ቅዱስ አጋቦስ ሐዋርያ

ነቢይ፣ ሐዋርያ፣ ሰማዕት የሆነው የቅዱስ አጋቦስ በዓል በየካቲት4 ይከበራል። ይህም ቅዱስ፣ ጌታችን ከመረጣቸውና ከመከራው በፊት ይሰብኩ ዘንድ ከላካቸው ከ፸፪ቱ አርድዕት መካከል አንዱ ነው። በጽርሐ ጽዮንም አጽናኝ መንፈስ ቅዱስ በወረደ ጊዜ ከሐዋርያት ጋር ስጦታውን ተቀብሏል። እግዚአብሔር የትንቢት ሃብትን ሰጠው። በዚህ ጸጋውም በዘመነ ሐዋርያት (በቀላውዴዎስ ቄሳር ጊዜ) በዓለም ላይ ከባድ ረሀብ እንደሚመጣ ተናግሮ በርካታ ክርስቲያኖች ከረሃብ እና ሞት የታደገ ቅዱስ ነው። ይህን ጊዜ ያለፉትም ደቀመዛሙርቱ  እያንዳንዳቸው እንደችሎታቸው መጠን አዋጥተው በይሁዳ ለሚኖሩ ወንድሞች እርዳታ ይልኩ ስለነበር  ነው። እንዲሁም የቅዱስ ጳውሎስን መከራ አስቀደሞ በመናገሩ ሐዋርያ ትንቢት ተብሏል። በሐዋርያት ሥራ መጽሐፍ እንደተነገረው የጳውሎስን መታጠቂያ አንስቶ ራሱን እግሮቹን አስሮ ” የዚህ መታጠቂያ ባለቤት በኢየሩሳሌም እንዲህ ያሥሩታል” ብሎ ትንቢት ተናገረ ትንቢቱም ተፈጸመች። ከዚህ በኋላ ከሐዋርያት ጋር ሕይወት የሆነውን የወንጌል ትምህርት ሊያስተሞር ወጣ። እያስተማረና ቀና የሆነችውን የእግዚአብሔርን መንገድ እየመራ ብዙ ሀገሮችም ዞረ፤ ብዙ አይሁዳውያንን እና ዮናናውያንን ወደ ክርስትና መለሰ። በዚህ የተነሳ ቅናትን የተሞሉ አይሁዳውያን በኢየሩሳሌም ብቻውን በድንገት ያዙትና ታላቅ ግርፋትን ገረፉት። ከዚህ በኋላ በአንገቱ ገመድ አስገብተው እስከ ከተማ ውጪ ድረስ እየጎተቱት ነፍሱ እስካሳለፈ ድረስ በድንጋይ ወገሩት ብዙ መከራን አደረሱበት። በመጨረሻም በየካቲት ፬ ነፍሱ አረፈች። በዚያን ጊዜ ከሰማይ ብርሃን ወርዶ በሥጋው ላይ እንደ ምሰሶ ተተከለ። አንዲት አይሁዊት ሴትም ልቦናውን ገለጠላትና ይህንን ብርሃን አየቺው። እሷም በውስጧ ሽንገላ፣ ጠብ፣ ቅናት የሌለባት የኦሪትን ሕግ የምትጠብቅ ነበረች። “ይህ ሰው አውነተኛ ነው” አለች። ያን ጊዜ በላይዋ ብርሃን  ወረደ፤ እንዲህ እያለች ጮኸች “እኔ በቅዱስ አጋቦስ ፈጣሪ የእግዚአብሔር ልጅ በኢየሱስ ክርስቶስ የማምን ነኝ” ብላ መሰከረች ያን ጊዜም እንደ ቅዱስ አጋቦስ በድንጋይ ወግረዋት ሰማዕት ሆናለች። የቅዱሱ የሰማዕቱ አባታችን በረከታቸው ይደርብን። ምንጭ – ሰንክሳር ከመስከረም እስከ መጋቢት

“በልቅሶና በዋይታ ወደ እኔ ተመለሱ”

ቸርነት፣ ደግነት፣ ምሕረትና ይቅር ባይነት የባሕርይ ገንዘቦቹ የሆኑለት አምላካችን እግዚአብሔር በአምሳሉ የፈጠራቸው የሰው ልጆችን ከመንገዱ በመውጣት በጠላት ወጥመድ ተይዘው እንዳይቀሩ “ወደ እኔ ተመለሱ” እያለ ዘወትር ይጣራል። ይህ ጥሪ የንስሓ ጥሪ ነው። ንስሓ የቃሉ ትርጒም መጸጸት፣ መቆጨት፣ በሠሩት ክፉ ተግባር ማዘን ማለት ነው። (ደስታ ተክለ ወልድ ገጽ ፰፻፸፰) በሌላ በኩል ደግሞ ንስሓ በሙሉ ልብ መመለስንና መለወጥን ያመለክታል። የሰው ልጅ ድካም የሚስማማውን ሥጋ እንደ መልበሱ ይደክማል፣ ይዝላልም። ከእውነት መንገድ፣ ከጽድቅ፣ ከሕይወት፣ ወጥቶ ይስታል። ይሁን እንጂ የሚያስብ አዕምሮና የሚያመዛዝን ኅሊና ያለው ፍጡር እንደመሆኑ የሠራውን ስሕተት አስተውሎ መጸጸቱ የማይቀር ነው። ጸጸቱ የዐሳብ ለውጥ መኖሩን ያመለክታላል። ነገር ግን የዐሳብ ለውጥ ብቻ መፍትሔ አይሆንምና በተግባር መለወጥ አለበት። በዐሳብም በተግባርም መለወጥ ማለት ደግሞ አጠቃላይ የሕይወት ለውጥ መሆኑን ያስገነዝበናል። ንስሓ የሚባለውም ይህ ነው። ማለትም በመጀምሪያ ያለንበትን ሁኔታ ቆም ብለን ማሰብ፤ ያለንበት ሁኔታ ከትክክለኛው የሕይወት መስመር የወጣ እንደሆነ መጸጸትና መቆጨት፤ ቀጥሎም የበደልነውና የተጣላነው ሰው ካለ ይቅርታ መጠየቅና መታረቅ፣ ከሁሉ በላይ ሕጉን በመተላለፍ ያሳዘንነው አምላካችን ይቅር እንዲለን ደጅ መጥናት ንስሓ ይባላል። ከንስሓ በኋላም ወደ ትትክለኛው መንገድ በመመለስ አዲስ ሕይወት መጀመር ይጠበቅብናል። ጠቅለል አድርገን ስንመለከት ንስሓ “እኖር፣ እከብር” ባይ ኅሊና የሚያሳስበንን ሥጋዊ ፍላጎት ተከትለን፣ ስላጠፋነው ጥፋት ስለ በደልነውም በደል ምሕረትና ይቅርታ የምንጠይቅበት ለኃጢአትና ለጥፋት የጋበዘንን ሥጋችንን የምንገሥጽበትና የምንቀጣበት፣ የእግዚአብሔርንም ቸርነት ደጅ የምንጠናበት ሥርዓት ነው። ይህም ማለት አስቀድመን በተከተልነው ክፉ ዐሳብና በፈጸምነው የጥፋት ተግባር የምንቆጭበት፣ የምንጸጸትበት፣ራሳችንን የምንወቅስበት ወደኋላም ተመልሰን የቀደመ ስሕተታችንን ላለመድገም ቃል የምንገባበት ሥርዓት ነው። ለዚህ ደግሞ “ልጆቼ ወደ እኔ ተመለሱ” እያለ ዘወትር የሚጠራንን የአምላካችንን ድምፅ መስማት ይጠበቅብናል። “እንመለስ!“  መልካም ዕለተ ሰንበት
ምንጭ ሐመር መጽሔት  የካቲት ፳፻፲፫ ዓ.ም.

