ማዕዶት- መሻገር

ማዕዶት “ዐደወ” ተሻገረ ከሚል የግዕዝ ግስ የወጣ ሲሆን ትርጓሜውም መሻገር ነው። እንደ ኢትዮጵያ ኦርቶዶክስ ተዋሕዶ ቤተክርስቲያን ቅዱስ ትውፊት ከትንሳኤ ቀጥሎ ለሚገኘው ሰኞ ስያሜ የሆነው ማዕዶት የበዙ ምስጢራትን የያዘ ነው።

በጌታችን ኢየሱስ ክርስቶስ ሞትና መከራ እኛ የሰው ልጆች ከሲኦል ወደ ገነት፣ ከጨለማ ወደ ብርሃን፣ ከሞት ወደ ሕይወት ተሻግረናልና ማዕዶትን እናከብራለን።

በዚህ ቀን በዋነኝነትም ኢየሱስ ክርስቶስ ነፍሱን ከስጋው በሥልጣኑ ለይቶ ክብርት ነፍሱ ወደ ሲኦል ወርዳ በሲኦል የምስራቹን ቃል እርሱም የተስፋ አበው ፍፃሜን መስበኩና ሙታንን ከሲኦል ማውጣቱ የሚታሰብበት እለት ነው።

በእርግጥ ይህ ሁነት የተከናወነው እጅግ የበዛ ምስጢራትና ተአምራት በተከናወነበት በእለተ አርብ ቢሆንም መሻገር ትፍስሕት ነውና ቤተክርስቲያን ከትንሳኤው በኋላ ባለው የመጀመሪያ ቀን በሲኦል የነበረው የእዳ ደብዳቤ መቀደዱን ታከብራለች።

ሊቀ ሐዋርያት ጴጥሮስ በሲኦል ቅድስት ነፍሱ ያደረገችውን ስብከት እንዲህ ይነግረናል:- ክርስቶስ ደግሞ ወደ እግዚአብሔር እንዲያቀርበን እርሱ ጻድቅ ሆኖ ስለ ዓመፀኞች አንድ ጊዜ በኃጢአት ምክንያት ሞቶአልና፤ በሥጋ ሞተ በመንፈስ ግን ሕያው ሆነ፥ በእርሱም ደግሞ ሄዶ በወኅኒ ለነበሩ ነፍሳት ሰበከላቸው። 1ኛ ጴጥ 3:18-19

የቤተክርስቲያን መምህር የሆነው አፈ በረከት ቅዱስ ዮሐንስ አፈወርቅ የክርስቶስን በሲኦል መውረድና ነፍሳትን ማሻገር ከጨጓራ አለመስማማት ጋር (gastronomic analogy) አመሳስሎ እንዲህ ይለዋል:-

‹‹የክርስቶስን ሰውነት በመቀበሉ ሞት ታላቅ ስኅተት ሠራ፡፡ ይህ ሰውነት በእርሱ የገዥነት ሥልጣን ሥር ያለ ተራ ሰውነት ፣ ኃጢአተኛ የሆነና የሚሞት ሰውነት መስሎት ነበር፡፡ ከሰውነታቸው ጋር የማይስማማ ምግብን የበሉ ሰዎች ሲያስመልሳቸው የሚያወጡት አልስማማ ያላቸውን ምግብ ብቻ ሳይሆን የበሉትን ነገር ሁሉ ነው፡፡ በሞትም ላይ የሆነው ይኼው ነው፡፡ ሞት ፍጹም ንጹሕና የማይሞት የሆነውን የክርስቶስን ሥጋ ዋጠ ፤ የማይሞተው ሕያዉ ክርስቶስ ለአልጠግብ ባዩ ሞትና ሲኦል የሚመር እና የማይስማማ ምግብ ሆነበት፡፡ ሊስማማው ስላልቻለም ተፋው ፤ ከክርስቶስ ሥጋ ጋርም ሲኦል ሆድ ውስጥ ከጥንት ጀምሮ ውጦ የያዘውን ሙት ሁሉ አብሮ ተፋ፡፡ ለሞት የሚስማማው ብቸኛ ምግብ ኃጢአት ብቻ ነው፡፡ ኃጢአት የሌለበት የጌታ ሰውነት ለሲኦል የማይስማማ ምግብ ነው፡፡


ሞት ሊላመጥ የማይችልን ትልቅ ድንጋይ ዋጠ ፤ ይህ ድንጋይ የማይላመጥ ብቻ ሳይሆን በሆድ ውስጥ ቆይቶ የሚያፈራርስና የሚሰባብር ነው፡፡ ስለዚህ ሞት ‹የማዕዘን ድንጋይ› የሆነውን የክርስቶስን ፍጹም ቅዱስ የሆነ ሥጋ በዋጠ ጊዜ በታላቅ ሥቃይና ድካም ውስጥ ሆኖ ጥንካሬዎቹን ሁሉ አጣ፡፡ ለዚህም ነው ቅዱስ ጴጥሮስ ‹ሞት ይይዘው ዘንድ አልቻለም› ያለው፡፡ (ሐዋ.፪፥፳፬) የትኛዋም ሴት ልጅ ለመውለድ ምጥን ባማጠች ጊዜ ሞት የክርስቶስን ሥጋ ይዞ የተጨነቀው ያህል ተጨንቃ አታውቅም” በእርግጥም መብላት የሌለበትን መብል የበላው አዳምን ካጋጠመው ደዌ ይፈውስ ዘንድ እግዚአብሔር ወልድ በሞት ተበላ። ዕፀ በለስ ለአዳም ባህርይ ባለመስማማት ሁሉንም እንዳሳጣችው ክርስቶስን የዋጠ ሲኦልም ለባህርዩ የሚስማማ አልነበረምና ሁሉንም አስተፋው።

ሌላኛው የቤተክርስቲያን ኮከብና ሊቅ ቅዱስ ኤፍሬም ሶርያዊ ይሄንን በክርስቶስ ከተደረገ ታላቅ ምሥጢር በኋላ ሞት ያጣውን ክብርና ነፃነት በሰውኛ ዘይቤ እንዲህ ያናግረዋል:-

‹‹ሞት እንዲህ አለ ፡- ‹‹ይህ ማን ነው? የማንስ ልጅ ነው? እኔን ድል የነሣኝ ይህ [ኢየሱስ የተባለ] ሰው ከየትኛው ቤተሰብ የተገኘ ይሆን? የትውልዶች ሁሉ የዘር ሐረጋቸው የተዘረዘረበት መጽሐፍ በእጄ ላይ አለ፡፡ ከአዳም ጀምሮ የነበሩት ሰዎች ስም አንድ በአንድ ማንበብ ጀመርሁ፡፡ ከእኔ ያመለጠ [ያልሞተ] አንድም ሰው የለም፡፡ ነገድ በነገድ ሁሉም በክንዶቼ ላይ ተጽፈዋል…

…. በእርግጥ አልዋሽም ፤ የሁለት ሰዎች ስም ብቻ ከእኔ ዘንድ የለም ፤ ሄኖክና ኤልያስ ወደ እኔ አልመጡም … በመላው ምድር ሁሉ ዞሬ ፈለግኋቸው ፣ ዮናስ እስከ ወረደበት የዓሣ አንበሪው ሆድ ድረስ ወርጄ ፈለግኋቸው፡፡ በገነት ውስጥ ተሸሽገው ከሆነ እንዳልፈልጋቸው የሚያስፈራ ኪሩብ ጠባቂ ሆኖ ቆሟል፡፡ ያዕቆብ መሰላልን ተመልክቶ ነበር ፤ ምልባት ወደ ሰማይ የወጡት በዚያ መሰላል ይሆንን?››

በቅዱሱ ብዕር ሞት ስለሆነው ነገር እንዲህ እያለ መናገሩን ይቀጥላል።

“ሞት እንዲህ አለ ፡- ወደ ሙሴ ዘመን ብመለስ ሳይሻለኝ ይሆን? ሙሴ እኮ በዓልን ደግሶልኝ ነበር፡፡ በግብፅ ፋሲካ የታረደው በግም ከእያንዳንዱ ግብፃዊ ቤት የበኩር ልጅን ሠጥቶኝ ነበር፡፡ በሙት ላይ ሙት በሲኦል ደጃፍ ተከምረውልኝ ነበር፡፡ ይኼኛው የፋሲካ በግ [ክርስቶስ] ግን ሲኦልን በዘበዘው ፣ ሙታንንም ከእጄ ነጥቆአቸው ወጣ፡፡ ሙሴ ያሳረደው የቀደመው በግ መቃብሮችን ሞላልኝ ፤ ይኼኛው በግ ክርስቶስ ግን ሞልተው የነበሩትን መቃብሮች ባዶ አደረገብኝ››
​‹‹የኢየሱስ ሞት ለእኔ ሥቃይ ነው ፤ ከሞቱ ይልቅ ለእኔ በሕይወት እንዲቆይ በተውኩትና ወደ እርሱ ባልቀረብኩ ይሻለኝ ነበር፡፡ በሌሎች ሰዎች ሞት ደስ ይለኝ ነበር ፤ የእርሱን ሞት ግን ጠላሁት፡፡ በሕይወት ሳለ የሞቱ ሰዎችን አስነሥቶ ነበርና እርሱም ከሞት እንደሚነሣና ወደ ሕይወት እንደሚመጣ ገምቼ ነበር፡፡ እርሱ ግን በሞቱ ሙታንን ወደ ሕይወት ወሰዳቸው ፤ ይዤ ላስቀራቸው ስሞክርም በሲኦል ደጃፍ አሽቀንጥረው ጥለውኝ ሔዱ … ገና አሁን እኔም ስለ ወዳጆቻቸው ሞት የሚያለቅሱ ሰዎችን የኀዘናቸውን ጣዕም ቀመስሁት … ከሰዎች ላይ የሚወዷቸውን በመቀማት የማመጣባቸው ሥቃይ በተራው በእኔም ላይ ወደቀ”። ሶሪያዊው ኤፍሬም እንደተናገረው የክርስቶስ ሞት ምትን ያስደነገጠና ያሸበረ ነበር። አባቱ ቅዱስ ዳዊት ነፍሴን በሲኦል አትተዋትም እንዳለው ዳግመኛም ወደ ላይ በወጣ ጊዜ ምርኮን ማረከ ስጦታንም ለሰዎች ሰጠ እንዳለው (መዝ 16:10፣ መዝ 68:18) በሲኦል ነብሳችን እንዳይቀር የቀኝ ገዢያችንን ሞት ምርኮ ማረከ፣ ለኛም ክቡር የሆነውን ነፃነት ስጦታ አድርጎ ሰጠን። እንደ ሙሴ ከባህረ ኤርትራ ሳይሆን ከባህረ እሳት ያሻገረን እግዚአብሔር ይመስገን።

ክርስቶስ ተንስአ እም ሙታን – ክርስቶስ ከሙታን ተለይቶ ተነሳ።

ቅዱሱ እሳት – የሚያስደንቀው የትንሳኤው ሕያው ምስክር

ክሪስቶስ አንስቲ (Χριστός Ανέστη)ክርስቶስ ተነስቷል ለሚለው ቃል የግሪክ አቻ ነው። ቃሉን በኢየሩሳሌም የሚገኙ የኦርቶዶክስ አብያተ ክርስቲያናት በሙሉ በልዩ ልዩ ቋንቋ ደውላቸውን እየመቱ ለከተማዋ ያውጁታል። ከዚህ አዋጅ በፊት ግን የጌታችን የመድኃኒታችንና የአምላካችን የኢየሱስ ክርስቶስ ቅድስት ሥጋ ያረፈበት መቃብሩ ከሚገኝበት የትንሳኤው ቤተክርስቲያን በመላው ኦርቶዶክሳውያን የሚጠበቅ አንድ ነገር አለ። – የትንሳኤው ቅዱስ እሳት

እንደ ቤተክርስቲያን ታሪክና በ2016ዓ.ም የእድሜ መመርመሪያ መሳሪያ (OSL) በመጠቀም በአቴንስ ዩንቨርስቲ የተሰራው ጥናትም እንደሚያመላክው የትንሳኤው ቤተክርስቲያን በንጉስ ቆስጠንጢኖስ ዘመን የተሰራ ሲሆን በውስጡም የጌታችንን መቃብር ይገኝበታል። ቤተመቅደሱ የተሰራው ከካልሲየም አለት፣ ከእምነ በረድና ከእንጨት ሲሆን በዓመት ሁለት የትንሳኤ በዓላት (የጎርጎርዮሳዊያንና የኦርቶዶክሳዊያን) በዓላት ይከበሩበታል።

