ በስምንተኛው ዓመት የተጠራ ነበረና ራሱን ካለ ጊዜው ከተወለደው ፅንስ ጋር አመሳስሎ እንደ ጭንጋፍ የምሆን ብሎ ጠራ::

ጭንጋፍ ሲወለድ በመጠኑ ከሌላው ፅንስ ያነሰ ይሆናል::
ቅዱስ ጳውሎስም ራሱን ጭንጋፍ ካለ በኋላ “እኔ ከሐዋርያት ሁሉ የማንስ ነኝና፥ የእግዚአብሔርን ቤተ ክርስቲያን ስላሳደድሁ ሐዋርያ ተብዬ ልጠራ የማይገባኝ” ብሎ አብራርቶታል:: (1ቆሮ 15:9)

ልጅ ጭንጋፍ ሆኖ ሲወለድ በሥቃይ ነው:: ጤና ያጣል ይታመማል:: እናቲቱም ትታወካለች በድብታ በጭንቀት ትቸገራለች:: ባለሙያዎቹ እንደሚሉት እናት ያለ ጊዜው ከተወለደ ልጅዋ ጋር እናታዊ ትስስር ለመፍጠርና የእናትነት ፍቅርዋን ለመሥጠት ባልጠበቀችው ጊዜ የመጣ በመሆኑ ምክንያት ለጥቂት ጊዜ ትቸገራለች:: በአጭሩ ጭንጋፍ ሆኖ ሲወለድ እሱም ይሰቃያል እናቱንም ያስጨንቃል:: ወዲያው እንደሌላ ሕፃን በሰው እጅ አይታቀፍም:: ከተፈጥሮአዊ እስከ ሰው ሠራሽ እንደየጊዜው እየዘመነ በሔደው የልጅ ሙቀት መስጫ መንገድ እየታገዘ የሰውነት አካሎቹ በአግባቡ መሥራት እስከሚችሉና በሽታ መቋቋም እስከሚችል ይቆያል::

ቅዱስ ጳውሎስ እንደ ጭንጋፍ ነበርኩ ያለው ለዚህ ነው:: በዳግም ልደት የተወለደው በደማስቆ መንገድ ወድቆ ሊቋቋመው ባልቻለው ብርሃን ተመትቶ ነበር:: “ሳውል ሳውል ስለምን ታሳድደኛለህ?” የሚል ድምፅ ሲሰማ ፅንስ ነውና ዓይኑን እንኳን መግለጥ አልቻለም ነበር::
ከተወለደ በኋላም ወዲያው ወደ ቤተ ክርስቲያን እቅፍ ወደ ሐዋርያት ማኅበር አልገባም:: እንደ ጭንጋፍ የምሆን እንዳለ ሙቀት ያስፈልገው ነበርና የሰው እጅ ሳያቅፈው ሦስት ዓመት በሱባኤ ቆይቶ በመንፈስ ቅዱስ ተሟሟቀ::

“ነገር ግን በእናቴ ማኅፀን ሳለሁ የለየኝ በጸጋውም የጠራኝ እግዚአብሔር በአሕዛብ መካከል ስለ እርሱ ወንጌልን እሰብክ ዘንድ ልጁን በእኔ ሁኔታ ሊገልጥ በወደደ ጊዜ፥ ወዲያው ከሥጋና ከደም ጋር አልተማከርሁም፥ ከእኔም በፊት ሐዋርያት ወደ ነበሩት ወደ ኢየሩሳሌም አልወጣሁም፥ ነገር ግን ወደ ዓረብ አገር ሄድሁ እንደ ገናም ወደ ደማስቆ ተመለስሁ። ከሦስት ዓመት በኁዋላ ወደ ኢየሩሳሌም ወጣሁ” ብሎ ስለ መንፈሳዊ ኃይል መልበሱ ይናገራል:: (ገላ 1:15-18)