እንደ ወሮቻችን ኑ በእርሷ እንጀምር (ዲ/ን ሕሊና በለጠ)

የወር መጀመሪያ የእርሷ ልደት ነው። ወሮቻችን ኹሉ በእርሷ ልደት ጀምረው በመጨረሻው የብሉይ ኪዳን ነቢይና የሐዲስ ኪዳን መንገድ ጠራጊ በመጥምቁ ዮሐንስ ያበቃሉ። እርሱ የብሉይን ማለፍና የሐዲስን መምጣት በማብሰር መንገድ እንደ ጠረገ ፣ የብሉይ ምሳሌ የኾነውን የአሮጌውን ዓመት ማለፍና የሐዲስ ምሳሌ የሚሆነውን የአዲሱን ዓመት መምጣት ያበሥር ዘንድ መስከረም አንድ ቅዱስ ዮሐንስ እንዲባል ኾነ። ልክ እንዲሁ ደግሞ የአሮጌው ወር መጨረሻ ላይ ወርኀዊው መታሰቢያው በመሆኑ በእርሱ ትምህርት ላይ ቆመው፣ እርሱ መንገድ ጠርጎላቸው ሐዲስን እንዳዩት የብሉይ ኪዳን ሰዎች፣ እኛም በእርሱ መታሰቢያ በዓል ላይ (በ30) ላይ ቆመን ሐዲስ ወርን እናያለን። እነርሱ በእርሱ ትምህርት ጸንተው የአሮጌውን ኪዳን መጨረሻነት ተረድተው የሐዲስ ኪዳንን ሐዲስ ሕይወት “1” ብለው እንደ ጀመሩ፣ እኛም 30 ላይ ቆመን የአሮጌው ወር ብልየታችንን መጨረሻነት ተረድተን የአዲሱን ወር ሐዲስ ሕይወት “1” ብለን እንጀምራለን። “1” ደግሞ ልደታ ለእግዝእትነ ነው – የኹሉ ነገር ጅማሬ የኾነችው የእመቤታችን ልደት። ወሮቻችን ኹሉ በእርሷ ልደት ስለሚጀምሩ ቀና ናቸው። ወሩን እርሷን አክብሮ፣ ዘክሮ ስሟን ጠርቶ የሚጀምር ሰው መንገዱ የቀና ነው። በእርሷ ጀምሮ ያፈረ የለም። የአዳም የመዳን ተስፋ “እምወለተ ወለትከ” በሚለው እርሷን በሚያነሣው ቃል ኪዳን ተጀምሮ ፍጻሜው ያማረ ሆነ። ኖሕ ከጥፋት ውኃ መዳኑን ለእርሷ ምሳሌ በሚሆን መርከቡ ጀምሮ አላፈረም። ሙሴ እስራኤልን ከፈርዖን የማዳን ሥራውን የጀመረው ሐመልማሉ እሳቱን ሳያጠፋው እሳቱም ሐመልማሉን ሳያቃጥለው ባየው ድንቅ ምሥጢር ነው፤ ይህ ደግሞ እሳተ መለኮት ሐመልማል የሆነች እርሷን ላለማቃጠሉና ላለመዋጡ፣ በእርሷ የተፈጸመውን ተዋሕዶ የሚያሳይ ነው። ሠለስቱ ዮሐንሶችም እንዲሁ ናቸው። ዮሐንስ ፍቁረ እግዚእ የፍቅር እናትን ተቀብሎ የጀመረው ሕይወት “ነባቤ መለኮት” አስብሎታል። ዮሐንስ መጥምቅ በእናቱ ማህጸን ሳለ ለእርሷ ሰግዶ የጀመረው ሕይወት “ከሴቶች ከተወለዱት መካከል ከእርሱ የሚበልጥ አልተነሣም” አስብሎታል። (ማቴ.11:11)። አፈ በረከት ዮሐንስ ስለ እርሷ አመሥጥሮ የጀመረው ሕይወቱ “አፈ ወርቅ” አስብሎታል። (ግንቦት 1 ዓመታዊ በዓሏ እንደ ሆነው ግንቦት 12 የሊቁ ፣ ግንቦት 16ም የሐዋርያው በዓል መሆኑን ልብ ይሏል) እርሷ የወራችን ብቻ ሳይሆን የሰማይና የምድርም መጀመሪያ ናት። (ሰማይና ምድር በውስጣቸውም ያሉት ስላንቺ ተፈጠሩ እንዲል ድርሳነ ማርያም)። ሰማይና ምድር ሳይጋፉ ፣ ሳይራበሹ “ይህ የኔ ክልል ነው፣ ይህ የኔ ወሰን ነው” ሳይባባሉ ሺህ ዘመናትን በፍቅር የጸኑት እርሷን መጀመሪያቸው ስላደረጉ ይሆን? እርሷ የአዳምና ሔዋን መጀመሪያ ናት። ስለ እርሷ አዳምና ሔዋን ተፈጥረዋል። (መላእክትን ከፈጠረ በኋላ በጸፍጸፈ ሰማይ ቀጥሎ ማንን እንደሚፈጥር ያሳያቸው ነበር። ቀጥሎ የሚፈጠረው ሰው: አምላኩን እንደሚክድ ሲያዩ መላእክቱ “አትፍጠረው” አሉ። ድንግልን አሳያቸው፤ ሊያዩት የሚጓጉለትን አምላክን መውለዷን ሲያዩ “ይህችን ፍጠርልን” ብለው ተማጸኑ። “ካለ እርሱ (አዳም) እርሷ አትገኝም” ቢላቸው “እንግዲያውስ ስለ እርሷ እርሱን ፍጠርልን” አሉ። \ትርጓሜ. ኢዮብ? ኩፋሌ?)። ነገረ ልደቱ በእርሷ የጀመረለት አዳም ነገረ ልደቱ በእርሷ እንዳልጀመረለት ሳጥናኤል ወድቆ አልቀረም – ተነሣ እንጂ። በእርሷ የሚጀምር ቢወድቅ እንኳን ይነሣል። መጽሐፍ ቅዱስ ካምና ያፌትን ትቶ የሴም የትውልድ ሐረግን ለምን ተረከ? እመቤታችን ከሴም ዘር ስለምትወለድ ነው። ከሌሎች ሕዝቦች መኻል እስራኤልን መርጦ ለምን ቀጠለ? እመቤታችን ከእስራኤል ስለምትወለድ ነው። የካም ዘር የሆነውን መልከጼዴቅን ትቶ የሴም ዘር ስለ ሆነው ስለ አብርሃም እየተረከ ለምን ቀጠለ? አብርሃም ስለሚበልጥ ነውን? አይደለም። መልከጼዴቅ ታላቅ አብርሃም ታናሽ እንደ ሆነ ቅዱስ ጳውሎስ ነግሮናል። (ዕብ.7)። ታዲያ ምክንያቱ ምንድን ነው? እርሷ ከአብርሃም ዘር ስለምትወለድና ጌታችንና አምላካችንም ወልደ ዳዊት ወልደ አብርሃም ስለሚሆን ነው። መጽሐፍ ቅዱሳችን እንኳን እርሷን በሩቅ ዐይቶና በእርሷ ላይ ተመሥርቶ የተጻፈ ነው። ድኅነታችን በእርሷ ምክንያትነት የተገኘ ነው። “አንዲት ዘር” የሆነች እርሷን ባያስቀርልን ኖሮ ከምድር በታች መውደቃችን ለመቀበር እንጂ ተዘርቶ ለማበብ አይሆንም ነበር። ኢትዮጵያውያን በእርሷ በመጀመር አንታማም። በእርሷ እየጀመርን ከብዙ ውድቀትም ተርፈናል፣ ተነሥተናል። እርስ በእርስ የመባላታችንም ሆነ የሰሞኑ የበሽታ ወሬ ምናልባት እርሷን ዘንግተን የመጡብን ይሆኑ ይሆን? ምናልባትም እርሷን የማይጠሩ ዜጎች በርክተው እኛም በዚህ ደክመን ይሆን? ኑ ልክ እንደ ወሮቻችን በእርሷ እንጀምር። ያለፈውን ብልየት ኹሉ በመጥምቁ ትምህርት ላይ ቆመን እንሻገርና እርሷን ይዘን እንጀምር። ባለፈው ወር ያለቀስን፣ ያዘንን፣ የወደቅን፣ የከፋን፣ ያቄምን፣ የሞትን፣ የዘረፍን፣ የገደልን፣ የዘሞትን በክፋትና በሥጋ ሥራ ያረጀን ኹሉ በመጥምቁ ትምህርት ላይ እንቁምና ብሉዩን እንሰናበተው፤ ሐዲሱን ሕይወት ልክ እንደ ወሮቻችን “1” ብለን በእርሷ እንጀምር። በዲ/ን ሕሊና በለጠ