በዚህ ቤተክርስቲያን የቅዱሱ እሳት ተአምር የሚጀምረው  በኛ ከቀኑ አራት ሰአት ላይ ነው። በኢየሩሳሌም ከተማ ከንቲባ ፅ/ቤትና ና በፓሊስ መምሪያው ትዕዛዝ የእስራኤል ፓሊስ እስከ ቀትር 6 ሰዓት ድረስ 3 ጊዜ ቤተ መቅደሱን በመፈተሽ ምንም አይነት ተቀጣጣይ ነገር ክርስቶስ በተቀበረበት ዋሻም ሆነ በቤተመቅደሱ እንደሌለ ያረጋግጣሉ። ፍተሻቸውን ካጠናቀቁ በኋላ ሁለት ሙስሊም አባወራዎች ቤተመቅደሱን ቆልፈው በማህተማቸው አትመው ያሽጉታል። በማስከተልም የትንሳኤ ዋዜማ የጸሎት ሥርዓት የሚከናወንበት ሰዓት ሲደርስ በኢየሩሳሌም የግሪክ ሊቀ ጳጳሳት መሪነት የአርመን ሐዋርያዊት ኦርቶዶክስ ቤተክርስቲያን ቅዱስ ፓትሪያርክ፣ የግብፅና የሶሪያ አብያተክርስቲያናት ልዑካንና ከልዩ ልዩ የዓለም ክፍል የተሰባሰቡ ኦርቶዶክሳዊያን ምዕመናን በተገኙበት ሥርዓተ ፀሎቱ ይጀመራል።

የጸሎቱ ሥርዓት እንደተጠናቀቀ የግሪኩ ፓትሪያርክ ልብሰ ፕትርክናቸውን (ካባቸውንና አክሊላቸውን) አውልቀው ምንም ተቀጣጣይ ነገር አለመያዛቸውን በእስራኤል የፀጥታ ሃይሎች ከተፈተሹ በኋላ 20 በ25 ጫማ (1ጫማ = 0.305 ሜትር)  ስፋት ወዳለው የክርስቶስ የመቃብር ቦታ (ኤዲኪዩር) ሻማ ይዘው ይገባሉ። በኢየሩሳሌም ቤተመቅደስና በዙሪያው ያሉ መብራቶች ይጠፋሉ። ሁሉም ነገር ፀጥ ብሎ ምዕመናን ቅዱሱን እሳት መጠበቅ ይጀምራሉ። ሊቀ ጳጳሱ በዋሻው ውስጥ ከቆዩ በኋላ ቅዱሱን እሳት ይዘው በመውጣት በመጀመሪያ የአርመኑን ፓትርያርክ ሻማ በመለኮስ እንደየ ክህነታዊ ደረጃቸው ለግብፅና ሦርያ ልዑካን ይሰጣሉ። በመቀጠል እሳቱ ለምዕመናን ሁሉ ይዳረሳል።

የኢየሩሳሌም ከተማም የኢየሱስን ትንሳኤ በሚያውጅ ደውል ይናጣሉ።  እሳቱ በአካባቢው ወደሚገኙ አብያተክርስቲያናት ይሰራጫል። ከዛም አልፎ በፈጣን አውሮፕላኖች ወደ ግብፅ፣ አረመን፣ ሩሲያ፣ ሰርቢያና መሰል ሃገራት ይሰራጫል።

ለ20 ዓመታት የኢየሩሳሌም ሊቀጳጳስ የነበሩት ብፁዕ አቡነ ዱዶሮስ በፈረንጆቹ 1988 ዓ.ም በነበራቸው ቃለ መጠይቅ በጌታችን መቃብር ዋሻ ለብቻቸው ከገቡ በኋላ ውስጥ ስለሚሆነው ነገር ሲናገሩ በጨለማ ውስጥ መንገድ እየፈለኩ ወደ ውስጥ እገባና ከጌታችን መቃብር ላይ ጸሎት አደርጋለሁ። ብዙ ጊዜ ጸሎቱን እንደጨረስኩ አንዳንዴ ደግሞ ደቂቃዎችን ዘግየት ብሎ ልዩ መልክ ያለው እሳት ይመጣል። እኔም ሻማዬን እለኩስና ወጥቼ በመጀመሪያ ለአርመኑ ፓትርያርክ በመቀጠልም ለምዕመናን ሁሉ አሰራጫለሁ። ብለው ነበር።

ስለዚህ ቅዱስ እሳት የተዘገበ ጥንታዊ ዘገባ የዛሬ 1700 ዓመት በ4ኛው ክፍለ ዘመን ላይ ሲሆን በኦርቶዶክሳዊት ቤተክርስቲያን ትውፊታዊ መረጃ የእሳቱ መታየትን ወደ 1ኛው ክፍለ ዘመን ይወስደዋል። የኒሳኑ ቅዱስ  ጎርጎርዮስና ቅዱስ ዮሐንስ ደማስዮስ  በትንሳኤው 1 ዓመት ማለትም በ 34ዓ.ም  ሐዋርያው ቅዱስ ጴጥሮስ ከጌታችን መቃብር እሳቱን ማየቱን ፅፈዋል።

ታሪካዊው ማስረጃ ግን በክርስቲያኖች የተዘገበ ብቻ አይደለም በ964 ዓ.ም የሞተው ሙስሊሙ የአረብ የታሪክ ተመራማሪ ኢብን አል ቃስና በ1000ዓ.ም አካባቢ ኢየሩሳሌምን የጎበኘው አል ባይሩኒም በታሪክ ማስታወሻቸው ላይ እውነትነቱን የዘገቡ ሲሆን በቱርክ ኢስላማዊ መንግስት ትመራ የነበረችው ኢየሩሳሌም በከተማዋ ሱልጣን/አሚርና በከተማዋ ኢማም (ዋና የእስልምና የሃይማኖት አባት) ጥብቅ ቁጥጥር እንደሚከወንና የከተማዋ መስጊዶች መብራት ጭምር ከትንሳኤው ቤተክርስቲያን ቅዱስ እሳት እንደሚለኮስ ፅፈዋል።

የትንሳኤው ቅዱስ እሳት ለየት የሚያረገው ያለ ለኳሽ መብራቱ ብቻ ሳይሆን የእሳቱም ለየት ያለ ተፈጥሮ ነው። አቡነ ዲዶርዮስም ሆነ ብዙዎች እንደሚናገሩት እሳቱ ለተወሰኑ ደቂቃዎች ያህል አያቃጥልም። በቅዱሱ እሳት ዙሪያ የተቀረፁ ቪዲዮች እንደሚያሳዩት ምዕመናኑ ያለምንም ጉዳት እሳቱን ሲደባበሱ ያሳያል። ነገር ግን ይሄ ለደቂቃዎች ብቻ የሚቆይ ነው ይላሉ የኦርቶዶክስ ሳይንቲስቶች ማህበር ፕሬዚዳንት ተመራማሪው አባ ገናዲ ዛይድዜ። ራሳቸው በ2016 ዓ.ም የሙቀት መለኪያ (Pyrometer) በመጠቀም ባደረጉት ምርመራ ሊቀ ጳጳሱ እሳቱን ይዘውት ከወጡ ከተወሰነ ቆይታ በኋላ ሲለኩት 42° ሴንቲ ግሬድ (መደበኛ ሙቀት) የነበረ ሲሆን ከ15 ደቂቃዎች በኋላ ግን የእሳቱ የሙቀት መጠን ወደ 350° ሴንቲግሬድ ከፍ ማለቱን ይገልፃሉ።


በሩሲያ ብሔራዊ የኒዩክለር ጥናት ዩንቨርስቲ የማቴሪያል መካኒክስ ረዳት ፕሮፌሰርና የሂሳብና ፊዚክስ ሊቁ ዶ/ር አንድሪው ፎልኮም በ2008 ከመቃብሩ 15 ሜትር ርቀት ላይ የኤሌክትሮ ማግኔቲክ ፍሪኩዌንሲ መለኪያ ማሽን (oscilloscope) በመግጠም ባካሄዱት ጥናት ተዓምሩ በሚከናወንበት ወቅት ላይ ብቻ የተለየ የሙቀት ባህርይ (low temperature plasma) እንደሚታይ ጠቅሰው ምርምሩን ባካሄዱበት ወቅት ኢየሩሳሌም በመደበኛ አየር ንብረቷ ላይ እንደ ነበረችና ልኬቱን የሚያዛባ ምንም አይነት ከባድ ነፋስ እንዳልነበር አረጋግጠዋል።

የቤተክርስቲያኑ ዜና መዋዕሎች ደግሞ አንዳች የተለየ ታሪክን ዘግበዋል በፈረንጆቹ 1579 የነበሩት የቱርክ መሪዎች ሊቀ ጳጳሱን ሶፎንያስ 4ኛና ምዕመናኑን ቤተመቅደስ እንዳይገቡና በዓሉን እንዳያከብሩ አገዷቸው። የታገዱት ካህናትና ምዕመናንም ከመቅደሱ በር በስተግራ በቆሙት ሊቀ ጳጳሳቸው ከውጭ ሆነው ሥርዓተ ጸሎቱን አድርሰው እንደጨረሱ ቅዱሱ እሳቱ የቤተክርስቲያኑን ግድግዳ ሰንጥቆ በመውጣቱ ሊቀ ጳጳሱም እሳቱን መለኮስና ለሁሉም ማጋራታቸው ተዘግቧል። እሳቱ የሰነጠቀውም ቦታ አሁንም ድረስ ይታያል።

በስንጥቃቱ ዙሪያ ያጠናው ሩሲያዊው ሳይንቲስት ኢቭጋኒ ሚካኤሎቪችም ይህ ስንጥቃት በአንዳች ሃይል የተፈጠረ እንጂ ሰው ሰራሽ ሊሆን አይችልም ምክንያቱም በ16ኛው ክፍለ ዘመን የሳይንስ እውቀት እንዲህ አይነት ስንጥቃት  መፍጠር የማይታሰብ መሆኑን ያትታል።

በተአምር በማያምኑ ወይም በሚጠራጠሩ ወገኖች ተአምሩን እንደ አንድ ማጭበርበር ወይም ማታለል (fraud/trick) የሚወስዱት ሲሆን ማጭበርበሩ ተፈጽሟል ሲሉ ሁለት መላምቶችን ያስቀምጣሉ አንደኛው ቤተመቅደሱ ውስጥ የተቀመጠ ወይም ሊቀ ጳጳሱ ይዘውት የሚገቡት ተቀጣጣይ ነገር ይኖራል የሚል ሲሆን ይህ መላምት ውድቅ የሚያደርገው ከሥርዓቱ በፊት በሊቀጳጳሱም ላይ ሆነ በቤተመቅደሱ ላይ ጥብቅ ፍተሻና ቁጥጥር መደረጉ ነው። ቁጥጥሩ የሚደረገው በቤተክርስቲያኗ ሳይሆን በመንግስት አካላት መሆኑና ፍተሻውን የሚያካሂዱት የክርስቶስን ትንሳኤ የሚክዱት የአይሁድና የእስልምና እምነት ተከታዮች መሆኑ ደግሞ ፍተሻው ምን ያህል ጠንካራ መሆኑን አመላካች ነው።

ሌሎች ተጠራጣሪዎች ደግሞ በራሱ የሚነደው ነጭ ድኝ (White phosphorus) ይጠቀማሉ ባይ ናቸው የነዚህ ክርክርም ቢሆን ሚዛን የማይደፋ ሆኖ ይገኛል። በመጀመሪያ በፍተሻ ወቅት መያዙ አይቀርም ግን አለፈ እንኳን ቢባል እንደዚህ አይነት እሳት መፍጠር አይችልም።


የካምብሪጅ ዩንቨርስቲው ኤሌክትሪካል ኢንጅነር ዶ/ር ራሚ ሞርጋን እንደሚናገረው የነጭ ድኝ እሳት የተቀመጠበትን ነገር እያቃጠለ የሚነድ ሲሆን ቅዱሱ እሳት ግን ነገሮችን የማቃጠል አቅሙ ደካማ ነው ይላል። ሌላው ነገር ደግሞ ነጭ ድኝ ከባቢ አየር ላይ ካለው ኦክስጅን ጋር ሲዋሃድ ፎስፈረስ ኦክሳይድ (phosphorus oxide) የተባለ መርዛማ ጋዝ ስለሚፈጥር እሳቱ መርዛማ ይሆን ነበር። ነገር ግን እስካሁን ድረስ አንድም ታሪካዊ ሰነድ፣ አንድም ተጓዥም ሆነ የከተማዋ አስተዳደር በእሳቱ የተመረዙ (የተቃጠሉ) ሰዎች መኖራቸውን ሪፖርተር አድርገው አያውቁም ይላል።

የአቴንስ ዩንቨርስቲ የፍራክቸራል መካኒክ ምሁሩ ጆርጅ ፓፓዶብሎስ “በሳይንሳዊ አነጋገር እሳቱ ከየት እንደሚመጣ አይታወቅም” ይላል።

ፅሁፋችንን ለዚህ ዝግጅት በዋቢነት በተጠቀምነበት የሲዋይሲ የግብፅ ቤተክርስቲያን ቴሌቪዥን ዶክመንተሪ አዘጋጅ ዶ/ር ሃኒ አሽማላ ሃሳብ እናጠናቅ በዮሐንስ ወንጌል ምዕራፍ 20 ላይ እንደተጠቀሰው ቶማስ የክርስቶስን ትንሳኤ በተጠራጠረ ወቅት ክርስቶስ ናና ሰውነቴን አረጋግጥ ብሎት ነበር ዛሬም በትንሳኤው ህያው ምስክር በቅዱሱ እሳት ዙሪያ የሚጠራጠር ቢኖር መጥቶ እንዲያይ እንጋብዘዋለን።

