በዓለ ደብረ ቁስቋምእንኳን ለእመቤታችን ቅድስት ድንግል ማርያምዓመታዊ በዓል (ኅዳር ፮) አደረሰን፤ አደረሳችሁ!!!
እመቤታችን ቅድሰት ደድንግል ማርያም ጌታችን ኢየሱስ ክርስቶስን ይዛ አረጋዊ ዮሴፍንና ሰሎሜን አስከትላ ወደ ግብጽ ተሰዳ ደብረ ቁስቋም ላይ ያረፉበትን ኅዳር ፮ ቀን የኢትዮጵያ ኦርቶዶከስ ተዋሕዶ ቤተክርስቲያን በታላቅ ድምቀት ታከብራለች፡፡
የእመቤታችን ስደት ወደ ግብጽ ከእግዚአብሔር የታዘዘ መልአክ ለቅዱስ ዮሴፍ “ሄሮድስ ሕፃኑን ሊደግለው ይፈልገዋልና ሕፃኑንና እናቱንም ይዘህ ወደ ግብጽ ሽሽ፡፡ ተመለስም ብዬ እስክነግርህ ድረስ በዚያ ኑር” ስለተባለ በዚያኑ ዕለት ሌሊት ስደት ጀምረዋል፡፡ በዚያውም “ልጄን ከግብጽ ጠራሁት” የሚለው ትንቢት ይፈጸም ዘንድ ነው። ሆሴ.፲፩፥፩ ነቢዩ ኢሳይያስም “እነሆ እግዚአብሔር በፈጣን ደመና እየበረረ ወደ ግብጽ ይመጣል ብሎ ነበረ። ኢሳ.፲፱፥፩ ደመና እመቤታችን ስትሆን እግዚአብሔር የተባለው ደግሞ በተለየ አካሉ ሰው የሆነ ፡እግዚአብሔር ወልድ ኢየሱስ ክርስቶስ ነው፡፡ እንደ ነቢዩ ቃለ ትንቢት ቀሊል ደመና እመቤታችን በጀርባዋ አዝላ የቀኑ ሐሩር የሌሊቱ ቁር እያቃጠላት ወደ ምድረ ግብጽ ተሰደደች፡፡
የእመቤታችን ስደት ወደ ኢትዮጵያ የእመቤታችን ስደት ወደ ኢትዮጵያም ነበረ፡፡ ነቢዩ ዕንባቆም “እግዚአብሔር ከቴማን፣ ቅዱሱም ከፋራን ተራራ ይመጣል፡፡ ክብሩ ሰማያት ከድኖአል፡፡ ምስጋናውም ምድርን ሞልቶአል፡፡ ጸዳሉም እንደ ብርሃን ነው፡፡ ጨረር ከእጁ ወጥቶአል፡፡ ኃይሉም በዚያ ተሰውሮአል፡፡” ያለው ኢየሱስ ክርስቶስ ነው፡፡ ቅዱሱ ከፋራን ተራራ ይወጣል እንደተባለ የፋራን ተራራ የተባለች እመቤታችን ናት፡፡ ከሦስቱ ቅዱስ አንዱ ቅዱስ ኢየሱስ ክርስቶስ ሳይከፍት ወደ ማኅፀኗ ገብቶ ሳይከፍት ወጥቶአልና፡፡ በመቀጠልም “ፍለጋውም ከዘላለም ነው፡፡ የኢትዮጵያ ድንኳኖች ሲጨነቁ አየሁ”። ዕንባ.፫፥፫-፯ ያለው እመቤታችን ጌታን ይዛ ወደ ኢትዮጵያ በተሰደደች ጊዜ ተፈጽሟል፡፡ ጠባቂዋ ዮሴፍ እመቤታችንና ሕፃኑ ኢየሱስ ክርስቶስ ሄሮድስ እስኪሞት ድረስ ሦስት ዓመት ከመንፈቅ በስደት ኖሩ፡፡ (ወላዲተ አምላክ በመጽሐፍ ቅዱስ፤ ገጽ ፻፬)፡፡
በጠቅላላው እመቤታችን በስደቷ ጊዜ ብዙ መከራ ተቀብላለች፡፡ አባ ሕርያቆስ በቅዳሴ ማርያም ድርሰቱ ላይ “ድንግል ሆይ ርጉም በሆነ በሄሮድስ ዘመን ከርሱ ጋር ከሀገር ወደ ሀገር ስትሸሺ ካንቺ ጋር መሰደዱን አሳስቢ፡፡ ድንግል ሆይ ከዐይኖችሽ የፈሰሰውንና በተወደደ ልጅሽ ፊት የወረደውን መሪር ዕንባ አሳስቢ፡፡ ድንግል ሆይ ረሃቡንና ጥሙን ችግሩንና ሀዘኑን ከርሱ ጋር የደረሰብሽንም ጭንቅ ሁሉ አሳስቢ” ያለው ለዚህ ነው፡፡ ቁጥር ፻፷፯

የቁስቋም ተራራ ደብረ ቁስቋም በደቡብ ግብፅ የሚገኝ ተራራ ነው፡፡ ደብረ ቁስቋም እመቤታችን ቅድስት ድንግል ማርያም ጌታችን መድኃኒታችን ኢየሱስ ክርስቶስን እንዲሁም ቅዱስ ዮሴፍንና ቅድስት ሰሎሜን ይዛ ከስደት ሲመለሱ ያረፉበት ቦታ ነው፡፡(ማቴ.፪፥፲፱-፳)
በየዓመቱ ኅዳር ፮ የኢትዮጵያ ኦርቶዶክስ ተዋሕዶ ቤተክርስቲያን የእነርሱን ስደትና ወደ ሀገራቸው እስራኤል መመለሳቸውን በማስታወስ ታከብራለች፡፡ ይህም በቅዱስ ወንጌል እንደተጻፈ፡ ሄሮድስ ጌታችን ኢየሱስን ለመግደል በፈለገ ጊዜ የእግዚአብሔር መልአክ ቅዱስ ገብርኤል ለአረጋዊው ዮሴፍ በሕልሙ “ሕፃኑንና እናቱን ይዘህ ወደ ግብፅ ሽሽ” ባለው መሠረት የተፈጸመ ነው፡፡ (ማቴ. ፪፥፲፫-፲፭)
ማየሕይወትዲጂታልመጽሔት
የ ጥር 2018ዓ.ም. እትም
ሐዋርያዊቷ ሰማዕት ቅድስት ኄራኒ

የስሟ ትርጓሜ ሰላም ፍቅር ማለት ነው። ለንጉሥ ሉክያኖስ ልጁ ነች እርሱም አባቷ ያማረ አዳራሽን ሠራላት መስኮቶቹንም ስምንት አደረገ ቅጽሩንም በዙሪያው ዐሥራ ሁለት አደረገ ማዕድንም ሠራላት። የወርቅና የብር የሆኑ ሣህኖችና ጽዋዎችንም አዘጋጀላት የሚያስተምራትም አንድ ሽማግሌ ሰው አደረገላት።