አቡነ ታዴዎስ ዘጽላልሽ

ትውልድ ሀገራቸው ጽላልሽ (ዞረ) ነው። አባታቸው ሮማንዮስ እናታቸው ማርታ ይባላሉ። አባታቸው ሮማንዮስ ቄስ ነው። የአቡነ ተክለ ሃይማኖት አጎት ናቸው።
በእናታቸው ማኅፀን ሳሉ በጽላልሽ ረሀብ ፀንቶ ነበር። እሳቸው ግንቦት ፳፫ ቀን በመንፈቀ ሌሊት በልብሰ ብርሃን ተጠቅልለው ተወለዱ። ቤታቸው በበረከት ተመላ። ለሀገሬው ዝናብ ዘንቦለት ህዝቡ ከፃድቁ እናትና አባት የተመፀወቱትን ከፍለው ዘሩ። አቡነ ታዴዎስ በተወለዱ በ፵ ቀናቸው ሐምሌ ፪ ቀን ሲጠመቁ የተዘራው እህል አንድ ሳይቀር አፍርቶ ተገኝቷል።ዕድሜአቸው ለትምህርት ሲደርስ ለሊቀ ካህናቱ ለሕይወትብነ ሰጥተዋቸው ሲማሩ አደጉ። አቡነ ተክለ ሃይማኖት ዳሞት (ወላይታ) ተሻግረው መተሎሚን አስተምረው “በእግዚአብሔር ቸርነት በአንተ ጸሎት መተሎሚን በሃይማኖት ወልጄዋለሁ። በምግባር አሳድጌዋለሁና እኅትህን ይዘህ በቶሎ ና!” ብለው ላኩባቸው።
እኅታቸው ትቤጽዮን ትባላለች። የመተሎሚን ወንድም ዝግናን አግብታ አባ ኤልሳዕን ወልዳለች። ከባሏ ተጣልታ ነበርና እሷን ከባሏ አስታርቀው እሳቸው አቡነ ተክለሃይማኖትን እያገለገሉ ፱ ዓመት ኖረዋል። በኋላ አቡነ ተክለ ሃይማኖት ወደ አባ በጸሎተ ሚካኤል ሲሄዱ እሳቸውም ወደ ጽላልሽ ተመልሰው ስለነበር አፄ ይኩኖ አምላክ “እንድትመክረኝ፣ እንድትገስፀኝ ከቤቴ ተቀመጥ!” ብለው ከቤተመንግሥት አስቀመጣቸው።
ሰይጣን ለፀብ ለምቀኝነት አያርፍምና ጠላ ቤቷን ክፉ የሚገድል ሽታ አሸተታትና ሞተች። አባ ታዴዎስ ወንዝ ገብተው ሲጸልዩ ሙቷ ተነሥታለች። ከዚህ በኋላ “ውዳሴ ከንቱ ይሆንብኛል” ብለው ወደ ደብረ ሊባኖስ ተመለሱ። አቡነ ተክለሃይማኖት “ወደ ጽጋጋ (ጅጅጋ) ሂድ አሏቸው።” “ለምን? ቢሉ? አባ አኖሬዎስ ሄደው ሲያስተምሩ ያገሬው ሰዎች ደብድበው አስረዋቸው ነበርና እሳቸውን ለማስፈታት ነበር። የአካባቢው ንጉስ መዩጥ ይባላል። በነፋስ ሰረገላ ተጭነው ሄደው ከፊቱ ወርደው ሲቆሙ ደንግጦ “ከሰማይ መላእክት ነህ ወይስ ከሰው ወገን?” ቢላቸው። እኔ ከሰው ወገን ነኝ አሉት። ክርስትናንም አስተማሩት ጋኔን ከእሳት ላይ ጥሎት ሲሰቃይ የሚኖር ልጅ ነበረው አድነውለታል። ይህን አይቶ አምኖ ሕዝቡም እንዲያምኑና ክርስትናን እንዲቀበሉ አዋጅ ነገረ።
እንደ ሐዋርያው ታዴዎስ ፳፭ ግመል በመርፌ ቀዳዳ በተአምራት አሳልፈው በማሳየታቸው አፍጃል የሚባል የአንድ ባለጠጋ ልጅ በምትሐት እንደሚያደርጉት አድርጎ በመናገሩ ከግመሎቹ አንዲቱ ረግጣው ሞተ፤ ይህን ሙሳ የሚባል ልጅም በተቀበረ በሦስተኛው ቀን ‘አልዓዛርን ከሙታን በአስነሳው በኢየሱስ ክርስቶስ ስም “ልጄ ና ተነስ!” ብለህ ይህንን መቋሚያዬን ወስደህ ከመቃብሩ ላይ አኑር! ‘  ብለው በአፍጃል ሰጥተዉት እንዳሉት ቢያደርግ አፈፍ ብሎ ተነስቷል። ይህን አይተው ሕዝቡ ሁሉ አምነዋል። ከዚህ በኋላ ሙሳን “ሙሴ” ብለው ሊቀ ካህናት አድርገው ፲፪ አብያተ ክርስቲያናት አሳንፀው አኖሬዎስን ይዘው ተመልሰዋል። አቡነ ተክለሃይማኖትም ከንጉሡ ተማክረው ሊቀካህናት ዘጽላልሽ ብለው ሾመዋቸዋል። ንጉስ ዓምደ ጽዮን ፍቅረ ዝሙት አድሮበት የአባቱን ቅምጥ ቢያገባት ሄደው ገሰፁት። በዚህ የተናደደች የንጉሱ ሚስት የኋሊት አሳስራ ከጥልቅ ገደል አሰጣለቻቸው። በዚህ ጊዜ የመቶ ሃያ ዓመት አረጋዊ ነበሩ። የታዘዘ መልአክ ገብረ እግዚአብሔርና ውቢት የተባሉ ደጋግ ሰዎችን አስነስቶ ስጋቸውን ወስደው ከበዓታቸው ቀብረው የተሰጣቸውንም ቃል ኪዳን በዳግማዊ አፄ ዳዊት ዘመን በሕዝቡ ፊት መስክረዋል። ንጉሥ ዳዊትም ዜና ገድላቸውን አጽፈዋል፤ ስጋቸውንም ወደ ከተማቸው በክብር አፍልሰው በተቀደሰ ስፍራ አኑረውታል።ከረድኤታቸው ያሳትፈን።

ዕረፍታ ለማርያም

ልቡናዋ በይኩነኒ የጸና ንጽሐ ሥጋ ፣ ንጽሐ ነፍስ ፣ ንጽሐ ልቡና አስተባብራ የያዘች ወላዲተ አምላክ ምንም እንኳን የአምላክ እናት ብትሆንም ሞተ ሥጋ ለሁሉም ዕጣ ፈንታ በመሆኑ በቃል መነገሩ በልብ መታሰቡ ከፍ ከፍ ይበልና ጌታችን መድኃኒታችን ኢየሱስ ክርስቶስ “ተንሥኢ ወንዒ”  “የነፍሴ ደስታ የኾንሽ ውድ እናቴ ሆይ ተነሥተሽ ወደ እኔ ነዪ” (መኃ ፪፥፲) ብሏታል። ቅዱስ ዳዊት “ነኪር ነገሩ በእንቲአኪ ሀገረ እግዚአብሔር” መዝ.፹፮፥፫  “እግዚአብሔር ማኅፀንሽን ከተማ አድርጎ ዘጠኝ ወር ከአምስት ቀን የኖረብሽ ሆይ ስለ አንቺ የተነገረው የተደረገው ነገር ዕጹብ ድንቅ ነው” እንዳለ እመቤታችን ቅድስት ድንግል ማርያም የአምላክ እናት ሆና ማረፏ ይደንቃል።

ታላቁ የቤተክርስቲያናችን አባት ቅዱስ ያሬድ ሞቷ የሚያስደንቅ መሆኑን «ሞትሰ ለመዋቲ ይደሉ፤ ሞታ ለማርያም የዐጽብ ለኲሉ” /  “ሞት ለማናቸውም ሰው ሁሉ የተገባ ነው፤ የማርያም ሞት ግን ሁሉን ያስደንቃል”  በማለት ገልጾታል። የቤተክርስቲያን ትውፊት የድንግል ማርያም ሞት በሚከተሉት ምክንያቶች እንደሆነ ያስረዳል። የመጀመሪያው  “ለመለኮት ማደርያ ለመሆን የበቃችው ኃይል አርያማዊት ብትሆን ነው እንጂ ምድራዊት ሴትማ እንደ ምን ሰማይና ምድር የማይችሉትን ልትሸከመው ይቻላታል?”  የሚሉ ወገኖች ነበሩና በርግጥም እግዚአብሔር ወልድ የተዋሐደው የሰው ልጆችን ሥጋ እንጂ የመላእክትን አለመሆኑን ለማጠየቅ ነው ፡፡ ይህንን ሁኔታ ቅዱስ ጳውሎስ ሲያስረዳ “እንግዲህ ልጆቹ በሥጋና በደም ስለሚካፈሉ፥ እርሱ ደግሞ በሞት ላይ ሥልጣን ያለውን በሞት እንዲሽር፥ ይኸውም ዲያብሎስ ነው፥ በሕይወታቸው ሁሉ ስለሞት ፍርሃት በባርነት ይታሰሩ የነበሩትን ሁሉ ነጻ እንዲያወጣ፥ በሥጋና በደም እንዲሁ ተካፈለ። የአብርሃምን ዘር ይዟል እንጂ የያዘው የመላእክትን አይደለም” አለ፡፡ (ዕብ.፪፥፲፬-፲፭) በዚህም ድንግል ማርያም የአዳም ዘር መሆኗ ታወቀ፡፡ ሁለተኛው ቅዱስ ያሬድ እንዳለው ጌታችን በፍርዱ አድልዎ የሌለበት መሆኑ ይታወቅ ዘንድ ነው፡፡ ሥጋ የለበሰ ሁሉ በለበሰው ሥጋ ሞትን ይቀምስ ዘንድ የግድ ነውና፡፡

ከዕረፍቷ ረድኤት በረከትን ያሳትፈን።መልካም ዕለተ ሰንበት

አዲስ አበባን እንደ ኒቂያ(የጉባዔ አዲስ አበባ 60ኛ ዓመት መታሰቢያ)