ክርስቶስ ተንስአ እም ሙታን – ክርስቶስ ከሙታን ተለይቶ ተነስቷል።

✨ቀዳም ሥዑር(የተሻረች ቅዳሜ)

ቀዳም ስዑር ለምለም ቅዳሜ፣ ቅዱስ ቅዳሜ ትባላለች፡፡

    ቀዳም ሥዑር መባሉ ከወትሮው ዕለታት በተለየ ይህችኛዋ ዕለት በጾም ስለምትታሰብ የተሻረች ቅዳሜ እንላታለን፡፡

ለምለም ቅዳሜ መባሏም ካህናቱ የምሥራች አብሳሪ የሆነውን ቄጤማ ይዘው ወደ ምእመናን ቤት ስለሚሔዱ ለምለም ቅዳሜ ትባላለች፡፡

  ቅዱስ ቅዳሜ መባሉም ቅዱስ እግዚአብሔር አምላካችን በጥንተ ተፈጥሮ ሃያ ሁለቱን ስነ ፍጥረታት የሚታዩትንና የማይታዩትን፣ በእግር የሚሄዱትን እና በክንፍ የሚበሩትን፣ በባሕር የሚዋኙትንና በመጨረሻም ሰውን በአርአያውና በአምሳሉ የፈጠረው በዕለተ ዐርብ ሲሆን ቅዳሜ ዕለት ደግሞ ከሥራው ያረፈበት ዕለት ናት፡፡

   በዘመነ ሐዲስም የማዳን ሥራውን አከናውኖ በከርሰ መቃብር አድሮ በአካለ ነፍስም ሲዖልን በርብሮ ተግዘው የነበሩትን ነፍሳት ያወጣበት ዕለት በመሆኑ ቅዱስ /ልዩ/ ቅዳሜ ተብላ ተሰይማለች፡፡ ዕለቱ ዝርዘር አድርገን ስንመለከተውም ይህች የመጀመሪያው ቅዳሜ ለእግዚአብሔር የዕረፍት ዕለት ናት፤ እግዚአብሔር ሥነ ፍጥረትን ፈጥሮ ስላረፈባት ሰንበት ዐባይ (ታላቋ ሰንበት) ትባላለች (ዘፍ. 1፡3)

   ይህችን ታላቋን ሰንበትም እንዲያከብሯት ሕዝበ እግዚአብሔር የተባሉ እስራኤላውያን ታዘው ነበር፡፡
ዕለተ ቀዳሚት (ሰንበት ዐባይ) በዘመነ ሐዲስም የተለየ የድኅነት ሥራ ተከናውኖባታል፡፡ ጥንት ሥነ ፍጥረትን በመፍጠር ዕረፍት እንደተደረገባት ሁሉ በሐዲስ ኪዳንም አዳምን ለማዳን ሕማምና ሞት የተቀበለው ቸሩ አምላክ በሐዲስ መቃብር አርፎባታል (ማቴ. 27፡61)፡፡

በዚህች ዕለት ጌታችንና መድኃኒታችን ኢየሱስ ክርስቶስ በከርሰ መቃብር ዐርፎ የዋለባት ዕለት በመሆኗ በምሥጢር ከሰንበት ዐባይ ጋር ትገናኛለች፡፡
ቀዳም ስዑር (የተሻረች ቅዳሜ) የተሰኘችውም በዓመት አንድ ቀን ስለምትጾም ነው፡፡

   እናቱ ቅድስት ድንግል ማርያም፣ ወዳጆቹ ቅዱሳን ሐዋርያት ጌታ ተላልፎ ከተሰጠበት ዕለት አንስተው ብርሃነ ትንሣኤውን እስከሚያዩ ድረስ እህል ውኃ በአፋቸው አልዞረም፡፡ ይመኩበትና ተስፋ ያደርጉት የነበረ መምህራቸው በመቃብር ስላረፈ ዕለቷን ነገረ ሞቱን በማሰብና ትንሣኤውን በመናፈቅ በጾም አክብረዋታል፡፡

   ከቅዱሳን ሐዋርያት ሲወርድ ሲወራረድ በመጣው ትውፊት መሠረት ቅዱሳን ሐዋርያት በሐዘን፣ በጾምና በጸሎት ዕለቷን እንዳከበሯት ክርስቲኖችም የተቻላቸው ከዓርብ ጀምረው በማክፈል፣ አሊያም ዓርብ ማታ በልተው ቅዳሜን በመጾም የጌታን ትንሣኤን ያከብራሉ፡፡

ቅዳሜ ጧት ምእመናኑና ካህናቱ ወደ ቤተ ክርስቲያን ይሰበሰባሉ፡፡

   የጧቱ ጸሎት ሲፈጸም ”ገብረ ሰላመ በመስቀሉ” በመስቀሉ ሰላምን መሠረተ፣ ሰላምን ፈጠረ፤ የምሥራች እየተባለ በቤተ ክርስቲያን ለተሰበሰበው ሁሉ ቄጠማ ይሰጣል፡፡ የምሥራች ምልክት ነው፡፡ ምእመናኑም እየሰነጠቁ በራሳቸው ያስሩታል፡፡ ወደ ቤተ ክርስቲያን ላልመጡት ምእመናንም ካህናት በየሰበካቸው ልብሰ ተክህኖ ለብሰው መስቀልና ቃጭል ይዘው ቄጠማውን የምሥራች እያሉ ያድላሉ፡፡

    የዚህ የቄጠማው ታሪክ መነሻው የኖኅ ዘመን ታሪክ ነው፡፡ቅዱስ መጽሐፍ እንደሚነግረን በጻድቁ ኖኅ ዘመን የነበሩ ሰዎች በማየ አይህ ከጠፉ በኋላ የውኃውን መጉደል እንድትመለከት የተላከች ርግብ የምሥራች ምልክት የሆነ ለምለም ቄጠማ በአፏ ይዛ ተመልሳለች፡፡ በዚህም የውኃው መጉደል፣ የቅጣቱ ዘመን ማለፍ ተረጋግጧል (ዘፍ. 9፡ 1-29)፡፡

    ቄጠማ ለጥፋት ውኃ መድረቅ የምሥራች መንገሪያ እንደሆነው ሁሉ አሁንም በክርስቶስ ሞት ሞተ ነፍስ ከሰው ልጆች ተወገደ ስትል ቤተ ክርስቲያን ለልጆቿ ቄጠማ ታድላለች፡፡ ምእመናንም የምሥራች ተምሳሌት የሆነውን ቄጠማ በግንባራቸው ያስሩታል፣ በጣታቸው ቀለበት ያደርጉታል፡፡

የክርስቶስ ተከታዮች ሁሉ ከጨለማ ወደሚደነቅ ብርሃን፣ ከሚያቃጥለው ዋዕየ ሲዖል (የሲዖል ቃጠሎ) ወደ ልምላሜ ገነት፣ ጥንተ ማኅደራቸው መመለሳቸውን በዚህ አኳኋን እየገለጡ በዓለ ትንሣኤን በቅድስት ቤተ ክርስቲያን ያከብራሉ፡፡

   ምንጭ :- አትሮንስ ዘተዋህዶ

🏡ቤተሰብ ይሁኑ!
የዩቲዩብ ቻናል፡
http://youtube.com/@EMislene
የቴሌግራም ቻናል፡
https://t.me/EMislene
የፌስቡክ ገጽ፡
https://www.facebook.com/EMislene/

ተፈፀመ

ጊዜ ተስዓቱ ሰዓት
አጽንኖ ርእሱ ኢየሱስ
ወይቤ ተፈጸመ ኩሉ

ለሦስት ሰዓታት በመስቀል ላይ የቆየው ጌታችን የተናገራቸው ሰባት ንግግሮችን ብቻ ነበር። በዙሪያው ሳያቋርጡ የሚጮኹ ሰዎች በተሰበሰቡበት እርሱ ግን እርሱ ሰዊ፣ እርሱ ተሰዊ (መስዋዕት)፣ እርሱ መስዋዕት ተቀባይ ፍፁም ሰው ፍፁም አምላክነቱን በሰባት ወሳኝ ቃላት ብቻ ተናገረ።

ቃላቱ ለብቻቸው በብዙ የሚተነተኑና የሰፉ ቢሆንም የተወሰነ አይተናቸው ወደ ርዕሳችን ተፈጸመ እንመለሳለን።

ኤሎሄ ኤሎሄ ኤልማስ ላማ ሰበቅታኒ ማቴ.27፤46

ዳግማዊው አዳም የሆነ ኢየሱስ ክርስቶስ በአዳም ፈንታ መስዋዕት አቅራቢ ሆኖ የአዳምን ጩኸት ጮኸለት።

አባት ሆይ የሚያደርጉትን አየውቁምና ይቅር በላቸው፤ ሉቃ.23:34

መስዋዕትን የሚያቀርብ ሊቀ ካህን ስለህዝቡ ይቅርታ እንዲለምን  እንደ መልከጸዲቅ የዘለዓለም ሊቀ ካህን የሆነ ክርስቶስ ስለ ህዝቡ ሁሉ ሃጢአት ልመናን ያቀርብ ዘንድ ይቅር በላቸው አለ።

አባት ሆይ ነፍሴን በእጅህ አደራ እሰጣለሁ፡፡ ሉቃ.23፤46

የአለምን ሃጢአት የሚያስተሰርይ አማናዊ በግዕ እንደሆነ የተመሰከረለት ክርስቶስ መስዋዕትነቱን ሲገልፅ ይህን ተናገረ። አባ ህርያቆስ እንደተናገረው ወየው የሚናገር በግ እንደምን ያለ ነው??

እውነት እውነት እልሃለሁ ዛሬ በገነት ከእኔ ጋር ትኖራለህ፡፡ ሉቃ.23፤43

በድካሙ ተሳልቀው በሕማሙ በሚቀልዱ መሐል የክርስቶስን አምላክነት የተረዳው በቀኝ የተሰቀለው ወንበዴ በመንግሥትህ በመጣህ ጊዜ አስበኝ ባለው ጊዜ በመልዕልተ መስቀል ላይ ሆኖ ፈረደለት።

ተጠማሁ፤  ዮሐ.19፤30

ለፊያታዊው በገባለት ቃል አምላክነቱን መግለፅ የወደደ ክርስቶስ ሰውነቱን ይገልፅ ዘንድ ተጠማሁ አለ። በመዝሙረኛው ዳዊት የተነገረ ትንቢቱ ይፈፀም ዘንድ ተጠማው አለ ሀሞትና ከርቤም ቀላቅለው ሰጡት።

እናትህ እነኋት፤ እነሆ ልጅሽ፤ ዮሐ.19፤26-27

በእለተ ሐሙስ ሁሉንም በስምህ ጠብቃቸው ብሎ ለአባቱ አደራ የሰጠው ጌታ በዕለተ አርብም ከመስቀሉ ሥር የተገኘውን ሐዋርያ ዮሐንስን ለእናቱ በአደራ ሰጣት። በበዛ ሃዘን ውስጥ ያለችውን እናቱን ያፅናና ዘንድ በተሰጠው በአንፃረ ዮሐንስ ለምዕመናን ሁሉ ለቤተክርስቲያንም እናት ትሆን ዘንድ ሰጣት።

ተፈጸመ፤ ዮሐ.19፤30

ወደ ጠቅላዩ ቃል እንመለስ። የሕማሙ ምስክር የሆነ ዮሐንስ ተፈፀመ ብሎ ከተናገረ በኋላ ራሱን አዘንብሎ ነፍሱን እንደሰጠ ይነግረናልና ይህቺ በመስቀል የተናገራት የመጨረሻ ቃል ናት።

ለመሆኑ የተፈፀመው ምንድነው?