ከዚህም በኋላ በዚያች አዳራሽ ውስጥ አኖራት የሚያገለግሏትም ሦስት አገልጋዮችን በእርሷ ዘንድ አድርጎ ደጃፎችን በላይዋ ዘጋ መምህርዋም በውጭ ሆኖ ያስተምራታል።
ዕድሜዋም ሰባት ዓመት ሆናትና ያን ጊዜ ራእይን አየች በማዕዷ ላይ ርግብ ስትቀመጥ በአፍዋም የወይራ ቅጠል አለ ። በማዕዱም ላይ አኖረችው ሁለተኛም ንስር መጣ ከእርሱ ጋር አክሊል አለ በማዕዷ ላይም አኖረው። ደግሞ ቊራ መጣ ከእርሱ ጋራ ከይሲ አለ በማዕዷ ላይም አኖረው። ደነገጠችም ለመምህርዋም ነገረችው እርሱም እንዲህ ብሎ ተረጐመላት “ርግብ የሕግ ምልክት ናት የዘይቱም ቅጠል የክርስትና ጥምቀት ናት፣ ንስርም ድል አድራጊነት ነው አክሊልም ለሰማዕታት የሚሰጥ ክብራቸው ነው። ቊራ የንጉሥ ምሳሌ ነው ከይሲውም መከራ ነው አንቺም የክብር ባለቤት በሆነ ክርስቶስ ስለ ስሙ ትጋደዪ ዘንድ አለሽ” አላት።
ከዚህም በኋላ ይጐበኛት ዘንድ አባቷ ወደርሷ መጣና “ልጄ ሆይ ከመንግሥት ታላላቆች ለአንዱ ላጋባሽ እኔ እሻለሁ” አላት እርሷ ግን ከልቡናዬ እስተምመክር ሦስት ቀኖችን አባቴ ሆይ ታገሠኝ” ብላ መለሰችለት። አባቷም በሔደ ጊዜ በጣዖታቱ መሠዊያ ፊት ተነሥታ ቆመችና ስለጋብቻ የሚሆነውን ይገልጡላት ዘንድ ለመነቻቸው እነርሱም ምንም ምን ከቶ አልመለሱላትም።
ከዚህም በኋላ ዐይኖቿን ወደ ሰማይ አቅንታ “የክርስቲያን አምላክ ሆይ ወደምትፈቅደው ምራኝ” ብላ ጸለየች ያን ጊዜ የእግዚአብሔር መልአክ መጥቶ እንዲህ አላት። “እነሆ ነገ ከጳውሎስ ደቀ መዛመርት አንዱ ወደዚች አገር ይመጣል እርሱም የክርስትና ጥምቀትን ያጠምቅሻል። በማግሥቱም ያ ሐዋርያ መጥቶ የክርስትና ጥምቀትን አጠመቃት። በሦስተኛውም ቀን እንደቀጠረቻቸው አባቷና እናቷ መጡ እርሷም እንዲህ አለቻቸው “እኔ ሰማይና ምድርን በፈጠረ በሕያው እግዚአብሔር ልጅ በጌታዬ ኢየሱስ ክርስቶስ የማምን ክርስቲያን ነኝ”።
አባቷም ሰምቶ በእርሷ ላይ ተቆጣ ወደ ከተማው መካከልም አውጥተው በጐዳና ላይ እንዲጥሏትና በፈረሶች እግር እንዲአስረግጧት አዘዘ። ወታደሮችም ንጉሥ አባቷ እንዳዘዘ አደረጉባት ግን ምንም ምን ክፉ ነገር ከቶ አልደረሰባትም። ይህንንም ድንቅ ሥራ አባቷና እናቷ በአዩ ጊዜ የክብር ባለቤት በሆነ በጌታችን ኢየሱስ ክርስቶስ አመኑ መንግሥታቸውንም ትተው ለርሷ ወደተሠራው አዳራሽ ሔደው በውስጡ ተቀመጡ።
በጐረቤታቸው ያለ ንጉሥም ዜናቸውን በሰማ ጊዜ ወደ ርሳቸው መጥቶ ወደ መንግሥታቸው እንዲመለሱ ተናገራቸው። እነርሱም አልፈለጉም እርሱም መንግሥታቸውን ያዘ ቅድስት ኄራኒንም ይዞ አሠቃያት ከዚያም አንበሶችን፣ እባቦችን በላይዋ ሰደደ ምንም አልቀረቧትም ። ሁለተኛም በመጋዝ መገዛት በአንገቷም ውስጥ ታላቅ ደንጊያ አሥሮ ከባሕር ጣላት የክብር ባለቤት ጌታችንም ከዚህ ሁሉ አድኖ ያለ ጥፋት በጤና አሥነሣት።
ከዚህም በኋላ እርሷን ያጠመቀ ሐዋርያን አባቷ ጠርቶ ከቤተሰቦቹ ሁሉ ጋር ተጠመቀ ቊጥራቸውም ሦስት መቶ ሆነ ከዘመዶቹና ከሀገር ሰዎችም ብዙዎች ተጠመቁ።
ከዚህም በኋላ ከሀዲው ንጉሥ ኑማርያኖስ የቅድስት ኄራኒን ዜናዋን ሰማ ወደርሱም አስቀርቦ ቀላኒካ ወደሚባል አገር ወሰዳት። በዚያም ጽኑ ሥቃይን አሠቃያት በበሬ አምሳል በተሠራ የነሐስ በርሜል ውስጥ ዘጋባት የክብር ባለቤት ጌታችንም ያንን በሬ ሰብሮ ቅድስት ኄራኒን ያለ ጥፋት በጤና አወጣት።
ከዚህም በኋላ ኑማርያኖስ ሙቶ በርሱ ፈንታ ሳፎር ነገሠ እርሱም የቅድስት ኄራኒን ዜና በሰማ ጊዜ ወደ ርሱ አስቀርቦ በእጁ ውስጥ በአለ በታላቅ ጦር ወጋትና ነፍሷን አሳለፈች የክብር ባለቤት ጌታችን ኢየሱስ ክርስቶስም ከሞተ አስነሣት። ንጉሥ ሳፎርም በአየ ጊዜ እጅግ አደነቀ ሰገደላትም በጌታችን ኢየሱስም አመነ ። ከእርሱም ጋራ ከሀገር ሰዎች ብዙ ወገኖች አመኑ ቁጥራቸውም ሠላሳ አንድ ሺህ ሆነ።
ከዚህም በኋላ በዚያች አዳራሽ ውስጥ አባቷና እናቷ ዐረፉ እርሷን ግን አምላካዊት ኃይል ተሸከመቻት ወደ ኤፌሶን አገርም አድርሳት በዚያ ታላላቅ የሆኑ ድንቆች ተአምራቶችን አደረገች።