ወቅቱ ፲፱፻፶፯ ዓ.ም. ቦታውም አዲስ አበባ ነው። በንጉሠ ነገሥቱ ዐፄ ኃይለ ሥላሴ ኅሊና ውስጥ ያደረውን ከኤፌሶኑ ጉባዔ ፲፭፻ ዓመታት በኋላ የኦርቶዶክስ ተዋሕዶ (ኦሪየንታል) አባቶችን የሚያሰባስብ ጉባዔ ለማዘጋጀት አዲስ አበባ እየተንጎዳጎደች ነው። በዚህ ጉባዔ ላይ እንዲሳተፉ በራሳቸው በንጉሠ ነገሥቱ በኩል የ፭ቱ አኀት አብያተክርስቲያናት ጥሪ የደረሳቸው በግንቦት ፲፱፻፶፮ ዓ.ም. ነበር። አብያተ ክርስቲያናቱ ለመገኘት ይሁንታቸውን ሲቸሩ መርሐግብሩን የሚያስተባብሩ ኮሚቴዎችን በመሠየም ወደ ሥራ ተገባ።

የመጀመሪያው ኮሚቴ በሐረር ሊቀጳጳስና በፓትርያርኩ ረዳት ሊቀጳጳስ ብፁዕ አቡነ ቴዎፍሎስ (በኋላ ፓትርያርክ) የሚመራ የመርሐግብር ኮሚቴ ሲሆን ሁለተኛው ደግሞ በመንግስት ሥራ ሚኒስቴር ሚንስትር ባላምባራስ ማኅተመ ሥላሴ የሚመራ የአቀባበል ኮሚቴ ነበር። ከዚህ በተጨማሪ በወቅቱ የጤና ሚኒስትር አቶ አበበ ረታ ዋና ጸሐፊነት የሚመራ ጽሕፈት ቤት ተቋቋመ። ኮሚቴዎቹ ከቅድስት ሥላሴ መንፈሳዊ ኮሌጅና ከዓለም አብያተ ክርስቲያናት ኅብረት ተወካዩ ከአባ ጳውሎስ ቬርጋስ ጋር በመተባበር ከጉባዔው ወራት አስቀድመው ነበር ዝግጅታቸውን የጀመሩት። በብፁዕ ወቅዱሳን ፓትርያርኮች ከሚካሄደው ዋናው ጉባዔ አስቀድሞ ከ፭ቱም አብያተ ክርስቲያናት የተውጣጡ ዐሥር የነገረ መለኮት ምሁራን ከዝግጅት ኮሚቴው ኃላፊዎች ጋር ከታኅሣሥ ፳፱/፲፱፻፶፯ ዓ.ም. ጀምሮ ለ፯ ቀናት በአፍሪካ ኅብረት አዳራሽ ተካሄደ።

ጉባዔው በኢትዮጵያ ኦርቶዶክስ ተዋሕዶ ቤተክርስቲያን የኢየሩሳሌም ሊቀጳጳስ ብፁዕ አቡነ ፊሊጶስ ጸሎትና አባታዊ መልእክት የተከፈተ ሲሆን በብፁዕነታቸው ሊቀመንበርነት እየተመራ በዝግ ባደረገው ጉባዔ ለዋናው ጉባዔ የሚያገለግሉ ፮ ርእሰ ጉዳዮችን ለየ። እነዚህ ፮ ርእሰ ጉዳዮች:
፩. ቤተክርስቲያንና ዘመናዊው ዓለም፣
፪. በነገረ መለኮት ትምህርት ላይ የሚኖር ትብብር፣
፫. በወንጌል መስፋፋት ዙሪያ የሚኖር ትብብር፣
፬. ከሌሎች አብያተክርስቲያናት ጋር የሚኖሩ ግንኙነቶች፣
፭. የአብያተ ክርስቲያናትን ግንኙነት ለማስቀጠል የሚያስችል ቋሚ መንገድ ማመቻቸት፣
፮. በዓለሙ ላይ ስለሚታየው ሰላም ማጣትና ፍትህ ዙሪያ አቋማቸውን ማንፀባረቅ ነበር።

ከቅድመ ጉባዔው መጠናቀቅ በኋላ ለዋናው ጉባዔ በእንግድነት የተጋበዙ ቅዱሳን ፓትርያርኮች በብፁዓን ሊቃነ ጳጳሳትና ተወካዮች ታጅበው ወደ ኢትዮጵያ ሲመጡ ንጉሠ ነገሥቱ ከከፍተኛ የቤተክርስቲያንና የመንግስት ኃላፊዎች ጋር በቦሌ ዓለምአቀፍ አየር ማረፊያና በመንበረ ጸባዖት ቅድስት ሥላሴ ካቴድራል አቀባበል ተደርጎላቸዋል።  በጉባዔው ላይ የተገኙ አብያተክርስቲያናት አባቶችም:

፩. ብፁዕ ወቅዱስ አቡነ ቄርሎስ ፮ኛ ከ፬ የግብፅ ኮፕቲክ ኦርቶዶክስ ቤተክርስቲያን ልኡካን ጋር፣
፪. ብፁዕ ወቅዱስ ሞራን ሞር አግናጥዮስ ያዕቆብ ፫ኛ፣ ከ፭ የአንፆኪያና የመላው ምሥራቅ የሶሪያ ኦርቶዶክስ ቤተክርስቲያን፣
፫. ብፁዕ ወቅዱስ አቡነ ቫኪን ቀዳማዊ በአርመን ኦርቶዶክስ ቤተክርስቲያን የኢታችማንዴዝና የመላው አርማንያ ፓትርያርክ እንዲሁም ብፁዕ ወቅዱስ ካቶሊኮስ አቡነ ኮራን ቀዳማዊ በአርመን ቤተክርስቲያን የኪልቅያ መንበር ፓትርያርክ ከ፱ የአርመን ሐዋርያዊት ኦርቶዶክስ ቤተክርስቲያን ልኡካን ጋር፣
፬. ብፁዕ ወቅዱስ አቡነ ባስልዮስ ቀዳማዊ ከ8 የኢትዮጵያ ኦርቶዶክስ ተዋሕዶ ቤተክርስቲያን ልኡካን ጋር፣
፭. ብፁዕ ወቅዱስ ሞራን ማር ባስሊዮስ አኡጉን ቀዳማዊ ከ፯ የማላንካራ ሶሪያዊት ኦርቶዶክስ ቤተክርስቲያን (ህንድ) ጋር ናቸው። ዋናው ጉባዔ ጥር ፮ በአፍሪካ ኅብረት ዋናው አዳራሽ ሲካሄድ በጥንታዊው ሥርዓት መሠረት ቅዱሳን ፓትርያርኮችና ብፁዓን አበው በየደረጃው የተቀመጡ ሲሆን መጽሐፍ ቅዱስ ከፍ ባለ ጠረጴዛ ላይ ከፊት ለፊት በማኖር ጉባዔው ተጀመረ። ጉባዔው በንጉሠ ነገሥቱ፣ በሶሪያና አርመን ፓትርያርኮች ተከታታይ የመክፈቻ ንግግር ከተጀመረ በኋላ በቅድመ ጉባዔ በረቀቁ ዐሳቦች ዙሪያ እስከ ጥር ፲፬ ፲፱፻፶፯ ዓ.ም. ድረስ ውይይት አካሂደዋል። ይሄኛውም ጉባዔ በዝግ የተካሄደ ሲሆን በጉባዔው ጥያቄ መሠረት አቶ አበበ ረታ በአስተባባሪነት፣ አቶ አበራ ጀምበሬ ደግሞ በዋና ጸሐፊነት ተሳትፈውበታል። ጉባዔው ሲጠናቀቅ:
✍️ቅዱሳን ፓትርያርኮች ንጉሠ ነገሥቱን  ወልታ ሃይማኖት (የሃይማኖት ጋሻ) ብለው የሰየሙ ሲሆን ትውፊትና ጥንታዊ ሥርዓትን በጠበቀ መልኩ ለወጣቶች፣ በከተማ ለሚኖሩ ምእመናን እንዲሁም ለቤተሰብ ልዩ ትኩረት ሰጥቶ መንቀሳቀስ ፣

✍️መጽሐፍ ቅዱሳዊውንና ሐዋርያዊውን የቤተክርስቲያን ትምህርት ዘመኑን ለወለዱ አዳዲስ ትምህርቶችና ርእዮተ ዓለሞች ምላሽ በሚሆኑ መልክ ማዘጋጀትና ሥነጽሑፍን ማስፋፋት፣

✍️ሥርዓተ ምንኩስናን ማስፋትና ማፅናት በተለይም የቀደመውን ሥርዓት በመመለስ የሴቶችን አገልግሎት ማጠናከር፣

✍️የቤተክርስቲያን አስተዳደር በየአብያተ ክርስቲያናቱ የሚታየው የሰፋ ልዩነትን መልሶ በማገናዘብ ለሐዋርያዊ ሥርዓትና ለኖላዊ አገልግሎት ምቹ በሆነ መንገድ ማስተካከል እንደሚገባ ፣