1. ከእግዚአብሔር አብ የተላከበት ተግባር ተፈፀመ

ምንም እንኳን የክርስቶስ መምጣት የማይነጣጠል የሥላሴ ፈቃድ ቢሆንም ቃል ከልብ እንደሚወጣ እርሱም ከእግዚአብሔር አብ የወጣ ነውና ከእግዚአብሔር አብ ወደ ምድር የመጣበትን ተግባር ስለ መፈፀሙ ተፈጸመ ብሎ ተናገረ። አስቀድሞ በዕለተ ሐሙስም ይህን የመሰለ ቃል ተናግሮ ነበር።  “እኔ ላደርገው የሰጠኸኝን ሥራ ፈጽሜ በምድር አከበርሁህ፤” ዮሐ 17፥4

2. ይሰራው ያለው ፅድቅ ሁሉ ተፈጸመ

በባሕረ ዮርዳኖስ ከመንገድ ጠራጊው ዮሐንስ ጋር ሲነጋገር “ አሁንስ ፍቀድልኝ፤ እንዲህ ጽድቅን ሁሉ መፈጸም ይገባናልና (ማቴዎስ 3፥15) እንዳለው በሥጋው ወራት ይፈጽም ዘንድ ያለውን ሁሉንም የፅድቅ ስራ ፈጽሟልና ተፈጸመ አለ።

3. ዘመነ መርገምና ፍዳ ተፈፀመ

የቀደመው የሰው ልጅ በድሏልና በበደሉ የመጣበት እርግማንን አስወግዷልና የአዳም ዘመነ ፍዳ ተፈፀመ

“በእኛ ላይ የነበረውን የሚቃወመንንም በትእዛዛት የተጻፈውን የዕዳ ጽሕፈት ደመሰሰው፤ እርሱንም በመስቀል ጠርቆ ከመንገድ አስወግዶታል፤” ቆላ 2፥14

4. የሐጢአትና የሞት ገዢነት ተፈፀመ

ብርሃነ ዓለም ቅዱስ ጳውሎስ “ሞት ሆይ፥ መውጊያህ የት አለ? ሲኦል ሆይ፥ ድል መንሣትህ የት አለ?” 1ኛ ቆሮ 15፥55 እያለ ይጠይቃል። ትናንት በብሉይ ኪዳን የነበሩ ሰዎችን ይወጋበት የነበረው ዘመን ተፈጽሟልና ተፈፀመ አለ።

5. የነቢያት ትንቢትና ልዩ ልዩ ምሳሌያት ተፈፀመ

የወልደ እግዚአብሔር ሰው መሆን አስቀድሞውንም በብዙ ምሳሌያትና ህብረ አምሳላት የተነበረ ነበር። ከፅንሰቱ እስከ ስቅለቱ ድረስ በኦሪትና በነብያት የተነገሩት ሁሉ ተፈጽመዋልና ተፈፀመ አለ።

6. በመስቀሉ የሰራው የአስታራቂነት ስራ ተፈጽሟልና ተፈፀመ አለ

ዝንጉዖች ዛሬም ይማልድልናል እንደሚሉት የዘወትር አማላጅነት የሚፈጽም አይደለምና አንድ ጊዜ የማስታረቅ ስራውን ፈጽሟልና ተፈፀመ አለ። ቅዱስ ጳውሎስም ይህን ሲያጠይቅ ” ክርስቶስ ይመጣ ዘንድ ላለው መልካም ነገር ሊቀ ካህናት ሆኖ፥ በምትበልጠውና በምትሻለው በእጆችም ባልተሠራች ማለት ለዚህ ፍጥረት ባልሆነች ድንኳን፥ የዘላለምን ቤዛነት አግኝቶ አንድ ጊዜ ፈጽሞ ወደ ቅድስት በገዛ ደሙ ገባ” ዕብ 9:10-11 ብሎ ተናገረ።

“ኢየሱስም ሆምጣጤውን ከተቀበለ በኋላ፦ ተፈጸመ አለ፥ ራሱንም አዘንብሎ ነፍሱን አሳልፎ ሰጠ።” ዮሐ 19፥30

ኦ ዘጥዕመ ሞተ በሥጋ

ተሰቀለ

ጊዜ ስድስቱ ሰዓት
ሰቀልዎ ለኢየሱስ
ማዕከለ ክልዔ ፊያት

ከሐሙስ ምሽት ጀምሮ ያንገላቱትን የክብር ንጉስ በመስቀሉ ላይ ሰቀሉት። ቅዱስ ጳውሎስ ቢያውቁስ ኖሮ የክብር ንጉስን ባልሰቀሉት ነበር እንዳለ (1ቆሮ 2:8) ዝንጉዎች በመስቀል ላይ ሰቀሉት።

መጽሐፋቸው በእንጨት የሚሰቀል የተረገመ ነው እንዲል (ዘዳ 21:23) ያዋርዱት ዘንድ በእንጨት ሰቀሉት ነገር ግን በእንጨት መሰቀሉ የእነርሱ ሳይሆን ከዘመናት በፊት የነበረ የእግዚአብሔር ፈቃድ ነበረ። ጌታችን ኢየሱስ ክርስቶስ ከመሰቀሉ አስቀድሞ በሙሴ ዘመን የተሰራውን የነሐሱ እባብ ሕብረ አምሳል ምሳሌነቱ ስለራሱ እንደ ሆነ እንዲህ ብሎ ሲናገር እናገኘዋለን።

“ሙሴም በምድረ በዳ እባብን እንደ ሰቀለ እንዲሁ በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ የሰው ልጅ ይሰቀል ይገባዋል።”
   ዮሐ 3፥14-15

በእርግጥም ያ የነሐስ እባብ የኢየሱስ ክርስቶስ ጥላ ነበር። ፍጡሩ እባብ እንጂ የእባብን መልክ ገንዘብ ያደረገ ነሐስ በባህሪው መርዝ እንደሌለበት የሀጢአተኛን ሰው መልክ ገንዘቡ ያደረገ ክርስቶስም ሃጢአትና በደል የሌለበት ንፁሀ ባህሪ ነው።


ከሆሳዕና መልስ እስከ ሊጦስጥራ ይጠይቁትና ይፈትኑት የነበሩ አይሁዳውያን ሊቃውንትም ሆነ ሮማውያን ባለስልጣናት አንዳች ሀሰት ከአንደበቱ፣ ጥቂት ስህተትም ከስርዓቱ ያላገኙበት አማናዊው የነሐሱ እባብ ክርስቶስ ተሰቀለ።

እግዚአብሔር ሙሴ ስለሰራት የነሐስ እባብ እንዲህ ብሎ ነበር

“ሙሴም ስለ ሕዝቡ ጸለየ። እግዚአብሔርም ሙሴን፦ እባብን ሠርተህ በዓላማ ላይ ስቀል የተነደፈውም ሁሉ ሲያያት በሕይወት ይኖራል አለው።”
  ዘኍ 21፥8

እስራኤል በበደለ ወቅት ወደ ህዝቡ ከተሰደዱ የሚናደፉ እባቦች ህዝቡ ይጠበቅ ዘንድ የነሐሱን እባብ ለሙሴ እንዲሰራ ያዘዘው እግዚአብሔር ወደ እርሱ የሚመለከት ሁሉ በሕይወት እንደሚኖር ተናግሮ እንደነበር ሁሉ በቀራንዮ በሁለት ወንበዴዎች መሀል ወደ ተሰቀለው ንጉስ ክርስቶስ በአይነ ልቦናው የሚያይ ሁሉ ይድን ዘንድ ኢየሱስ ክርስቶስ ተሰቀለ።

በዕፀ በለስ የጠፋውን የሰው ልጅ በዕፀ መስቀል ይመልሰው ዘንድ ለሚፈሩትም ሁሉ ከጠላት ፊት የሚያመልጡበትን ምልክታቸውን በደሙ ባርኮ ይሰጣቸው ዘንድ መድኀኒታችን ተሰቀለ።

በነቢይ ኢሳያስ (ኢሳ 53) እንደ ተተነበየው ትንቢት በደላችንንና መርገማችንን ያስወግድ ዘንድ የዋሁ ክርስቶስ ተሰቀለ። ሊቀካህናቱ ክርስቶስ ስለሁሉ ሃጢአት መስዋዕት ይከፍል ዘንድ መሰዊያው ወደ ምትሆን መስቀል ወጣ፣ ንጉስ ክርስቶስ የሞትን መንግስት ገልብጦ ነግሷልና ዙፋኑ ወደ ምትሆን መስቀል ከፍ አለ። ፈራጅ ክርስቶስ የአዳምን ነፃነት ይበይን ዘንድ በመስቀል የችሎት መንበሩ ተሰየመ።

የእግዚአብሔር ልጅ መሆኑን ያሳይ ዘንድ አይሁድ ከመስቀል ውረድ አሉት እሱ ግን መስቀልን የርሱ መውረጃ ሳይሆን የኛ መወጣጫ እንዲሆን ፈቀደ

እኔም ከምድር ከፍ ከፍ ያልሁ እንደ ሆነ ሁሉን ወደ እኔ እስባለሁ።
³³ በምን ዓይነትም ሞት ይሞት ዘንድ እንዳለው ሲያመለክታቸው ይህን ተናገረ።

ዮሐ 12: 22-23

ንዑድ ጳውሎስ እንደተናገረው አይሁድ ባይረዱትም ፀሐይ በመጨለም፣ ጨረቃ በመድማት፣ ከዋክብት በመርጠፍ አለት በመሰነጣጠቅ፣ መቃብር በመከፈት፣ ሙታን በመነሳት የእግዚአብሔርነቱን ክብር ተናገሩለት።

በመስቀሉ በሰራው ሀዲሱ ኪዳን  የህዝብና የአህዛብ ቤት ስለምትሆን ቤተክርስቲያን የኦሪቱ ቤተመቅደስ መጋረጃ ለሁለት ተከፈለች።

ነገር ግን ይህንን ከተውልዱ ማን አስተዋለ? ቢያስተውሉስ የክብርን ንጉስ ባልሰቀሉት ነበር። እነርሱ ግን በሳዶር፣ አላዶር፣ ዳናት፣ አዴራትናሮዳስ በተሰኙ ቅንዋት (ችንካር) ቸነከሩት። አለማወቃቸውን ግን አስቀድሞ ያውቅ ነበርና የሚሰሩትን አያውቁምና ይቅር በላቸው ብሎ ተናገረ።

ጌታ ሆይ ባለማወቅ በሃጢአት ችንካር የምንቸነክርህ እኛን ስለተቀበልካቸው ሕማማተ መስቀል ብለህ ይቅር በለን።

13ቱ ሕማማተ መስቀል

1ኛ. ተአስሮ ድኅሪት (ወደኋላ መታሰር)
2ኛ. ተስሕቦ በሐብል (በገመድ መሳብ)
3ኛ. ወዲቅ ውስተ ምድር (በምድር ላይ መውደቅ)
4ኛ. ተከይዶ በእግረ አይሁድ (በእግረ አይሁድ መረገጥ)
5ኛ. ተገፍዖ ማዕከለ ዓምድ (ከምሶሶ ጋር መላተም)
6ኛ. ተጽፍዖ መልታሕት (በጥፊ መመታት)
7ኛ. ተቀሰፎ ዘባን (ጀርባን በጅራፍ መገረፍ)
8ኛ. ተኰርዖተ ርእስ (ራስን በዱላ መመታት)
9ኛ. አክሊለ ሦክ (የሾህ አክሊል መድፋት)
10ኛ. ፀዊረ መስቀል (መስቀል መሸከም)
11ኛ.  ተቀንዎ በቅንዎት (በችንካር መቸንከር)
12ኛ.  ተሰቅሎ በዕፅ (በመስቀል ላይ መሰቀል)
13ኛ. ሰሪበ ሐሞት (መራራ ሐሞትን መጠጣት)

ሰማያዊው ፈራጅ በፈራጆች ፊት

ዕለተ አርብ ለክርስቲያኖች ሁሉ የሕማም የመገረም የመደሰት እለት ናት። በዚህች ቀን ስለሰው ሁሉ ፍቅር ሰው የሆነው ክርስቶስ ሕማምን ተቀብሏልና ከእርሱ ጋር እየወደቁና እየተነሱ ከሊቀካህናቱ ጊቢ እስከ ሊጦስጥራና ቀራንዮ ድረስ አብረው ይታመማሉ።
በክርስቲያኖች ልብ ውስጥ ያለው ግን መታመም ብቻ አይደለም። መደመምም ጭምር እንጂ። “ነፍሱን ስለ ወዳጆቹ ከመስጠት ይልቅ ከዚህ የሚበልጥ ፍቅር ለማንም የለውም።”  ዮሐ 15፥13 ብሎ ያስተማረ አምላክ የኃጢአተኛውን ሰውነት ገንዘብ ከማድረግ አልፎ ሊያድነው በመጣው ሰው ሕማምን ተቀብሎ በማዳን ስለገለጠው ፍቅር ይደነቃል። ከልበ አምላክ ዳዊት ቃል ተውሶ ታስበው ዘንድ ሰው ምንድነው? ትጎበኘውስ ዘንድ የሰው ልጅ ምንድነው? እያለ በፍፁም መገረም ይጠይቃል። ነገሩ በመገረም አያበቃም በተከፈለላቸው ዋጋ ያገኙትን ያቃሉና በፍፁም ደስታ ሆነው በመልክአ ሕማማቱ ስብሃት ለከ እያሉ ያመሰግናሉ።

በዚህ የታላቁ የፍቅር ቀን መደመማችንን ዘላለማዊው ፈራጅ ክርስቶስ ኢየሱስ በአላፊ ጠፊ ፈራጆች ፊት በመቆሙ እንጀምር።

የእለተ አርብ የአይን ምስክር ወንጌላዊው ዮሐንስ እንደሚነግረን አይሁድ ከቀያፋ ወደ ሊጦስጥራ ፍርድ አደባባይ ወሰዱት ጲላጦስ የተሰኘው ሀገረ ገዢም ወደነሱ መጥቶ የዚህ ሰው በደሉ ምንድነው አላቸው እነርሱም “ክፉ ባይሆንስ ወደ አንተ አሳልፈን ባልሰጠነው ነበር” ብለው መለሱለት። ጲላጦስ ራሳቸው በህጋቸው እንዲወስኑ የፈለገ ቢሆንም እነርሱ ማንንም ልንገድል አልተፈቀደልንም ብለው እርሱ እንዲፈርድበት ግድ አሉት። በዚህ ሰዓት ጲላጦስ ክርስቶስን “የአይሁድ ንጉስ ነህን?” ብሎ ጠየቀው። ክርስቶስ የጲላጦስ ጥያቄ ከራሱ ከጲላጦስ ወይም ከሌላ የመጣ መሆኑን በሚመረምር ጥያቄ መለሰለት። ጲላጦስ ጥያቄው ከአይሁድ የመጣ መሆኑን ሲነግረው ጌታችን ኢየሱስ “መንግሥቴ ከዚህ ዓለም አይደለችም፤ መንግሥቴስ ከዚህ ዓለም ብትሆን፥ ወደ አይሁድ እንዳልሰጥ ሎሌዎቼ ይዋጉልኝ ነበር፤ አሁን ግን መንግሥቴ ከዚህ አይደለችም” አለው። ጲላጦስ ግን መልሶ ጠየቀው “እንግዲያስ አንተ ንጉስ ነህ” ደግሞ ጠየቀው ኢየሱስም “እኔ ንጉሥ እንደ ሆንሁ አንተ ትላለህ። እኔ ለእውነት ልመሰክር ስለዚህ ተወልጃለሁ ስለዚህም ወደ ዓለም መጥቻለሁ፤ ከእውነት የሆነ ሁሉ ድምፄን ይሰማል” አለው። ጲላጦስ በዚህ ሰዓት ሁሉ ይጠይቀው ዘንድ የሚገባውን ጥያቄ ጠየቀው “እውነት ምንድነው?”