በፋርስ ነገሥታት በመቄዶንያ፣ በቀላኒካና በቊስጥንጥንያ ነገሥታት ፊት በጌታችን ኢየሱስ ክርስቶስ ስም ከመሰከረች በኋላ ወደ ወደደችው ክርስቶስ ሔደች። የድልና የሰማዕትነት አክሊልንም ተቀበለች። ለእግዚአብሔር ምስጋና ይሁን እኛንም በሐዋርያዊቷ ሰማዕት በቅድስት ኄራኒ በጸሎቷ ይማረን በረከቷም ከእኛ ጋራ ትኑር ለዘላለሙ አሜን።
ምንጭ፦ የነሐሴ 21 ስንክሳር።
እጨጌ አባ ዮሐንስ ዘጠገሮ (ዘጐንድ)

ሐምሌ ሃያ ዘጠኝ በዚች ቀን አቡነ ዮሐንስ ዘጠገሮ ዕረፍታቸው ነው፡፡ ጻድቁ አባታችን የተወለዱት በኢየሩሳሌም አውራጃ ልዩ ስሙ ሳሬራ በሚባል ቦታ ነው፡፡ የካቲት ፳፰ ቀን ተፀንሰው ኅዳር ፳፱ ተወለዱ፡፡ አባታቸው ድላሶር እናታቸው እምነ-ጽዮን ይባላሉ፡፡ ሲወለዱ በወላጆቻቸው ቤት ውስጥ ብርሃን ወርዷል፡፡ ወላጆቻቸውም እግዚአብሔርን የሚፈሩ ደጋግ ክርስቲያኖች ናቸው፡፡ አባታችን ገና በተወለዱ በ፭ ዓመታቸው ወላጆቻቸው ወደ እግዚአብሔር ቤት ይዘዋቸው የእመቤታችንን ሥዕል ተመልክተው በደስታ ተመልተው ሳቁ፡፡ አምላክን የወለደች የብርሃን እናቱ እመቤታችንም ከስዕሉ ወጥታ “በምን አውቀኸኝ ነው?” ብላ አቅፋ ሳመችውና “ከእንግዲ ወዲህ የልጄ አገልጋይ ትሆናለህ፣ ኑሮህም እንደ መላእክት ይሆናል፣ በአንተ ምክንያት ብዙ ሰዎች ይድናሉ፣ በምድር ላይም ፭፻ ዓመታትን ትኖራለህ።” ብላ ባርካው ተሰወረች፡፡
ከዚያችም ቀን ጀምሮ አባ ዮሐንስ ለክርስቶስ ተላልፎ ተሰጠ፡፡ ፶ ዓመትም በበረሃ ሲጋደል ኖሮ ከ፶ ዓመት በኋላ በደመና ተጭነው በመልአኩ በቅዱስ ገብርኤል መሪነት ወደ ቅድስት ሀገር ኢትዮጵያ መጡ፡፡ ጻድቁ አባታችን በአቡነ ተክለሃይማኖት ዘመን መጨረሻ የመጡ ሲሆን ምንኩስና ከደብረ ሊባኖስ ገዳም ከአቡነ ተክለ ሃይማኖት ተቀብለው በዚያው በደብረ ሊባኖስ ገዳም ለ፶ ዓመት በጾምና በጸሎት በተጋድሎ ኖረዋል፡፡ ከዚኽም በኋላ አባ ዮሐንስ ወደ ተዘጋቸላቸው ምድር በቅዱስ ገብርኤል አሳሳቢነት ወደ ጠገሮ መጡ፡፡ ይኽም ጠገሮ ያለው ገዳማቸው በሰሜን ሸዋ በመንዝና ይፋት ክልል መዘዞ በሚባል ቦታ ሲደርሱ በእግር አንድ ሰዓት ከተጓዙ በኋላ ይገኛል፡፡
ሕዝቡ በተለምዶ እጨ ዮሐንስ እያለ ይጠራቸዋል እንጂ ስማቸው እጨጌ ዮሐንስ ነው፡፡ አቡነ እጨጌ ዮሐንስ መስቀል ከሰማይ የወረደላቸው ታላቅ አባት ናቸው፡፡ መስቀሉም ሁልጊዜ ተአምር ይሠራል፡፡ በልደታቸው ቀን ኅዳር ፳፱ ቀን መስቀሉ ከመቅደሱ ወጥቶ በካህናቱ ታጅቦ ወደ ጸበሉ ሲወርድ ከየት እንደመጣ ሳይታሰብ ደመና መጥቶ ከመስቀሉ ላይ ብቻ እረቦና እንደ ጃንጥላ ተዘርግቶ አብሮ ወደ ጸበሉ ይወርዳል፡፡ እዛው ቆይቶ መስቀሉ ሲመለስም አብሮ አጅቦ ይመለስና መስቀሉ ቤተ መቅደስ ውስጥ ሲገባ ደመናው ወዴት እንደተበተነ ሳይታወቅ ይጠፋል፡፡ ይህ በዘመናችንም ጭምር እየታየ ያለ ታላቅ ተአምር ነው፡፡
አባታችን በታላቀ ተጋድሎ ሣሉ ሰይጣን የሀገሩን ሰዎች በጠላትነት እንዲነሡባቸው አደረገ፡፡ ሰዎቹም አባታችንን እንዴት እንደሚያጠፏቸው ይማከሩ ጀመር፡፡ ሊገድሏቸው ፈልገው ቅድስናቸው በሁሉ ዘንድ የታወቀ ነውና ፈሩ፡፡ ከዚኽም በኋላ ‘ለምን ከመንደራችን ከወንድ ያረገዘች ሴት ፈልገን “እሳቸው አስረገዟት” ብለን በሐሰት እንከሳቸውም?’ ብለው ተማከሩ፡፡ ብዙ ወርቅና ብርም ለአንዲት ሴት ሰጥተው በሐሰት “ከእርሱ አርግዣለሁ” ብላ እንድትመሰክር አደረጓት፡፡ አባታችንም በሕዝብ ፊት በሐሰት ተከሰሱ፡፡ ጻድቁም “አንቺ ሴት ከእኔ ነው ያረገዝሽው?” አሏት እርሷም “አዎ ከአንተ ነው፤ ልትክድ ነው እንዴ?” አለቻቸው፡፡ አባታችንም በዚህ አዝነው “በአንቺና በእኔ መካከል እግዚአብሔር ይፍረድ” ሲሉ ያቺ ሴት ወዲያው ለሁለት ተሰንጥቃ ሞተች፡፡ የአገሩ ሰዎችም እጅግ ፈሩ፡፡ አባታችንም ምድሪቱን ረገሟት፡፡ “የተዘራው ዘር አይብቀልብሽ፣ የተተከለው አይፅደቅ፣ ብርድና ውርጭ ይፈራረቅብሽ” ብለው እረግመዋት በደመና ተጭነው ወደ ሰሜን ጎንደር እስቴ ጉንደ ተክለተሃማኖት ሔዱ፡፡