ጭንጋፍ ሆኖ የተወለደ ልጅ የሚገጥመው ችግር ከወላጆቹ ጋር በሥነ ልቡና ለመተሳሰር መቸገሩ ነው::
ቅዱስ ጳውሎስን ለማመንና እንደ ልጅ ለመቀበል የቤተ ክርስቲያን ማኅበርም ተቸግራ ነበር::
“ሳውልም ወደ ኢየሩሳሌም በደረሰ ጊዜ ከደቀ መዛሙርት ጋር ይተባበር ዘንድ ሞከረ፤ ሁሉም ደቀ መዝሙር እንደ ሆነ ስላላመኑ ፈሩት” ሐዋ 9:26 ስለዚህ ሐዋርያው እንደ ጭንጋፍ ነኝ አለ::

ቅዱስ ጳውሎስ ስለ ጌታ መነሣት ምስክሮች ብሎ ሌሎችን ከዘረዘረ በኋላ “ከሁሉ በኋላ ጭንጋፍ ለምሆን ለእኔ ታየኝ” ብሎ ተናገረ:: ክርስቶስ ተነሥቶአል ወይ ብለው ሲጠይቁህ አዎ ተነሥቶአል እነ እገሌ አይተውታል ብለህ ዘርዝረህ “ከሁሉ በኁዋላ ለእኔም ታየኝ” ብለህ መናገር መቻል እንዴት መታደል ነው!?

ወዳጄ ክርስቶስ መነሣቱን ታምናለህ:: ልክ ነህ ለብዙዎች ታይቶአል:: አንተስ ከሁሉ በኁዋላ ለእኔም ታየኝ ማለት ትችል ይሆን? ጌታ ከተነሣ በኁዋላ ላለፉት ሁለት ሺህ ዓመታት ለብዙዎች ታይቶአል:: ብዙዎቹ ቅዱሳን አይተውታል:: ቅዱስ እስጢፋኖስ አይቶታል : ቅድስት አርሴማ አይታዋለች : አቡነ ተክለ ሃይማኖት አይተውታል : አቡነ ገብረ መንፈስ ቅዱስ ተመልክተውታል:: አባ ጳኩሚስ በዕንባ ተመልክቶታል : ቅድስት ክርስቶስ ሠምራ አይታዋለች::

ሁሉም ቅዱሳን ብዕር ቢሠጣቸው ከዕንባ ጋር
“ከሁሉ በኁዋላ ለእኔም ታየኝ” ብለው የትንሣኤውን ማስረጃ ዝርዝር ይቀጥላሉ:: ቅዱስ ኤፍሬም ሶርያዊ በበረሃ ሲጸልይ አይቶት ነበርና ሰው ባገኘ ቁጥር
ወቅቱ የፋሲካ ሰሞን ባይሆንም እንኳን በፈገግታ ተሞልቶ
“ክርስቶስ ተነሥቶአል!” ብሎ ያበሥርና ሰላምታ ይሠጥ ነበር::

ጌታ ሆይ ለእኔ ለኃጢአተኛው የምትታየኝ መቼ ይሆን? ቸርነትህን አይቻለሁ! ፍቅርህን አይቻለሁ! ብሩሕ ገጽህን የማየው መቼ ይሆን? መች እደርሳለሁ የአምላኬንስ ፊት መቼ አየዋለሁ? እኔም እንደ ቅዱሳንህ “ከሁሉ በኁዋላ ለእኔ ታየኝ” ብዬ የተቀመጠውን ብዕር አንሥቼ የምጽፈው መቼ ይሆን? አቤቱ ፊትህን እሻለሁ! አቤቱ ፊትህን ከእኔ አትመልስ! አቤቱ ፊትህን እሻለሁ!