ይህ የጲላጦስ ጥያቄ መሠረታዊ ጥያቄ ነበር። ነገር ግን ጲላጦስ ጠይቆ መልስ እስኪያገኝ ድረስ አልታገሰም። በዚህ ሰው ላይ በደል አላገኘሁበትም ይል ዘንድ ወደ አይሁድ ሄደ እንጂ ቢታገስ ኖሮ እውነት ማለት ክርስቶስ መሆኑን ይረዳ ነበር። ጲላጦስ ግን መሰረታዊ ጥያቄ ጠይቆ መሠረታዊውን መልስ ለመስማት ጊዜ አጣ።

ወንጌላዊው ቅዱስ ሉቃስ ኢየሱስ የገሊላ ሰው መሆኑን የሰማው ጲላጦስ በወቅቱ በኢየሩሳሌም ወደ ነበረው የገሊላው ገዢ ወደ ሄሮድስ መላኩን ይነግረናል። በነቢዩ ኢሳያስ (ነበር53:7) እንደተተነበየው ሄሮድስም ጌታ ኢየሱስን በብዙ መንገድ ቢመረምረውም እንደሚታረድ በግ አንዳች አልመለሰለትም ነበር። በዚህም የአለሙን ሀጢአት የሚያስተሰርይ በግ ተብሎ በመጥምቁ ዮሐንስ የተነገረውን ቃል እውነተኝነት አስረገጠ።

ሄሮድስ በደል እንዳላገኘበት ገልፆ ለጲላጦስ ቢልክበትም ሚስቱ ስለእርሱ በህልም መሰቃየቷን መልዕክት በመላኳና ለሞት የሚያበቃው በደል ስላላገኘበት ሊፈታው ወዶ አብዝቶ ወንጀል ከሰራው ከበርባን ጋር ኢየሱስን ለምርጫ አቀረበው። ከዕፀ በለስና ከእፀ ሕይወት እፀ በለስን ያስመረጠው ሰይጣንም አይሁድን በሊቀ ካህናቶቻቸው አድሮ በርባንን አሰመረጣቸው።

ጲላጦስም ፀብ ክርክር እንጂ ምንም እንደሌለ አውቆ ክርስቶስን ገርፎ አሳልፎ ሰጣቸው። ከደሙ ነፃ ነኝ ብሎ እጁን ታጠበ። የይስሐቅን ምርቃትን ከወንድሙ ጋር የተሻማው የያዕቆብ ልጆች እስራኤላውያን እርግማኑን ተሻሙ። ለራሳቸው ብቻ ሳይሆን ለልጅ ልጆቻቸውም ደሙን ተሻሙ። አስቀድሞ ይሁዳ ገንዘቡን ሲመልስ በኋላም ጲላጣስና ሄሮድስ የኢየሱስን ንፅህና ቢነግሯቸውም አይሁድ የተባባሪዎቻቸውን ቃል መስማትን እንኳን አሻፈረን አሉ።

ስለዚህች የፍርድ ሰዓት እንደመማለን እንዳይፈረድባችሁ አትፍረዱ ያለውን አምላክ፣ ሂጅ አልፈርድብሽም ብሎ የታፈሩትን የፈታው ክርስቶስ ተፈረደበት። በዳግም ምፅዐቱ አለም ሁሉ በፍርድ ዙፋኑ ፊት የሚቆሙለት ክርስቶስ ተፈረደበት። ያውም የተከሳሽነት ከብር ተነፍጎት እየተዳፋና እየተደበደበ በፈራጆች ፊት ቆመ። አይሁድ ከሆሳዕና ጀምሮ ይጠይቁትና እንከን ይፈልጉበት ዘንድ ባቀረቡት በአንዱም ጥፋት ያልተገኘበትን፣ በፈራጆች ፊት ንፁህ መሆኑን የገለጠውን ክርስቶስ ስለህዝብ ጩኸት ብቻ ሲሉ ፈረዱበት። እውነት በድምፅ ብልጫ፣ ንፅህናም በጩኸት ተሸጠ።

ጠላቶቹን የሚወድ ክርስቶስ ግን በሞቱ የተለያዩትን ሰውና መላዕክት አንድ ለማድረግ በመጣበት በዚህች ዕለት ስለ እርሱ የተለያዩትን ሁሉ አንድ ያደርግ ነበር። አስቀድሞ በክስ ፈሪሳውያንንና ሰዱቃውያንን አንድ ያደረገ እርሱ ለፍርድ በፊታቸው ቆሞ ተጣልተው የነበሩትን ጲላጦስንና ሄሮድስን አስታረቃቸው። በሞት ላይ ይፈርድ ዘንድ፣ በሲኦል ላይ ይበይን ዘንድ ተፈረደበት።

እስከ መቼ?፡መንፈሳዊ ወግ

ከዓመታት ወዲህ በሰሙነ ሕማማት ከቤተክርስቲያን ቅጽር ግቢ ውስጥ ከማልገኝባቸው ቀናት መካከል አንደኛው ቅዳሴ የሚቀደስበት ሐሙስ ነው። ተጨባጭ የሆነ ምክንያት የለኝም፡ ግን በስራም፡ በስንፍናም እያመካኘሁ ሐሙስን አልገኝም። የሚገርመው ነገር የሕማማትን ሐሙስ ካስቀደስኩ ዘመናት እንደነጎዱ ያስተዋልኩት  ከወትሮው በተለየ ሁኔታ ዛሬ ሰፈራችን በሚገኘው የቅዱስ ሚካኤል ቤተክርስቲያን ውስጥ ስላለሁ ነው። ወይ ጊዜ።

የዛሬን አያድርገውና…የዛሬን አያድርገውና …

    እኔም በዕለተ ሐሙስ የተሰራው የምስጢረ ቁርባን ስርዓት ተሳታፊ ነበርኩኝ። ነጣ ያለ ሱሪዬን አጣጥቤ፡ ነጠላዬን አጣፍቼ  “ስጋዬንም የበላ ደሜንም የጠጣ የዘለዓለም ሕይወት አለው” የሚለውን ዝማሬ በለሆሳስ እያልኩ ወደ ቤተ ክርስቲያን የማቅናት ልምድ ነበረኝ።

   አሑን አሑን ግን እንኳን ለስጋና ለደሙ ነጠላ እንኳን ለመልበስ እፈራለሁ። አንዳንድ ጊዜ አስባለሁ ፡ እኔንጃ ነውሬ የነጠላውን ነጭ ቀለም  የሚያመነችክ ይመስለኝ ይሆን፡ እንጃ ብቻ።

   ለምን ከስጋ ወደሙ ራቅክ? ለምን ንስሐ አትገባም? የዘለዓለም ሕይወትን ማግኘት አትፈልግም? ብለህ ብትጠይቀኝ ስጋ ወደሙ ለወጣቶች አልተፈቀደም የሚል ምላሽ አልሰጥህም። እንደውም በብዙ ለታመምን እኛ በብዙ የሚያድነው የመድኃኒታችን የኢየሱስ ክርስቶስ ስጋና ደም ምን ያህል እንደሚያስፈልገን በብዙ ማስረጃ ላስረዳህ እችላለሁ።

     ታድያ ለምን ንስሐ የማልገባ ይመስልሃል? ይቅር ባይ መሆኑን አውቃለሁ። እንደ እርሱ አይነት መሐሪ ማን አለ? እኔም ሰው ተብዬ ደጁን ለመርገጥ ከመብቃቴ የበለጠ ለእርሱ መሐሪነት ማስረጃ የሚሆን ምን አለ?  የይሁዳ ትልቁ ኃጢያት የዓለምን መድኃኒት በሠላሳ ዲናር ከመሸጡ የበለጠ አምላኩ ይቅር አይለኝም ብሎ ራሱን ማጥፋቱ እንደሆነስ መች ጠፍቶኝ።

   የዘለዓለም ሕይወትን እንደሚያሰጥም አውቃለሁ። አምላኬ አማኑኤል የተናገረውን ቃል መቼ አጥፎ ያውቃል? “ስጋዬንም የበላ ደሜንም የጠጣ፡ የዘለዓለም ሕይወት አለው”ብሎ የተናገረውንስ እንዴት አላምንም። ለማስረዳት ጠይቁ ብሎ ጠይቄ ያገኘሁትን ወይስ ከልለኝ ብዬው የሰወረኝን ልዘርዝር?

ታዲያ ለምን አልቆርብም? ስንፍና፡ ትዕቢት፡ መሞትን መርሳት ፡ በድጋሚ እንጃ ብቻ።

አላውቅም።

   ተጠየቅ –  አምላክህ በመስቀል ተሰቅሎ በፍቅር አይኑ እያየ ስጋዬን ብሉና የዘለዓለም ሕይወትን አግኙ ሲል ፡ ከእርሱ መሸሽ ምን ይባላል? በትሕትና የሐዋርያቱን እግር ያጠበው አምላክ ንስሐ ብንገባ ከክፉ ስራችን ሁሉ ሊያነጻን፡ ሊያጥበን  እንደ ማርያም እንተ ዕፍረት በደላችንን ሊረሳ ፡ አስበኝ እንዳለው ፊያታዊው ዘየማን ከእርሱ ጋር በገነት ሊያኖረን የሚወድድን አምላክ ስለምን ይሆን የምሸሸው ? የእናንተን አላውቅም።  እኔ ግን ምን ሆኛለሁ? እስከመቼስ እንደዚህ እቀጥላለሁ?  ራሴን እጠይቃለሁ?