አቡነ ዮሐንስ በመላው ኢትዮጵያ ወንጌልን እየተዘዋወሩ ያስተማሩ ሲሆን ከቅድስናቸው የተነሣ በፀሐይ ላይ ፶ ዓመት፣ በጨረቃ ላይ ፶ ዓመት፣ በደመና ላይ ፶ እንዲሁም ዓለምን በክንፋቸው በመዞር በደመና ላይ ፶ የኖሩ፣ ከሰው ተወልደው ከመላእክት የተደመሩ ታላቅ ጻድቅ ናቸው፡፡ በይፋት ጠገሮ በዓለወልድ፣ በአፋር አዘሎ፣ በመንዝ ፍርኩታ ኪዳነምሕረት፣ በደብረ ሊባኖስ፣ በጎንድ ተክለ ሃይማኖት በሌሎችም ቦታዎች በመዘዋወር በታላቅ ተጋድሎ ኖረዋል፡፡ አባታችን ከሰማይ መስቀል የወረደላቸው ሲሆን ዛሬም በገዳማቸው የሔደ ሰው በወረደው በእጃቸው መስቀል እየተዳበሰ ቆመው በጸለዩበት ባሕር በጠበላቸው ይጠመቃል፡፡ በተጨማሪም ይይዙት በነበረውም መቋሚያቸው በመዳሰስ በረከትን ማግኘት ይቻላል፡፡ ቆመው ከጸለዩበት ባሕር ውስጥ ደረቅ አሸዋ ይወጣል፡፡ አባ ዮሐንስ ፶፻ ዓመት ከኖሩ በኋላ ዐረፍተ ዘመናቸው ሲደርስ መድኃኔዓለም ክርስቶስ ከ፲፭ ነቢያት፣ ከ፲፪ ሐዋሪያት፣ ሄሮድስ ያስፈጃቸው ከመቶ አርባ አራት ሺ ሕፃናት፣ ከአብርሃም ከይስሐቅ፣ ከያዕቆብ ጋር ሁሉንም ነገደ መላእክትን፣ ጻድቃን ሰማዕታትን ሁሉ አስከትሎ መጥቶ ታላቅ ቃልኪዳን ገብቶላቸዋል፡፡ “ስምህን የጠራ ገዳምህን የረገጠ፣ መባ የሰጠ፣ ቤተ ክርስትያንህን የሠራ፣ ያሠራ የረዳ፣ ገድልህን የሰማ፣ ያሰማ ያስተረጎመ፣ መታሰቢያህን ያደረገ እስከ ፲ ትውልድ እምርልሀለው፤ ንስሀ ሳይገባ አይሞትም፣ ልጅ መውለድ ባይችል እኔ ልጅ እሰጠዋለሁ፤ ገድልህን በቤትህ ያስቀመጠ እርኩስ መንፈስ፣ ክፉ አጋንንት፣ ቸነፈር፣ ወባ መልአከ ጽልመት አይነካውም፡፡ በገዳምህ መነኩሴ ቢቀበር በሰማይ ክንፍ አበቅልለታለሁ፤ አይሁድም አረማዊም ያላመነ፣ ያልተጠመቀ በገዳምህ መጥቶ ቢያርፍ ይቅር እልልሃለሁ፣ እንደ መቃብሬ ጎልጎታ እንደተቀበረ አድርጌ እቆጥርልሃለሁ…” የሚል ቃል ኪዳን ከሰጣቸው በኋላ ወደ ሰማይ ዐረገ፡፡
ቅዱስ አባታችንም በ፶፻ ዓመታቸው ሐምሌ ፳፱ ቀን ዐርፈው በጎንድ ተክለ ሃይማኖት ተቀብረዋል፡፡ በሰሜን ጎንደር የሚገኘውን ይህንን ገዳም ጻድቁ ራሳቸው ናቸው የመሠረቱት፡፡ ነገር ግን የገዳሙን ስያሜ በአባታቸው በአቡነ ተክለ ሃይማኖት ስም አድርገውታል፡፡ አቡነ ዮሐንስ ካረፉ በኋላ በእርግማናቸው መሠረት በመንዝና በይፋት ብርዱ፣ ድርቁ ስለበዛባቸው አንድ ብቁ ባሕታዊ ከበዓታቸው ወጥተው “በሐሜታችሁ ምክንያት እጨ ዮሐንስ ስለረገማችሁ ነው፤ የእርሱን ዐፅም ካላመጣችሁ ብርዱ ውርጩ ድርቁም አይጠፋላችሁም” አሏቸው፡፡ ሕዝቡም አባታችን በጉንድ አቡነ ተክለ ሃይማኖት ከተቀበሩ ከ፻፴፬ ዓመት በኋላ በቅዱሳን እየተመሩ ሄደው በሌሊት ግማሽ ዐፅማቸውን አምጥተው በሀገራቸው አምጥተው ስላስቀመጡ ብርዱና ውርጩ በመንዝ እየቀነሰላቸው መጥቷል፡፡ ዛሬም በሀገሩ ብርዱና ውርጭ ሲበዛ የጻድቁን ታቦት ሲያወጡ ውርጩ ይጠፋል፡፡ ጠገሮ በሚባለው ገዳማቸው ውስጥ የሚገኘው ጠበላቸው እጅግ አስደናቂ ነው፡፡ ግማሽ ዐፅማቸውን ከጉንድ ተክለሃይማኖት አምጥተው አርባ ሐራ መድኃኔዓለም አጠገብ በላይ በፍሩክታ ኪዳነምሕረት መጋቢት ፲፰ ፍልሰተ ዐፅማቸው ተከናወነ፡፡ ምድሪቷም ተባረከች፣ የዘሩትንም አበቀለች፣ ውርጩም ብርዱም ቀነሰ፣ ዝናብ አልዘንብ ሲል ወይም ሰብል የሚጨርስ አንበጣ ሲመጣ ታቦታቸው ወጥቶ ምህላ ይያዛል፤ ወድያውም መቅሰፍት ይርቃል፣ ዝናብም ይዘንባል፡፡ ጻድቁ ደመናን፣ ጨረቃንና ፀሐይን በእጃቸው እየያዙ ይጸልዩ ነበር፡፡ በጠገሮ፣ በአዘሎ፣ በፍርኩታና በሌሎቹም ታላላቅ ቦታቦዎች ላይ በእያንዳንዱ ገዳም ኃምሳ ኃምሳ ዓመት በጸሎት ኖረው በአጠቃላይ በ፭፻ ዓመታቸው ነው ያረፉት፡፡ ዐፅማቸው መንዝ ከአርባ ሐራ መድኃኔዓለም አጠገብ ፍርኩታ ኪዳነ ምሕረት ገዳም ውስጥ ይገኛል፡፡
ምንጭ፡- ስንክሳር ከሚያዝያ እስከ ጳጉሜን
ይህንን ጥሪ ሰምታችሁ ኖሯል ? የንስሐ ጥሪ