✍️በነገረ መለኮት ትምህርት የጋራ ሥርዓተ ትምህርት ከመቅረፅ ጀምሮ የትምህርት ዕድሎችን፣ የመማሪያ መጻሕፍትን፣ ምሁራንን ለመጋራት፣

✍️ከምሥራቅ ኦርቶዶክስ፣ ከሮማ ካቶሊክና ከሌሎች አብያተክርስቲያናት ጋር የሚደረጉ ውይይቶች መጠናከር እንደሚገባቸው በማመን በውይይቶች ላይ ተመሳሳይ አቋምና የመረጃ ልውውጥ እንዲኖር ፣

✍️የኦርየንታል(ተዋሕዶ) አብያተክርስቲያናት ግንኙነት ቀጣይ ሊሆን እንደሚገባ በመስማማት ከየአብያተ ክርስቲያናቱ ሁለት ሁለት ተወካዮች እንዲሰየሙ፣

✍️በዓለም ላይ ያለ፡ ኢ-ፍትሃዊነትን፣ ቅኝ ግዛትን በማውገዝ በመላው ዓለም ለሚከናወኑ የፀረ ቅኝ ግዛት ንቅናቄዎችን እንደሚደግፉ የሚገልፁ ውሳኔዎችን በመስጠት ተጠናቋል።

ጉባዔው ከሺህ ዓመታ በኋላ ለመጀመሪያ ጊዜ የተዘጋጀ ቢሆንምና በቀጣይነቱ ላይ ሁሉም አብያተክርስቲያናት የተስማሙ ቢሆንም በመሪዎች ደረጃ መሠል ጉባዔ ድጋሚ ሳይካሄድ እነሆ ፷ ዓመታት አልፈዋል። ነገር ግን ጉባዔው አብያተክርስቲያናት አሁን ላይ ላላቸው የትብብር መንፈስና አንድነት፣ በልዩልዩ ጉዳዮች ላይ ላላቸው ወጥና ተመሳሳይ አቋም መነሻ በመሆኑ በቤተክርስቲያን ታሪክ ውስጥ ደማቅ ኵነት ሆኖ ቀጥሏል። በሰሜን አሜሪካ መቀመጫውን ላደረገው የኦርየንታል ኦርቶዶክስ ስታንዲንግ ኮንፍረስ ለተሰኘው ተቋምም ምሥረታና ህልውና እንደ ጋራ ሠነድ እያገለገለ ይገኛል። ይህን አዲስ አበባን እንደ ኒቂያ ንጉሠ ነገሥቱንም እንደ ቆስጠንጢኖስ ያስቆጠረውን ጉባዔ የዳሰስንበት ሰፊ ጥንቅር የምናበቃው አምላከ ቅዱሳን ዳግም ጉባዔውን የማስጀመር መነሳሳት በፍቁራኑ ልብ እንዲያሳድርና የቤተክርስቲያንን አንድነት እንዲጠብቅ በመመኘት ነው።

ሥርዓተ ጥምቀት

     ጥምቀት ሌሎችን ምስጢራተ ቤተ ክርስቲያን ለመሳተፍ፣ የቤተ ክርስቲያን አባል ለመሆን የመጀመሪያው መግቢያ በር ነው። ጌታችን መድኃኒታችን ኢየሱስ ክርስቶስ በተወለደ በሠላሳ ዓመቱ በዮርዳኖስ ወንዝ በዮሐንስ እጅ ተጠምቆ ጥምቀትን መሠረተ። ጌታችን ኢየሱስ ክርስቶስ ተጠምቆ ከውኀው ከወጣ በኋላ አብ “ዝንቱ ወልድየ” ብሎ የባሕርይ ልጅነቱን መስክሯል። መንፈስ ቅዱስ በርግብ አምሳል ወርዶ በራሱ ላይ ተቀምጧል።   ማቴ ፫÷፲፮-፲፯  በትምህርቱ መጨረሻ “በአብ በወልድ በመንፈስ ቅዱስ ስም አጥምቁ!” በማለት ጥምቀትን አዟል። ማቴ ፳፰ ÷ ፲፱

ከመጠመቅ በፊት የሚያስፈልጉ ነገሮች
፩. ትምህርት፣
፪. እምነት ያስፈልጋል። ተጠማቂው በዕድሜ ከፍ ያለ ከሆነ የክርስትናን ትምህርት የተማረ፣ በኢየሱስ ክርስቶስ ያመነ መሆን አለበት። ጌታችን “ያመነ የተጠመቀ ይድናል” ብሎአልና። ማር ፲፮ ÷ ፲፮.
እምነት መሠረት ነው ሌሎች ተግባራት ግን ሕንጻዎች ናቸው። እምነቱን ለመግለጽ የማይችል ሕጻን ከሆነ ግን በወላጆችና በክርስትና አባቱ ወይም እናቷ ኃላፊነት ይጠመቃል። ካደገ በኋላ በኃላፊነታቸው ይመክሩታል ያስተምሩታል።

ለጥምቀት የተወሰነ ዕድሜ፡-ለጥምቀት የተወሰነ ዕድሜ ለወንዶች ፵ ቀን እና ለሴቶች ፹ ቀን ነው። ኩፋሌ ፬÷፱-፲፫ ሕፃኑ ሞት የሚያሰጋው ሆኖ ከተገኘ ግን ከአርባና ከሰማንያ ቀንም በፊት በሞግዚት ታዝሎ ሄዶ ይጠመቃል። ለመጠመቅ ቀኑ የደረሰውን ሰው ለነገ ብሎ ቀጠሮ መስጠትና በልዩ ልዩ ምክንያት ማሳደር አይገባም።

የጥምቀት ሥርዓት፡- ፩. ጥምቀት የሚደረገው በሥላሴ ስም ነው። የሥላሴን ስም ሳይጠሩ የተጠመቁት ጥምቀት ውኃ ተነክሮ እንደመውጣት የሚቆጠር እንጂ የሚሰጠው ዋጋ ወይም ጥቅም የለውም። ማቴ ፳፰ ÷ ፲፱
፪. ጥምቀት የሚፈጸመው በፈሳሽ ወይም በጥልቅ ውኃ ነው። የሚከናወነውም የሥላሴን ስም እየጠሩ “አጠምቀከ በስመ አብ፤ አጠምቀከ በስመ ወልድ፤ አጠምቀከ በስመ መንፈስ ቅዱስ” እያሉ ሦስት ጊዜ ብቅ፣ ጥልቅ እያደረጉ በማጥመቅ ነው። የማጥመቁ ሂደት ጥልቅ ውኃ በማይገኝበት ጊዜ ግን ውኃ በመቅዳት ወይም በእጅ በማፈስ ያጠምቁታል።
፫. አጥማቂው ኤጲስ ቆጶስ ወይም ቄስ ነው፤ ስልጣነ ክህነት የሌለው ሊያጠምቅ አይችልም።
በማጥመቅ ጊዜ የሚፈጸመው ሥርዓት የሚከተለው ነው።
ንኡሰ ክርስቲያን ማጥመቂያው የትንሣኤ ዕለት የሆነ እንደሆነ በሰሙነ ሕማማት፣ በሱባኤው ውስጥ ሰውነታቸውን ይታጠባሉ፤ ዐርብ ይጾሙና እሑድ ይጠመቃሉ።
ኤጲስ ቆጶሱ ወይም ቄሱ ሲያጠምቁ ፊታቸውን ወደ ምሥራቅ አዙረው፣ እጃቸውን ዘርግተው ይጸልዩለታል።
ቀጥሎ ልጅነት በሚያሰጠው መንፈስ ቅዱስን በሚያሳድረው በሜሮኑ ይጸለይበታል።
ከተጸለየበት በኋላ ለሌላ ቄስ  ይሰጥና በተጠማቂዎች ቀኝ ያቆሙታል።
ወደ መጠመቂያው ከመግባታቸው አስቀድሞ በአብ፣ በወልድ፣ በመንፈስ ቅዱስ ስም እንዳመኑ ይናገራሉ። ማለትም “በአብ፣ በወልድ በመንፈስ ቅዱስ ታምናለህን?” እያለ እያንዳንዳቸውን ይጠይቃቸዋል። “አዎን አምናለሁ” እያሉ እያንዳንዳቸው ይመልሳሉ።
ከዚህ በኋላ ቅብዓ ቅዱስ ይቀቧቸዋል፤ ያጠምቋቸዋል፣ ልጅነትን ያሳድሩባቸዋል።
መናገር የሚችሉ ከሆነ ራሳቸው እምነታቸውን በመመስከር ጸሎተ ሃይማኖትን ያነባሉ። መናገር የማይቻላቸው ከሆኑ የክርስትና አባትና እናት ስለ እነሱ ሃይማኖታቸውን ይመሰክራሉ፤ ጸሎተ ሃይማኖት ያነባሉ።