ለምን… እስከ መቼ?

https://t.me/EMislene

ምክረ ረሲአን

በአንድ አጀንዳ ዙሪያ መመካከር የተለመደ ነው። ሰዎች በአንድ ግለሰብ ብቻ መወሰን በማይችሉ ጉዳዮች ላይ ይመለከታቸዋል ከሚሏቸው ሰዎች ጋር ይወያያሉ፣ ይወስናሉ። እነዚህ መሰባሰቦች ጉባኤ፣ ሸንጎ፣ ምክር ተብለው ይጠራሉ። በመዝሙረኛው ዳዊትም በሕብረት መቀመጥ ተብሎ ተጠርቷል።


ከአንድ ብርቱ ሁለት መድኃኒቱ ነውና ምንም እንኳን በጉባኤ ተሰባስቦ መነጋገር ጠቃሚና ዘመን የጠገበ መጽሐፍ ቅዱሳዊ ልማድ ቢሆንም ጉባኤዎች ሁሉ ንጹሐንና ጠቃሚዎች አለመሆናቸውን መጽሐፍ ቅዱስና የቤተክርስቲያን ታሪክ ይነግረናል።

የምክር ምልከታችንን ንጹሑን ዮሴፍን ለማጥፋት በመከረው የአስራ አንዱ ወንድሞች ታሪክ እንጀምር። የዘፍጥረት ጸሐፊው ሙሴ በ37ኛው የመጽሐፉ ምዕራፍ ስለዛች ምክር እንዲህ ብሎ ይጀምራል “እነርሱም በሩቅ ሳለ አዩት፥ ወደ እነርሱም ገና ሳይቀርብ ይገድሉት ዘንድ በእርሱ ላይ ተማከሩ።”— ዘፍጥረት 37፥18 ለምክራቸው መነሻ የሆነው ዮሴፍ ያየው ህልም ነበር። ህልሙ የፈጠረባቸውን ቅናት መቆጣጠር ስላልቻሉ
በምክራቸው ላይ አንደኛው ወንድሙ እንግደለው ብሎ ሲነሳ ሌላኛው አይ በሕይወት ጉድጓድ ውስጥ እንጣለው ሲል እናደምጣለን። የጉባኤው ሀሳብም የመጨረሻ ውጤት የዮሴፍ መሸጥና የያዕቆብ እንባ ነበር።

የዚሁ ምክር ተመሳሳዩን በሐዲስ ኪዳንም እናገኛለን። መድኅን ዓለም ኢየሱስ ክርስቶስ አልአዛርን ከሞት ካስነሳው በኋላ የሰራቸውን ድንቆችና ተዓምራት የሰሙ አይሁድ ክርስቶስን ሊያስወግዱ ጉባኤ ሰሩ።

የብሉይ ኪዳኑ ምክረ ውሉደ ያዕቆብና የሐዲስ ኪዳኑ ምክረ አይሁድ መሐል የበዛ መመሳሰል እናያለን። በብሉይ ኪዳኑ ጉባኤ ዮሴፍ ላይ የተነሱበት ወገኖቹ ነበሩ። በሐዲስ ኪዳኑ ምክርም ላይ አይሁድ የተነሱት ለሙሴ ከወንድሞች መሐል እንዳንተ ያለን አስነሳለው ተብሎ በተነገረለት በኢየሱስ ክርስቶስ ላይ ነበር።

የብሉይ ኪዳኑ ምክር መነሻው ቅናት ነበር። እኛን ሊገዛና የበላያችን ሊሆን ይወዳል ብለው ነበር ለመግደል በኋላም ሀሳቡን አሻሽለው በባርነት ለመሸጥ የተስማሙት። የሐዲሱም ምክር ምንም እንኳን የሮማን የበላይነት ለማጽናትና የአይሁድን እምነትና ባህል ለመጠበቅ የሚል ሽፋን ቢኖረውም ትክክለኛው ምክንያቱ ግን ቅናት ነበር። ይሄም በጲላጦስ ዘንድ ጭምር የታወቀ እንደነበር ቅዱስ ማቴዎስ በወንጌሉ ያነሳዋል። “በቅንዓት አሳልፈው እንደ ሰጡት ያውቅ ነበርና።” ማቴዎስ 27፥18

የምክራቸው ሀሳብም ተመሳሳይ ነበር የተመቀኙትን ሰው እንዴት ማስወገድ እንዳለባቸው። በዮሴፍ ላይ የመከሩት ይገደል አይገደል በሚለው ሃሳብ ተከፋፍለው እንደነበረው ሁሉ በአይሁድም መካከል ይህ አይነት ክርክር እንደነበረና ሦስት ቀን እንደፈጀባቸው ዕለተ ረቡዕም የተስማሙበት ቀን መሆኑን የቤተክርስቲያን ሊቃውንት ያነሱታል። ኢየሱስን የመሸጥ ሀሳብ በይሁዳ የቀረበውም ልክ እንደ ዮሴፍ መሸጥ ዘግየት ብሎ ነበር። ዮሴፍ ከጉባኤ ውጪ ላሉ ነጋዴዎች ሲሸጥ ኢየሱስ ግን ከጉባኤው ውጭ ባለ ሰው ለጉባኤተኞች ለድርድር ቀረበ። የዮሴፍ መሸጥ ከወንድሞቹ ምክር በኋላ እንደ መጣ ሁሉ ይሁዳም የመጣው ጉባኤው ከተበተነ ከሰዓታት በኋላ ነበር። ከእንግዲህ ባሮች አይደላችሁም ወንድሞች እንጂ ተብሎ የተነገረለት ይሁዳ ወንድሙ ይሆን ዘንድ በትህትና ራሱን ዝቅ ያደረገውን ክርስቶስ ሊሸጠው ከአይሁድ ጉባኤ መልስ ተገኘ።

ከደቀመዛሙርቱ መካከል አሳልፎ የሚሰጣቸው ሰው ይኖራል ብለው ለማይገምቱት አይሁድ የይሁዳ መምጣት ያልተጠበቀ ሆኖላቸው ነበር። “ሁከት እንዳይፈጠር በበዓል አንያዘው” ማቴ 26:5 ብለው ያሉት በስውር አሳልፎ የሚሰጣቸው ደቀ መዝሙር እንዳለ ስላላወቁ ነበር። “ሲሰሙም ደስ አላቸው ብርም ይሰጡት ዘንድ ተስፋ ሰጡት” የሚለውም ቃል የይሁዳ መምጣት በአይሁድ ጉባኤ ያልተጠበቀ መሆኑን አመላካች ነበር።

የክፉዎች ምክር ግን በኢየሱስ ክርስቶስ ተላልፎ መሸጥ የሚያበቃ ብቻ አይደለም። “ባርያ ከጌታው አይበልጥም ብዬ የነገርኋችሁን ቃል አስቡ። እኔን አሳደውኝ እንደ ሆኑ እናንተን ደግሞ ያሳድዱአችኋል።” ዮሐ 15፥20 ብሎ እንደተናገረው በክርስቶስ ላይ የመከሩ ጠላቶች በሐዋርያቱና በአርድእቱም ላይ ለመነሳት ከመምከር ወደ ኋላ አላሉም። ሐዋ 4:17፣ ሐዋ 9:23

የክፉዎች ምክር በዘመነ ሰማዕታትም ብዙ ሰማዕታትን በመከራ ውስጥ ለእግዚአብሔር ምስክር እንዲሆኑ አድርጓቸዋል። ይሄ የአይሁድና የአህዛብ በክፉ የመዶለት ጠባይ ታዲያ በኋላ ዘመን በተነሱና የኢየሱስ ክርስቶስ ስምን በሚጠሩ ነገር ግን የእርሱን የማይመስል ወንጌል በሚሰብኩ መናፍቃንም ጭምር መታየት ጀመረ። ይህንንም ከታሪክ ሁሉ ጎልቶ በሚታየውና ቅዱስ አባት ዲዮስቆሮስን ስለእውነት በብቸኝነት ባቆመው የኬልቄዶን ጉባኤም ላይ እንመለከተዋለን። አስቀድመው የቅዱሱ አባት ዲዮስቆሮስ ወንድም የነበሩት ሊቃነ ጳጳሳት የክርስቶስን የተዋሕዶ ስግው ቃልነት በመሰከረ ወንድማቸው ላይ ተነሱበት። በሀሰት ጉባኤያቸው አውግዘው ለዩት። ነገር ግን በዚህ ቁጣቸው ያልበረደላቸው መለካውያኑ ግን በዲዮስቆሮስ ላይ እጃቸውን አነሱበት ጥርሱን አርግፈው ጽሕሙን ሲነጩት እንኳን ለቀናኢ እምነቱ ለእርጅና ክብሩ እንኳን አልተጨነቁም ነበር።

እኒህንና ሌሎች መሰል ምክሮችን ለታሪክ እንተወውና ፈጣሪ አለማት ክርስቶስን ለማስወገድ ወደተመከረባት ወደዚህች ቀን እንመለስ። ይህች ቀን የክርስቶስን መሲሕነት የተገለጠባት ስለመሆኑ በዮሐንስ ወንጌል ምዕራፍ 11 ከቁጥር 49-52 እንዲህ ያነሳልናል
“በዚያችም ዓመት የካህናት አለቃ የነበረው ስሙ ቀያፋ የተባለው ከእነርሱ አንዱ እንዲህ አላቸው “እናንተስ ምንም አታውቁም። ምንም አትመክሩም፤ ሕዝቡ ሁሉ ከሚጠፋ ስለ ህዝቡ አንድ ሰው ቢሞት ይሻለናል”

ይሄ ምንኛ የሚደንቅ ምስክርነት ነው? የጠላት ምስክርነት የታመነ ነው እንዲሉ ለመግደል ከተሰበሰበ ጉባኤ ያውም ከሊቀ ካህኑ ይሄንን መስማት እንደምን ያስደምም። ወንጌላዊው ዮሐንስ ስለዚህ ምስክርነት እንዲህ ይለናል


“…ይህንም ከልቡ የተነገረው አይደለም፤ ነገር ግን በዚያች ዓመት የካህናት አለቃ ነበርና ጌታችን ኢየሱስ ስለ ህዝቡ ሁሉ ቤዛ ሆኖ ይሞት ዘንድ ስላለው ይህን ትንቢት ተናገረ። ስለ ህዝቡ ብቻ አልነበረም የተበተኑትን የእግዚአብሔርንም ልጆች በአንድነት ይሰበስባቸው ዘንድ ነው እንጂ”

የመንፈስ ቅዱስን ስራ እዚህ ጋር እንመልከት ስምዖን ጴጥሮስ አንተ የህያው የእግዚአብሔር ልጅ ነህ ብሎ ያስመሰከረ መንፈስ ቅዱስ የካህናት አለቃው ቀያፋንም ልቡን አንቅቶ ፊቱን ፀፍቶ የእውነትን ቃል እንዲናገር አደረገው። ክርስቶስ ሊቀ ካህናት ሆኖ በመስቀል ላይ መስዋዕትነቱን እስኪፈጽም ድረስ ኦሪት አላለፈችም ነበርና በክፉ ተንኮል ሥራ ተጠምዶ በነበረው በቀያፋም አንደበት እግዚአብሔር ስለ ኢየሱስ ክርስቶስ ማዳን የትንቢት ቃልን አኖረ። ይሄም ዛሬም ያሉ ካህናት ምንም እንኳን ኃጥእ ቢሆኑ ክህነታቸው እስኪሻር ድረስ እግዚአብሔር በእነርሱ ውስጥ ያለውን ሥራውን የማያቋርጥ መሆኑን የሚያመላክት ነው።

“የምድር ነገሥታት ተነሡ፥ አለቆችም በእግዚአብሔርና በመሢሑ ላይ እንዲህ ሲሉ ተማከሩ። ማሰርያቸውን እንበጥስ፥ ገመዳቸውንም ከእኛ እንጣል። በሰማይ የሚኖር እርሱ ይሥቃል፥ ጌታም ይሣለቅባቸዋል።” መዝ 2:2-4

መድኃኒታችን ኢየሱስ ክርስቶስ ሰው ሁኖ መከራን ተቀበለ። በመከራውም አዳነን።

ባለሽቱዋ ማርያም- ማርያም እንተ ዕፍረት

የሕማማት ዕለተ ረቡዕ ከምክረ አይሁድ ባሻገር የእንባና የሽቱ ቀን ተብሎ ይጠራል። በዚህች ቀን ማርያም እንተ ዕፍረት የጌታችንን እግሮች በእንባዋ ማጠቧንና ሽቱ መቀባቷን እናስባለን።

ጌታችንና አምላካችን ኢየሱስ ክርስቶስ እንደተናገረው የመንግሥቱ ወንጌል በሚሰበክበት ቦታ ሁሉ ስሟ ስለሚታሰበው ቅድስት፡ ስለቀባችው ሽቱና ስለቀባችበት ሁኔታ እናንብብ።


ይህች ቅድስት ቀድሞ በዝሙት የኖረችበትን አስከፊ ሕይወት በመተው በቆራጥ ኅሊና ፍጹም ንስሓ ገብታ ገንዘቧን ሁሉ አውጥታ እጅግ ውድ የሆነውን ሽቱ ገዝታ ጌታችንን ስትቀባው ጌታችንም በፍጹም ንስሓዋ ተደስቶ ‹‹እውነት እላችኋለሁ ይህ ወንጌል በዓለም ሁሉ በማናቸውም ስፍራ በሚሰበክበት እርሷ ያደረገችው ደግሞ ለእርሷ መታሰቢያ እንዲሆን ይነገራል›› በማለት አስደናቂ ትእዛዙን የሰጠላት ቅድስት ናት፡፡ ማቴ 26፡6፡፡ ይህንን የጌታችንን ትእዛዝ ልብ ብለን ካየነው በውስጡ ብዙ ምሥጢራትን የያዘ ነው፡፡ በሐዲስ ኪዳን ስለ ቅዱሳን ለመጀመሪያ ጊዜ የሰበከው ራሱ መድኀኔዓለም ክርስቶስ መሆኑን በዚሁ ልብ ይሉታል፡፡


ማርያም እንተ ዕፍረት የቀድሞውን ሕይወቷን ስናየው ሁልጊዜ ከነጭ ሐር የተሠራ ልብስ የምትለብስ፣ ከሽቱ ሁሉ ይልቅ የሚበልጥ ውድ ሽቱን ትቀባ ነበር፡፡ በወርቅም ታጌጥና በክፉ ሥራ ሁሉ ጸንታ የምትኖር ሴት ነበረች፡፡ ጠላት ዲያብሎስም የዚህን ዓለም ጣዕም አጣፈጠላት፡፡ ነገር ግን ስለዚህች ሴትና ስለ ኃጥአን ሁሉ ጌታችን ከጌትነቱ ከፍታ ሳይለወጥ ከልዑል ዙፋኑ ወረደ፡፡ በሰዎች መካከልም ከእነርሱ እንደ አንዱ እየተመላለሰ አስተማረ፡፡