“ኢየሱስ ክርስቶስ በግዕ ዘቀራንዮ
ለላሕይከ ንትሜነይ ከመ ንርአዮ”
“የቀራንዮው በግ ኢየሱስ ክርስቶስ ሆይ
ውበትህን ልናየው እንመኛለን”

ዲያቆን ሄኖክ ኃይሌ

ፍርሃትን የሚጥል ፍፁም ፍቅር

በሌሊት ማለፍና በፀሐይ መውጣት መካከል ገና ጨለማ ሳለ ሁለቱ ማርያሞች ማርያም መግደላዊትና የያዕቆብ እናት ማርያም ከሰሎሜ ጋር ሽቱ ሊቀቡት ወደ መቃብሩ ሄዱ። በዚህ ግርማ ሌሊቱ ባልተለየው ድምፀ አራዊቱ በሚሰማበት ሌሊት የአይሁዳውያን ዛቻና የኃያላኑን የሮማ ወታደሮች ቁጣ ተጋፍጠው የክርስቶስን ክቡር ሥጋ ሽቶ ይቀቡ ዘንድ ወደ መቃብሩ ገሰገሱ። እነኚህ ሴቶች የክርስቶስን ሞት ሰምተው መቃብሩን ሊያዩ ከሩቅ የመጡ እንግዶች አልነበሩም ይልቁንም በዕለተ አርብ እየተላጋ ሲወሰድ፣ በየመንገዱ ሲጎተትና መስቀል ተሸክሞ ሲሄድ እያለቀሱ በደም የተዋበ የመስቀሉን መንገድ በእንባ ያጠቡ ሴቶች ናቸው።

ሐዋርያቱ ሸሽተው በሄዱበት አሁን አድን ያሉት የኢየሩሳሌም ሰዎች አሁን አጥፋው ብለው ጲላጦስን በሚማፀኑበት ወቅት ከእግረ መስቀሉ ሥር የነበሩ ሴቶች ናቸው። ዮሴፍና ኒቆዲሞስ በአዲስ መቃብር ሲቀብሩት ከሩቅ ሆነው ያዩት ሴቶች ናቸው። ጌታቸውን በመቃብር ትተው እንቅልፍ አልወስድ ቢላቸው በሌሊት ተነስተው ወደ መቃብሩ ሄዱ። ወንጌላዊው ማቴዎስ ሁለቱ ሴቶችን በስም ሲጠራ ቅዱስ ዮሐንስ ደግሞ በትንሳኤው ዘርዘር ያለ መገለጥን ያየችው ቅድስት ማርያም መግደላዊት ላይ ዋናውን ትኩረቱን ያደርጋል። ወንጌላዊው ቅዱስ ማርቆስ ግን የሦስቱንም ስም ዘግቦ እናገኘዋለን። ይሄ አዘጋገብ የታሪክ ልዩነት ሳይሆን የወንጌላውያኑን የትኩረት ነጥብ የሚያሳይ ነው።

እነዚህ ሴቶች ማልደው ወደ መቃብሩ ሲደርሱ ድንጋዩን ማን እንደሚያንከባልልላቸው ተጨንቀው ነበር።
ራሔልና ሴቶቹ የውሐውን ምንጭ መዝጊያ ድንጊያ የሚያንከባልልላቸው አጥተው እስከ ቀትር እንጠብቃለን? ብለው እንደተጨነቁት ማየ ሕይወት ክርስቶስ ያለበትን በጲላጦስ ማህተም ታትሞ በሮማ ወታደሮች የሚጠበቀው የመቃብር ድንጋይን ሚያንከባልላቸው ሰው እያሳሰባቸው ነበር። ሲደርሱ ግን የገጠማቸው ፍፁም ተቃራኒ ነበር። እንደ ያዕቆብ ሆኖ የመቃብሩን ድንጋይ የሚያንከባልል መልአክን እግዚአብሔር ልኮላቸው ነበር። /ዘፍ 29:8-10/

የእስክንድርያው ቅዱስ ቄርሎስ በልደቱ ሌሊት መንጋቸውን ሲጠብቁ ለነበሩ እረኞች አትፍሩ ያሉ መላእክት (ሉቃ 2:10) ዛሬም እጅግ ጨለማ በነበረው ፀሐይ አልባ የማለዳ ጠዋት የመጡትን ሴቶች አትፍሩ አሏቸው እያለ በልደቱ የተሰበከውን የምስራች በትንሳኤው ሌሊት ስለመደገሙ ይደነቃል።