የተጠማቂዎች  ቅደም ተከተል ተራ፡-በመጀመሪያ የ ፵ና የ፹ ቀን ምፃናት ይጠመቃሉ፤ በኋላ ንኡሰ ክርስቲያን ወንዶች ይጠመቃሉ፤ በመጨረሻ  ንኡሰ ክርስቲያን  ሴቶች ይጠመቃሉ። 
ተጠማቂዎች ከተጠመቁ በኋላ ካሕኑ ሜሮን ይቀቧቸዋል። ከዚያ በኋላ ቅዱስ ሥጋውን እና ደሙን ያቀብሏቸዋል። የክርስትና አባት እና እናትም አብረው ጾመው ቅዱስ ሥጋው እና ደሙ ይቀበላሉ።

በዕለቱ ክርስትና የተነሱ ከሌሎች ቆራቢዎች በፊት ሥጋ ወደሙን ይቀበላሉ። የምትጠመቀውን ሴት ንኡሰ ክርስቲያን ቅብዓ ቅዱሱንና ሜሮኑን ኤጲስ ቆጶሱ ከአንገቷ በላይ ከቀባ በኋላ ሌላውን ሰውነቷን የምትቀባው ዲያቆናዊት ሴት ናት።

በጥምቀት የሚገኝ ክብር፡- ከእግዚአብሔር መንፈሳዊ ልደት መወለድ ልጅነት ማግኘት፣ ከኃጢአት መንጻት ነው።
ወነአምን በአሐቲ ጥምቀት ለሥርየተ ኃጢአት (ጸሎተ ሃይማኖት) የእግዚአብሔር ፀጋ ለሰው ልጅ የሚሰጠው በጥምቀት ከሥላሴ ሲወለድ መሆኑ በቅዱሳት መጻሕፍት ተነግሯል። ዋቢ መጽሐፍ:- ሥርዓተ ቤተ-ክርስቲያን በሊቀ ካህናት ክንፈ ገብርኤል አልታዬ

ቅዱስ ባስልዮስ ዘቂሣርያ 

ታላቁ ሊቅ ቅዱስ ባስልዮስ አርእስተ ሊቃውንት ከሚባሉ አባቶች አንዱ ነው:: አባቱ ኤስድሮስ (ባስልዮስ የሚሉ አሉ)፣ እናቱ ደግሞ ኤሚሊያ ይባላሉ:: ባልና ሚስት ከተቀደሰ ትዳራቸው ፭ ወንድ እና ፩ ሴት ልጅን አፍርተዋል:: የሚገርመው ሴቷ ( ቅድስት ማቅሪና) ገዳማዊት ስትሆን ፭ቱም ወንዶች ጳጳሳት መሆናቸው ነው:: የሁሉ የበላይ የሆነው ግን ቅዱስ ባስልዮስ ነው:: አባቶቻችን እንዳስተማሩን ቅዱሱ ሊቅ ከ፫፻፲፰ቱ ሊቃውንት አንዱ ነው:: ቅዱስ ኤፍሬም ሶርያዊንም ያስተማረው እርሱ ነው ። ቅዱስ ባስልዮስ ገዳማዊ ጻድቅ፣ ባለ ብዙ ምሥጢር ሊቅ፣ የብዙ ምእመናን አባት፣ የቂሣርያ ሊቀ ጳጳሳት፣
ባለ ብዙ ተአምራትና ከከዊነ እሳት (ከፍጹምነት) የደረሰ አባት ነው:: ለመጀመሪያ ጊዜ የነዳያንን ሆስፒታል በ፬ኛው መቶ ክ/ዘ ያስገነባ እርሱ ነው:: እጅግ ብዙ ድርሰቶች አሉት:: መጽሐፈ ቅዳሴንም ዛሬ በምናውቀው መንገድ ያሰናሰለው እርሱ ነው:: ለምዕመናን የሚጠቅሙ ብዙ ሥርዓቶችን ሠርቶ: የብሉይና የሐዲስ ኪዳን መጻሕፍትን ተርጉሟል:: ታዲያ ይህ ሊቅ: ቅዱስና ጻድቅ ሰው ብዙ ድንቆችን ሠርቷል:: ቤተ ክርስቲያን ደግሞ ዛሬ ይህኛውን ታስባለች::

በዘመኑ እዚያው ቂሣርያ ውስጥ አንድ አገልጋይ (በዘመኑ አጠራር ባሪያ) ነበር:: የሚሠራው ደግሞ በሃገረ ገዥው ግቢ ውስጥ ነው:: ለሥራ ሲገባ የሰውዬውን አንዲት ብቸኛ ልጅ ተመለከታት:: ቆንጆ ነበረችና በፍትወት ተለከፈ:: ጧት ማታ ሥራው እሷን ማየት ሆነ:: እንዳይጠይቃት ደረጃው አይመጥንምና ከባድ ፍርድ ይጠብቀዋል:: ነገሮች ከአቅሙ በላይ ሲሆኑበት በቀደመ ስሕተቱ ላይ ሌላ ከባድ ስሕተትን ጨመረ:: ወደ ጠንቋይ (መተተኛ) ቤት ሒዶ ሥራይ እንዲደረግለት ጠየቀ:: መተተኛው ግን “ይህንን ማድረግ የሚችል ሰይጣን ብቻ ስለሆነ ካልፈራህ ወደ እርሱ ልላክህ” አለው:: ያ ከንቱ ሰው “እሺ” አለ:: መተተኛው ቀጠለ “በል! ሌሊት ፮ ሰዓት ሲሆን ወደ አሕዛብ መቃብር ሒድና ግራ እጅህን ወደ ላይ ዘርጋ:: ከዛ ይመጣልሃል” ብሎ ላከው:: አገልጋዩም የተባለውን ሲያደርግ ከአጋንንት አንዱ መጥቶ፣ ነጥቆ ወደ ጥልቁ የሰይጣኖች አለቃ ወደ ሚገኝበት ወሰደው::ጋኔኑ ሰውየውን አለው:- “አንተ የፈለግኸው እንዲፈጸም መጀመሪያ ክርስትናህን ካድ:: በክርታስም ላይ ክህደትህን ጽፈህ በፊርማህ ስጠኝ” አለው:: ያ ልቡ የታወረ ሰው እንደተባለው መጽሐፈ ክህደቱን ለሰይጣን ሰጠ:: ወዲያው ያ ያመጣው ወደ ቤቱ መለሰው:: በማግስቱ ጠዋት በሃገረ ገዥው ቤት ታላቅ ግርግር ሆነ:: ልጃቸው “ያን አገልጋይ ካላጋባችሁኝ ራሴን አጠፋለሁ” አለች:: ቢለምኗትም ልትሰማ አልቻለችም:: ወላጆቿ ግራ ስለተጋቡ ከምትሞት ብለው እያዘኑ ልጃቸውን ከአጋንንት ጋር ለተዛመደ ሰው ሰጡ:: እነርሱ ተጋብተው ኑሯቸውን ቀጠሉ:: ወላጆች ግን የአንድ ልጃቸውን ነገር እንዲህ በዋዛ ሊተዉት አልወደዱምና ጾሙ፣ ጸለዩ፣ ተማለሉ:: በእንዲህ ሁኔታ ብዙ ዓመታት አለፉ:: ወላጆቿ ግን ተስፋ አልቆረጡምና እግዚአብሔር ሰይጣን የቀማትን ማስተዋል መለሰላት::