አንድ ቀን እንደልማዷ ማርያም እንተ ዕፍረት ነጭ ሐር ለብሳ፣ አጊጣና ተኳኩላ ፊቷን በመስታወት አይታ ውድ ሽቱ ተቀባች፡፡ ጉንጮቿ ቀያዮች፣ ዐይኖቿ የተዋቡ ሆነው ደም ግባቷ በጣም አማራት፡፡ እንደዚህ እየተመለከተች አንድ ሰዓት ያህል ቆየች፡፡ ከዚህ በኋላ መልካም አሳብ በእርሷ ላይ አድሮ እንዲህ አለች፡- ‹‹ይህን ሁሉ ታስወግድ ዘንድ መልኬንም ትለውጥ ዘንድ ሞት ትመጣ የለምን? ይህ መልካም ሽታ ወደ ትልነትና ወደ መሽተት ይለወጣል፡፡ ይህስ ብርታት ፍጻሜው ጉስቁልናና ድካም አይለምን? ሊቀርቡኝ የሚወዱትስ የሚርቁኝ አይደሉምን? እንደዚህስ ከሆነ ዘለዓለም ከጥፋትና ከኩነኔ በቀር እንግዲህ ምን አገኛለሁ? የዚህን ዓለም ገንዘብ ብገዛ፣ ብነዳ ከድካም በዐይኖቼም ዕንባን ከማፍሰስ የሚያድነኝ ይኖራልን? ወይስ ይህ ሁሉ ከሞት ያድነኝ ዘንድ ይችላልን? ነፍሴ ሆይ! እንግዲህ ሁሉን ለሚገዛ ጌታ ምን ትመልሻለሽ? ከእውነተኛው ፈራጅ ዘንድ በአንቺ ላይ ትእዛዝ በመጣ ጊዜ እንዴት ትሆኛለሽ? ነፍሴ ሆይ! ንስሐ በሌለበት፣ ነፍስ የተናቀች በምትሆንበት ጩኸት፣ ልቅሶና ጩኸት ባለበት ቦታ የሚረዳሽ ማነው? ነጭ ሐርና ኅብሩ ልዩ ልዩ የሆነ ልብስ በመልበስ ደስ የምትሰኝ ሥጋዬ ሆይ በክብር ባለቤት በእግዚአብሔርና በመላእክቱ ፊት ራቁትሽን በቆምሽ ጊዜ እንዴት ትሆኛለሽ? ነፍሴ ሆይ! በዚህ ዓለም የተደሰችው ምን ይጠቅምሻል?…›› እያለች ራሷን መመርመር ጀመረች፡፡


ከዚህ በኋላ በማመን ጸንታ እንዲህ ብላ አሰበች፡- ‹‹ስለ ኃጥአን ወደዚህ ዓለም የመጣ ስለ እነርሱ በመካከላቸው እንደሰው የተመላለሰ ይህ አይደለምን? የኃጢአተኛን መመለሱን ነው እንጂ ሞቱን አልሻም ያለውስ እርሱ አይደለምን? ነፍሴ ሆይ ምሕረትስ ቅርብ ናት፣ ባለመድኃኒትም የራቀ አይደለም፣ ሌላ መድኃኒትሽን ተስፋ የምታደርጊበትስ አለን? መቶ በግ ያለው ከእነርሱም አንዲቱ ቢጠፋ ዘጠና ዘጠኙን በበረሃ ትቶ የጠፋውን እስኪያገኝ ድረስ ሊፈልጋት የሚሄድ አይደለምን? ባገኛትም ጊዜ ደስ ብሎት በጫንቃው ይሸከማታል፣ ካልጠፉት ከዘጠና ዘጠኙ ይልቅ በእርሷ ደስ የሚሰኝ አይደለምን? እናንት ደካሞች ሸክማችሁ የከበዳችሁ ሁሉ ወደ እኔ ኑ እኔም አሳርፋችኋለሁ የሚል እርሱ መድኃኒት ክርስቶስ ነው፡፡ እንደዚህ ከሆነ ለምን እሰንፋለሁ? ለምንስ ንስሓ አልሻም? እነሆ ከዛሬ ጀምሮ ወደ እርሱ ሄጄ ራሴን በፊቱ እክዳለሁ›› ብላ ካሰበች በኋላ ተጽናናችና በፍጥነት ተነስታ ገንዘቧን፣ የገዛችውን ወርቋንና ብሯን ሁሉ ሰበሰበች፡፡

‹‹ምን አደርጋለሁ ይህን ገንዘብ ወስጄ ብሰጠው አይቀበልም እርሱ ፈጣሪ፣ ጌታና የዓለም መድኃኒት ነውና›› ብላ አሰበች፡፡


ከዚህ በኋላ ሽቱ ወደሚሸጥ ሰው ፍለጋ ሄደች፣ ያን ሰው ከጥንት ጀምሮ ታውቀው ነበርና ከእርሱ ዘንድ ዋጋው እጅግ ውድ የሆነ ሽቱን ገዛችና በደስታ ስትሄድ እነሆ ሰይጣን በወርቅ ያጌጠች ሴት መስሎ ወደ እርሷ መጣ፡፡ የዚህን ዓለም ምኞት እያጣፈጠ ይነግራት ጀመር፡፡ መብላትን፣ መጠጣትን፣ ያማረ ልብስ መልበስን፣ ሽቱ መቀባትን… ይህን ሁሉ ያሳስባት ጀመር፡፡ ጌታችንም በይቅርታው ብዛት የጠላት ዲያብሎስን ክፋት ገለጠላትና ‹‹ለበደልና ለኃጢአት ሥራ የተዘጋጀሁ አድርገኸኛልና ኃፍረትና ጉስቁልናንም በእኔ ላይ አምጥተሃልና አንተ ሰይጣን ከእኔ ወግድ›› ብላ በቁርጥ ነገር መለሰችለት፡፡ ጠላት ዲያብሎስም የሃይማኖቷን ጽናት ባየ ጊዜ ከእርሷ ሽሽቶ ፈሪሳዊ ወደሚሆን ስምዖን ወደሚባል ሰው ዘንድ ሄዶ ልቡናውን ያውከው ጀመር፡፡ እርሱም ጌታን በቤቱ ማዕድ ይመገብ ዘንድ ጋብዞት ነበርና፡፡በልቡናው ያደረው ክፉ ሰይጣንም እንዲህ እንዲል አደረገው፡- ‹‹ይህስ ነቢይ ቢሆን ይህች የምትዳስሰው ሴት ማን እንደሆነች እንዴትስ እንደነበረች ኃጢአተኛ እንደነበረች አያውቅም ነበር? ብሎ እንዲያስብ አድረገው፡፡››


“ከንቱ ነገርን ስትመለከቱ የኖራችሁ ዐይኖቼ ሆይ! ጌታን ታዩ ዘንድ ተሰጣችሁ፤ ርኩስን የምትዳስሱ እጆቼ ሆይ! የሰማያዊ ጌታን እግር ትዳስሱ ዘንድ ሰጣችሁ፤ ኃጢአተኛ ነፍሴ ሆይ! እነሆ ፈጽሞ ከፍ ያለ ባለሟልነትን አገኘሽ፤ ስላደረገልኝ ምን እከፍለዋለሁ› እያለች ታላቅ ልቅሶን አለቀሰች፡፡ የጌታንም እግር ይዛ በእንባዋ እያራሰች በፀጉሯ ታብስ ጀመር፡፡ አስቀድማ በልቧ እንዲህ ብላ አስባለችና ‹በጌታ ፊት ባለሟልነትንስ ካገኘሁ ወደ እርሱ ዘንድ እንድቀርብ ያደርገኛል፡፡ በሥራዬም ክፋት ካበረረኝ ግን ዳግመኛ አልድንም› ብላ አስባ ነበር፡፡ ከጌታም ባለሟልነትን ባገኘች ጊዜ ጨክና በራሱ ላይ ሽቱውን ጨመረች፡፡ ከዚህ ሁሉ ጋርም ልቅሶንና ልመናን አላቋረጠችም፡፡ የእግዚአብሔር ስጦታ በእርሷ ላይ እንደበዛ ባየ ጊዜ ጠላት ዲያብሎስ በእርሷ ላይ ታላቅ መቅናትን ቀናባት፡፡ ተቆጥቶም ወደ ስምዖን ተመልሶ ልቡን አወከው፡፡ ‹ይህስ ነቢይ ቢሆን ኖሮ ይህቺ የምትዳስሰው ሴት ኃጢአተኛ እንደሆነች ያውቅ ነበር› እንዲል አደረገው፡፡

  ጌታችንም ስምዖንን ሁሉ ከእርሱ እንዳልተደበቀና ሀሳቡንም እንዳወቀበት እንዲረዳና እግዚአብሔርም በደለኞችን ማዳንና ከኃጢአታቸው ማንጻት እንደሚችል ያውቅ ዘንድ እንዲያስተውል አደረገው፡፡›› ሉቃ 7፡36-50፡፡

ይህ እጅግ ውድ ዋጋ ያለው የማርያም እንተ ዕፍረት ሽቱ መነሻ መገኛው ራሱ ጌታችን ነው፡፡ ይኸውም ነገሩ እንዲህ ነው፡- ‹‹ርጉም በሆነ በሄሮድስ ዘመን አረጋዊ ዮሴፍ ሕፃኑንና እመቤታችንን ይዞ ወደ ምድረ ግብፅ ሲሄዱ በመንገድ ላይ አንድ ፈረሰኛ ሰው አገኛቸውና ከእነርሱም ጋር ይሄድ ጀመር፡፡ እመቤታችን ድንግል ማርያምን በመንገድ እንደደከመች ባየ ጊዜ ሕፃኑን አንሥቶ ፈረሱ ላይ አውጥቶ በጭኑ ታቀፈው፡፡ ያንጊዜም በፈረሱ ላይ የመልካም ሽቱ መዓዛ ይሸት ነበር፡፡ ወዙም ሲንጠፈጠፍ ባየው ጊዜ መልካም ሽታም እንዳለው ባየ ጊዜ ሻሹን ከራሱ ላይ አውልቆ የሕፃኑን ወዝ ጠረገለትና ቆይቶ ሕፃኑን ለእናቱ ሰጥቷት በጐዳናው ሄደ፡፡ ቤቱም በደረሰ ጊዜ ልብሱን ታጥበው ዘንድ ለእናቱ ሰጣት፣ እርሷም በሻሹ ላይ ያለውን መልካም ሽታ ካየች በኋላ በማጠቢያ ባስቀመጠችው ጊዜ ከሻሹ ውስጥ ሽታው እጅግ የሚያስደስት መልካም ዘይት ወጣ፡፡

እርሷም ደስ ተሰኝታ ከቅባቷ ጋር በማሰሮ አድርጋ አስቀመጠችው፡፡ ያም ዘይት ባለበት በዚያች መንገድ የሚሄዱ ሰዎች ሁሉ የሽቶውን መዓዛ ያደንቁ ነበርና ስለዚህ ያች ሴት ከአገረ ገዥው ጋር እንዳያካስሷት ፈርታ በብዙ ገንዘብ ሽቱ ከሚገዙ ነጋዴዎች ለአንዱ ሸጠችለት፣ እርሱ ግን ምን እንደሆነ አያውቅም ነበር፡፡ ያም ዘይት ብፅዕት ማርያም እንተ ዕፍረት እስክትመጣ ድረስ ለብዙ ዘመን በእርሱ ዘንድ በዚያ ኖረ፡፡ ማርያም እንተ ዕፍረትም ከእርሱ እጅግ ውድ በሆነ ዋጋ ገዝታ በጌታችን ሥጋ ላይ አፈሰሰችው፡፡ እነሆም ይህ ዋጋው እጅግ ውድ የሆነው ሽቱ ከጌታችን ዘንድ እንደተገኘ የታወቀ ሆነ፡፡ ያም በፈረስ ላይ ተቀምጦ ጌታችንን በሕፃንንቱ በጭኑ አቅፎ የያዘው ፈረሰኛ ሰው ጌታችን በቀራንዮ አደባባይ በእንጨት መስቀል ላይ ተሰቅሎ ሳለ ያመነበት ፊያታዊ ዘየማን (ጥጦስ) ነው፡፡››


ማርያም እንተ ዕፍረት ጌታችን ቃልኪዳን ከገባላት በኋላ ዐርፋለች፡፡ የንግሥ በዓላቶቿ መጋቢት 21 ቀን የጌታችንን እግር ሽቱ የቀባችበት ሲሆን የካቲት 6 ቀን ደግሞ ያረፈችበት ዕለት ነው፡፡ ጥቅምት 1 ዓመታዊ መታሰቢያ በዓሏ እንዲሆን አባቶቻችን ሕግ ሠሩልን፡፡ የማርያም እንተ እፍረትን ገድሏንና ድርሳኗን የጻፈላት ታላቁ የቤተክርስቲያናችን ሊቅ ቅዱስ ዮሐንስ አፈወርቅ ነው፡፡
የቅድስት ማርያም እንተ ዕፍረትን ረድኤት በረከቷን ያሳድርብን፣ በጸሎቷም ይማረን።

( ገድለ ቅድስት ማርያም እንተ ዕፍረት፣ የጥቅምትና የካቲት ስንክሳር)

የግብረ ሕማማትን መጽሐፍ ምን ያህል ታውቁታላችሁ?