የሰው ልጆችን አብዝቶ የሚወደውና መጥፋታቸውን የማይሻ ፈጣሪ ከጥልቅ ፍቅሩ የተነሳ ልጆቹን ዘወትር ወደ ንስሐ ይጠራቸዋል፡፡ እግዚአብሔርን የሚያስደስተው የሰው ልጆች ድኅነት በመሆኑ ወደ ንስሐ ከመጣራት አይሰለችም ፡፡ ሐዋርያው ቅዱስ ጳውሎስ “ሰዎች ሁሉ ሊድኑና እውነቱን ወደማወቅ ሊደርሱ በሚወድ እግዚአብሔር በመድኃኒታችን ፊት መልካምና ደስ የሚያሰኝ ይህ ነው” በማለት ፈጣሪያችን ለሰው ያለውን ፍቅር ገልጦታል፡፡ ፩ጢሞ ፪÷፬፡፡ የሰዎች መዳን መሻት ብቻም ሳይሆን ወደ ንስሐ እንዲመለሱ ከቸርነቱ የተነሳ ስለኀጢአታቸው ከመቅጣት ይታገሳል፡፡ ይህንንም ቅዱስ ጳውሎስ “ነገር ግን ሁሉ ወደ ንስሐ እንዲደርሱ እነጂ ማንም እናዳይጠፋ ወድዶ ስለእናንተ ይታገሳል” በማለት አረጋግጦታል፡፡፪ጴጥ ፫÷፱ ይህ የእግዚአብሔር ትዕግስት ሰፊ ነውና የጥሪውን ድምጽ የሚሰሙት ሁሉ ሊጠቀሙበት እንዲችሉ የፈጣሪ ፈቃዱ ነው፡፡
ሐዋርያው ቅዱስ ጳውሎስ በአቴና ከተማ በአርዮስፋጎስ መካከል የግሪክ ሰዎችን ሲሰያስተምር “እንግዲህ እግዚብሔር ያለማወቅን ወራት (በኃጢአት የመኖር ዘመን) አሳልፎ አሁን በየቦታቸው ንስሐ ይገቡ ዘንድ ሰውን ሁሉ ያዛል፡፡” የሐዋ ፲፯÷፴
“ንስሐ ግቡ ኃጢአትም እንቅፋት እንዳይሆንባችሁ ከኃጢአታችሁ ሁሉ ተመለሱ፡፡ የበደላችሁትን በደል ሁሉ ከእናንተ ጣሉ፡፡ አዲስ ልብና አዲስ መንፈስም ለእናንተ አድርጉ፡፡ ስለምን ትሞታላችሁ የሟቹን ሞት አልፈቅድምና ይላል ጌታ እግዚአብሔር ስለዚህ ተመለሱና በሕይወት ኑሩ” ሕዝ ፲፰÷፴-፴፪
አምላካችን እግዚአብሔር ይወደናል፡፡ ከፍቅሩ የተነሳ በንስሐ አማካኝነት ከበደላችን ታጥበን የቸርነቱን እና የማታልፍ መንግስቱ ተካፋይ እንድንሆን ይፈልጋልና ሰዎችን ወደ ንስሐና ወደ ዘለዓለማዊ ሕይወት ከመጠራት አላቋረጠም፡፡
የምንኖረው በኃጢአት ዓለም በመሆኑ ከኃጢአትም ተለይተን በንጽህና መኖር ባለመቻላችን ፈጣሪአችን እግዚአብሔር በሕይወት እንድንኖር እንድንነጻ እና እንድንቀደስ አስፈላጊያችን ወደሆነው ንስሐ ይጠራናል፡፡ ስለዚህ ንስሐ ስለእኛ ድኅነት ወደ ተቀደሰው ሕይወት እንድንገባ የተሰጠን እንጂ በላያችን በግድ የተጫነ ሸክም አለመሆኑን በመረዳት ልንጠቀምበት ያስፈልጋል፡፡ ንስሐ ብንገባ የእግዚአብሔርንም ጥሪ ብንቀበል ምክሩንም ብንሰማ በሕይወት እንኖራለን ፡፡ ከሞተ ነፍስም እንድናለን፡፡ እምቢ ብንልም ንስሐ ባንገባ የኀጢአታችን ዋጋ በጊዜው ማግኘታችንን የማይቀር ነው፡፡ በነቢዩ ኢሳይያስ አንደበት “እሺ ብትሉ ብትታዘዙ የምድርን በረከት ትበላላችሁ፤ እምቢ ብትሉ ግን ብታምጹ ሠይፍ ይበላችኋል፡፡” እግዚአብሔር ተናግሯል፡፡ ኢሳ ፩÷፲፱-፳፡፡ እኛ ግን መልካሙን ብንሠራ የእግዚአብሔር የንስሐ ጥሪ ብንቀበል እና ከኃጢአታችን ሥርየት አግኝተን በተቀደሰ ሕይወት በእግዚአብሔር መንግሥት ብንኖር መልካም ነው፡፡
ምንጭ: አቡነ ሺኖዳ የንስሐ ሕይወት
ፈተናን ማሸነፊያ መንገድ ከወዴት አንደሆነ ያውቃሉ?

አንዳንድ ሰዎች መስቀሉን የሚሸከሙት በትዕግስት እና በድፍረት ነው፡፡ ሌሎቹ የሚሸከሙት ደግሞ በማማረርና በመቃወም ነው፡፡ ለልዩ ምክንያት ሲሉ መስቀሉን መሸከም የማይችሉ ሰዎችም አሉ፡፡ ሌሎቹ ደግሞ መስቀሉን መሸከም ስለማይፈልጉ ከእነርሱ ዘንድ ይወሰዳል፡፡ ከላይ ከተመለከትናቸው መካከል የመጨረሻዎቹ ሁለቱ ክፍሎች ክርስትያናዊ እምነታቸውን ለመግለጽ የማይፈልጉ ስለሆኑ መጥፎ ምሳሌዎች ናቸው፡፡
ሐዋርያው ቅዱስ ጳውሎስ ለሮሜ ሰዎች በላከው መልእክቱ ውስጥ ምእመናን ለክርስቶስ ያላቸውን ፍቅር ገልጧል፡፡ ይህን የገለጠው ከክርስቶስ ፍቅር ማንም እንደማይለያቸው፣ ስለ እርሱ ሲሉ በየቀኑ መታረዳቸውንና ለመታረድ እንደቀረበ በግ መቆጠራቸውን በመዘርዘር ነው፡፡ በዚያው ላይ በመቀጠል የተናገረው ግን እንዲህ ብሎ ነው፡፡ “በዚህ ሁሉ ግን በወደደን በእርሱ ከአሸናፊዎች እንበልጣለን፡፡” ሮሜ ፰÷፴፭-፴፯ ስለሆነ እውነተኛ ድል የሚገልጠው የመከራን፣ የጭንቀትን፣ የስደትን፣ የረሀብን፣ የራቁትነትን፣ የፍርሃትን፣ የሰይፍን፣ወዘተ. ሕማምን በጽናት በመታገስ ነው፡፡ ይህን ልናደርግ የምንችለውም በጌታችን በመድኃኒታችንና በኢየሱስ ክርስቶስ እርዳታ ነው፡፡