አንድ ቀንም ባሏን ጠርታ   ” ቤተ ክርስቲያን ተሳልመህ፣ ቆርበህ፣ ስመ እግዚአብሔር ጠርተህ፣ አማትበህስ ታውቃለህ?” አለችው:: እርሱም “በጭራሽ አላውቅም” አላት:: “ለምን?” ብትለው የሆነውን ነገር ሁሉ ዘርዝሮ ነገራት:: በጣም ከመደንገጧ የተነሳ ምድር ከዳት:: ለረዥም ሰዓት አለቀሰች:: ከሰይጣን ጋር ተጋብታ የኖረች ያህል ስታስበው አንገፈገፋት:: ሰውነቷ ተስፋ ቆረጠ:: ወዲያው ግን በኅሊናዋ አንድ ዐሳብ መጣላት:: “ያ ታላቅ የእግዚአብሔር ሰው ከሰይጣን ባርነት ሊገላግለኝ ይቻለዋል” አለች:: ፈጥናም ወደ ቅዱስ ባስልዮስ ዘንድ ሒዳ ከእግሩ ሥር ወድቃ አለቀሰች:: እርሱም “ልጄ ሆይ! አይዞሽ! በእግዚአብሔር ዘንድ ሁሉ ቀላል ነው:: ሒጂና ባልሽን አምጪው” አላት:: ሔዳ አመጣችው:: ቅዱሱም ያን ሰው “መዳን ትፈልጋለህ?” አለው:: ሰውየው መልሶ “ያቺን ደብዳቤ መመለስ የሚቻል ቢሆንማ እፈልግ ነበር” አለው:: ቅዱስ ባስልዮስም ሴቷን “ሒጂና ጸልዪ! ከ፵ ቀን በኋላ ትመጫለሽ” ብሎ አሰናበታት:: በሰይጣን ባርነት የተያዘውን ያን ሰው ግን ወደ ራሱ በዓት ወስዶ አስገባውና በ፬ አቅጣጫ በመስቀል አተመው:: ትንሽ ምግብ ሰጥቶት “ከ፫ ቀን በኋላ እመጣለሁ” ብሎት ሔደ:: ቅዱሱ ያለ ዕረፍት ይጋደልም ጀመር:: በ፫ኛው ቀን መጥቶ “እንዴት ነህ?” አለው:: “አባቴ! አጋንንት አሰቃዩኝ” አለው:: “አይዞህ!” ብሎት ወጣ::
በ፮ኛው ቀን መጥቶ “አሁንስ?” አለው:: “አባ! ስቃዩ ቀረልኝ፤ ግን ደብዳቤዋን እያሳዩ ያስፈራሩኛል” አለው:: “በርታ” ብሎት ሔደ:: በ፱ኛው ቀን ተመልሶ “ደግሞ አሁንሳ?” አለው:: “አባቴ! ምስጋና ለፈጣሪህ! ከአካባቢው እየራቁ ነው” አለው:: እንዲህ በ፫ ፣ በ፫ ቀናት እየተመላለሰ ለ፲፫ ጊዜ ጠየቀው:: በ፴፱ኛው ቀን መጥቶ “ዛሬ ምን አየህ” ቢለው “አባ! አጋንንትን ከእግርህ በታች ስትረግጣቸው አየሁ” አለው::

ቅዱስ ባስልዮስ በ፵ኛው ቀን ደወል ደውሎ መነኮሳት፣ ካህናትና ምእመናንን ሰብስቦ፣ ያንን ሰው ከመሃል አቁሞ፣ “እግዚኦ በሉ” አላቸው:: ሕዝቡ እግዚኦታውን ሲፈጽሙ ከሰማይ ድምጽ ተሰማ:: ቀና ሲሉ ያቺ የክህደት ደብዳቤ ሁሉ እያዩአት ከመካከላቸው ወደቀች:: በዚያች ቦታም ታላቅ እልልታና ሐሴት ተደረገ:: ቅዱሱ በጸሎቱ ለ፵ ቀናት ከእንቅልፍና ከምግብ ተከልክሎ ያቺን ነፍስ ማረከ፤ የሕዝቡንም ሃይማኖት አጸና:: በዚያውም ቅዳሴ ቀድሶ ሕዝቡን አቁርቦ አሰናበታቸው:: ባልና ሚስቱንም ባርኮ በፍቅር ይኖሩ ዘንድ አሰናበታቸው:: ታላቁ ሊቅም ተጋድሎውን ፈጽሞ ጥር ፮ ቀን ዐርፏል::አምላከ ቅዱሳን ከረድኤት በረከቱ ያሳትፈን።

የሰላሙ ንጉሥ ልደት በጦርነት(ከቤተልሔም እስከ ላሊበላ)

አስቀድሞ በትንቢት “ሕፃን ተወልዶልናልና፥ ወንድ ልጅም ተሰጥቶናልና፤ አለቅነትም በጫንቃው ላይ ይሆናል፤ ስሙም ድንቅ መካር፥ ኃያል አምላክ፥ የዘላለም አባት፥ የሰላም አለቃ ተብሎ ይጠራል።” ኢሳ ፱÷፮ የተባለለትን ቅዱስ ያሬድም በድጓው “ትዕምርተ ሰላምነ ወልድ ተወልደ ለነ” “የሰላማችን ምልክት ወልድ ተወለደልን” ብሎ የተናገረለት የሰላሙ አለቃ የልደት በዓል በተለያዩ የዓለም ክፍሎች እየተከበረና ለመከበርም ዝግጅት እየተደረገ ይገኛል።ምዕራባውያንን ጨምሮ የህንድና የሶሪያ ኦርቶዶክስ አብያተክርስቲያናት በጎርጎርዮሳውያን ዘመን ቀመር መሠረት ባሳለፍነው ሣምንት ታህሣሥ ፲፯ በዓሉን አክብረዋል። በኦርቶዶክስ አብያተክርስቲያናት የዘመን ቀመር ሥር የሚገኙት የኢትዮጵያ፣ ግብፅ፣ ኤርትራ ኦርቶዶክስ አብያተ ክርስቲያናት እንዲሁም የምሥራቅ ኦርቶዶክሳዊያን በታኅሣሥ ፳፱ በዓለ ልደትን ለማክበር በልዩ ጉጉት ውስጥ ሆነው እየጠበቁ ይገኛሉ።በዓለ ልደት ሲነሳ በክርስቶስ ኢየሱስ መወለድ ስላገኘነው ታላቅ ሠላም “ወሰላም ለምድር፤ ስምረቱ ለሰብእ” እያልን የምንዘምርበት ዕለት ቢሆንም ዘንድሮ ሀገራችን ኢትዮጵያን ጨምሮ በመካከለኛው ምሥራቅ፣ በዩክሬንና ሩሲያ የሚገኙ ክርስቲያኖች በሰላም እጦት ውስጥ ሆነው ለማክበር ተገደዋል። በዚህ ሳምንት ዘገባችንም የገና በዓል በድምቀት የሚከበርባቸው አካባቢዎች የዘንድሮን የበዓል አከባበር እንመለከታለን።

ላሊበላ – ኢትዮጵያ፡ ከአንድ አለት የተፈለፈሉ አሥራ አንድ አብያተክርስቲያናት የሚገኙባት ዳግማዊት ኢየሩሳሌም የተሰኘችዋ ደብረ ሮሃ በዓለም ላይ የጌታችን የመድኃኒታችን የኢየሱስ ክርስቶስ በዓለ ልደት ከሚከበርባቸው ቦታዎች መካከል አንዷ ናት። ዓለም አቀፍ የቱሪስት መዳረሻ አውጪዎች ለገና በዓል ከቅድስት ቤተልሔም ቀጥሎ በ፪ኛ ወይም በ፫ኛ ደረጃ የሚያስቀምጧት ላሊበላ ልብን በሚመሥጠው “የቤዛ ኩሉ” ዝማሬዋ ልቦናን ወደ ክርስቶስ የልደት ምሽት በመውሰዷ በብዙኀኑ ምእመናንና ቱሪስቶች ዘንድ በየዓመቱ ትናፈቃለች።ይህች የምስጋና ደሴት ግን ድኅረ ኮቪድ ሀገራችን ባስተናገደቻቸው አራት የጦርነት ዓመታት ምክንያት የደኅንነት ሥጋት ተጋርጦባታል። በዚህም ከሩቅና ቅርብ የሚመጡ የተሳላሚዎች መጠን በመቀነሱ አብያተ ክርስቲያናቱና በጎብኚዎች ላይ ሕይወታቸውን የመሠረቱ የአካባቢው ነዋሪዎች ለከፋ ችግር ተጋልጠዋል። ማግሰኞ ለሚከበረው በዓለ ልደት እየተዘጋጀች የምትገኘው ላሊበላ ዘንድሮም በተስፋና ሥጋት ውስጥ ሆና እንግዶቿን እየጠበቀች ነው።በሌሎች የኢትዮጵያ አካባቢዎችም እየተካሄዱ ባሉ የእርስ በርስ ጦርነቶች ባስከተሏቸው ጫናዎች ውስጥ ሆነው ኢትዮጵያዊያን በዓለ ልደቱን በጉጉት እየጠበቁ ይገኛሉ።

ገና በሩሲያና ዩክሬን፡ከፍተኛ ቁጥር ያላቸው የምሥራቅ ኦርቶዶክሳውያን ሕዝቦችን የያዙት ሩሲያና ዩክሬን በዓለ ልደትን ለዘመናት በኦርቶዶክሳዊ ትውፊት በታኅሣሥ ፳፱ ያከብሩ የነበረ ቢሆንም ዩክሬን ከሁለት ዓመት በላይ በዘለቀው ጦርነት ምክንያት የሩሲያን ተፅዕኖ ከዩክሬን ለማጥፋት በሚል ስበብ ካለፈው ዓመት ጀምሮ በመንግስት ውሳኔ ከምዕራባውያን ጋር በታኅሣሥ ፲፯ ለማክበር ተገዳለች። ከሩሲያና ከሩሲያ ቤተክርስቲያን ጋር ግንኙነት ያላቸውን ነገሮች ከምድረ ገጿ እያጠፋች የምትገኘዋ ዩክሬን ለኦርቶዶክሳዊያን ሲኦል ሆና እየተሠራች እንደምትገኝ በርካቶች ይናገራሉ።ዩክሬን የዘንድሮ የገና በዓልን እንደ ከዚህ ቀደም በሚያማምሩ ርችቶች ሳይሆን በእስካሁኑ ጦርነት ታይቶ በማይታወቅ የባለስቲክ ሚሳኤል ናዳ ነበር ያከበረችው። ለአንድ ሰው ሞትና ለአስራ አምስት ሰዎች መቁሰል ምክንያት የሆነው ይህ ጥቃት ከፍተኛ የኀይል መሠረተ ልማቶችን ዒላማ በማድረጉ ዩክሬናውያን በዓሉን በጨለማ ለማሳለፍ ተገደዋል።