መላእክቱ የተናገሩት ቃል እጅግ የሚያረጋጋ ነበር። የሚፈልጉትን አስቀድመው ያውቁ ነበርና ከሕማማቱ በፊት የነገራቸውን አስታውሰው እንደ ተናገረው ተነስቷል ብለው አወጁላቸው። ይሄንን ዜና የሰሙት አንስት ለሐዋርያት ለመናገር ተፋጠኑ። ቅዱስ ቄርሎስ የቅዱስ ጳውሎስንና የኢሳያስን ቃል ተውሶ ትንሳኤውን ሊያውጁ የተነሱትን እግሮችን መልካሙን የምሥራች የሚያወሩ እግሮቻቸው እንዴት ያማሩ ናቸው ሲል ያወድሳል። ሮሜ 10:15፣ ኢሳ 52:7

መነሳቱን ግን በመላእክት ብቻ ሰምተው እንዳይቀሩ እርሱ ራሱም በፊታቸው ታየላቸው። አስቀድመው መላእክት አትፍሩ የተባሉ ቅዱሳን አንስት ከክርስቶስም አንደበት የሚያረጋጋውን ቃል ሰሙ “እነሆም፥ ኢየሱስ አገኛቸውና፦ ደስ ይበላችሁ አላቸው። እነርሱም ቀርበው እግሩን ይዘው ሰገዱለት። በዚያን ጊዜ ኢየሱስ፦ አትፍሩ፤ ሄዳችሁ ወደ ገሊላ እንዲሄዱ ለወንድሞቼ ተናገሩ፥ በዚያም ያዩኛል አላቸው።” ማቴ 28:9-10

ወንጌላዊው ዮሐንስ ደግሞ ሌላም ቃል ይነግረናል። ሴቶቹ ለደቀመዛሙርቱ ከተናገሩ በኋላ ሐዋርያት ወደ ቦታው መጥተው መቃብሩ ባዶ መሆኑን አይተው ወደ ቤታቸው ሲመለሱ ማርያም መግደላዊት ግን ከመቃብሩ አጠገብ ቀረች። ዮሐንስ አፈወርቅ በዚህ ነገር ይደመማል። ቅዱስ ጴጥሮስ መቃብሩን አይቶ ተመለሰ ማርያም መግደላዊት ግን እዛው መቅረቷን ከሴትነት ልባዊ ፍቅርና ርህራሄ ጋር ያገናኘዋል። በእውነትም ሴት ያላትን የፍቅር ጥግ አስቀድሞ በመስቀል ኋላም በትንሳኤው ተገለጠልን። የዩሐንስ አፈወርቅን እይታ ገታ አድርገን የወንጌላዊውን ትረካ እንከተል። በጌታ መቃብር ቀኝና ግራ የተቀመጡ መላእክት ምን ትፈልጊያለሽ ብለው ጠየቋት። እርሷም ጌታን ወስደውታል የትም እንዳረጉት አላውቅም። ብላቸው ወደ ኋላ ዘወር ስትል ክርስቶስን አየችው። ታሪኩን ከወንጌላዊው አፍ እናዳምጥ:-

“ይህንም ብላ ወደ ኋላ ዘወር ስትል ኢየሱስን ቆሞ አየችው፤ ኢየሱስም እንደ ሆነ አላወቀችም። ኢየሱስም፦ አንቺ ሴት፥ ስለ ምን ታለቅሻለሽ? ማንንስ ትፈልጊያለሽ? አላት። እርስዋም የአትክልት ጠባቂ መስሏት፦ ጌታ ሆይ፥ አንተ ወስደኸው እንደ ሆንህ ወዴት እንዳኖርኸው ንገረኝ እኔም እወስደዋለሁ አለችው። ኢየሱስም፦ ማርያም አላት። እርስዋ ዘወር ብላ በዕብራይስጥ፦ ረቡኒ አለችው፤ ትርጓሜውም፦ መምህር ሆይ ማለት ነው። ኢየሱስም፦ ገና ወደ አባቴ አላረግሁምና አትንኪኝ፤ ነገር ግን ወደ ወንድሞቼ ሄደሽ፦ እኔ ወደ አባቴና ወደ አባታችሁ ወደ አምላኬና ወደ አምላካችሁ ዓርጋለሁ ብለሽ ንገሪአቸው አላት። መግደላዊት ማርያም መጥታ ጌታን እንዳየች ይህንም እንዳላት ለደቀ መዛሙርቱ ነገረች።” ዩሐ 20:14-18