በቤተክርስቲያን የጸሎት ሕይወት ውስጥ ታላቅ ቦታ ካላቸው ቅዱሳት መጻሕፍት አንዱ ‹መጽሐፈ ግብረ ሕማማት› ነው፡፡ ሊቃውንቱ ‹ግብር› የሚለውን ‹አገልግሎት› ብለው ይተረጉሙትና ‹ግብረ ሕማማት› ማለት ‹በሕማማት ወቅት የሚፈጸም አገልግሎት› ማለት ነው ይላሉ፡፡ ነቢዩ ኢሳይያስ ‹እርሱ ሕመማችንን ተሸከመ› (ኢሳ 53÷4) በማለት የገለጠው ኃይለ ቃል ለሰሙኑም ሆነ ለመጽሐፉ ስያሜ መነሻ መሆኑንን ሊቃውንቱ ይገልጣሉ፡፡ ሐዋርያትም በሥርዓት መጽሐፋቸው ‹ወአንት ሙሰ ተዐቀቡ ወግበሩ ተዝካረ ሕማማቲሁ – እናንተ ግን ተጠበቁ፣ የሕማማቱንም መታሰቢያ አድርጉ› ብለው ደንግገዋል (ግብረ ሕማማት፣ 1996፣9) ፡፡ ቅዱስ ዮሐንስ አፈወርቅም <ይትባረክ እግዚአብሔር ዘሰመየ ሕማማተ ወልዱ ክብረ ወስብሐተ – የልጁን ሕማማት ክብርና ምስጋና ብሎ የጠራ እግዚአብሔር ይመስገን› ብሎ ገልጦ ነበር፡፡

ግብረ ሕማማት ከበዓለ ሆሳዕና እስከ በዓለ ፋሲካ የሚከናወነውን ሥርዓት የያዘ ትልቅ መጽሐፍ ነው፡፡ የመጽሐፉ የተወሰነ ክፍልና ሥርዓቱ ከ8ኛው መቶ ክፍለ ዘመን ቀደም ብሎ ጀምሮ በግብጽ ቤተክርስቲያን ነበረ፡፡

ለመጀመርያ ጊዜ አሁን በምናየው መልኩ የሰሙነ ሕማማት ምንባባትን ያዘጋጁት የገዳመ መቃርስ መነኮሳት መሆናቸውን ግብረ ሕማማት ይገልጥልናል፡፡ በእነዚህ የገዳመ መቃርስ አባቶች በመታገዝ የእስክንድርያው ፓትርያርክ አቡነ ገብርኤል 2ኛ (1131-1145) (የኛ ግብረ ሕማማት “ጸሐፊ የነበረው የታሪክ ልጅ አባታችን አባ ቅብርያል” ይለዋል፡፡ ኢብንቱርያክ የሚለውን ተርጉሞ ሳይሆን አይቀርም፡፡) የሰሙነ ሕማማት መጽሐፍ (ፓሻ) በእርሱ አስተባባሪነት ሊቃውንቱ ለየቀኑ እና ለየሰዓቱ የሚሆኑትን ምንባባት ከብሉይ እና ከሐዲስ እያውጣጡ አዘጋጇቸው፡፡

ፓትርያርክ ገብርኤል አያሌ የመጽሐፍ ቅዱስና የሊቃውንት ትርጓሜ ዕውቀት ያላቸው ሊቃውንት በማሰባሰብ ለየሰዓቱና ለየኩነቱ የሚነበበውን ሥርዓትና ንባብ አዘጋጁ፡፡ ወደ ኢትዮጵያ የመጣው በሰላማ መተርጉም ጊዜ መሆኑን ኢትዮጵያውያን ሊቃውንት ይናገራሉ፡፡ ከጎንደር መድኃኔዓለም ተወስዶ በብሪቲሽ ሙዝየም በሚገኘው ግብረ ሕማማት ላይ ከአባ ሕርያቆስ ድርሳን መጨረሻ ላይ <<ዘንተ መጽሐፈ ዘተርጎመ ብፁዕ ወርቱዕ ሃይማኖት አቡነ አባ ሰላማ ይጽሕፍ ስሞ እግዚአብሔር ውስተ መጽሐፈ ሕይወት› ይላል፡፡

ከተወሰኑ ዓመታት በኋላ ደግሞ የብሕንሳው ጳጳስ አቡነ ቡትሮስ ምንባባቱን ለየሰዓታቱ በተመጣጣኝ ሁኔታ በማካፈል ሁሉም ቀናት ተመጣኝ የሆኑ ሁሉም ዓይነት ምንባባት እንዲኖሯቸው አድርገዋል፡፡ ግብረ ሕማማታችንም «ከኦሪት እና ከነቢያት፣ ከነዌ ልጅ ከኢያሱ፣ ከንጉሥ ሰሎሞን መጽሐፍ ወስዶ ሁላቸው ትክክል እስከ ሆኑ ድረስ በየሰዓቱ ሁሉ የሚገባውን አደረገ፡፡ አባቶች ከተናገሩት ሁለት ሁለት ተግሣፅ እና ምክር አንዱ በነግህ አንዱም በማታ እንዲነበብ አደረገ» ይላል፡፡

ፕሮፌሰር ጌታቸው ኃይሌ እንደሚሉት ከሆነ ግብረ ሕማማትን አሁን ባለው መልክ ያዘጋጁት ኢትዮጵያውያን ሊቃውንት ናቸው፡፡ እስከ 14ኛው መክዘ የኢትዮጵያ ቤተክርስቲያን ለሰሙነ ሕማማት የሚሆኑ የጸሎት ሥርዓት ሳይኖሯት ቆየች ማለት አስቸጋሪ ነው፡፡ አቡነ ሰላማ መተርጉም የተወሰነውን የመጽሐፈ ግብረ ሕማማት ድርሳናት በመተርጎም ቀድሞ በነበረው የሰሙነ ሕማማት የጸሎት ሥርዓት ውስጥ መጨመራቸውን ይገልጣሉ ። አሁን ባሉን የግብረ ሕማማት ቅጅዎች የአቡነ ሰላማን ስም የሚያነሣው ከሊቃውንቱ ድርሳናት መጨረሻ ላይ የሆነውም ለዚህ ሊሆን ይችላል፡፡ አቡነ ሰላማ መተርጉም ኢትዮጵያውያን ሊቃውንትን አሰባስበው የትርጉም ሥራ ይሠሩ የነበሩት በደቡብ ጎንደር ስማዳ በምትገኘው ደብረ ዕንቁ ማርያም ነበር፡፡ አቡነ ሰላማ የግብጹን ግብረ ሕማማት ይዘውት የመጡ ይመስላል፡፡ በደብረ ዕንቁ የነበሩ ሊቃውንት መጽሐፉን መነሻ በማድረግና ከቀደመው የቤተክርስቲያን ጸሎት ጋር በማስማት አሁን የምናውቀውን ግብረ ሕማማት አዘጋጅተውልናል፡፡

እስካሁን ባሉን መረጃዎች ረጅም እድሜ ያስቆጠሩት የግብረ ሕማማት ቅጅዎች በ15ኛው መክዘ የተጻፉት ናቸው፡፡ ከእነዚህም መካከል ሦስቱ በኢትዮጵያ ማይክሮ ፊልም ቤተ መጻሕፍት ውስጥ ይገኛሉ፡፡ (EMML 1765, 4434, 4752) EMML 1765 የሐይቅ እስጢፋኖስ ቅጅ ሲሆን በዚህ መጽሐፍ ላይ ልዩ ልዩ ድርሳናትን የተረጎሙት አባ ሰላማ መሆናቸውን ይገልጣል፡፡ EMML 4434 የእንዳ ፍሬ ማርያም (ሞረት) ሲሆን EMML 4752 ደግሞ ሰሜን ሸዋ የሚገኘው የሙሽ ዜና ማርቆስ ንብረት ነው፡፡

በግብረ ሕማማት ውስጥ ከጾመ ድጓና ምዕራፍ የተወሰዱ ጸሎቶች መኖራቸው ፤ በግብጹ መጽሐፍ ላይ የሌሉ ከተአምረ ማርያምና ከተአምረ ኢየሱስ የሚነበቡ ምንባባት መገኘታቸው ፤ እንዲሁም የቀረቡት የመጽሐፍ ቅዱስ ክፍሎች በቅርጽ ካልሆነ በቀር በብዛትና በዓይነት የተለዩ መሆናቸው ኢትዮጵያውያን ሊቃውንት የመጽሐፉን መነሻ ከግብጽ ወስደው ለኢትዮጵያ ቤተክርስቲያን እንዲሆን አድርገው ማዘጋጀታቸውን እንደሚያሳይ የሚገልጡ አሉ፡፡ ለብዙ ዘመናት ግብረ ሕማማት በግእዝ ብቻ የሚገኝ መጽሐፍ ነበር፡፡ በሊቀ መዘምራን ላዕከ ማርያም ወልደ ኢየሱስ (ዘአሰላ) ወደ አማርኛ ተተርጉሞ በትንሣኤ ማሳተሚያ ድርጅት ታትሟል፡፡

√ በግብረ ሕማማት ውስጥ ሦስት ነገሮች አሉ፡-

የመጀመሪያው ጸሎት ሲሆን ‹ዐማኑኤል አምላኪየ ለከ ኃይል ክብር ወስብሐት ወእዘዝ እስከ ለዓለም› እየተባለ የሚጸለየውና ካህናትና ምእመናን በየመካከሉ የሚደግሙት ዳዊት የዚሁ መገለጫ ነው፡፡ ኹለተኛው ደግሞ ስግደት ነው፡፡ በመጀመሪያው ሰዓት፣ በሦስት፣ በስድስት፣ በዘጠኝና በ11 ሰዓት ከጸሎት ጋር የሚደረግ ስግደት አለ፡፡ በዕለተ ዓርብ ደግሞ የ12 ሰዓት ጸሎትና ስግደት አለው፡፡ ከግብረ ሕማማት ትልቁን ቦታ የሚይዘው ሦስተኛው ክፍል ንባቡ ነው፡፡

በሰሙነ ሕማማት በመጽሐፈ ግብረ ሕማማት መሠረት የሚነበቡ ብዙ ምንባባት አሉ፡፡ እነዚህንም በአራት መድበን መመልከት እንችላለን፡፡

  1. መጽሐፍ ቅዱስ፡- በተለይም በዋናነት ከብሉይ ኪዳን ከኦሪት፣ ከጥበብ መጻሕፍት (ምሳሌ ፣ መኃልየ መኃልይ፣ ጥበበ ሰሎሞን፣ ሲራክ፣ ኢዮብ፣ ከመጽሐፈ ኢያሱ፣ ከመጽሐፈ ሩትና ከሌሎችም የሚቀርቡ ከሰሞኑ ጋር የሚሄዱ ምንባባት አሉ፡፡
  2. ትርጓሜ፡- የልዩ ልዩ የመጽሐፍ ቅዱስ ክፍሎች ትርጓሜ ይነበባል፡፡ በተለይ ደግሞ የቅዱስ ዮሐንስ አፈወርቅ የዕብራውያን ትርጓሜ ትልቅ ቦታ አለው፡፡ ከእርሱም ጋር የኤጲፋንዮስ፣ የአትናቴዎስ፣ የቄርሎስና የያዕቆብ ዘሥሩግ ትርጓሜያት ይሰማሉ፡፡
  3. ምዕዳን፡- በግብረ ሕማማት የክርስቲያንን ልዩ እሴቶች የሚመለከቱ ምክሮች ይቀርባሉ፡፡ ስለ ፍቅር፣ ይቅርታ፣ ወገንን መርዳት የተመለከቱ ምንባባት አሉ፡፡
  4. መጻሕፍተ ሊቃውንት፡- በሊቃውንተ ቤተክርስቲያን ከተዘጋጁና እምብዛም ከማናገኛቸው ድርሳናት መካከል በግብረ ሕማማት ውስጥ የምንሰማቸው አሉ፡፡ መጽሐፈ ዶርሖ፣ ላሃ ማርያም ለዚህ ማሳያ ናቸው፡፡ ከተለመዱት ምንባባት ደግሞ ስንክሳር ፣ተአምረ ኢየሱስና ተአምረ ማርያም ይጠቀሳሉ፡፡

በተለይ በአሁኑ ጊዜ መጽሐፉ በአማርኛ የሚነበብ በመሆኑ ምእመናን ሁላችን በማስተዋል ብናዳምጥ በሌላ ጊዜ የማናገኛቸውን የቤተክርስቲያን ታሪኮች ፣ ምሥጢራትና ምንባባትን የምናዳምጥበት ዕድል ይሆናል፡

በቀሲስ ኢዩኤል ሰለሞን።