ልደት በመካከለኛው ምሥራቅ፡የሶሪያ ኦርቶዶክስ ቤተክርስቲያንን ጨምሮ በሶሪያ የሚገኙ ክርስቲያኖች በአዲሱ ወታደራዊ መንግስት ስር ሆነው የልደት በዓልን ታኅሣሥ ዐሥራ ሰባት አክብረዋል።የልደት በዓል አከባበሩ በደማስቆ መንበረ ፓትርያርክ በሰላም የተካሄደ ቢሆንም እንደ አሌፖና አልዋ ባሉ አካባቢዎች ክርስቲያኖች የተፈናቀሉበት የልደት በዓል መታሰቢያዎች የተቃጠሉበትና ግጭቶች የተነሱበት ሆኖ አልፏል።

በዓለ ልደት በሊባኖስና ኢራቅ፡ የአርመን ኦርቶዶክስ ቤተክርስቲያን የኪልቂያ መንበር መቀመጫ በሆነችው ሊባኖስ የገና በዓልን ከእስራኤል ጋር ባለው ጦርነት ሥጋት ውስጥ ሆና በቀዘቀዘ የሀዘን ድባብ ውስጥ አክብራለች።በኢራቋ ነነዌ ደግሞ በዓሉን በሥጋት ውስጥ ሆነው ቢጀምሩትም ኢስላማዊው የሺሃይት ብርጌድ ባደረገው ጥበቃ ያለምንም ችግር በዓሉን አከናውነዋል። ይሄንን ተከትሎ በርካታ የኢራቅ ክርስቲያኖች ለብርጌዱ ያላቸውን አክብሮት ሲገልፁ ተስተውለዋል።

ባለ ፪ በዓሏ ቤተልሔም፡ከእስራኤል ጋር አመትን የተሻገረ ግጭት ውስጥ በምትገኘው ፍልስጤም የዌስት ባንክ አስተዳደር ስር ያለችውና የክርስቶስ ኢየሱስ የልደት ቦታ የሆነችው ቤተልሔም በአሥራ አምስት ቀናት ውስጥ የገናን በዓል ሁለት ጊዜ ታከብራለች። ታኅሣሥ  ፲፯ እና ፳፱። እነዚህ ቀናት በክርስቲያኖች ብቻ ሳይሆን በእስልምና ተከታዮች ዘንድ የሚናፈቅና በየዓመቱ በሚልየን የሚቆጠሩ ተሳታፊዎች የሚገኙበት የነበረ ቢሆንም ቤተልሔም ዘንድሮ ያን ተናፋቂ በዓል ለማክበር አልታደለችም። በከፍተኛ የፀጥታ ቁጥጥር ክርስቲያኖች ሥርዓተ አምልኳቸውን በአብያተክርስቲያናታቸው አክብረው እንዲመለሱ ከመንግስት ባለሥልጣናት በተላለፈላቸው መመሪያ መሠረት የታኅሣሥ ፲፯ቱን በዓል ዝም ባለ ድባብ ያከበሩ ሲሆን የታኅሣሥ ፳፱ኙም ተመሳሳይ እንደሚሆን ይጠበቃል።በዚህ ሁኔታ ላይ ሆነው በዓለ ልደትን የሚያከብሩ የሃይማኖት አባቶች የሰላም ጥሪያቸውን እያሰሙ ሲሆን ለፈረንጆቹ አዲስ ዓመትና ተያይዞ ለሚከበረው የልደት በዓል ለመላው ዓለም መልእክታቸውን ያስተላለፉት የኢትዮጵያ ኦርቶዶክስ ተዋሕዶ ቤተክርስቲያን ፓትርያርክ ብፁዕ ወቅዱስ አቡነ ማትያስ ናቸው። ዓለም በዚህ ትብታብ የመከራ አዙሪት መውጣት የምትችለው በይስሙላ የሰላም ስብሰባ አለመሆኑን ጠቅሰው “ስለዚህ በዚህ የልደተ ክርስቶስ መታሰቢያና የ2025 ዓ.ም. መቀበያ ላይ ቆመን ይቅር መባባል፣ ለጋራ ቤታችን መሥራትና በሰዎች አለመግባባት የታወከችውን ዓለም በሰዎች ቁርጥ ውሳኔ እንድትረጋጋ የበኩላችንን ጥረት ማድረግ ይገባናል ።” ሲሉ ጥሪያቸውን በመላው ዓለም ላሉ ሁሉ አቅርበዋል።እኛም የቅዱስ አባታችንን ጥሪ፣ ጥሪ አድርገን የልደቱ ባለቤት መድኃኔዓለም ክርስቶስ ከእርሱ የሚገኘውን ሰላም እንዲሰጠን እየተመኘን የዛሬውን በዚህ ቋጨን።መልካም ገና፣ መልካም ሰሞነ አስተርዕዮ!

ብስራተ ገብርኤል

ብሥራታዊው መልአክ ቅዱስ ገብርኤል ለእመቤታችን ቅድስት ድንግል ማርያም ተገልጦ ስለ ጌታችን መድኃኒታችን ኢየሱስ ክርስቶስ ከእርሷ መወለድ ያበሠራት ዕለት፣ ታኅሣሥ ፳፪ “ብሥራተ ገብርኤል” ታላቅ በዓል ነው፡፡ቅድስት ድንግል ማርያም በቤተ መቅደስ ሐርና ወርቅ አስማምታ በምትፈትልበት ሰዓት ቅዱስ ገብርኤል ተገልጦ “ደስ ይበልሽ÷ ጸጋን የተመላሽ ሆይ÷ እግዚአብሔር ከአንቺ ጋር ነው፤ ከሴቶች መካከል አንቺ የተባረክሽ ነሽ” አላት።
ድንግል ማርያምም  “እንዲህ ያለ የምስጋና እጅ መንሻ እንዴት ይደረግልኛል?” ብላ ጠየቀችው፡፡
ቅዱስ ገብርኤልም  “ማርያም ሆይ አትፍሪ! ከእግዚአብሔር ዘንድ ባለሟልነትን አግኝተሻልና። እነሆ ትፀንሻለሽ፤ ትወልጃለሽ፤ ስሙንም ኢየሱስ ትዩዋለሽ። ይህ የሚወለደው ከሦስቱ ቅዱስ አንዱ ቅዱስ ነው፤ እርሱም  የእግዚአብሔር ልጅ ይባላል” አላት፡፡  
እርሷም “ይህ ነገር እንደምን ይሆንልኛል፤ ወንድ ሳላውቅ?” አለቺው፡፡
መልአኩ ገብርኤልም “መንፈስ ቅዱስ ይጠብቅሻል፤ የልዑል ኃይልም ያድርብሻል” አላት፡፡
እርሷም የመልአኩን ቃል ተቀብላ “እንደ ቃልህ ይደረግልኝ” አለቺው፡፡
በዚህ ጊዜ አካላዊ ቃል በግብረ መንፈስ ቅዱስ ተፀነሰ፡፡ ቅድስት ማርያም እምነቷን በእግዚአብሔር ላይ አድርጋለችና በትንቢተ ነቢያት መሠረት በድንግልና ፀነሰቺው፡፡ (ሉቃ. ፩፥፳፰-፳፱፣ ኢሳ. ፯÷፲፬ )
ሊቁ አባ ሕርያቆስ በቅዳሴው ስለ ቅዱስ ገብርኤል ብሥራትና ስለ አምላክ ሰው መሆን ሲመሰክር “እርሱ እግዚአብሔር አብ ንጽሕናሽን ባየ ጊዜ ስሙ ቅዱስ ገብርኤል የሚባል መልአክ ወደ አንቺ ላከ፤ መንፈስ ቅዱስ በላይሽ ያድራል፡፡ የልዑል ኃይልም ይጋርድሻል አለሽ፤ ከአባቱ ሳይለይ ቃል ወደ አንቺ መጣ ሳይወሰን ፀነስሺው፤ በላይ ሳይጎድል በታችም ሳይጨመር በማሕፀንሽ ተወሰነ፤ መጠንና መመርመር የሌለበት እሳተ መላኮት በማሕፀንሽ አደረ›› (ቅዳሴ ማርያም ቁ. ፵፭) ብሏል፡፡ ቤተ ክርስቲያናችንም ይህን የብሥራት ቀን በማሰብ ታከብረዋለች፡፡
ምንጭ፡- ነገረ ማርያም፤ ቅዳሴ ማርያም