ቅዱስ ቄርሎስ ይሄንን ተመልክቶ እንዲህ ይላል ሞት በሷ በኩል የመጣባት ሔዋን በገነት የአትክልት ስፍራ የሞትን ቃል እንደሰማች ሁሉ (ዘፍ 3:1) ማርያም መግደላዊትም በአትክልቱ ስፍራ ለሞት ሞት የሆነውን ትንሳኤውን ሰማች። ይለናል።

ምናልባት በዚህ ንግግር ውስጥ ክርስቶስ ወደ አባቴና ወደ አባታችሁ ወደ አምላኬና ወደ አምላካችሁ አላረግኩም የሚለው ቃል ጥያቄ ያስነሳ ይሆናል ። ሊቁ ጠርጡለስ ክርስቶስ ሌላ አምላክ እየጠራ አይመሰላችሁ ይለናል። ይልቁንም ፈጣሪ ያለውን የፍጡር ሥጋን ይዞ እንደተነሳ ሊያመላክት እንጂ እርሱ ፍጡር ሆኖ ሌላ ፈጣሪ ኖሮት አይደለም ይላል በዚህ ሀሳብ ቅዱስ ቄርሎስና አፈወርቅ ዮሐንስም ይስማማሉ ፍጡር ሥጋን ገንዘብ ስላደረገ ተናገረ እንጂ። እግዚአብሔር አብ የእርሱ አባትና አምላክ የሚሆንበት አገባብ ከኛ ይለያልና ወደ አባቴና ወደ አባታችሁ ወደ አምላኬና ወደ አምላካችሁ አለ እንጂ ወደ አባታችንና አምላካችን አለማለቱን ቅድስት ቤተክርስቲያን ታስተምራለች።

ወደ ቅዱሳት እናቶቻችን እንመለስ ጌታ እስከመስቀል ላልተለየው ሐዋርያ ቅድስት ድንግል ማርያምን እንደሰጠው ሁሉ እስከመስቀል ለታመኑለት ቅዱሳት የከበረች ትንሳኤውን አስቀድሞ ገለጠላቸው። ባገለገሉት ልክ በወደዱትም መጠን አከበራቸው ቅዱስ ዮሐንስ አፈ በረከት እንዳለው የትንሳኤውን ወንጌል ለሐዋርያት ይሰብኩ ዘንድ የተገቡ አደረጋቸው።

ቤተክርስቲያንም ለዚህ መታሰቢያ የትንሳኤን ስድስተኛ ቀን ቅዱሳት አንስት ብላ ታከብረዋለች።

ክርስቶስ ተንስአ እም ሙታን – ክርስቶስ ከሙታን ተነሳ

የልደታ ለማርያም ቅዱስ ትውፊት

ከኢትዮጵያ ኦርቶዶክሳዊት የተዋሕዶ ቤተክርስቲያን በዓላት ጋር በተያያዘ ከተለያዩ አካላት በተደጋጋሚ የሚቀርቡ ትችቶችን መሰማት ከጀመረ ሰንበትበት ብሏል

የዓለምአቀፋዊቷ ቤተክርስቲያንን ትውፊት ያጠና ግን በዓላቱ በዘመን የረዘመ በቦታም የሰፋ ነገር ግን እንደ ቦታው ታሪካዊ ሂደት ለውጥን የሚያስተናግድ ተመሳሳይነትን ማግኘቱ የማይቀር ነው። የዚህ ምንጩም ዜና ቅዱሳን ነው።