በአገልግሎት ውስጥ መከራን በጽናት በመቀበል ቀዳሚ ምሳሌ የሚሆን ሰው ነው፡፡ በጽናቱ በተቀበላቸው ፈተናዎችና በተልእኮዎቹ መስክ ውስጥ እጅግ በመድከሙ ቅዱስ ጳውሎስ በእውነት የሚቆጠረው ከሐዋርያት ሁሉ እጅግ የሚበልጥ ሆኖ ነው፡፡ ይህን አስመልክቶ ሲናገር “…ከሁላቸው ይልቅ ግን ደከምሁ፤ ዳሩ ግን ከእኔ ጋር ያለው የእግዚአብሔር ጸጋ ነው እንጂ እኔ አይደለሁም፡፡ “፩ኛ ቆሮ ፲፭÷፲
ቅዱስ ጳውሎስ ክርስቲያን ሆኖ ከተለወጠ በኋላ ተልእኮውን ደማስቆ ወስጥ የጀመረው ኢየሱስ ክርስቶስን ከታላቅ መነሳሳት ጋር በየምኩራብ ውስጥ በመስበክ ነበር፡፡ ብዙ ቀናት ካለፉ በኋላ ግን አይሁድ ሊገድሉት አሤሩበት፡- “…ሳውል (የቅዱስ ጳውሎስ የቀድሞ ስሙ) ግን ዐሳባቸውን አወቀ፡፡ ይገድሉት ዘንድ በሌሊት እና በቀን ወስደው በቅጥር ላይ አሳልፈው በቅርጫት አወረዱት፡፡”
ቅዱስ ጳውሎስ የመሞቻው ጊዜ በደረሰ ጊዜ እንዲህ ብሎ ነበር፡፡ “በመሥዕዋት እንደሚደረግ የእኔ ሕይወት ይሠዋልና የምሄድበት ጊዜ ደርሷል፡፡ መልካሙን ገድል ተጋድያለሁ፤ ሩጫዬን ጨርሻለሁ ሃይማኖትን ጠብቄአለሁ፤ ወደ ፊት የጽድቅ አክሊል ተዘጋጅቶልኛል…” በማለት ተናግሯል፡፡፪ኛ ጢሞ ፬÷፮-፰
ይህ ታላቅ ሐዋርያ በዚህ መልእክቱ ውስጥ የተናገረው እንዲህ በማለትነው፡- “የክርስቶስ አገልጋዮች ናቸውን? …..በድካም አብዝቼ በመገረፍ፣ አብዝቼ በመታሰር፣ አትርፌ በመሞት፣ ብዙ ጊዜ ሆንሁ፡፡ አይሁድ ሲጎድል አርባ ግርፋት አምስት ጊዜ ገረፉኝ፤ ሦስት ጊዜ በበትር ተመታሁ፤ አንድ ጊዜ በድንጋይ ተወገርሁ ፤ መርከቤ ሦስት ጊዜ ተሰበረ፤ ሌትና ቀን በባሕር ውስጥ ኖርሁ፤ ብዙ ጊዜ በመንገድ ሄድኩ ፤ በወንዝ ፍርሃት፣ በወንበዴዎች ፍርሃት ፣ በወገኔ በኩል ፍርሃት፣ በአህዛብ በኩል ፍርሃት፣ በከተማ ፍርሃት፣ በምድረበዳ ፍርሃት ፣ በባሕር ፍርሃት ፣ በውሸተኞች ወንድሞች በኩል ፍርሃት፣ ነበረብኝ፤ ድካምና በጥረት ብዙ ጊዜም እንቅልፍ ማጣት ፣ በርሃብና በጥም፣ ብዙ ጊዜም በመጦም፤ በብርድና በራቁትነት ነበርሁ፡፡ የቀረውንም ነገር ሳልቆርጥ ዕለት ዕለት የሚከብደኝ የአብያተ ክርስትቲናት ዐሳብነው፡፡”
ምንጭ ፡ መከራ እና ክርስትና
በግብጽ ኦርቶዶክስ ቤተክርስትያን
የቀድሞው የጋርቢያ ጳጳስ አቡነ ዮሐንስ እንደ ጻፉት አያሌው ዘኢየሱስ እንደ ተረጎመው
በሮም አደባባይ ባዶ እጃቸውን ዓለምን ያሸነፉ ጀግኖች

ውድ የቤተ ክርስቲያን ሳምንታዊ እድምተኞቻችን በዚህኛው ሳምንት በእግረ ልቡናችን ሐዋርያት የተመላለሱባትን ሮምን ለመጎብኘት የዐሳብ ፈረሳችንን ኮርኩረን ካለንባት ምድር ወደ ጣልያኗ ርእሰ ከተማ ሮም እንጋልበዋለን፡፡
ከዘመናት በፊት ምድራችን በአንድ ታላቅ ክስተት ተጎብኝታ ነበር፡፡ የእግዚአብሔር ልጅ ኢየሱስ ክርስቶስ ከቅድስት ድንግል ማርያም በነሳው ሥጋ ሰው ሆነ፡፡ ይህንን መገለጥ ዓለሙ ባላወቀው ሰዓት ከደቀ መዛሙርቱ አንዱ የሆነው ኬፋ “እናንተስ ማን ትሉኛላችሁ?” ለሚለው ጥያቄ መሠረታዊ ምላሽ ሰጠ፡፡ “አንተ ግን የሕያው የእግዚአብሔር ልጅ ነህ፡፡” ይህ ምስክርነት ስምዖንን ወደ ጴጥሮስነት/ኬፋነት አሻገረው፡፡ ስምዖን አለት ሆነ፡፡ ከዚህ ትዕይንት ከዓመታት በኋላ የእግዚአብሔር ልጅ ወደ ሰማያት ካረገ፣ ደቀ መዛሙርቱም በ፲ (10)ኛው ቀን መንፈስ ቅዱስን ተቀብለው ለአገልግሎት ከወጡ ከዓመት በኋላ ወደ ደማስቆ የሚጓዝ አንድ ጎልማሳ በታላቅ ብርሃን ከመንገዱ ተሰናከለ፡፡ ብርሃኑ ሊያስቆመው አልቻለምና ወደቀ፡፡ ያ ብርሃን ስሙን ጠርቶ “ለምን ታሳድደኛለህ?” አለው፡፡ አሳዳጁን ያላወቀው ጎልማሳም “አንተ ማነህ?” ብሎ ጥያቄውን በጥያቄ መለሰ፡፡ “እኔ አንተ የምታሳድደኝ የናዝሬቱ ኢየሱስ ነኝ” ብሎ መለሰለት፡፡ ያ “አንተ ግን የሕያው የእግዚአብሔር ልጅ ነህ” ተብሎ የተመሰከረለት አምላክ በሰብዓዊ ነገዱ በናዝሬት ራሱን ጠርቶ ተገለጠ፡፡ ይህ ገጠመኝ ሳዖልን ወደ ጳውሎስነት ለወጠው፡፡ ጳውሎስ ምርጥ ዕቃ ሆነ፡፡