የቅዱሳንን ዜና ሕይወት መጻፍ በብሉይ ኪዳን የተጀመረ ሲሆን ሊቀ ነብያት ሙሴ በኦሪት ዘፍጥረት ምዕራፉ የቀደሙ ርዕሳነ አበውን የነአዳም፣ ኖህ፣ ሄኖክ፣ አብርሃምን ታሪክ ሰንዶልናል። የቅዱሳን መሳፍንትና ነገስታትም ዜና ሕይወት በመጽሐፈ መሳፍንት፣ ነገስትና ዜና መዋዕል በሌሎቹም ክፍላት የተፃፉ ናቸው።

በሐዋርያት ሥራ መጽሐፉም ሉቃስ የሐዋርያትን አገልግሎት ከትቧል። እኒህ ሁሉ ዜና ቅዱሳን በመጽሐፍ ቅዱስ ውስጥ የተካተቱ ሲሆን ሳይገኙ በመዘግየት ያልተካተቱ የሐዋርያት ጽሑፎችና የድኅረ ሐዋርያት ዜና ቅዱሳን በተናጥል (ገድላትና ተአምራት) እንዲሁም በስብስብ (ስንክሳር) መልኩ እየተዘገበ ከዚህ ዘመን ተደርሷል። የአንዳንድ የቅዱሳን ዜና በዓለም ሁሉ የሚታወቅ ሲሆን የሌሎች ዜና ገድል ግን በተወሰነ ቦታ ብቻ የሚታወቅ ሆኖ እናገኘዋለን።

እንደ ዓለም ገዝፎ በመታወቅ ደረጃ የቅድስት ድንግል ማርያምን መታወቅና መከበርን የሚያህል የለም። የድንግል ማርያም ነገረ ልደት በሁሉም ጥንታዊያን አብያተክርስቲያናት የሚታወቅና የሚከበር በዓል ነው። በነገረ ድህነታዊ ዋጋቸው በአለም ሁሉ ከሚከበሩት የሁለት ፍጡራን በዓላትም ዋነኛው የእመቤታችን ልደት ሲሆን ሁለተኛው ደግሞ በመወለዱ ብዙዎች ደስ ይላቸዋል ተብሎ በጌታችን የተነገረለት የመጥምቁ ዮሐንስ ልደት ነው።

የእመቤታችን ነገረ ልደት የተመዘገበበት ጥንታዊው መጽሐፍ የጌታ ወንድም ተብሎ የተጠራው ሐዋርያው ቅዱስ ያዕቆብ ያዘጋጀው መጽሐፈ ልደት (the book of nativity) ወይም መጽሐፈ ያዕቆብ (book of James) በግሪኩ ደግሞ ፕሮቶቫንጌልዮን ነው።

መጽሐፉ በኦርቶዶክስና የካቶሊክ አብያተክርስቲያናት በቀኖናቸው ተቀባይነት የሰጡት መጽሐፍ ሲሆን 16 ምዕራፎች ያሉት መጽሐፍ ነው። እንደ ስያሜው አምላክን ስለወለደች ቅድስት ድንግል ማርያምና ስለ ጌታችን ኢየሱስ ክርስቶስ ልደት የሚያወራ ሲሆን እመቤታችን ዘመዱ እንደመሆኗ ከእርሷና ከቅርብ ዘመዶቿ እየሰማ እንደፃፈው ይታመናል።

በ1ኛው ክ/ዘ እንደተጠናቀቀ የሚነገርለት ይህ መጽሐፍ እንደ ኦሪገን ያሉ የጥንቷ ቤተክርስቲያን ሊቃውንት በትምህርታቸው ላይ የጠቀሱት ሲሆን በ1552 ወደ ላቲን ተተርጉሟል።

መጽሐፉ ሲጀምር “የኢየሱስ ክርስቶስና የዘለዓለማዊት ድንግል ማርያም የልደት ታሪክ፤ የክርስቶስ ዘመድና ወንድም በሚሆን ዋና ሐዋርያ እንዲሁም የመጀመሪያው የኢየሩሳሌም ክርስቲያኖች ሊቀጳጳስ በሆነ ታናሹ ያዕቆብ” ብሎ ይዘቱንና ጸሐፊውን ይናገራል።

የመጽሐፉ ታሪክ በሁሉም አቢያተክርስቲያናት የሚታመን ሲሆን ታሪኩ ከመጽሐፉ መታተም ከ600 ዓመት በፊት በተጻፉ ሌሎች ጥራዞች ላይ ሳይቀር መጠቀሱ በእድሜ ቅድምናና መነሻ ታሪክ እንዳለው ማሳያ ይሆናል።

የቅድስት ድንግል ማርያም የትውልድ ስፍራን በተመለከተ ልዩነቶች ያሉ እንዲሁም ናዝሬትና የኢየሩሳሌም መግቢያ ከተሞች በኔ ነው በኔ ነው የተወለደችው እያሉ ሚፎካሩ ሲሆን ኦርቶዶክሳዊት የተዋሕዶ ቤተክርስቲያን ግን “ሙሽራዬ ሆይ፥ ከሊባኖስ ከእኔ ጋር ነዪ፤ ከሊባኖስ ከእኔ ጋር ነዪ፤ ከአማና ራስ ከሳኔርና ከኤርሞን ራስ፥ ከአንበሶች መኖሪያ ከነብሮችም ተራራ ተመልከች።” መኃልየ. 4፥8 የሚለውን የሰለሞንን ቃል መነሻ አድርጋ መወለዷ ከሊባኖስ መሆኑን ታስተምራለች። በሊባኖስም እጅግ ጥንታዊ የሆነ በስሟ የሚጠራ ቤተመቅደስም ይገኛል።

በዓለማችን የሚገኙ የተለያዩ ክርስቲያኖች (ኦርቶዶክስ ተዋሕዶ፣ ምስራቅ ኦርቶዶክስ፣ ካቶሊክ፣ አንጋሊካን፣ ሉተራውያን) የእመቤታችን ልደት በተለያዩ ቀናት የሚያከብሩ ሲሆን የምዕራብ አብያተክርስቲያናት ጷግሜ 3 (September 8), የምስራቅ አብያተክርስቲያናት (ኦርየንታልና ምስራቅ ኦርቶዶክስ መስከረም 10 (September 21) እንዲሁም የኢትዮጵያ፣ የኤርትራና የግብፅ አብያተ ክርስቲያናት ደግሞ በግንቦት 1 ያከብሯታል።

የእመቤታችንን 33 በዓላቷን በሚዘረዝረው የተአምረ ማርያም መቅድም ላይም መስከረም 10 የሚያከብሩ እንዳሉ ይጠቅስና “እኛ ግን..” ብሎ “…በተረዳ ነገር  አባቶቻችን ሊቃውንት እንዳስተማሩን ልደቷ ግንቦት 1 ነው እንላለን” ሲል ይመልሳል።

የእመቤታችን የልደት በዓል እስከ ደርግ ውድቀት ድረስ በብሔራዊ በዓልነት ሲከበር የነበረ ሲሆን እንደ ፊሊፒንስ ባሉ ሀገራት ስራ የማያዘጋ ብሔራዊ በዓል ተደርጎ ይከበራል።

ሁሌም የጌታ ትንሳኤ በሚከበርበት በበዓለ 50ው በዓል የሚከበረው የልደታ ማርያም ዓመታዊ በዓል ዘንድሮ ይበልጥ ከትንሳኤው በዓል ጋር ተቀራርቦ በአዳም መታሰቢያ ሐሙስ ላይ ውሏል።

መልካም የአዳም ተስፋ ማርያም የልደት በዓል

ክርስቶስ ተንስአ እም ሙታን – ክርስቶስ ከሙታን ተነሳ