እያንዳንዱን ትምህርቷን ከኢየሱስ ክርስቶስ የተቀበለችው ቤተክርስቲያን “የዓለም ብርሃን ናችሁ” የሚለውን ቃሉን መነሻ አድርጋ እነዚህን ሁለት ሐዋርያት “ብርሃናተ ዓለም” ብላ ትጠራቸዋለች፡፡ እነዚህ ቅዱሳን ሐዋርያት ከወንድሞቻቸው ጋር ወደ አገልግሎት ከተላኩ በኋላ ወንጌል በዓለም መስፋፋት ጀመረ፡፡ ክርስትና እንደ አይሁድ በዘርና በጎሳ ሳይገደብ ዓለምን ሁሉ ለኢየሱስ ክርስቶስ መንግሥት ማዘጋጀት ጀመረ፡፡ ቅዱስ ጴጥሮስ ወደ ሮም፣ አንጾኪያና ወደ ተለያዩ ሕዝቦች ተሰማራ፡፡ በቃልና በጽሑፍ በማስተማር ብዙኀኑን ውደ እግዚአብሔር መንግሥት ማረከ፡፡ የአሕዛብ ሐዋርያ የሆነው ቅዱስ ጳውሎስም በግሪክ፣ በሮምና በተለያዩ የአሕዛብ መንደሮች ወንጌልን አዳረሰ፡፡
ይህ የመንግሥተ ወንጌል መስፋፋት ሰላም የነሳው ጠላት በአላውያን መንግሥታት በኩል ጠላትነትን አወጀ፡፡ እጅግ የበዛ መከራን አጸናባቸው፡፡ በሮማ አደባባይ ባዶ እጃቸውን ዓለምን ተፋለሟት፡፡ በቁልቁል በመሰቀል፣ በሰይፍ በመቀላት በኩል ዓለምንና ፍላጎቱን ድል ነሱት፡፡ ይህ ሞቶ የማሸነፍ ድል ለሰይጣን ክፉ ትዝታውን ቀሰቀሰበት፡፡ ያጠፋው ዘንድ ቆርጦ፣ ባሰቀለው ጊዜ ድል ያደረገውን ክርስቶስን አስታወሰው፡፡ በድጋሚ ያውም በሜዳው በግዛቱ በሮም አደባባይ ተሸነፈ፡፡ ሐዋርያቱ በቃለ ጳውሎስ በኩል “ሩጫዬን ጨርሻለሁ፤ ሃይማቴን ጠብቄያለሁ፤ ከእንግዲህ የጽድቅ አክሊል ይጠብቀናል” አሉ፡፡
ዛሬ ላይ ለመንግስታቸው መጽናት በሮም ዐደባባይ ሐዋርያቱን ያሰዉት ነገስታት መንግስታቸው አልፎ፣ ክብራቸው ተገፎ፤ ስም አጠራራቸው ተረስቶ የሐዋርያቱ ታሪክ ሲነገር ብቻ የሚነገሩ የታሪክ ተቀጽላ ብቻ ሆነው ቀርተዋል፡፡ ዛሬ ያ አደባባይ ስሙ የሮማ አደባባይ አይደለም፤ ይልቁንም ተዘቅዝቆ የተሰቀለበትን የቅዱስ ጴጥሮስን ስም ወስዷል፡፡ ከሮማ ግንቡ ባሻገር ያለው የሮማ መሬትም አንገቱን በተቀላው በቅዱስ ጳውሎስ ስም ተሰይሟል፡፡ ዛሬ ሮም የጴጥሮስና ጳውሎስን ታሪክ የምትዘክር መሬት ሆናለች፡፡
እስቲ ፈረሳችንን በሮም እምብርት ወዳለችው ትንሽዬዋ ሃገር ቫቲካን እንውሰደው፡፡ በዚህ ባለው ትልቁ ካቴድራል የሐዋርያው ቅዱስ ጴጥሮስ ክቡር ሥጋው አርፏል፡፡ በ፷፬ (64) ዓ.ም. ሰማዕትነት የተቀበለው ቅዱስ ጼጥሮስ ካረፈ በኋላ ከቀዩ ግንብ አቅራቢያ በኔክሮፖሊስ ባለ ዋሻ ክቡር ሥጋው አርፎ የነበረ ሲሆን በፈረንጆቹ ፲፱፻፵ (1940) ዓ.ም. በተደረገ አሰሳ Πέτρος ἐνὶ /ጴጥሮስ እዚህ ነው የሚል ጥንታዊ የግሪክ ጽሑፍ በመቃብሩ ላይ ተጽፎበት ተገኝቷል፡፡ ከ፲፱፻፷ (1960) ዓ.ም. ጀምሮ አጽሙ ለዐሥርት ዓመታት በካቶሊኩ ፖፕ ቤተ ጸሎት ተቀምጦ የነበረ ሲሆን ከ፳፻፮ (2006)ዓ.ም. ጀምሮ ለሕዝብ ጉብኝት ክፍት ሆኗል፡፡ የተወሰኑ የዓጽሙ ቅሪት ክፍሎችም ለኦርቶዶክስ አብያተ ክርስቲያናት ተሰጥቷል፡፡ ይህንን ቦታ ጎብኝተንና የቅዱሱን አጽም ተሳልመን ከአደባባዩ ቅጥር ጀርባ እንጓዝ፡፡
የቤተክርስቲያናችን ቅዱስ ትውፊት እንደሚነግረን ቅዱስ ጳውሎስ ከከተማው ውጪ በዚህ ቦታ እንዳረፈ ነው፡፡ በዚህም በካቶሊካውያን በሚተዳደር ቤተክርስቲያን መንበር ሥር የአሕዛብ ሃዋርያ የንዋየ ህሩይ ቅዱስ ጳውሎስ ክቡር ሥጋ አርፏል፡፡ በዚህ መቃብሩ ላይም በጥንታዊ የላቲን ቃል PAULO APOSTOLO MART /ጳውሎስ ሐዋርያ ሰማዕት ከሚል ጽሑፍ ጋር ያለበት ሲሆን በ፲፱፻፺፱ (1999)ዓ.ም. በተካሄደ ቁፋሮ ተገኝቶ በ፳፻፩ (2001) ዓ.ም. ከመቃብሩ በተወሰደ ቅሪተ አካል ላይ በተደረገ የካርቦን ምርመራ በመጀመሪያው ክፍለ ዘመን የነበረ መሆኑ ተረጋግጧል፡፡
አሁን ፈረሳችንን ወዳለንበት እንመልሰው፡፡ ሥጋቸውን እንጂ ነፍሳቸውን መግደል የማይችሉትን ነገስታት ያልፈሩት የቅዱሳኑ ሥጋ በምድር እንዳረፈው ሁሉ ዓይነ ህሊናችንን ወደ ክርስቶስ ስናቀና ሕያው ነፍሳቸውን በሰማይ በአባታቸው ዘንድ እናየዋለን፡፡ በኛም ልብ ደግሞ ጸጋቸው እንዲያርፍ እየተመኘን የዛሬን “ቤተ ክርስቲያን ሳምንታዊ” በዚሁ አተምን፡፡
መልካም በዓል፡፡
የመከራ በረከቶችን ያወቁ ኖሯል?

እጅግ ታላቁ የመከራ በረከት እኛ ከዚህ ጎስቋላ ዓለም ወደ ዘላለማዊ ክብር የምንሸጋገርበት ጠንካራና ኃያል ድልድይ ነው፡፡ መከራ ልባችንን ለዓለም ፍቅር ጎትቶ በማውጣት እኛን ለሌሎች ሰዎች አድርጎ ይቀይረናል፡፡ በሌላ ቃላት መከራ እኛን ከዓለም ፍቅር ያስጥለናል፡፡ በዘለዓለማዊነት ውስጥ ያለችውን አንድ ቀን በመከራዎች የተሞሉ ብዙ ዓመታትን ታካክስልናለች፡፡
ቅዱስ አውግስጢን እንዲህአለ፡- “ነፍስ ከዓለም ፍቅር ውስጥ ተጎትታ ካልወጣች በስተቀር ወደ እግዚአብሔር መመለስ አትችልም፡፡ እርሷን ጎትቶ ለማውጣት ደግሞ ከመከራና ከፈተና የተሻለ ምንም ነገር የለም፡፡” ከዚህ በተጨማሪም እንዲህ ብሏል፡፡ “የወይን ዘለላዎች ካልተረገጡ በስተቀር የወይን ጠጅ ሊሆኑ አይችሉም፤ ወይራም በድንጋይ ካልተጨመቀ በስተቀር የወይራ ዘይት ሊወጣው አይችልም፡፡” ከዚህ ሌላ ደግሞ አውግስጢን እንዲህ በማለት ተናግሯል፡- “ፈተናና መከራ ሲበረቱ ፍጹምነትን ያስገኛሉ እንጂ በጥፋት አይጠቃለሉም፡፡”
ሰው በመከራና መስቀሉን በመሸከም ካልሆነ በስተቀር ክብርን ሊቀበል አይችልም፡፡ አንዳንድ ሰዎች ለክርስቶስ ያላቸውን ፍቅር በይፋ ካሳወቁ በኋላ እርሱን ያለምንም መከራ ነው የሚወዱት፡፡ ይሁን እንጂ በተመሳሳይ ጊዜ ከዓለም ክብርና ውዳሴ ከሚቀበሉ “በጠበበው በር ለመግባት ተጋደሉ” ሉቃ ፲፪÷፳፬ ፣ ማቴ ፯÷፲፫ የሚለውን የኢየሱስ ክርስቶስ ትምህርት ይረሱታል፡፡ ምን ጊዜም ቢሆን “በክርስትና ውስጥ ወዳለ ክብር መግባት የሚቻለው በመከራ ነው፡፡” የሚለውን ጠቃሚ መመሪያ ልንማርና ልንገነዘብ ይገባናል፡፡
መከራን ተከትሎ ስለሚመጣው ክብር ስናስብ መንጌላዊው ቅዱስ ዮሐንስ በአንደኛው መልእክቱ ውስጥ የተናገረውን ቃል እናስታውሳለን፡- “ወዳጆች ሆይ አሁን የእግዚአብሔር ልጆች ነን፤ ምንም እንደምንሆን ገና አልተገለጠም፡፡ ዳሩ ግን ቢገለጥ እርሱ እንዳለ እና የዋለን እርሱን እንድንመስል እናውቃለን፡፡” ፩ኛ ዮሐ ፫-፪
ቅዱስ ጳውሎስ “ከክርስቶስ ፍቅር ማን ይለየናል፤ መከራ ወይስ ጭንቀት ወይስ ስደት ወይስ ረሀብ …ፍርሃት ወይስ ሰይፍ ነውን?” እና “ስለ አንተ ቀኑን ሁሉ እንገደላለን፤ እንደሚታረዱ በጎች ተቆጠርን፡፡” በማለት ከተናገረ በኋላ ነው “በዚህ ሁሉ ግን በወደደን በእርሱ ከአሸናፊዎች እንበልጣለን፡፡” ያለው ሮሜ ፰÷፴፭-፴፭
መከራ እና ክርስትና
በግብጽ ኦርቶዶክስ ቤተክርስትያን
የቀድሞው የጋርቢያ ጳጳስ አቡነ ዮሐንስ እንደጻፉት አያሌው ዘኢየሱስ እንደተረጎመው
ቅድስት ቅፍሮንያ

ቅድስት ቅፍሮንያ በደናግል ገዳም ቁጥራቸው ኃምሳ ለሆኑ ለደናግሉ እመ ምኔት እኅት ነበረች። የእመ ምኔትዋም ስሟ ኦርያና ነው። ይህችንም ቅድስት በፈሪሀ እግዚአብሔር አሳደገቻት። በትሩፋት ሥራ ተጋዳሊት እስከሆነችም ድረስ አምላካውያት የሆኑ መጻሕፍትን አስተማረቻት። ከዚህም በኋላ ፍጹም ገድልን ጀመረች፤ በየሁለት ቀኑ ትጾም ነበር። ብዙ ጸሎታትንም ትጸልይ ነበር። ያቺም እመ ምኔት ሥራዋ ያማረ በሃይማኖቷም የጸናች ነበረች። በበጎ ሥራ ሁሉ እንዲጸኑ ወገኖቿን ታስተምራቸው ነበር።
ከዚህም በኋላ ሰዎች ሁሉ ጣዖታትን እንዲያመልኩ ከሀዲው ዲዮቅልጥያኖስ በአዘዘ ጊዜ ብዙዎች ክርስቲያኖችን ይዘው አሠቃዩአቸው፤ ሰማዕታትም ሆኑ። እሊያ ደናግልም ይህን በሰሙ ጊዜ ሁሉም ከገዳም ወጥተው ሸሽተው ተሠወሩ። እመ ምኔቷ ግን ከዚች ቅድስት ቅፍሮንያ ጋራ ብቻዋን ቀረች።
በማግሥቱም የንጉሡ መልክተኞች ወደ ዚያ ገዳም በመጡ ጊዜ እመ ምኔቷን አግኝተው ያዟት፤ ሌሎችንም ደናግል ፈለጓቸው ግን አላገኟቸውም። ቅድስት ቅፍሮንያም በእርሷ ፈንታ እኔን ውሰዱኝ ይቺንም አሮጊት ተውዋት አለቻቸው። እነርሱም ያዟት፤ በብረት ሰንሰለትም አሠሯት፤ መኰንኑ ወደአለበትም ከተማ ወሰዷት፤ እመ ምኔቷም እያለቀሰች ተከተለቻቸው።
ወደ መኰንኑም በአደረሷት ጊዜ ለአማልክት ሠዊ አላት፤ ብዙ ቃል ኪዳንም ገባላት። እርስዋ ግን ቃል ኪዳኖቹን አቃለለች፤ ትእዛዙንም አልተቀበለችም። እንዲደበድቧትም አዘዘና በበትሮች ደበደቧት።
ዳግመኛም ልብሷን ገፍፈው ሥጋዋን ግልጥ እንዲያደርጉ አዘዘ። እመ ምኔቷ ኦሪያናም “አንተ ከሀዲ፣ ይቺን ታናሽ ብላቴና እንዳጐሳቈልሃት እግዚአብሔር ያጐሳቍልህ ዘንድ አለው” ብላ ጮኸች። መኰንኑም እጅግ ተቈጥቶ ይህቺን ቅድስት ቅፍሮንያን አሥረው በመንኰራኵር ውስጥ እንዲያሠቃዩዋት፣ በብረት መጋዝም እንዲሠነጥቋት አዘዘ። ሁሉንም አደረጉ ይህንም ሁሉ ፈጸሙባት። እርሷም ርዳታን ሽታ ወደ እግዚአብሔር ጮኸች። ወዲያውኑ ከሕመሟ ሁሉ ድና ምንም ጉዳት እንዳልደረሰባት ሆነች።
ከዚህም በኋላ ደግሞ ምላሷንና ሕዋሳቷን ሁሉ ቆረጡ ጥርሶቿንም ሰበሩ። ክብር ይግባውና መድኃኒታችን ኢየሱስ ክርስቶስም ያለ ሕማም አስነሣት። መኰንኑም እሷን ማሠቃየት በሰለቸው ጊዜ ራሷን በሰይፍ እንዲቆርጡ አዘዘና ቆረጧት። በመንግሥተ ሰማያትም የሰማዕትነት አክሊልን ተቀዳጀች።
አንድ ባለ ጸጋ ምእመን ሰውም መጥቶ የቅድስት ቅፍሮንያን ሥጋ ወሰደ፤ በአማሩ የሐር ልብሶችም ገንዞ በወርቅ ሣጥን አኖራት። ከሥጋዋም ብዙ ድንቅ ታአምር ተገለጠ።
ምንጭ፡ ስንክሳር ከሚያዝያ እስከ ጳጉሜን

